Inda é inportanti djobe verdadi?

Bu ta atxa ma sta ta bira kada bês más difísil sabe kuzê ki é verdadi i kuzê ki é mintira? Ta parse ma gósi pesoas ta fika más konvensidu pa kel ki es ta xinti i ki es ta kridita na el di ki pa kel ki próvas ta mostra. Oji na mundu interu txeu algen ta kridita ma verdadi ka ta izisti.

Kel manera di pensa li é ka novu. Dja ten uns 2 mil anu ki Pónsiu Pilatus, ki éra governador di Roma, pergunta Jizus: “Kuzê ki é verdadi?” (Juan 18:38) Enbóra Pilatus ka staba ta spera un respósta, se pergunta éra inportanti. Respósta ki Bíblia ta da pode dexa-u kontenti i el pode djuda-u sabe kuzê ki é verdadi i kuzê ki é mintira na es mundu ki pesoas sta konfuzu sobri kel-li.

Verdadi ta izisti mê?

Sin. Bíblia ta uza palavra “verdadi” pa pâpia sobri kuzas ki ten bazi na próvas i tanbê sobri kuzê ki é dretu. Tanbê el ta inxina ma Jeováa Deus é Fonti di verdadi, i el ta txoma-l di ‘kel Deus di verdadi.’ (Salmo 31:5) Bíblia ten kel verdadi ki ta ben di Deus, i el ta konpara es verdadi ku lus, pamodi el ta gia-nu na meiu di tudu kel konfuzon ki sta na mundu oji. — Salmo 43:3; Juan 17:17.

Modi ki bu pode atxa verdadi?

Deus ka krê pa nu seta verdadi ki sta na Bíblia sen pensa. Envês di kel-li, el ta insentiva-nu pa nu uza nos kapasidadi di pensa pa djobe kes verdadi envês di kunfia na nos sentimentus. (Romanus 12:1) Jeová krê pa nu konxe-l i pa nu ama-l di “tudu [nos] menti” i el ta insentiva-nu pa nu prova nos kabésa ma kel ki nu prende na Bíblia é verdadi. — Mateus 22:37, 38; Atus 17:11.

Kenha ki inventa mintira?

Bíblia ta fla ma é Satanás ki é inimigu di Deus, ki inventa mintira, i el ta txoma-l di “pai di mintira.” (Juan 8:44) El konta Adon ku Eva mintiras sobri Deus. (Génesis 3:1-6, 13, 17-19; 5:5) Désdi kel ténpu, Satanás sta ta spadja mintiras i ta sukundi verdadi sobri Deus. — Apokalipse 12:9.

Pamodi ki oji txeu algen ta konta mintira?

Na es ténpu ki nu sta ta vive, ki Bíblia ta txoma di “ténpu di fin”, Satanás sta ta influensia i disvia pesoas kada bês más. Txeu bês pesoas ta konta mintira pa ingana otus algen i pa tra pruvetu di es. (2 Timótiu 3:1, 13) Tanbê oji maioria di relijion ta konta mintira. Sima Bíblia dja flaba, na nos ténpu pesoas ta “djobe instrutoris ki ta faze-s gósga na obidu”, i es ta skodje “dexa di obi verdadi”. — 2 Timótiu 4:3, 4.

Pamodi ki verdadi é inportanti?

Pesoas meste pâpia verdadi pa es pode kunfia na kunpanheru. Nu ka ta pode ten bons amizadi i un sosiadadi fórti si nu ka ta kunfia na kunpanheru. Bíblia ta fla ma Deus krê pa nos adorason ten bazi na verdadi. Bíblia ta fla: “Kes ki ta adora [Deus] ten ki adora-l ku spritu i verdadi.” (Juan 4:24) Pa sabe modi ki verdadi ki sta na Bíblia pode djuda-u sabe kal ki é kes mintira ki relijion falsu ta inxina i ka dexa kes mintira kontrola más bu vida, lé alguns artigu ki sta na kel Sentinéla ku téma “Mintiras ki ka ta dexa pesoas ama Deus”.

Pamodi ki Deus krê pa N konxe verdadi?

Deus krê pa bu vive pa tudu ténpu. Pa faze kel-la, bu meste prende verdadi sobri el. (1 Timótiu 2:4) Si bu konxe kes prinsípiu di Deus sobri kuzê ki é dretu i kuzê ki é mariadu i bu vive sima el ta fla, bu ta ten un amizadi fórti ku el. (Salmo 15:1, 2) Pa djuda pesoas prende verdadi, Deus manda Jizus pa téra. Deus krê pa nu obi ku kel ki Jizus inxina. — Mateus 17:5; Juan 18:37.

Deus ta ben kaba ku mintira?

Sin. Deus ta ôdia óras ki algen ta konta mintira pa tra pruvetu di otus algen. El promete ma el ta ben distrui kes ki skodje kontinua ta konta mintira. (Salmo 5:6) Óras ki Deus ben faze kel-li, el ta kunpri kel promésa ki el faze: ‘Bóka ki ta pâpia verdadi ta dura pa tudu ténpu’. — Provérbios 12:19.