Ku Batsha mu Zwimo Zwa ka Sima ne 2022—Ludo Gwe Buzwalani gu no Boneka

Baibili ya ka lebela mbeli kuti mazhuba a ngwenu a nowo boneka ne dzingwa, zunguzika kwe shango, magwele, kose ne zwingwe “zwinoshingikala zwinotjisa.” (Luka 21:10, 11) Matama iyawa e buporofiti a no dwilila e shingikadziwa mu gole le bushingili le 2022.a Ha ti lakidza, ku gwisana ku ku Ukraine kwa ka dzwilila ku si nga me, ne ama dzimiliyoni dze machilo e bathu. Bunji gwe dzishango dza ka dzi cha dwa mu pandemic ye COVID-19. Pezhugwi kwa ichecho, bathu banjinji ba ka amiwa ne dzingozi dze lubumbo dzi nonga ku zunguzika kwe shango ku Haiti ne matutu a ka be yapo ku Central America, Philippines ne ku southeastern Africa. Bafakazi ba Jehova ba ka batsha chini ba ka amiwa ne mathatha iyawa?

Mu gole le bushingili le 2022, gubungano ledu la ka batsha bathu ba ka amiwa mu dzingozi idzedzi dzili 200! Mari wose a ta ka shingisa mu ku batsha a nga bata P153 000 000.b Bona kuti mari a ka doneitiwa a ka shingisiwa chini ku batsha bathu ba ka amiwa mu dzingozi dzili mbili.

Ku Zunguzika Kwe Shango ku Haiti

Ne August 14, 2021, ku zunguzika kwe shango kwe bukulu gwe 7.2 magnitude kwa ka shingikala ku southern Haiti. Chi no hwisa zogwadza, Bafakazi batatu ba ka fa—boazwadzi bedu babili ne nzwalani wedu. Ba ka chila mu ku zunguzika ikoku kwe shango ba ka lingisana ne magwadzi e mbili kose ne ku hwa zogwadza mu mazwiwo kwa ka thamiwa ne ku zunguzika ikoku. Nzwalani u no dangwa kuyi Stephane a kati: “Mu turopo yose kwa ku na bathu banjinji ba ka fa kwa ka pelela ku na dzimbiganyo dze bathu mu viki ingwe ne ingwe mu mingwedzi i no pinda mibili.” Nzwalani nngwe u noyi, Éliézer, a kati: “Bafakazi banjinji ba ka ba sina buyizelo, zwiambalo, shangu, ne zwingwe zwithu zwe ntewo zwi no sheteka. Shule, banjinji ba ka tola mingwedzi minjinji ba na litshugo.”

Gubungano ledu la ka batsha ka bunako. Litabi gwe Haiti gwa ka dusa dzithani dzi no pinda 53 dze zojiwa, dzitente, dzi-tarpaulin, materasi, ne dzi-solar dzi no chajisa dzi-cell phone. Kakale, mu gole le bushingili le 2022, kwa ka bakiwa kene baakanyiwa ngumba dzi no pinda 100. Mari a no pinda P12 800 000 a ka shingisiwa mu ku batsha.

Bazwalani bedu ne dziazwadzi ba no bokela ichecho kwazo. Lorette a kati: “Ku zunguzika kwe shango kwa ka chinya choselele ngumba yedu ne bizinesi. Kwa ku si na cha ti no ja. Ngono gubungano la Jehofa la ka ma naswi li ka ti pa kose kwa ti no sheta.” Micheline a kati: “Ku zunguzika kwe shango kwa ka chinya pa nda ka ndi gala ne bakololo bangu babili. Nda ka ndi si nga zibe kuti ndi nga thamani ha isi ku tembezela ndi kumbila batsho koga, ngono Jehova wa ka ndi dabila e shingisa gubungano lile. Ngwenu ti na ngumba ya ka bakiwa zwibuyanana ya ti no gala mu ili. Nda ka zwimisila ku thama kose kwa ndi nga khona ku lakidza kuti ndo boka Jehova.”

Nshingo wedu we ku batsha wa ka bongwa ne bashingi ba hurumente. Darekitara we holo ye turopo hwulu ye L’Asile wa kati: “Ndo mu bokela ku be ma zha ka bunako ku wo batsha. Ndo mu tolela pezhugwi ne kuti mo tuta hurumente. Ndo shathisiwa ne kuti a mu to shaka mari koga. Ku thubukana na ichecho, mo shaka ku batsha bathu. Mo shinga ne ludo.”

Dutu Linoyi Ana la ka Chinya ku Malawi ne Mozambique

Ne January 24, 2022, dutu li noyi Ana la ka chinya ku Mozambique ku dwapo li be li nowo chinya ku west kwe Malawi. Dutu ileli la ka nesa vula i njinji ne dziphepo whulu—dza ka dzi yenda ne lubelo gu nga bata 100 kilometers ne awara (62 mph). La ka liga dzipala dze motakase, li ka senga maburogo, ne ku zhisa mirwalela mikulu.

Dutu ileli la ka ama Bafakazi ba no pinda 30 000 ku Malawi ne ku Mozambique. Nzwalani u noyi Charles, wa ka e thusa mu nshingo we ku batsha, wakati: “Nda kati ndi bona kuti bazwalani ba no sokola kungapani kakale ba ka ba lashikigwa kungapani, nda ka paluka moyo ne ku zwitoboka.” Chi no hwisa zogwadza wu kuti, zojiwanyana zwa ba ka be ba nadzo kose ne minda yabo kose kwa ka kwa sengiwa ne mirwalela. Banjinji ba ka lashikigwa ne dzingumba dzabo. Chino gwadza, nzwalani nngwe wa ka figwa ne nkadzi uwe kose ne bana babe be chikadzi batukununu bali babili, ba ka fa ha ngoro uno ba thusa u pitokila mu vula.

Dutu ileli la ka be li tshusa kwazo. Ne 1:00 a.m. ku Nchalo ku Malawi, nsha wa Sengeredo wa ka hwa ku wona kwe vula i no wunga i no tshusa. Njidzi mbili dza ka be dzili zhele dzi tebukana! Nzwalani Sengeredo wa ka pedza nkumbulo kuti ba bhude mu ngumba. Ya ka be ili nkumbulo wa ka lulwama ne kuti ka bunako koga murwalela wa ka liga ngumba. Zwithu zwabo zwa ka zwa chinyiwa kene zwa ka zwa sengiwa ne murwalela. Nsha iwoyo wa ka yenda ku Holo ye Bushe, kanjinji ku no ba no tola 30-minute ha be yenda ne makumbo be dwa ku ngumba ya bo. Ngono mu chibaka ichechi kwa ka ba tola dziawara dzili 2. Ba ka no swika bali ba nyolo kakale ba ka nyala, ngono ba ka bakililika.

Be litabi gwe Malawi ne litabi gwe Mozambique ka bunako ba ka tangisa nshingo we ku batsha. Ba ka pa ndaulo balingilili be poteleko ne bakugwana ku linga zwi no shetiwa ne bazwalani ba ka ba amiwa ne mirwalela ne ku ba pa zwa ba no sheta mu ku namata ne ku ba batsha mu mazwiwo. Dzikomiti njinji dze Disaster Relief (DRC) dza ka piwa nshingo we ku tungamila mu nshingo we ku batsha, ngono ka bunako dzikomiti idzedzi dza ka tangisa ku batsha bazwalani kuti ba bone zojiwa kose ne zwingwe zwi no sheteka. Mari a no pinda P421 000 a ka shingisiwa mu ku batsha bathu kakale mari a no pinda P3 800 000 a ka shingisiwa mu ku baakanya ne ku baka dzingumba kakale.

Dzikomiti dze DRC dza ka shingisa mari ne buchenjedu, ichecho chithu chikulu ne kuti zwithu zo tura kwazo. Ha ti lakidzila, mu mingwedzi ye kutanga ili 7 koga ye nshingo we ku batsha, dzi-price dze gwisa gwe chimanga—gu no shingisiwa kwazo ku Malawi—gwa ka paphidzika ku ngabe ne 70 percent. Dzi-price dze peterole dza ka paphidzika bo. Kuti ba boloke mari, bazwalani ba ka tenga zojiwa ne zwithu zwi no baka zwili zwinjinji mu ndawo ya ba no gala. Ku thama be jalo kwa ka thama kuti ba tapudzigwe dzi-price kakale ba sitongo ruela mari e transport a pezhugwi.

Nshingo we ku batsha wa ka kutha mimoyo ye bathu ba Jehova. Felisberto, nzwalani ku Mozambique, wakati: “A ndi thu a bona gubungano li no pa zwingapa, zwithu zwi nonga: zwi no baka, transport, bashingi ba no baka, zojiwa, ne ku tungamila ne ludo. Nshingo iwoyo we ku batsha chilakidzilo chi no boneka kwazo che ludo gu no thalusiwa na Jesu mu na Johani 13:34, 35.” Ester, nkadzi wa ka figwa ne nlume ku Malawi, wa ka chinyikigwa ne ngumba, wakati: “Nda ka be nda zwitoboka ne kuti nda ka be ndi sina chingwe cha ndi nga bakisa ngumba ingwe kakale nacho. Ndizo nda kati ndi bona bazwalani be zha be ndi bakila ingwe ngumba, nda ka zwiwa u ngati nda chi bo mu Paradaisi kale.”

Ha ti sedzelela ku shango ptshwa ya ta ka thembesiwa, ta ka lingilila ku bona ngozi dze lubumbo dzi paphidzika kwazo. (Matewu 24:7, 8) Ne kwaka jalo, to bokela zwipo zwenyu zwa mu no dusa ne moyonchena, to themba kuti bathu ba Jehova ba nowo piwa batsho ya ba no sheta. Zila ye ku dusa zwipo i no thalusiwa mu donate.jw.org. Tobokela ku be muli moyonchena.