Yehowa Aseɣɖe Tɩnaa ɛzɩma ŋsɩma? Pɩtɩla ɖa-taa nabɛyɛ kɛ ñɔ-cɔlɔ ñɩma, ña-tʋmɩyɛ taa taabalaa yaa ño-sukuli taa taabalaa. Pɩtɩla ɖɔɖɔ yɔ, ɖa nɛ ŋ ɖiɖiɣni labʋ kɛdaɣ Bibl yɔɔ. Ɛyaa mba keekee ɖɩkɛnaa nɛ ɛbɛ yɔɔ ɖɩyɛlɩɣ nɛ ɖiheyiɣ lalaa ɖe-tisuu tɔm?

Ðɩwɛ ɛzɩ ɛyaa lalaa yɔ. Ðɩlɩnɩ kedeŋa hɔɔlɩŋ ndɩ ndɩ taa nɛ ɖɩlakɩ ɖɔɖɔ tʋma ndɩ ndɩ. Ða-taa nabɛyɛ kaawɛ Ɛsɔ sɛtʋ agbaa naayɛ taa; ɛlɛ lalaa lɛ, pataatisiɣ se Ɛsɔ wɛɛ. Ɛlɛ pʋcɔ nɛ ɖa-tɩŋa ɖɩpɩsɩɣ Yehowa Aseɣɖe Tɩnaa lɛ, ɖɩkpaɣ alɩwaatʋ nɛ ɖɩtazɩ tɔm ndʋ Bibl wɩlɩɣ yɔ tɩ-taa camɩyɛ. (Tʋma Labʋ 17:11) Ðitisi tɔm ndʋ Bibl wɩlɩɣ yɔ tɩ-yɔɔ lɛ, ɖɩkpaɣ lɩmaɣzɩyɛ se ɖɩsɛɣ Ɛsɔ Yehowa.

Ðe-Bibl kpɛlɩkʋʋ wazɩɣ-ɖʋ. Ɛzɩ ɛyaa lalaa yɔ, ɖɩkatɩɣ tɩlasɩ nɛ ɖɩlʋkɩnɩ ɖɛ-ɛjandʋ ɖɔɖɔ. Ɛlɛ ɖɩñakɩ pana nɛ ɖɩɖɔŋ Bibl paɣtʋ kila yɔɔ paa evemiye nɖɩ lɛ, piyeki nɛ ɖe-wezuu caɣʋ ñɔɔzʋʋ kamaɣ fɛyɩ. (Keɣa 127:1, 2) Pʋyɔɔ ɖɩyɛlɩɣ nɛ ɖiheyiɣ lalaa tɔm kɩbandʋ ndʋ ɖɩkpɛlɩkɩ Bibl taa yɔ.

Ðɩɖɔŋ Ɛsɔ paɣtʋ yɔɔ. Bibl paɣtʋ ndʋ, tɩsɩɣnɩ-ɖʋ se ɖɩtɩlɩ mbʋ laŋhɛzɩyɛ kɛnaa yɔ. Tiyeki nɛ ɖɩñaŋ lalaa, ɖɩkɛ toovenim tɩnaa nɛ kʋjɔʋ tɩnaa. Tɩsɩɣnɩ ɛyaa se pɛwɛɛnɩ tomnaɣ taa alaafɩya nɛ palakɩ tʋmɩyɛ camɩyɛ. Pɩtasɩ lɛ, tɩsɩɣna nɛ nɔɔ kʋyʋmaɣ wɛɣ hɔŋ taa nɛ ɛyaa cakɩ wezuu kɩbaŋʋ. Ðiɖiɣzinaa se “Ɛsɔ ɛɛtʋkʋʋ ɛyaa taa,” mbʋ yebina nɛ paa ɖɩlɩnɩ ajɛɛ ndɩ ndɩ taa yɔ, ɖe-tisuu yɔɔ lɛ, ɖɩkɛ koobiya. Ðiiyeki tomnaɣ tɔlɩm nɛ politiki lɩmaɣza se atayɩ ɖɛ-hɛkʋ taa. Ðɩwɛ ɛzɩ ɛyaa tɩŋa yɔ, ɛlɛ ɖɩkɛ samaɣ ŋga kɛwɛ ŋgee yɔ.—Tʋma Labʋ 4:13; 10:34, 35.

• Ɛbɛ yɔɔ pɔtɔŋ se Yehowa Aseɣɖe Tɩnaa wɛ ɛzɩ ɛyaa lalaa yɔ?

• Paɣtʋ ndʋ Yehowa Aseɣɖe Tɩnaa kpɛlɩkɩ Bibl taa?

Ɛyaa sakɩyɛ maɣzɩɣ se Yehowa Aseɣɖe Tɩnaa kɛ Ɛsɔ sɛtʋ ɛgbɛyɛ kɩfaɖɛ na. Ɛlɛ pɩnzɩ 2700 nzɩ sɩɖɛwa yɔ sɩ-taa, payaɣaɣ Ɛsɔ toovenim tʋ sɛyaa se “Aseɣɖe Tɩnaa.” (Izaayii 43:10-12) Pʋcɔ nɛ pɩtalɩ pɩnaɣ 1931 lɛ, payaɣaɣ-ɖʋ se Bibl kpɛlɩkɩyaa. Ɛbɛ yɔɔ ɖɩkpaɣ lɩmaɣzɩyɛ se payaa-ɖʋ se Yehowa Aseɣɖe Tɩnaa?

Ða-hɩɖɛ yeki se patɩlɩ ɖɛ-Ɛsɔ. Bibl takayɩsɩ kɩbɩnzɩ wɩlɩɣ se pama Ɛsɔ hɩɖɛ, Yehowa, tam kudokiŋ sakɩyɛ Bibl taa. Sɔnɔ Biblwaa sakɩyɛ taa, pɛlɛɣzɩ hɩɖɛ nɖɩ nɛ hɩla kɩsɛsɛna ɛzɩ Kɩbaɣlʋ yaa Ɛsɔ mbʋ yɔ. Ŋgʋ Ɛsɔ toovenim tʋ kaalɩzɩ ɛ-tɩ nɛ ɛwɩlɩ Moyizi nɛ eheyi-i se payaɣ-ɩ se Yehowa. Ɛsɔzaa se: “Ma-hɩɖɛ lɛ mbʋ tam.” (Ejipiti Lɩʋ 3:15) Ɛlabɩ mbʋ nɛ ɛwɩlɩ se tʋkaɣ wɛ ɛ nɛ cɛtɩm ɛsɔnaa pɛ-hɛkʋ taa. Ða-taa wɛ leleŋ se Ɛsɔ hɩɖɛ kiɖeɖee wɛ ɖɔ-yɔɔ.

Ða-hɩɖɛ yeki se patɩlɩ ɖa-tʋmɩyɛ. Caanaʋ taa, kpaɣnɩ abalʋ siɣsiɣ tʋ weyi payaɣ se Aabɛɛlɩ yɔ, ɛyaa sakɩyɛ lɩzɩ aseɣɖe tisuu mbʋ pɛwɛnɩ Yehowa yɔɔ yɔ pɩ-yɔɔ. Pɩnzɩ mɩnɩŋ sakɩyɛ nzɩ sɩɖɛwa yɔ sɩ-taa Noowa, Abraham, Saara, Moyizi nɛ Daviid nɛ ɛyaa lalaa pɔkɔm nɛ pɔsɔzɩ “aseɣɖe tɩnaa mba pɛwɛ ɛzɩ ɛsɔmɩnʋʋ sɔsɔʋ” yɔ pɔ-yɔɔ. (Ebree mba 11:4–12:1) Ɛzɩ nɔɔyʋ lɩzʋʋ aseɣɖe tɔm ɖɩhʋyɛ se ɛwɩlɩ se nɔɔyʋ tɔm ɖewa yɔ, ɖa ɖɔɖɔ ɖɩtɛm ɖa-taa se ɖɩñakɩ pana nɛ ɖɩsɩnɩ ɛyaa nɛ patɩlɩ toovenim ɖɛ-Ɛsɔ yɔɔ.

Ðɩwɛɛ nɛ ɖɩmaɣzɩɣnɩ Yesu. Bibl ya Yesu se “aseɣɖe tʋ siɣsiɣ tʋ nɛ toovenim tʋ.” (Natʋ 3:14) Yesu maɣmaɣ kaayɔɔdaa se ‘eyeba nɛ patɩlɩ Ɛsɔ hɩɖɛ’ nɛ eɖiɣni lɩzʋʋ “aseɣɖe toovenim” tɔm ndʋ titukuuni Ɛsɔ yɔ tɩ-yɔɔ. (Yohanɛɛsɩ 17:26; 18:37) Ye mbʋ, pɩwɛɛ se Yehowa hɩɖɛ ɛwɛɛ Krɩstʋ wayɩ tɩŋɩyaa toovenim mba yɔɔ nɛ pala nɛ ɛyaa tɩlɩ hɩɖɛ nɖɩ. Mbʋ Yehowa Aseɣɖe Tɩnaa ɖiɣni ñaɣʋ pana nɛ palakɩ.

• Ɛbɛ yɔɔ Bibl kpɛlɩkɩyaa kpaɣ lɩmaɣzɩyɛ se payaa-wɛ se Yehowa Aseɣɖe Tɩnaa?

• Yehowa paɣzʋʋ wɛnʋʋ aseɣɖe tɩnaa tɛtʋ yɔɔ yɔ, pɩlakɩ alɩwaatʋ ɛzɩma yɔ?

• Akɛ Yehowa Aseɣɖe Tʋ sɔsɔ?

Bibl yɔɔdaa se Yesu Krɩstʋ sɩkɩ nɛ pɩtɛ lɛ, cɛtɩm wɩlɩyaa kaɣ lɩʋ kajalaɣ Krɩstʋ mba hɛkʋ taa nɛ pepisi Bibl wɩlɩtʋ. (Tʋma Labʋ 20:29, 30) Pɩkɔm pʋwayɩ lɛ, pɩla mbʋ keekee. Pakpaɣ sɩɩnaa layaa sɔnzɩ nɛ pesidi Yesu wɩlɩtʋ taa nɛ palɩzɩ cɛtɩm Krɩstʋ agbaa sakɩyɛ. (2 Timootee 4:3, 4) Ye mbʋ, ɛbɛ pɩzɩɣ nɛ pɩsɩnɩ-ɖʋ nɛ ɖɩtɩlɩ se ɛzɩma ɖɩnɩɣ Bibl taa lɛɛlɛɛyɔ yɔ, pɩlabɩ nɔɔ kʋɖʋmaɣ nɛ tɔm ndʋ Bibl wɩlɩɣ toovenim taa yɔ?

Alɩwaatʋ kaatalaa se Yehowa ekuli toovenim yɔɔ. Yehowa kaayɔɔdaa se ‘kɛdɛzaɣ alɩwaatʋ taa lɛ, lɔŋ sɩmtʋ kaɣ tɔyʋʋ.’ (Danɩyɛɛlɩ 12:4) Pɩnaɣ 1870 taa, toovenim ñɩnɩyaa nabɛyɛ pazɩ kpelaɣ nɛ pɛkpɛlɩkɩɣ Ɛsɔtɔm. Mbʋ sɩnɩnɩ-wɛ nɛ peɖiɣzina se coocinaa sakɩyɛ wɩlɩtʋ tɩlɩɩnɩ Bibl taa. Peeɖe papaɣzɩ ñɩnʋʋ se patɩlɩ tɔm ndʋ Bibl wɩlaɣ kiɖe tɛɛ yɔ; nɛ Yehowa wazɩ-wɛ ɖɔɖɔ nɛ panɩɩ Masɩ taa.

Laŋɩyɛ kɩbanɖɛ tɩnaa kaakpɛlɩkɩ Bibl camɩyɛ. Bibl kpɛlɩkɩyaa kɩbama mba, paatɩŋnɩ nʋmɔʋ kɩfalʋʋ nakʋyʋ yɔɔ nɛ patazɩ Bibl taa. Nʋmɔʋ kʋyʋmʋʋ ŋgʋ kɩ-yɔɔ ɖɩtɩŋɩɣnɩ sɔnɔ. Patazaɣ Bibl wɩlɩtʋ taa kʋyʋm kʋyʋm. Ye pakatɩ Bibl mayaɣ nakɛyɛ nɛ paanɩɣ ka-taa yɔ, pañɩnɩɣ nɛ pana ɛzɩma Bibl masɩ lɛɛsɩ lɩzɩɣ ka-taa yɔ. Panɩɣ ɛzɩma Bibl tɩŋa lɩzɩɣ mayaɣ ŋga ka-taa yɔ lɛ, pama tɔm ndʋ Bibl wɩlɩɣ yɔ nɛ pasɩɩ. Peyekaɣ Bibl maɣmaɣ se kɩsɩnɩ-wɛ nɛ panɩɩ kɩ-wɩlɩtʋ taa. Mbʋ sɩnɩnɩ-wɛ nɛ patɩlɩ toovenim tɔm ndʋ keekee Bibl wɩlɩɣ tɔm tʋnɛ tɩ-yɔɔ yɔ: Ɛsɔ hɩɖɛ nɛ e-Kewiyaɣ, tamaɣ ŋga yɔɔ Ɛsɔ lɩzɩ tɛtʋ yɔ, wɛtʋ ndʋ tɩ-taa sɩɖaa wɛɛ yɔ nɛ sɩɖaa fezuu lidaʋ. Toovenim tɔm ndʋ tɩ-yɔɔ palɩwa yɔ, tɩsɩnɩ-wɛ nɛ palɩɩ cɛtɩm wɩlɩtʋ nɛ lakasɩ kɩdɛkɛdɩsɩ po-yomiye taa.—Yohanɛɛsɩ 8:31, 32.

Pɩnaɣ 1879 taa, Bibl kpɛlɩkɩyaa nawa se pɩtalaa se pala nɛ ɛyaa sakɩyɛ tɩlɩ toovenim. Mbʋ yebina nɛ papaɣzɩ lɩzʋʋ fenaɣ fenaɣ takayaɣ kanɛ: Feŋuu Tilimiye Susuu Yehowa Kewiyaɣ Tɔm. Lɛɛlɛɛyɔ ɖɩwɛɛ nɛ ɖisusuu Bibl taa toovenim tɔm kʋnʋmɩŋ weyi ɩ-taa yɔ, ɩcɛzɩ 900; nɛ ɖisusuu-tʋ ajɛɛ wena a-taa yɔ, acɛzɩ 240. Wiɖiyi toovenim tɔm tɩtɔyɩ mbʋ!

• Krɩstʋ sɩm wayɩ lɛ, ɛbɛ kaatalɩ Bibl wɩlɩtʋ?

• Ɛbɛ sɩnɩ-ɖʋ nɛ ɖɩɖaɣnɩ lɩʋ Bibl taa toovenim yɔɔ?

Pɩnzɩ sakɩyɛ taa, Yehowa Aseɣɖe Tɩnaa lɩzaa, patayɩ nɛ palabɩnɩ tʋmɩyɛ Biblwaa ndɩ ndɩ. Pʋwayɩ lɛ, ɖɩkɔɔ nɛ ɖɩna se pɩcɛyaa se ɖɩlɩzɩ Bibl kɩfalʋʋ nakʋyʋ, ŋgʋ kɩpɩzɩɣ nɛ kɩsɩnɩ ɛyaa nɛ pɛkpɛlɩkɩ nɛ pɛwɛɛnɩ “toovenim tɛ sɩmtʋ siŋŋ” nɛ pɩkɩlɩ yɔ; nɛ mbʋ Yehowa sɔɔlaa se paa weyi ɛla. (1 Timootee 2:3, 4) Pʋyɔɔ lɛ, kpaɣnɩ pɩnaɣ 1950 lɛ, ɖɩpaɣzɩ Bibl ɖɛzʋʋ sɔnɔ kʋnʋmɩŋ taa. Bibl ŋgʋ payaɣ se Ɛjaɖɛ kɩfaɖɛ tɔm ɖɛzʋʋ. Pɛɖɛzɩ kɩ-taa tɔm ɖeyi ɖeyi ɛzɩ pɩmʋnaʋ yɔ. Kʋnʋmɩŋ weyi ɩ-taa pɛɖɛzɩ Bibl ŋgʋ yɔ, ɩcɛzɩ 160.

Pɩɩpɔzɩ Bibl ŋgʋ kɩ-taa nɩʋ wɛ kɛlɛʋ yɔ. Pɩnzɩ ɖɛɣ lɛ, ɛzɩma pɔyɔɔdʋʋ kʋnʋŋ nakʋyʋ yɔ, pɩlɛɣzɩɣ. Nɛ pama tɔm pee wena Biblwaa sakɩyɛ taa yɔ, a-taa nɩʋ wɛ kaɖɛ; nabʋyʋ taa lɛ, tɔm pee wena pamawa yɔ, paatasɩɣ-yɛ labɩnʋʋ tʋmɩyɛ sɔnɔ. Pɩtasɩ lɛ, pehiɣ caanaʋ taa Bibl takayɩsɩ nasɩyɩ nɛ sɩsɩɣnɩ Bibl taa tɔm ɖɛzɩyaa se panɩɩ Ebree, Arameya nɛ Grɛɛkɩ kʋnʋmɩŋ camɩyɛ nɛ pɩkɩlɩ. Kʋnʋmɩŋ ɩnɩ ɩ-taa paama Bibl kiɖe tɛɛ.

Pɩɩpɔzɩ Bibl ŋgʋ kɩɖɛzɩɣ tɔm ɖeyi ɖeyi yɔ. Pɩtɩmʋna se Bibl taa tɔm ɖɛzɩyaa ɩlɛɣzɩ Ɛsɔ lɩmaɣza, ɛlɛ pɩwɛɛ se pɛɖɛzɩ kɩ-taa tɔm ɖeyi ɖeyi ɛzɩ paamaʋ-tʋ kiɖe tɛɛ yɔ. Paa mbʋ yɔ, patɩma Ɛsɔ hɩɖɛ Yehowa Biblwaa sakɩyɛ taa.

Pɩɩpɔzɩ Bibl ŋgʋ kɩɖʋʋ hɩɖɛ weyi ɛ-cɔlɔ kɩ-taa tɔm lɩnaa yɔ. (2 Samɩyɛɛlɩ 23:2) Pama Ɛjaɖɛ kɩfaɖɛ tɔm ɖɛzʋʋ Bibl taa Yehowa hɩɖɛ ɛzɩ tam 7000 mbʋ yɔ. Mbʋ pɩɩwɛ caanaʋ taa Bibl takayɩsɩ taa ɛzɩ ɖɩnaɣʋ pɩ-tɛɛ cɩnɛ kɩɖaʋ taa yɔ. (Ejipiti Lɩʋ 3:15) Pakpaɣ pɩnzɩ sakɩyɛ nɛ pañɩnɩ tɔm camɩyɛ pʋcɔ nɛ pɛɖɛzɩ Bibl ŋgʋ kɩ-taa tɔm, mbʋ yebina nɛ kɩ-kalʋʋ wɛɛ leleŋ nɛ kɩlɩzɩɣ Ɛsɔ lɩmaɣza taa camɩyɛ. Paa ŋwɛnɩ Ɛjaɖɛ kɩfaɖɛ tɔm ɖɛzʋʋ tɛ Bibl yaa ŋfɛyɩnɩ-kʋ ña-kʋnʋŋ taa yɔ, ɖiseɣtiɣ-ŋ se ŋñaɣ pana nɛ ŋkalɩɣ Yehowa tɔm paa evemiye nɖɩ.—Yozuwee 1:8; Keɣa 1:2, 3.

• Ɛbɛ yeba nɛ ɖiɖiɣzina se pɩpɔzaa se palɩzɩ Bibl kɩfalʋʋ nakʋyʋ?

• Mba payɩ pɔsɔɔlaa se patɩlɩ Ɛsɔ sɔɔlɩm yɔ, ɛbɛ pɩpɔzaa se pañaɣ pana nɛ palakɩ paa evemiye nɖɩ?