Ŋŋsɩm-tʋ?

Ɛbɛ yɔɔ caanaʋ taa Izrayɛɛlɩ piya hɛyaɣ mbʋ pɔpɔzʋʋnɩ pɛlɛ yɔɔ yɔ?

BIBL alɩwaatʋ taa, pɛhɛyaɣ mbʋ pɔpɔzʋʋnɩ pɛlɛ yɔɔ yɔ pɛlɛ hɔʋ taa ñɩma alɩwaatʋ ndʋ abalɩbɩɣa hɔʋ taa ñɩma nɛ halɩbɩɣa hɔʋ taa ñɩma panɩɣnɩ ɖama se pa-pɩyalʋ nɛ pɛ-pɛlɛ pɔɖɔkɩ nesi yɔ. Mbʋ pɛhɛyaɣ se pɔpɔzɩnɩ pɛlɛ yɔɔ yɔ, pɩpɩzaɣ se pɩkɛ wondu ndʋ tɩmʋ ñɩm yɔ, kpɩna, yaa liidiye. Nabʋyʋ taa, nɔɔyʋ pɩzɩɣ nɛ ɛla tʋmɩyɛ se ɛhɛyɩnɩ pɛlɛ yɔɔ ɛzɩ Yakɔɔb kaatisuu nɛ ɛla tʋmɩyɛ Rasɛɛlɩ caa pɩnzɩ lʋbɛ se pɩsa nɛ ɛkpaɣ Rasɛɛlɩ yɔ. (Kiɖe 29:17, 18, 20) Kaɖʋwa ŋga yɔɔ pɛhɛyaɣ mbʋ pɔpɔzʋʋnɩ pɛlɛ yɔɔ yɔ?

Bibl taa tazɩyʋ Carol Meyers yɔɔdaa se: “Mbʋ pɛhɛyaɣ se pɔpɔzɩnɩ pɛlɛ yɔɔ yɔ, pɩpɩzaɣ se pɩlɛɣzɩ tʋmɩyɛ nɖɩ pɛlɛ lakaɣ ɛ-hɔʋ taa yɔ ɖi-lone taa; nɛ pɩ-tɔm kaacɛyɩ hɔŋ weyi ɩ-taa mba kaakɛ haɖaa yɔ ɩ-ɛsɩndaa.” Mbʋ pɛhɛyaɣ se pɔpɔzɩnɩ pɛlɛ yɔɔ yɔ, pɩpɩzaɣ ɖɔɖɔ se pɩcɛyɩsɩ taabalɩyɛ nɖɩ ɖɩwɛ hɔŋ ɛnɩ ɩ-naalɛ ɩ-hɛkʋ taa yɔ. Hɔŋ ɛnɩ ɩpɩzaɣ se ɩsɩnɩ ɖama kaɖɛ alɩwaatʋ taa. Pɩtasɩ lɛ, mbʋ pɛhɛyaɣ se pɔpɔzɩnɩ pɛlɛ yɔɔ yɔ, pɩwɩlɩɣ se pɛlɛ ɛɛtasɩɣ wɛʋ ɛ-caa tɛɛ, ɛlɛ ɛlɩɣ nɛ ewolo ɛ-walʋ tɛ se ɛlɛ ɛcɔnɩ ɛ-yɔɔ nɛ ɛkandɩyɩ ɛ-yɔɔ.

Mbʋ pɛhɛyaɣ se pɔpɔzɩnɩ pɛlɛ yɔɔ yɔ pɩɩwɩlɩɣ se halʋ pɩsɩ wonuu ŋgʋ payakɩ yaa pɛpɛdɩɣ yɔ. Takayaɣ ŋga payaɣ se Les institutions de l’Ancien Testament yɔ kɔyɔɔdaa se: “Toovenim taa lɛ, liidiye yaa wondu lɛɛtʋ ndʋ pɛhɛyaɣ pɛlɛ hɔʋ taa ñɩma yɔ, piyeba nɛ Izrayɛɛlɩ taa nesi ɖɔkʋʋ wɛɛ ɛzɩ mbʋ payakɩ yɔ. Ɛlɛ pɩwɛ ɛzɩ mbʋ pɛhɛyaɣ se pɔpɔzɩnɩ pɛlɛ yɔɔ yɔ, pakpakaɣ-pʋ ɛzɩ kʋjɔʋ ŋgʋ palakɩ pɛlɛ hɔʋ taa ñɩma yɔ, nɛ pɩtaakɛ mbʋ payakɩnɩ halʋ yɔ.”

Sɔnɔ, sɔnzɩ nzɩ sɩkpɛndɩ sɩwɛ ajɛɛ naayɛ taa; ɛyaa woki pɩ-yɔɔ nɛ pɛhɛyɩɣ mbʋ pɔpɔzʋʋnɩ pɛlɛ yɔɔ yɔ. Alɩwaatʋ ndʋ lʋlɩyaa Krɩstʋ ñɩma pɔzʋʋ mbʋ pɛhɛyɩɣ se pɔpɔzɩnɩ pɛlɛ yɔɔ yɔ, ye paapɔzʋʋ nɛ pɩcɛzɩɣ mbʋ pɩpɔzʋʋ yɔ pɩ-yɔɔ yɔ, peyeki nɛ ‘ɛyaa tɩŋa tɩlɩ se pɛkɛ mba panɩɣ tɔm taa yɔ.’ (Fil. 4:5; 1 Kɔr. 10:32, 33) Ye palakɩ mbʋ yɔ, pawɩlɩɣ se patɩkɛ ‘liidiye sɔɔlɩyaa’ nɛ pɛfɛyɩnɩ ɛsa naɣ naɣ. (2 Tim. 3:2) Pɩtasɩ lɛ, alɩwaatʋ ndʋ lʋlɩyaa ɩɩpɔzʋʋ mbʋ pɔpɔzʋʋnɩ pɛlɛ yɔɔ yɔ nɛ pɩkɩlɩ ɖɔʋ yɔ, pɩɩkaɣ kɛnʋʋ kɩjɛyʋʋ abalʋ weyi ɛcaɣ nesi ɖɔkʋʋ yɔ se etuzi nesi ɖɔkʋʋ nɛ ɛsɩndaa se pɩsa nɛ ɛñɩnɩ liidiye sakɩyɛ se pʋcɔ nɛ ɛkɔɔ nɛ ɛhɛyɩ mbʋ pɔpɔzʋʋnɩ pɛlɛ yɔɔ yɔ. Yaa pɩɩkaɣ-ɩ kɛnʋʋ kɩjɛyʋʋ se eyele nʋmɔʋ lɩzʋʋ tʋmɩyɛ nɛ ewolo ɛla tomnaɣ yɔɔ tʋmɩyɛ alɩwaatʋ tɩŋa se pɩsa nɛ ehiɣ liidiye sakɩyɛ nɛ ɛhɛyɩ mbʋ pɔpɔzʋʋnɩ pɛlɛ yɔɔ yɔ.

Ɛjaɖɛ hɔɔlɩŋ nɩɩyɩ taa lɛ, komina pɛlɩɣnɩ mbʋ pɔpɔzʋʋnɩ pɛlɛ yɔɔ yɔ. Ðenɖe pɩwɛ mbʋ yɔ, pɩwɛɛ se lʋlɩyaa mba pɛkɛ Krɩstʋ ñɩma yɔ, paña paɣtʋ ndʋ. Ɛbɛ yɔɔ? Ɛsɔtɔm yɔɔdʋʋ se pɩpɔzʋʋ se Krɩstʋ ñɩma ‘iluzi pa-tɩ ñʋndɩnaa sɔsaa tɛɛ’ nɛ paña paɣtʋ ndʋ tɩɩkaɖɩɣnɩ Ɛsɔ paɣtʋ yɔ.—Roma 13:1; Tʋma 5:29.