Kuduyuŋ weyi papɩzaa nɛ pama pʋcɔ nɛ kʋdɔŋ sɔsɔʋ paɣzɩɣ yɔ

Paa pɩnaɣ ŋga lɛ, ɛyaa kudokiŋ mɩnɩŋ sakɩyɛ haɣ pa-tɩ nɛ pamɩyɩsɩɣ-wɛ lɩm, nɛ pʋyɔɔ lɛ, pɩpɔzʋʋ se pama teokrasɩ kuduyuŋ kɩfaŋ. Lɩmaɣzɩyɛ nɖɩ, ɖɩ-yɔɔ ɛjaɖɛ kpeekpe yɔɔ ɛgbɛyɛ pilinzi taa tʋmɩyɛ nɖɩ ɖɩcɔŋnɩ kuduyuŋ maʋ, ɩ-ñɔɔzʋʋ nɛ ɩ-yɔɔ kandɩyɩɣ yɔɔ yɔ, ɖɩlabɩ ɖʋtʋ se pama yaa pɔñɔɔzɩ Ɛsɔ sɛtʋ lona 2 700, teokrasɩ pɩnaɣ 2020 taa.a

Ɛlɛ COVID-19 kʋdɔŋ sɔsɔʋ yeba nɛ ɖʋtʋ ndʋ tɩtɩɖɔ camɩyɛ. Pɩsa nɛ pakandɩyɩ ɖo-koobiya halaa nɛ abalaa yɔɔ nɛ paña ɖɔɖɔ komina paɣtʋ lɛ, Nɔɔɖɛyaa Ɛgbɛyɛ tɛ Takayɩsɩ Labʋ Kɔɔmiite kpaɣ lɩmaɣza se pasɩnzɩ Ɛsɔ sɛtʋ lona sakɩyɛ maʋ ɛjaɖɛ kpeekpe yɔɔ. Paa mbʋ yɔ, teokrasɩ pɩnaɣ 2020 taa, papɩzaa nɛ pama nɛ pɔñɔɔzɩ ɖɔɖɔ Ɛsɔ sɛtʋ lona 1 700 pʋcɔ nɛ kʋdɔŋ sɔsɔʋ kʋnɛ kɩpaɣzɩ. Pɩtasɩ lɛ, pama ɛgbɛyɛ pilinzi nzɩ sɩcɛzɩ 100 yɔɔ yɔ. Iyele nɛ ɖɩyɔɔdɩ teokrasɩ kuduyuŋ weyi pamawa yɔ, ɩ-taa naalɛ tɔm nɛ ɖɩna ɛzɩma pɩwazɩ koobiya yɔ.

Kameruni ɛgbɛyɛ piliŋa. Betɛɛlɩ kɩbɩnʋʋ kaawɛ Douala. Ɛlɛ kɩtaapaɣlɩ nɛ pɩɩpɔzaa ɖɔɖɔ se pala tʋma sakɩyɛ nɛ paɖaɣnɩ-kʋ ñɔɔzʋʋ. Takayɩsɩ Labʋ Kɔɔmiite kaakpaɣ lɩmaɣza se paɖaɣnɩ-kʋ ñɔɔzʋʋ. Ɛlɛ palabɩ akɔnta lɛ, pana se liidiye nɖɩ pɩpɔzʋʋ se pɔñɔɔzɩnɩ-kʋ yɔ, ɖɩcɛzɩ nɖɩ pamanɩ-kʋ yɔ. Pɩtasɩnɩ Betɛɛlɩ ñɔɔzʋʋ lɛ, paawɛɛ nɛ pamaɣzɩɣ ɖɔɖɔ se pana se, papɩzɩɣ nɛ paya tɛtʋ nɛ pama Betɛɛlɩ kɩfalʋʋ, yaa papɩzɩɣ nɛ paya lone nɖɩ ɖɩ-taa pɛtɛm maʋ kuduyuŋ nɩɩyɩ yɔ nɛ paɖaɣnɩ-ɩ ñɔɔzʋʋ. Ɛlɛ patɩpɩzɩ nɛ pakpaɣ lɩmaɣzɩyɛ naɖɩyɛ.

Koobiya kɔma nɛ panɩɩ se komina labɩ ɖʋtʋ se kɩɖʋʋ habɩyɛ sɔsɔɖɛ naɖɩyɛ Douala hayo kiŋ, nɛ habɩyɛ nɖɩ ɖɩkaɣ tɩŋnʋʋ Kigbeɣluu Kpaaŋ nakʋyʋ ɛsɩndaa. Ye mbʋ habɩyɛ nɖɩ ɖɩkaɣ yebu se pɩwɛɛ kɛlɛʋ ɛyaa se powolo Kigbeɣluu Kpaaŋ ŋgʋ kɩ-taa. Pɩlabɩ nɔɔ kʋɖʋmaɣ ɖeyi ɖeyi nɛ mbʋ ɛgbɛyɛ piliŋa taa koobiya ñɩnaɣ yɔ. Pʋyɔɔ Nɔɔɖɛyaa Ɛgbɛyɛ ha nʋmɔʋ se pama Betɛɛlɩ kɩfalʋʋ Kigbeɣluu Kpaaŋ ŋgʋ, kɩ-tɛtʋ hɔɔlʋʋ nakʋyʋ yɔɔ.

Yehowa Aseɣɖe Tɩnaa nɛ kuduyuŋ mayaa lalaa pɛkpɛndɩna nɛ pala tʋmɩyɛ nɖɩ peeɖe. Piyeba nɛ tʋmɩyɛ nɖɩ tɩtɩkɩlɩ kpaɣʋ alɩwaatʋ sakɩyɛ. Piyeba ɖɔɖɔ nɛ pɔtɔsɩ liidiye sakɩyɛ. Toovenim taa lɛ, liidiye nɖɩ palabɩnɩ tʋmɩyɛ nɖɩ yɔ, ɖɩtɩtalɩ liidiye nɖɩ paaɖʋwa yɔ. Pɔtɔsɩ liidiye ɛzɩ 1 097 882 000 F CFA mbʋ yɔ. Betɛɛlɩ koobiya wobi Betɛɛlɩ kɩfalʋʋ ŋgʋ kɩ-taa nɛ pitileɖi lɛ, COVID-19 kʋdɔŋ paɣzɩ ɖoŋ kpaʋ.

Lɛɛlɛɛyɔ wɛtʋ ndʋ tɩ-taa Kameruni Betɛɛlɩ koobiya wɛɛ yɔ, tɩwɛ ɖeu siŋŋ nɛ pɩsɩɣnɩ-wɛ nɛ palakɩ tʋmɩyɛ camɩyɛ. Pʋyɔɔ pamaɣzɩɣ se Betɛɛlɩ kɩfalʋʋ ŋgʋ kɩkɛ kʋjɔʋ kɩbaŋʋ siŋŋ ŋgʋ Yehowa labɩ-wɛ yɔ. Nesi ɖɔkɩyaa nabɛyɛ yɔɔdaa se: “Ðɩsɔɔlaa se ɖɩla tʋmɩyɛ nɛ kpekpeka nɛ ɖɩwɩlɩ se ɖa-taa wɛ leleŋ nɛ kʋjɔʋ kɩbaŋʋ kʋnɛ.”

Tojolabal Tɔm ɖɛzʋʋ ɖɩɣa (RTO), Mɛkɩsiiki. Pɩnzɩ sakɩyɛ nzɩ sɩɖɛwa yɔ sɩ-taa, Tojolabal tɔm ɖɛzɩyaa lakaɣ tʋmɩyɛ Ameriki hɛkʋ taa ɛgbɛyɛ piliŋa taa. Nɛ ɛgbɛyɛ piliŋa ŋga kɔñɔtɩnɩ Mɛkɩsiiki tɛtʋ kpam. Ɛlɛ Altamirano nɛ Las Margaritas tɛtʋ taa pakɩlɩɣ yɔɔdʋʋ Tojolabal kʋnʋŋ nɛ tɛtʋ ndʋ tɩ-naalɛ, tiposini ɛgbɛyɛ piliŋa ɛzɩ kilomɛtanaa 1 000 mbʋ yɔ. Pʋyɔɔ lɛ, pɩɩwɛ kaɖɛ tɔm ɖɛzɩyaa se patɩlɩ ɛzɩma pɔyɔɔdʋʋ pa-kʋnʋŋ lɛɛlɛɛyɔ yɔ. Pɩtasɩ lɛ, koobiya mba papɩzɩɣ nɛ pɛɖɛzɩ Tojolabal kʋnʋŋ yaa pakpaɣ pɔ-nɔsɩ tatasɩ yɔɔ kʋnʋŋ ŋgʋ kɩ-taa yɔ, patɩɖɔɔ ɖenɖe Betɛɛlɩ wɛɛ yɔ.

Pʋyɔɔ Nɔɔɖɛyaa ɛgbɛyɛ tɛ Takayɩsɩ Maʋ Kɔɔmiite kpaɣ lɩmaɣza se powoni tɔm ɖɛzɩyaa egeetiye nɖɩ ɖɩ-taa pɔyɔɔdʋʋ pa-kʋnʋŋ yɔ. Peeɖe ɛgbɛyɛ piliŋa kpaɣ lɩmaɣza se kayakɩ ɖɩɣa sɔsɔ nakɛyɛ nɛ kaɖaɣnɩ-kɛ ñɔɔzʋʋ. Ye paakpaɣ lɩmaɣza se pamaɣ ɖɩɣa kɩfalaɣ yaa palakɩ haya ɖɩɣa nakɛyɛ yɔ, pɩɩmʋ liidiye nɛ pɩkɩlɩ.

Tɔm ɖɛzɩyʋ nɔɔyʋ yɔɔdaɣ wazasɩ nzɩ ehiɣaa yɔ, sɩ-tɔm lɛ, ɛtɔm se: “Malabɩ tɔm ɖɛzʋʋ tʋmɩyɛ pɩnzɩ hiu ɛgbɛyɛ piliŋa taa. Ɛlɛ wiɖiyi mantɩkatɩ hɔʋ nakʋyʋ ŋgʋ kɩyɔɔdʋʋ man-kʋnʋŋ yɔ. Lɛɛlɛɛyɔ, ɖɔ-tɔm ɖɛzʋʋ ɖɩɣa wɛ egeetiye nɖɩ ɖɩ-taa pɔyɔɔdʋʋ Tojolabal kʋnʋŋ yɔ ɖɩ-maɣmaɣ ɖɩ-taa. Paa evemiye nɖɩ, mankatɩɣ mba pɔyɔɔdʋʋ Tojolabal kʋnʋŋ yɔ. Piyeba nɛ mɛnkpɛlɩkɩ tɔm pee kɩfana sakɩyɛ nɛ mankpasɩ man-tʋmɩyɛ taa.”

Tʋma wena pakaɣ labʋ Teokrasɩ pɩnaɣ 2021 taa yɔ

Ye ɛjaɖɛ yɔɔ wɛtʋ ɛhaɣ-ɖʋ nʋmɔʋ yɔ, teokrasɩ pɩnaɣ 2021 taa ɖɩkaɣ maʋ nɛ ɖɩñɔɔzɩ tɔm ɖɛzʋʋ ɖɩsɩ nɛ teokrasɩ sukulinaa 75. Ðɩɩtɛm labʋ ɖʋtʋ se ɖɩkaɣ maʋ ɛgbɛyɛ pilinzi lutozo, ɖɩkaɣ wobu ɖʋtʋ ndʋ tɩ-yɔɔ. Ðʋtʋ ndʋ tɩ-taa lɛɛtʋ lɛ, tʋmɩyɛ ɖɩlaɖɛ sɔsɔɖɛ kuduyuŋ kɩfaŋ weyi pakaɣ maʋ Ramapo (Niyuu Yɔrɩkɩ tɛtʋ taa) yɔ. Nɛ pakaɣ lɛɣzʋʋ ɖɔɖɔ lona Arzentiini nɛ Itaalii ɛgbɛyɛ pilinzi. Pɩtasɩ lɛ, pɩkaɣ pɔzʋʋ Kewiyaɣ Kpaamɩŋ weyi ɩcɛzɩ 1 000 yɔ. Pɩkaɣ pɔzʋʋ ɖɔɖɔ se pɛlɛɣzɩ Ɛsɔ sɛtʋ lona 6 000 wena atɩtasɩ mʋnʋʋ yɔ, nɛ pɔñɔɔzɩ Kewiyaɣ Kpaamɩŋ 4 000.

Le pakaɣ lɩʋ liidiye yɔɔ nɛ pala tʋma ana a-tɩŋa? Koobu Lázaro González weyi ɛlakɩ tʋmɩyɛ Amerika hɛkʋ taa ɛgbɛyɛ piliŋa taa yɔ, ecosi tɔm ndʋ tɩ-yɔɔ alɩwaatʋ ndʋ ɛyɔɔdaɣ Tojolabal tɔm ɖɛzʋʋ ɖɩɣa maʋ tɔm yɔ. Ɛtɔm se: “Ðɛ-ɛgbɛyɛ piliŋa ajɛɛ taa ɛyaa sakɩyɛ wɛ tanɩm taa. Pʋyɔɔ lɛ, ye ɖo-koobiya mba pɛwɛ ɛjaɖɛ kpeekpe yɔɔ yɔ patɩsɩnɩ-ɖʋ yɔ, ɖɩɩpɩzɩɣ nɛ ɖɩma ɖɩsɩ nzɩ sɩ-taa pɛɖɛzɩɣ kʋnʋmɩŋ weyi pɔyɔɔdʋʋ cɩnɛ yɔ. Haɖɛ nɖɩ ɖo-koobiya halaa nɛ abalaa lakɩ ɛjaɖɛ kpeekpe yɔɔ yɔ, nɖɩ yebina nɛ lɛɛlɛɛyɔ tɔm ɖɛzɩyaa ñɔtɩnɩ ɛyaa mba pɔyɔɔdʋʋ pa-kʋnʋŋ yɔ. Ðɩsɛɣ ɛjaɖɛ kpeekpe yɔɔ koobiya hɔʋ ɛzɩma kɩsɩɣnɩ-ɖʋ yɔ pɩ-yɔɔ.” Toovenim taa lɛ, haɖɛ nɖɩ ɩlakɩ kɔzɩ kɔzɩ pɩtɩŋnɩ donate.jw.org yɔɔ yɔ, nɖɩ kaɣnɩ sɩnʋʋ nɛ pala tʋma ana.