Ñɛ-ɛsɩyɛ ɛsɛɛnɩ Ɛsɔ sɔɔlɩm labʋ “kɛdɛzaɣ kɩyakɩŋ” ɖɩdɛnɖɛ taa

1. Ɛbɛ yeba nɛ ɖa-taa tɛ se ɖɩwɛ “kɛdɛzaɣ kɩyakɩŋ” taa?

PƖNAƔ 1914 ɖɛwa pʋcɔ nɛ palʋlɩ-ŋ yaa we? Ye mbʋ yɔ, ɛjaɖɛ yɔɔ ɖʋtʋ tʋnɛ, tɩ-tɛ “kɛdɛzaɣ kɩyakɩŋ” taa ŋcaɣ ñe-wezuu kpeekpe. (2 Tim. 3:1) Mbʋ Yesu kaayɔɔdaa se pɩkaɣ labʋ ɖa-alɩwaatʋ tʋnɛ tɩ-taa yɔ, ɖa-tɩŋa payɩ ɖɩnɩ pɩ-taŋ. Pɩ-taa nabʋyʋ lɛ, yoŋ, ñɔɔsɩ, tɛtʋ ñamsʋʋ, kʋdɔmɩŋ, paɣtʋ yɔɔ maʋ nɛ Yehowa samaɣ nazʋʋ. (Mat. 24:3, 7-9, 12; Luka 21:10-12) Ðɩna ɖɔɖɔ ɛzɩma ɛyaa wɛnɩ lakasɩ nzɩ sɩ-tɔm apostoloo Pɔɔlɩ kaayɔɔdaa yɔ. (Kalɩ aɖakaɣ “Wɛtʋ ndʋ ɛyaa wɛnɩ lɛɛlɛɛyɔ yɔ.”) Ða Yehowa sɛyaa lɛ, ɖa-taa tɛma se ɖɩwɛ “wayɩ wayɩ wɛɛ” yaa kɛdɛzaɣ kɩyakɩŋ taa.—Mik. 4:1.

2. Tɔm pɔzʋʋ mbʋ yɔɔ pɩwɛɛ se ɖicosi?

² Kpaɣnɩ pɩnaɣ 1914 nɛ pɩtalɩ sɔnɔ, ɛzɩma alɩwaatʋ sakɩyɛ ɖɛwa yɔ, pɩwɩlɩɣ se ɖɩwɛ lɛɛlɛɛyɔ “kɛdɛzaɣ kɩyakɩŋ” ɖɩdɛnɖɛ taa. Ɛjaɖɛ ɖɩnɛ ɖɩ-tɛm ñɔtɩ kpam; pʋyɔɔ lɛ, pɩcɛyaa se ɖɩtɩlɩ tɔm kɩcɛyɩtʋ tʋnɛ tɩ-yɔɔ cosuu: Ɛbɛ kaɣ labʋ “kɛdɛzaɣ kɩyakɩŋ” ɖɩdɛnɖɛ alɩwaatʋ taa? Nɛ alɩwaatʋ ndʋ ɖɩɖaŋ mbʋ pɩkaɣ labʋ yɔ tɩ-taa lɛ, ɛbɛ Yehowa sɔɔlaa se ɖɩtɩɩlakɩ?

ƐBƐ KAƔ LABƲ “KƐDƐZAƔ KƖYAKƖŊ” ÐƖDƐNÐƐ ALƖWAATƲ TAA?

3. Ɛzɩ natʋ ndʋ tɩwɛ 1 Tesalooniiki mba 5:1-3 taa yɔ tɩyɔɔdʋʋ yɔ, tɔm ndʋ ajɛɛ kaɣ susuu?

³ Kalɩ 1 Tesalooniiki mba 5:1-3. Pɔɔlɩ yɔɔdɩ “Yehowa kɩyakʋ” tɔm. Mayaɣ kanɛ ka-taa lɛ, pʋ-tɔbʋʋ lɛ se Yehowa kɩyakʋ paɣzɩɣnɩ “Babilɔɔnɩ sɔsɔʋ” ɖɩzʋʋ nɛ kɩtɛzɩnɩ Armaagedɔɔ. “Babilɔɔnɩ sɔsɔʋ” kɛnɩ cɛtɩm Ɛsɔ sɛtʋ agbaa kɩgbɛndʋʋ. (Natʋ 16:14, 16; 17:5) Pʋcɔ nɛ “kɩyakʋ” ŋgʋ kɩpaɣzɩ lɛ, ajɛɛ kaɣ susuu se “laŋhɛzɩyɛ nɛ pɛɛyɛ” wɛɛ. Nabʋyʋ taa, tɔm ndʋ mbʋ yɔ ajɛɛ ñʋndɩnaa lakɩnɩ tʋmɩyɛ alɩwaatʋ ndʋ pɔyɔɔdʋʋ taabalɩyɛ nɖɩ ɖɩwɛ ajɛɛ hɛkʋ taa yɔ ɖɩ-tɔm yɔ.b Ɛlɛ “laŋhɛzɩyɛ nɛ pɛɛyɛ” nɖɩ ɖɩ-tɔm Bibl yɔɔdʋʋ se posusuu yɔ, ɖɩkaɣ wɛʋ ndɩ. Ɛbɛ yɔɔ? Mbʋ pʋyɔɔ yɔ posusuu tɔm ndʋ lɛ, ɛyaa sakɩyɛ kaɣ maɣzʋʋ se ajɛɛ ñʋndɩnaa pɩzaa peyele nɛ laŋhɛzɩyɛ nɛ pɛɛyɛ wɛɛ ɛjaɖɛ yɔɔ nɛ pɩkɩlɩ. Ɛlɛ toovenim taa lɛ, “kʋñɔŋ sɔsɔʋ” paɣzɩɣ nɛ pʋwayɩ lɛ “ɖɩzʋʋ mbʋ patɩɖʋna yɔ pɩkaɣ pɔ-yɔɔ tibu.”—Mat. 24:21.

4. (a) Tɔm ndʋ pakaɣ susuu se “laŋhɛzɩyɛ nɛ pɛɛyɛ” wɛɛ yɔ, ɛbɛ ɖɩɖaŋaa se ɖɩna tɩ-yɔɔ? (b) Ɛbɛ ɖɩtɛm sɩm tɔm ndʋ tɩ-yɔɔ?

⁴ Ðɩsɩm natʋyʋ tɔm ndʋ pakaɣ susuu se “laŋhɛzɩyɛ nɛ pɛɛyɛ” wɛɛ yɔ tɩ-yɔɔ. Ɛlɛ lɛɛtʋ wɛɛ lɛ, ɖɩɩsɩŋ-tʋ. Ðɩɩsɩŋ mbʋ pɩkaɣ yebu nɛ ajɛɛ ñʋndɩnaa susi tɔm ndʋ yɔ, yaa ɛzɩma pakaɣ-tʋ susuu yɔ. Nɛ ɖɩɩsɩŋ ɖɔɖɔ se pakaɣ tɔm ndʋ susuu tam kʋɖʋmam yaa pakaɣ-tʋ susuu pazɩ pazɩ. Paa pɩtɩɩkɛ suwe yɔ, ɖɩsɩm tɔm tʋnɛ: Pɩfɛyɩ se piyiɣdi-ɖʋ nɛ ɖɩmaɣzɩ se ajɛɛ ñʋndɩnaa pɩzɩɣ peyele nɛ laŋhɛzɩyɛ wɛɛ ɛjaɖɛ yɔɔ. Ɛlɛ Bibl heyiɣ-ɖʋ se ɖifeŋ tɔm susuu mbʋ. Pɩkɛnɩ yʋsaɣ ŋga kawɩlɩɣ se “Yehowa kɩyakʋ” caɣ paɣzʋʋ yɔ!

5. Ɛzɩma 1 Tesalooniiki mba 5:4-6 sɩɣnɩ-ɖʋ se ɖɩñɔɔzɩ ɖa-tɩ nɛ ɖɩɖaŋ “Yehowa kɩyakʋ”?

⁵ Kalɩ 1 Tesalooniiki mba 5:4-6. Tɔm ndʋ Pɔɔlɩ yɔɔdaa yɔ, tɩwɩlɩɣ-ɖʋ ɛzɩma ɖɩñɔɔzɩ ɖa-tɩ nɛ ɖɩɖaŋ “Yehowa kɩyakʋ” yɔ. Pɩwɛɛ se “ɖitaaɖou ɛzɩ lalaa yɔ.” Pɩwɛɛ se “ɖɩcaɣnɩ ɖɛ-ɛsa.” Kɩɖaʋ nakʋyʋ yɔ. Pɩwɛɛ se ɖɩcaɣnɩ ɖɛ-ɛsa nɛ ɖɩtaaɖʋ ɖɔ-nɔɔ ɛjaɖɛ yɔɔ politiki tɔm taa paa ññɩɩ. Ye ɖɩɖʋ ɖɔ-nɔɔ tɔm ndʋ tɩ-taa yɔ, pɩpɩzɩɣ piyele nɛ ɖɩpɩsɩ “ɛjaɖɛ yɔɔ mba.” (Yoh. 15:19) Ðɩnawa se Ɛsɔ Kewiyaɣ ɖeke kaɣnɩ kɔnʋʋ laŋhɛzɩyɛ ɛjaɖɛ yɔɔ.

6. (a) Ɛbɛ ɖɩsɔɔlaa se ɖɩsɩnɩ lalaa nɛ pala? (b) Nɛ ɛbɛ yɔɔ?

⁶ Pɩtasɩnɩ se pɩwɛɛ se ɖa-maɣmaɣ ɖɩcaɣnɩ ɖɛ-ɛsa lɛ, ɖɩsɔɔlaa ɖɔɖɔ se ɖɩsɩnɩ lalaa nɛ patɩlɩ mbʋ Bibl yɔɔdaa se pɩkaɣ labʋ ɛjaɖɛ yɔɔ yɔ. Ðɩtaasɔɔ se alɩwaatʋ ndʋ kʋñɔŋ sɔsɔʋ paɣzɩɣ yɔ, pɩɩkaɣ tasʋʋ sam se ɛyaa ɩpaɣzɩ Yehowa sɛʋ. Pʋyɔɔ pɩcɛyɩ kpem se ɖɩla tɔm susuu tʋmɩyɛ lɛɛlɛɛyɔ!c

ÑƐ-ƐSƖYƐ ƐSƐƐNƖ TƆM SUSUU

7. Ɛbɛ Yehowa sɔɔlaa se ɖɩla lɛɛlɛɛyɔ?

⁷ Alɩwaatʋ pazɩ ndʋ tɩkazaa se pʋcɔ nɛ Yehowa “kɩyakʋ” paɣzɩ yɔ, ɛsɔɔlaa se ɖɛ-ɛsɩyɛ ɛsɛɛnɩ tɔm susuu tʋmɩyɛ. Pɩpɔzaa se ɖɩwɛɛnɩ “tʋma sakɩyɛ Kɩbaɣlʋ tʋmɩyɛ taa.” (1 Kɔr. 15:58) Yesu kaayɔɔdɩ mbʋ pɩwɛɛ se ɖɩla yɔ pɩ-tɔm. Alɩwaatʋ ndʋ ɛyɔɔdɩ mbʋ mbʋ pɩkaɣ labʋ kɛdɛzaɣ kɩyakɩŋ taa yɔ pɩ-tɔm lɛ, ɛsɔzaa se: “Pɩtasɩ lɛ, pɩwɛɛ se pacalɩnɩ susuu tɔm kɩbandʋ ajɛɛ kpeekpe taa.” (Mark. 13:4, 8, 10; Mat. 24:14) Maɣzɩ nɛ ŋna: Alɩwaatʋ ndʋ payɩ ŋlɩɣ tɔm susuu yɔ, ŋwɛɛ nɛ ŋɖʋʋ nesi se Bibl taa natʋ tɔm ndʋ tɩla!

8. Ɛzɩma Kewiyaɣ tɔm susuu tʋmɩyɛ wɛɛ nɛ ɖɩɖɛɣnɩ ɛsɩndaa?

⁸ Suwe ɖɩpɩzɩɣ nɛ ɖɩyɔɔdɩ ɛzɩma Kewiyaɣ tɔm susuu tʋmɩyɛ wɛɛ nɛ ɖɩɖɛɣnɩ ɛsɩndaa yɔ pɩ-yɔɔ? Paa pɩnaɣ ŋga lɛ, tʋmɩyɛ nɖɩ ɖɩwɛɛ nɛ ɖiwokini ɛsɩndaa. Kɩɖaʋ nakʋyʋ yɔ. Maɣzɩ ɛzɩma Kewiyaɣ tɔm susuyaa wɛɛ pohukuu kɛdɛzaɣ kɩyakɩŋ taa yɔ pɩ-yɔɔ nɛ ŋna! Pɩnaɣ 1914 taa, tɔm susuyaa kaakpɛndɩ 5155 ajɛɛ 43 taa. Sɔnɔ, tɔm susuyaa ɛzɩ miiliyɔɔwaa lutozo nɛ hɔɔlʋʋ mbʋ yɔ wɛnɩ ajɛɛ 240 taa! Paa mbʋ yɔ, ɖa-tʋmɩyɛ tɩtɛmta. Pɩwɛɛ se ɖiwolo pɩ-yɔɔ nɛ ɖisusuu se Ɛsɔ Kewiyaɣ ɖeke kaɣnɩ hɩzʋʋ ɛyaa kʋñɔmɩŋ kpeekpe.—Keɣa 144:11-13.

9. Ɛbɛ yɔɔ pɩwɛɛ se ɖiwolo pɩ-yɔɔ nɛ ɖisusuu Kewiyaɣ tɔm?

⁹ Ðɩwɛɣ Kewiyaɣ tɔm susuu tʋmɩyɛ labʋ yɔɔ pɩkɔɔ pɩsɩɩnɩ alɩwaatʋ ndʋ Yehowa tɔŋ se pɩmaɣaa yɔ. Alɩwaatʋ ɛzɩma pɩkazaa se ɛyaa ɩkpɛlɩkɩ nɛ patɩlɩ Yehowa Ɛsɔ nɛ Yesu Krɩstʋ? (Yoh. 17:3) Ðɩɩsɩŋ. Ɛlɛ ɖɩsɩma se pʋcɔ nɛ kʋñɔŋ sɔsɔʋ paɣzɩ lɛ, ɛyaa “mba payɩ paawɛnɩ laŋa kɩbana se pehiɣ wezuu maatɛŋ yɔ,” papɩzɩɣ nɛ pamʋ tɔm kɩbandʋ nɛ palɩzɩ se pɛsɛɣ Yehowa. (Tʋma 13:48) Ɛzɩma ɖɩpɩzɩɣ nɛ ɖɩsɩnɩ ɛyaa mba pʋcɔ nɛ alɩwaatʋ ndʋ tɩtalɩ?

10. Ɛbɛ Yehowa ha-ɖʋ se pɩsɩnɩ-ɖʋ nɛ ɖɩwɩlɩ ɛyaa toovenim?

¹⁰ Yehowa tɩŋɩɣnɩ ɛ-ɛgbɛyɛ yɔɔ nɛ ɛhaɣ-ɖʋ mbʋ payɩ pɩpɔzʋʋ-ɖʋ se ɖɩwɩlɩnɩ ɛyaa toovenim yɔ. Kɩɖaʋ nakʋyʋ lɛ falɩsʋʋ mbʋ ɖɩmʋʋ kpɩtaŋ tɩŋa kpɩtaʋ hɛkʋ taa kediɣzaɣ taa yɔ. Kediɣzaɣ ŋga kasɩɣnɩ-ɖʋ se ɖɩtɩlɩ tɔm ndʋ ɖɩpɩzɩɣ nɛ ɖɩyɔɔdɩ alɩwaatʋ ndʋ ɖɩcalɩɣ ɛyʋ katʋʋ yaa ɖɩlakɩ pɩsɩ nɛ ŋna-ɩ yɔ. Nɛ kawɩlɩɣ-ɖʋ ɛzɩma ɖɩpɩzɩɣ nɛ ɖɩkpɛlɩkɩnɩ ɛyaa Bibl yɔ. Yehowa ɛgbɛyɛ lɩzɩ ɖɔɖɔ wondu ndɩ ndɩ nɛ tɩwɛɛ Tɔm wɩlʋʋ wondu ndʋ ɖɩlakɩnɩ tʋmɩyɛ yɔ tɩ-taa. Wondu ndʋ tɩsɩɣnɩ-ɖʋ se . . .

• ɖa nɛ ɛyaa ɖɩpaɣzɩ kɛdaɣ labʋ,

• ɖɩhɔ ɛyaa lɩmaɣza,

• ɖiseɣti ɛyaa nɛ pɔsɔɔlɩ se patɩlɩ nɛ pɩkpaɖɩ,

• ɖɩwɩlɩ ɛyaa toovenim,

• ɖɩyaa laŋa kɩbana tɩnaa se powolo ɖɛ-tɛ intɛrnɛɛtɩ lone yɔɔ nɛ ɖe-Kewiyaɣ Kpaamɩŋ taa.

Pɩkɛ toovenim se wondu ndʋ tɩ-wɛnʋʋ ɖeke tɩmaɣ. Pɩwɛɛ se ɖɩlabɩnɩ-tʋ tʋmɩyɛ.d Kɩɖaʋ nakʋyʋ yɔ: Ye ña nɛ nɔɔyʋ ɩlabɩ kɛdaɣ camɩyɛ nɛ ŋna se pɩkɛdɩnɩ-ɩ nɛ ŋha-ɩ traktɩ yaa fenaɣ fenaɣ takayaɣ nakɛyɛ yɔ, pɩsɩɣnɩ-ɩ nɛ ɛkalɩ ka-taa tɔm pʋcɔ nɛ ŋpɩsɩ ɛ-cɔlɔ. Ða-maɣmaɣ ɖa-sʋʋtʋ pɩkɛnaa se paa fenaɣ ŋga lɛ ɖɛ-ɛsɩyɛ ɛsɛɛnɩ Kewiyaɣ tɔm susuu.

11. Ɛbɛ yɔɔ palɩzɩ intɛrnɛɛtɩ yɔɔ Bibl kpɛlɩkʋʋ tɔm ñʋŋ?

¹¹ Pɩsa nɛ ŋtɩlɩ nʋmɔʋ lɛɛkʋ ŋgʋ kɩ-yɔɔ Yehowa tɩŋɩɣna nɛ ɛsɩɣnɩ ɛyaa se pɛkpɛlɩkɩ toovenim yɔ lɛ, kalɩ intɛrnɛɛtɩ yɔɔ Bibl kpɛlɩkʋʋ tɔm ñʋŋ weyi ɩwɛ jw.org^®. yɔɔ yɔ. Ɛbɛ yɔɔ palɩzɩ tɔm ñʋŋ ɛnɩ? Paa fenaɣ ŋga, ɛyaa kudokiŋ sakɩyɛ woki intɛrnɛɛtɩ yɔɔ se patɩlɩ Bibl taa tɔm. Tɔm ñʋŋ weyi ɩwɛ ɖɛ-tɛ intɛrnɛɛtɩ lone yɔɔ yɔ, ɩpɩzɩɣ nɛ ɩsɩnɩ ɛyaa mba nɛ pɛkpɛlɩkɩ Bibl taa toovenim tɔm. Ɛyaa mba ŋkatɩɣ yɔ, pɩpɩzɩɣ nɛ pɩwɛɛ pa-taa nabɛyɛ fɛyɛ se petisi se nɔɔyʋ ɛkpɛlɩkɩnɩ-wɛ Bibl. Ye mbʋ yɔ, wɩlɩ-wɛ mbʋ papɩzɩɣ nɛ pana ɖɛ-tɛ intɛrnɛɛtɩ lone yɔɔ yɔ, yaa tiyini-wɛ tɔm ñʋŋ ɛnɩ ɩ-tɛ lien.e

12. Ɛbɛ ɛyʋ pɩzɩɣ nɛ ɛkpɛlɩkɩ intɛrnɛɛtɩ yɔɔ Bibl kpɛlɩkʋʋ tɔm ñʋŋ taa?

¹² Ðɛ-tɛ intɛrnɛɛtɩ yɔɔ Bibl kpɛlɩkʋʋ tɔm ñʋŋ yɔɔdʋʋ “Bibl nɛ weyi ɛ-cɔlɔ kɩlɩnaa yɔ,” “Ɛyaa mba pɔ-tɔm Bibl yɔɔdʋʋ yɔ,” nɛ “Lidaʋ tɔm ndʋ tɩwɛ Bibl taa yɔ” pɩ-tɔm. Ɛyaa pɩzɩɣ nɛ patɩŋnɩ tɔm ñʋŋ ɛnɩ ɩ-yɔɔ nɛ pɛkpɛlɩkɩ nɛ patɩlɩ:

• Ɛzɩma Bibl pɩzɩɣ nɛ kɩsɩnɩ ɛyʋ yɔ

• Weyi Yehowa, Yesu nɛ Ɛsɔ tiyiyaa kɛnaa yɔ

• Mbʋ pʋyɔɔ Ɛsɔ lɩzɩ ɛyaa yɔ

• Mbʋ pʋyɔɔ kʋñɔmɩŋ nɛ kɩdɛkɛdɩm pɛwɛɛ yɔ

Tɔm ñʋŋ ɛnɩ ɩyɔɔdʋʋ ɖɔɖɔ ɛzɩma Yehowa kaɣ . . .

• labʋ nɛ kʋñɔmɩŋ nɛ sɩm pasɩɩ tɩnaɣ yɔ

• fezuu sɩɖaa, nɛ

• ɛlɛɣzɩ ɛyaa kominawaa lone taa Ɛsɔ Kewiyaɣ yɔ.

13. Ɛzɩ intɛrnɛɛtɩ yɔɔ tɔm ñʋŋ lɛɣzɩɣ ɖʋtʋ ndʋ palaba se pɛkpɛlɩkɩɣnɩ ɛyaa Bibl yɔ ti-lone taa? Lɩzɩ pɩ-taa.

¹³ Intɛrnɛɛtɩ yɔɔ tɔm ñʋŋ ɩɩlɛɣzɩɣ ɖʋtʋ ndʋ palaba se pɛkpɛlɩkɩɣnɩ ɛyaa Bibl yɔ ti-lone taa. Yesu ha-ɖʋ waɖɛ se ɖɩla tɔmkpɛlɩkɩyaa. Ðɩtaɣ liu se laŋa kɩbana tɩnaa kaɣ wobu nɛ pakalɩ intɛrnɛɛtɩ yɔɔ tɔm ñʋŋ. Ðɩtaɣ liu ɖɔɖɔ se tɩkɛdɩɣnɩ-wɛ nɛ pañɩnɩ se patɩlɩ nɛ pɩkɩlɩ. Ye mbʋ yɔ, pɩtɩla pakaɣ tisuu se pɛkpɛlɩkɩnɩ-wɛ Bibl. Paa tɔm ñʋʋ ŋgʋ kɩ-ɖɩdɛnɖɛ lɛ, peseɣtiɣ kalɩyʋ se ɛpɔzɩ nɛ nɔɔyʋ kpɛlɩkɩnɩ-ɩ Bibl. Pɩtɩŋnɩ ɖɛ-tɛ intɛrnɛɛtɩ lone yɔɔ lɛ, paa ɖooye ɛyaa mba pɔpɔzʋʋ se pɛkpɛlɩkɩnɩ-wɛ Bibl ɛjaɖɛ kpeekpe yɔɔ yɔ, pɛcɛzɩ 230 mbʋ yɔ! Ðʋtʋ ndʋ palaba se pɛkpɛlɩkɩnɩ paa ɛyʋ weyi yɔ, tɩ-tɔm cɛyaa!

ÑAƔ PANA NƐ TƆMKPƐLƖKƖYAA LABƲ

14. (a) Paɣtʋ ndʋ Yesu ɖʋwa nɛ pama-tʋ Maatiyee 28:19, 20 taa yɔ, tiseɣtiɣ-ɖʋ se ɖɩñaɣ pana nɛ ɖɩla we? (b) Nɛ ɛbɛ yɔɔ?

¹⁴ Kalɩ Maatiyee 28:19, 20. Alɩwaatʋ ndʋ ɖɩkpɛlɩkɩɣnɩ ɛyaa Bibl yɔ, pɩwɛɛ se ɖɩñaɣ pana nɛ ‘ɖɩla ɛyaa nɛ papɩsɩ tɔmkpɛlɩkɩyaa nɛ ɖɩwɩlɩ-wɛ nɛ pɔɖɔ tɔm ndʋ payɩ Yesu wɩlaa yɔ tɩ-yɔɔ.’ Pɩwɛɛ se ɖɩsɩnɩ ɛyaa nɛ pana mbʋ pʋyɔɔ pɩcɛyaa se pɛsɛɛ Yehowa nɛ paɖʋ e-Kewiyaɣ nesi yɔ. Pʋ-tɔbʋʋ se ɖɩñaɣ pana nɛ ɖiseɣti ɛyaa nɛ pɔɖɔ toovenim tɔm ndʋ pɛkpɛlɩkaa yɔ tɩ-yɔɔ nɛ paha pa-tɩ Yehowa nɛ pamɩyɩsɩ-wɛ lɩm. Pi-yeke pɩpɩzɩɣna nɛ pɩya pa-ñʋʋ Yehowa kɩyakʋ wiye.—1 Pɩy. 3:21.

15. (a) Ɛbɛ pɩtɩpɔzɩ se ɖɩwɛɛkɩ ɖa-alɩwaatʋ nɛ ɖɩlakɩ? (b) Nɛ ɛbɛ yɔɔ?

¹⁵ Ɛzɩ ɖɩyɔɔdʋʋ nɛ pɩɖɛɛ yɔ, alɩwaatʋ pazɩ yem pɩkazaa se ɛjaɖɛ yɔɔ ɖʋtʋ tɛm ɛtalɩ. Pʋyɔɔ lɛ, pɩfɛyɩ se ɖɩwɛɛkɩ ɖa-alɩwaatʋ nɛ ɖɩkpɛlɩkɩɣ Bibl nɛ ɛyaa mba paawɩlɩɣ kpayɩ se pɔsɔɔlaa se papɩsɩ Krɩstʋ tɔmkpɛlɩkɩyaa yɔ. (1 Kɔr. 9:26) Pɩwɛɛ se ɖɩla ɖa-tʋmɩyɛ kpɛdɛyɛ! Ɛyaa sakɩyɛ wɛɛ nɛ pɩpɔzʋʋ se posusi-wɛ Kewiyaɣ tɔm pʋcɔ nɛ alɩwaatʋ ndʋ tɩtalɩ.

POSI ÑA-TƖ NƐ MBƲ PAYƖ PƖLABƖ NƆƆ KƲÐƲMAƔ NƐ CƐTƖM ƐSƆ SƐTƲ YƆ

16. Ɛzɩ Natʋ 18:2, 4, 5, 8 yɔɔdʋʋ yɔ, ɛbɛ pɩwɛɛ se ɖa-tɩŋa ɖɩla? (Kalɩ ɖɔɖɔ pɩ-tɛɛ tɔm.)

¹⁶ Kalɩ Natʋ 18:2, 4, 5, 8. Masɩ sɩnɛ, sɩwɩlɩɣ mbʋ Yehowa sɔɔlaa ɖɔɖɔ se ɛ-sɛyaa ɩla yɔ. Pɩwɛɛ se Krɩstʋ ñɩma toovenim mba tɩŋa iposi pa-tɩ nɛ mbʋ payɩ pɩlabɩ nɔɔ kʋɖʋmaɣ nɛ Babilɔɔnɩ sɔsɔʋ yɔ. Pʋtɔma, pʋcɔ nɛ nɔɔyʋ kpɛlɩkɩɣ Bibl lɛ, ɛɛwɛ cɛtɩm Ɛsɔ sɛtʋ ɛgbɛyɛ naɖɩyɛ taa. Pʋtɔma ewokaɣ pɛ-Ɛsɔ sɛtʋ taa nɛ ɛ nɛ wɛ palakɩ pa-tʋma. Yaa pʋtɔma ɖɔɖɔ yɔ, ɛcɔwaɣ liidiye se pɩsɩnɩ ɛgbɛyɛ nɖɩ. Pʋcɔ nɛ paha Bibl kpɛlɩkɩyʋ nɔɔyʋ waɖɛ se ɛpɩsɩ tɔm susuyu patɩmɩyɩsɩtɩ-m lɩm lɛ, pɩwɛɛ se ɛcɛ mbʋ payɩ pɩlakɩ nɔɔ kʋɖʋmaɣ nɛ cɛtɩm Ɛsɔ sɛtʋ yɔ. Pɩwɛɛ se ɛma-wɛ takayaɣ nɛ eheyi-wɛ se ɛlɩ pa-taa, yaa ɛcɛ mbʋ payɩ pɩlakɩ nɔɔ kʋɖʋmaɣ nɛ cooci ŋgʋ, nɛ agbaa wena alabɩ nɔɔ kʋɖʋmaɣ nɛ Babilɔɔnɩ sɔsɔʋ yɔ.f

17. (a) Tʋma wena pɩwɛɛ se Krɩstʋ tʋ ekizi? (b) Nɛ ɛbɛ yɔɔ?

¹⁷ Pɩwɛɛ se Krɩstʋ tʋ toovenim tʋ ɛtazɩ camɩyɛ nɛ ɛna se nɔɔ kʋɖʋmaɣ nakɛyɛ fɛyɩ tʋmɩyɛ nɖɩ ɛlakɩ yɔ nɛ Babilɔɔnɩ sɔsɔʋ pɛ-hɛkʋ taa yaa we. (2 Kɔr. 6:14-17) Pɩfɛyɩ ɖeu se Krɩstʋ tʋ ɛkɛ cooci nakʋyʋ tʋmlaɖʋ. Ðɔɖɔ lɛ, Krɩstʋ tʋ weyi tʋmɩyɛ ɛgbɛyɛ naɖɩyɛ mʋ-ɩ tʋmɩyɛ yɔ, pɩfɛyɩ se etisi nɛ ɛla tʋma wena aseɣtiɣ cɛtɩm Ɛsɔ sɛtʋ yɔ. Nɛ ye ɛ-maɣmaɣ ɛtʋlɩnɩ tʋmɩyɛ naɖɩyɛ yɔ, pɩtʋʋ fɛyɩ se ɛɛkaɣ tisuu se Babilɔɔnɩ sɔsɔʋ ɛcɛlɩ-ɩ tʋmɩyɛ naɖɩyɛ nɛ ɛla. Ɛbɛ yɔɔ ɖɩsɛtɩɣ ɖa-tɩ tɔm mbʋ? Mbʋ pʋyɔɔ yɔ, ɖɩtɩsɔɔlɩ se ɖɩɖʋ nesi cɛtɩm wɩlɩtʋ nɛ lakasɩ kɩdɛkɛdɩsɩ nzɩ cɛtɩm Ɛsɔ sɛtʋ agbaa lakɩ nɛ sɩkɛ azuluma pʋyʋ Ɛsɔ ɛsɩndaa yɔ.—Iza. 52:11.g

18. Ɛzɩma koobu nɔɔyʋ ɖɔm Bibl paɣtʋ kila yɔɔ ɛ-tʋmɩyɛ labʋ taa?

¹⁸ Ðɩyɔɔdɩ koobu ɛzʋtʋyʋ nɔɔyʋ tɔm; ɛkɛ kafɩnda nɛ ɛtʋlɩ ɛ-maɣmaɣ ɛ-tʋmɩyɛ. Pɩlakɩ pɩnzɩ nasɩyɩ yɔ, tʋmɩyɛ ñʋʋdʋ nɔɔyʋ pɔzɩ-ɩ se ɛla kafɩnda tʋmɩyɛ cikpeɖe naɖɩyɛ cooci ŋgʋ kɩwɛ koobu ɛnʋ ɛ-tɛtʋ taa yɔ. Tʋmɩyɛ ñʋʋdʋ ɛnʋ ɛɛnawa se koobu ɛnʋ ekiziɣ tam se ɛɛlakɩ tʋmɩyɛ coocinaa taa. Ɛlɛ alɩwaatʋ ndʋ tɩ-taa lɛ, tʋmɩyɛ ñʋʋdʋ ɛnʋ ɛtɩpɩzɩ nɛ ehiɣ nɔɔyʋ se ɛla tʋmɩyɛ nɖɩ. Paa mbʋ yɔ, koobu ɛnʋ ɛñɔnɩ Bibl paɣtʋ kila nɛ ekizi tʋmɩyɛ nɖɩ. Kpɩtaʋ lɛɛkʋ taa lɛ, pawɩlɩ kafɩnda lɛlʋ tɛ foto tɛtʋ ndʋ tɩ-tɛ tɔm susuu takayaɣ taa; eɖiɣni kam kaamaŋgaɣ cooci ŋgʋ kɩ-yɔɔ. Ye ɖo-koobu ɛtaañɔɔnɩ Bibl paɣtʋ kila yɔ, ɛ-tɛ foto kaawɛnɩ takayaɣ ŋga ka-taa. Maɣzɩ nɛ ŋna ɛzɩma pɩɩpɩzaɣ se pipisi koobu ɛnʋ ɛ-hɩɖɛ e-koobiya Krɩstʋ ñɩma lalaa hɛkʋ taa yɔ! Maɣzɩ ɖɔɖɔ nɛ ŋna ɛzɩma pɩɩlabɩ Yehowa yɔ.

SUWE ÐƖKPƐLƖKAA?

19-20. (a) Ɛbɛ ɖɩkpɛlɩkaa? (b) Ɛbɛ ɖɔɖɔ pɩwɛɛ se ɖɩtasɩ kpɛlɩkʋʋ?

¹⁹ Bibl wɩlɩɣ se pɩkazɩ pazɩ lɛ, natʋ tɔm sɔsɔtʋ ndʋ tɩkaɣ labʋ ɛjaɖɛ yɔɔ yɔ, ndʋ lɛ tɔm ndʋ ajɛɛ kaɣ susuu se “laŋhɛzɩyɛ nɛ pɛɛyɛ” wɛɛ yɔ. Ɛzɩ Yehowa heyuu-ɖʋ yɔ, ɖɩnawa se ajɛɛ ɩɩkaɣ pɩzʋʋ nɛ akɔnɩ laŋhɛzɩyɛ nɖɩ ɖɩwɛɣ tam yɔ. Ɛbɛ pɩwɛɛ se ɖɩla pʋcɔ nɛ alɩwaatʋ ndʋ tɩtalɩ, nɛ pʋcɔ nɛ ɖɩzʋʋ talɩ tuda? Yehowa sɔɔlaa se ɖɛ-ɛsɩyɛ ɛsɛɛnɩ Kewiyaɣ tɔm susuu tʋmɩyɛ nɛ ɖɩñaɣ pana nɛ ɖɩla tɔmkpɛlɩkɩyaa nɛ pɩkpaɖɩ. Alɩwaatʋ kʋɖʋmtʋ ndʋ tɩ-taa ɖɔɖɔ lɛ, pɩwɛɛ se ɖiposi ɖa-tɩ nɛ cɛtɩm Ɛsɔ sɛtʋ agbaa tɩŋa. Pʋ-tɔbʋʋ se ye ɖɩɩwɛ cɛtɩm Ɛsɔ sɛtʋ ɛgbɛyɛ naɖɩyɛ taa yɔ, ɖɩlɩzɩ ɖa-tɩ ɖɩ-taa nɛ ɖikizi labʋ tʋma wena alakɩ nɔɔ kʋɖʋmaɣ nɛ Babilɔɔnɩ sɔsɔʋ yɔ.

²⁰ Nabʋyʋ kaɣ tasʋʋ labʋ “kɛdɛzaɣ kɩyakɩŋ” ɖɩdɛnɖɛ alɩwaatʋ taa. Yehowa sɔɔlaa se ɖɩla nabʋyʋ ɖɔɖɔ. Ɛbɛ kaɣ tasʋʋ labʋ nɛ ɛbɛ Yehowa sɔɔlaa se ɖɩla? Nɛ piileɖiɣ lɛ nabʋyʋ kaɣ labʋ; ɛzɩma ɖɩpɩzɩɣ ɖɩñɔɔzɩ ɖa-tɩ nɛ ɖɩɖaŋ mbʋ payɩ pɩkaɣ labʋ yɔ? Ðɩkaɣ yɔɔdʋʋ pɩ-tɔm tɔm ñʋʋ ŋgʋ kɩkɔŋ yɔ kɩ-taa.