TƆM KƖKPƐLƖKƖTƲ 22
Ɛzɩma ŋpɩzɩɣ nɛ ŋsusi tɔm kɩbandʋ?
Ŋwɛɣ nɛ ŋkpɛlɩkɩɣ Bibl taa toovenim tɔm lɛ, ŋpɩzɩɣ nɛ ŋmaɣzɩ se: «Pɩpɔzʋʋ se paa weyi ɛtɩlɩ tɔm tʋnɛ!» Toovenim pɩwɛɛ se paa weyi ɛtɩlɩ tɔm ndʋ! Ɛlɛ pɩtɩla sɔɔndʋ kpaɣ-ŋ se ŋheyi lalaa tɔm ndʋ ŋkpɛlɩkaa yɔ. Yele nɛ ɖɩna ɛzɩma ŋpɩzɩɣ nɛ ŋwa sɔɔndʋ ndʋ nɛ ŋsusi lalaa tɔm kɩbandʋ ndʋ yɔ.
1. Ɛzɩma ŋpɩzɩɣ nɛ ŋheyi mba ŋsɩma yɔ tɔm ndʋ ŋkpɛlɩkaa yɔ?
Yesu tɔmkpɛlɩkɩyaa yɔɔdaa se: «Ðɩɩpɩzɩɣ nɛ ɖiyele mbʋ ɖɩnawa nɛ ɖɩnɩɩ yɔ pɩ-tɔm yɔɔdʋʋ.» (Tʋma Labʋ 4:20) Toovenim tɔm kaamʋ ñɩm siŋŋ pɛ-ɛsɩndaa nɛ pʋyɔɔ lɛ, paasɔɔlaa se pala po-ɖoŋ ɖeɖe nɛ posusi-tʋ ɛyaa sakɩyɛ. Toovenim mʋ ñɩm ñɛ-ɛsɩndaa mbʋ ɖɔɖɔ? Ye pɩmʋ ñɩm yɔ, ñɩnɩ nʋmɔŋ ndɩ ndɩ weyi ɩ-yɔɔ ŋpɩzɩɣ ŋtɩŋna nɛ ŋsusi ñɔ-hɔʋ taa mba nɛ ña-taabalaa tɔm ndʋ ŋkpɛlɩkaa yɔ nɛ ñamtʋ yɔ.—Kalɩ Koloosi mba 4:6.
Nʋmɔŋ weyi ɩ-yɔɔ ŋpɩzɩɣ ŋtɩŋna nɛ ŋpaɣzɩ yɔ ɩ-taa nɩɩyɩ yɔ
Ŋpɩzɩɣ nɛ ŋheyi ñɔ-hɔʋ taa tʋ nɔɔyʋ se: «Mɛnkpɛlɩkɩ tɔm kɩbandʋ natʋyʋ kpɩtaʋ kʋnɛ.» Pɩsɩɣnɩ-ŋ nɛ ŋhɔ ɛ-lɩmaɣza nɛ ŋwoni Bibl taa tɔm natʋyʋ yɔɔ.
Ye pɩwɩɣ ña-taabalʋ yaa ɛwɛ nɩɣzɛ taa yɔ, kalɩ mayaɣ nakɛyɛ nɛ ŋkpazɩ-ɩ ɖoŋ.
Ye tʋmɩyɛ taa nɔɔyʋ ɛpɔzɩ-ŋ se ɛzɩma ña-kpɩtaʋ ɖɩdɛnɖɛ kɩyakɩŋ ɖɔma yɔ, kɛdɩ-ɩ tɔm ndʋ ŋkpɛlɩkɩ kediɣzaɣ taa yaa alɩwaatʋ ndʋ pɛkpɛlɩkaɣnɩ-ŋ Bibl yɔ.
Wɩlɩ ña-taabalaa jw.org intɛrnɛɛtɩ lone.
Yaa lalaa se pɔkɔɔ nɛ ña nɛ wɛ ɩkpɛlɩkɩ Bibl, yaa wɩlɩ-wɛ ɛzɩma patɩŋnɩ jw.org yɔɔ nɛ pɔpɔzɩ se pɛkpɛlɩkɩnɩ-wɛ Bibl yɔ.
2. Ɛbɛ yɔɔ pɩwɛɛ se ña nɛ ɛgbɛyɛ taa koobiya isusi tɔm?
Pɩtɩkɛ ɛyaa mba Yesu tɔmkpɛlɩkɩyaa kaasɩma yɔ pe-ɖeke posusaɣ tɔm. Yesu kaatiyi-wɛ «naalɛ naalɛ se pɛɖɛɛ-ɩ nɔɔ tɛtʋ nɛ lona ndɩ ndɩ» taa nɛ posusi tɔm. (Luka 10:1) Paañɔɔzɩ pa-tɩ camɩyɛ nɛ pala tʋmɩyɛ nɖɩ. Pɩɩha waɖɛ ɛyaa sakɩyɛ nɛ pewelisi tɔm kɩbandʋ ndʋ. Pɩtasɩ lɛ paakpɛndaa nɛ posusi tɔm nɛ mbʋ kaayebina nɛ pehiɣ taa leleŋ. (Luka 10:17) Ña ɖɔɖɔ ŋpɩzɩɣ nɛ ŋɖʋ ña-tɩ kaɖʋwa se ŋkpɛndɩɣ ɛgbɛyɛ taa koobiya yɔɔ nɛ ña nɛ wɛ isusi tɔm na?
TAZƖ NƐ PILIMI
Tazɩ nɛ ŋna mbʋ ŋpɩzɩɣ nɛ ŋla nɛ ŋwa sɔɔndʋ nɛ ña ɖɔɖɔ ŋhiɣ taa leleŋ weyi ɩlɩɣnɩ tɔm kɩbandʋ susuu taa yɔ.
3. Yehowa kaɣ wɛʋ ñɔ-cɔlɔ
Nabɛyɛ sɔɔlaa se posusi tɔm, ɛlɛ sɔɔndʋ kpaɣ-wɛ nɛ ndʋ lalaa kaɣ maɣzʋʋ yɔ yaa ɛzɩma pakaɣ-wɛ mʋʋ yɔ.
Sɔɔndʋ kpaɣ-ŋ se ŋsusi lalaa tɔm ndʋ ŋkpɛlɩkaa yɔ? Ɛbɛ yɔɔ?
Ɩcɔnɩ VIDEO, nɛ pʋwayɩ lɛ ɩtazɩ tɔm tʋnɛ tɩ-taa.
Ɛzɩma piya evelisi sɩnɛ sɩpɩzaa nɛ sɩwa sɔɔndʋ?
Ɩkalɩ Izaayii 41:10, nɛ pʋwayɩ lɛ ɩtazɩ tɔm tʋnɛ tɩ-taa:
Ye sɔɔndʋ ɛkpaɣ-ŋ nɛ tɔm susuu yɔ, ɛzɩma adɩma pɩzɩɣ nɛ asɩnɩ-ŋ?
Ŋŋsɩm-tʋ?
Yehowa Aseɣɖe Tɩnaa sakɩyɛ kaamaɣzaa se paakaɣ pɩzʋʋ kpa nɛ posusi ɛyaa tɔm kɩbandʋ. Ðɩkpaɣ Sergey kɩɖaʋ. Ɛmaɣzaɣ se ɛɛwazɩɣ pʋyʋ nɛ pɩɩwɛ-ɩ kaɖɛ se ɛ nɛ ɛyaa lalaa pala kɛdaɣ. Ɛlɛ pʋwayɩ lɛ ɛkpɛlɩkɩ Bibl. Ɛyɔɔdaa se: «Paa sɔɔndʋ ɛkpaɣaɣ-m yɔ, maapaɣzɩ lalaa heyuu tɔm ndʋ mɛnkpɛlɩkaa yɔ. Pɩɖɩɣzɩ-m se piyeba nɛ mantaɣ man-tɩ liu nɛ pɩkpaɖɩ nɛ pɩkpazɩ ɖɔɖɔ men-tisuu ɖoŋ.»
4. Wɛɛnɩ ñamtʋ
Alɩwaatʋ ndʋ ŋsusuu tɔm kɩbandʋ yɔ, taamaɣzɩ tɔm ndʋ ŋsusuu yɔ ti-ɖeke tɩ-yɔɔ, ɛlɛ maɣzɩ ɖɔɖɔ ɛzɩma pɩwɛɛ se ŋsusi-tʋ yɔ pɩ-yɔɔ. Ɩkalɩ 2 Timootee 2:24 nɛ 1 Pɩyɛɛrɩ 3:15, nɛ pʋwayɩ lɛ ɩtazɩ tɔm tʋnɛ tɩ-taa:
Ɛzɩma ŋpɩzɩɣ nɛ ŋlabɩnɩ tʋmɩyɛ masɩ sɩnɛ sɩ-taa tɔm alɩwaatʋ ndʋ ŋsusuu lalaa Bibl taa tɔm yɔ?
Pɩtɩla ñɔ-hɔʋ taa mba nabɛyɛ yaa ña-taabalaa nabɛyɛ ɩɩkaɣ tisuu ñɔ-tɔm yɔɔ. Ɛbɛ ŋpɩzɩɣ nɛ ŋla? Ɛbɛ pɩtɩpɔzɩ se ŋla?
Ɛbɛ yɔɔ pɩkɩlɩɣ ɖeu se ŋtaañɩɣ pɔ-yɔɔ se petisi ñɔ-tɔm yɔɔ, ɛlɛ ŋpɔzɩ-wɛ tɔm kɩpɔzʋ nɛ nɔɔ kɩbaŋa?
5. Tɔm kɩbandʋ susuu haɣ taa leleŋ
Yehowa ɖʋ Yesu tʋmɩyɛ se esusi tɔm kɩbandʋ. Yesu maɣzɩɣ suwe tʋmɩyɛ nɖɩ ɖɩ-yɔɔ? Ɩkalɩ Yohanɛɛsɩ 4:34, nɛ pʋwayɩ lɛ ɩtazɩ tɔm tʋnɛ tɩ-taa:
Pɩcɛyaa se ɖɩtɔɔ tɔɔnaɣ nɛ ɖɩwɛɛ wezuu; pɩtasɩ lɛ, pɩhaɣ-ɖʋ taa leleŋ. Ɛbɛ yɔɔ Yesu kpaɣ Ɛsɔ sɔɔlɩm labʋ, kɔzɩ kɔzɩ tɔm kɩbandʋ susuu nɛ ɛmaɣzɩnɩ tɔɔnaɣ tɔɔʋ?
Ɛbɛ yɔɔ tɔm kɩbandʋ susuu pɩzɩɣ nɛ pɩha-ŋ taa leleŋ?
Labɩnɩ tʋmɩyɛ lɔŋ tasʋʋ pʋnɛ nɛ ŋna
Kpɩtaʋ hɛkʋ taa kediɣzaɣ taa, yʋsɩ lɩmaɣza wena a-yɔɔ ŋpɩzɩɣ ŋtɩŋna nɛ ŋpaɣzɩ kɛdaɣ yɔ.
Yɔɔdɩnɩ weyi ɛkpɛlɩkɩɣnɩ-ŋ Bibl yɔ nɛ ɛwɩlɩ-ŋ mbʋ ŋpɩzɩɣ ŋla nɛ paha-ŋ waɖɛ nɛ ŋlakɩ sukulibiya tʋma kpɩtaʋ hɛkʋ taa kediɣzaɣ taa yɔ. Tʋma ana a-labʋ kaɣ-ŋ sɩnʋʋ nɛ ŋñɔɔzɩ ña-tɩ nɛ ŋsusi lalaa tɔm ndʋ ŋwɛɛ nɛ ŋkpɛlɩkɩɣ yɔ.
Tɩŋnɩ hɔɔlɩŋ «Nabɛyɛ yɔɔdʋʋ se» yaa «Nɔɔyʋ pɩzɩɣ nɛ ɛpɔzɩ se» yɔɔ nɛ ŋfalɩsɩ ña-tɩ nɛ ŋpɩzɩ nɛ ŋcosi tɔm ndʋ ɛyaa pɔzʋʋ ɖoŋ ɖoŋ se pakaɖɩnɩ-ɖʋ yɔ tɩ-yɔɔ.
NƆƆYƲ PƖZƖƔ NƐ ƐPƆZƖ SE: «Pileɖaa, ŋwɛɛ lɛ?»
Ɛzɩma ŋpɩzɩɣ nɛ ŋlabɩnɩ waɖɛ nɖɩ tʋmɩyɛ nɛ ŋheyi ɛyʋ ɛnʋ tɔm ndʋ ŋwɛɛ nɛ ŋkpɛlɩkɩɣ Bibl taa yɔ?
TOBI LƐ
Ye ŋsusuu lalaa tɔm kɩbandʋ yɔ, pɩhaɣ-ŋ taa leleŋ nɛ pɩtɩla pɩɩkaɣ wɛʋ kaɖɛ se ŋpaɣzɩ ɛzɩ ŋŋmaɣzʋʋ yɔ.
Tɔm taa tazʋʋ
Ɛbɛ yɔɔ pɩwɛɛ se ŋsusi ɛyaa lalaa tɔm kɩbandʋ?
Ɛzɩma ŋpɩzɩɣ nɛ ŋla tʋmɩyɛ nɖɩ nɛ ñamtʋ?
Ye sɔɔndʋ ɛkpaɣ-ŋ nɛ tɔm susuu yɔ, ɛbɛ ŋpɩzɩɣ ŋla nɛ ŋwabɩ-tʋ?
WONDU LƐƐTƲ
Cɔna nɛ ŋna nʋmɔŋ naanza weyi ɩwɛ kɛlɛʋ nɛ ŋpɩzɩɣ nɛ ŋtɩŋnɩ ɩ-yɔɔ nɛ ŋlabɩnɩ tʋmɩyɛ jw.org tɛ carte de visite nɛ ŋpɩzɩ nɛ ŋsusi tɔm kɩbandʋ yɔ.
Kɩɖaʋ ŋgʋ kɩwɩlɩɣ ɛzɩma ɖɩpɩzɩɣ nɛ ɖɩlabɩnɩ tʋmɩyɛ JW.ORG tɛ carte de visite yɔ (1:43)
Kalɩ nɛ ŋna wɛtʋ kɩbandʋ naanza ndʋ tɩpɩzɩɣ nɛ tɩsɩnɩ-ŋ nɛ ŋsusi tɔm kɩbandʋ yɔ.
«Ŋñɔɔzɩ ña-tɩ se ŋpɩsɩ ɛyaa kpayʋ na?» (Feŋuu Tilimiye, septembre 2020)
Cɔna nɛ ŋna Bibl taa kɩɖaʋ ŋgʋ kɩpɩzɩɣ nɛ kɩha-ɖʋ abalɩtʋ nɛ ɖisusi tɔm kɩbandʋ paa ɖɩkɛ piya evelisi yɔ.
Kalɩ nɛ ŋna ɛzɩma ŋpɩzɩɣ nɛ ŋsusi Bibl tɔm ñɔ-hɔʋ taa ñɩma mba paasɩŋ Yehowa yɔ.
«Touchons le cœur de nos parents non Témoins» (La Tour de Garde, 15 mars 2014)