Juan

5 Chirix chik aʼin kiwank xninqʼehebʼ laj judiiy, ut li Jesús kitaqeʼk Jerusalén. 2 Joʼkan bʼiʼ, aran Jerusalén, chixkʼatq li Rokebʼaal ebʼ li Karneer, wank jun li tzʼakanbʼil haʼ li nakʼabʼaʼiik saʼ aatinobʼaal hebreo Betzata. Chire li tzʼakanbʼil haʼ aʼin wank oobʼ li bʼe li wank xmu.* 3 Saʼ li naʼaj aʼin yokyokebʼ naabʼalebʼ li yaj, ebʼ li mutzʼ, ebʼ li yeq roq ut ebʼ li qas qiitzʼin li inkʼaʼ nekeʼekʼank jun li roq malaj jun li ruqʼ. 4 * 5 Ut aran wank jun li winq li 38 chihabʼ rokik xyajel. 6 Naq li Jesús kiril chi yokyo li winq ut kixnaw naq naabʼal chihabʼ rokik li xyajel, kixpatzʼ re: «Ma twulaq raj chaawu naq tatkʼiraaq?». 7 Li yaj kixye re: «Qaawaʼ maaʼani natenqʼank we chi ok saʼ li tzʼakanbʼil haʼ naq nabʼulbʼutk li haʼ. Naq nawaj ok jalan chik naxkʼe ribʼ chiwu ut nakubʼeek xbʼeenwa». 8 Li Jesús kixye re: «Waklin! Xok laachʼaat ut bʼeen». 9 Ut li winq saʼ junpaat kikʼiraak, kixxok li xchʼaat ut kiʼok chi bʼeek.

Aʼin kikʼulmank saʼ sábado.* 10 Joʼkan naq, ebʼ laj judiiy xeʼok xyeebʼal re li winq li kikʼirtasiik: «Anaqwan sábado,* li chaqʼrabʼ moko naxkʼulubʼa ta naq taapaqo laachʼaat». 11 Abʼan aʼan kixye rehebʼ: «Li winq li xinxkʼirtasi kixye we “Xok laachʼaat ut bʼeen”». 12 Ebʼ aʼan xeʼxpatzʼ re: «Ani li winq li xyeehok aawe “Xok laachʼaat ut bʼeen”?». 13 Abʼan li winq inkʼaʼ naxnaw ani xkʼirtasink re xbʼaan naq li Jesús kixchʼik ribʼ saʼ xyanqebʼ li qas qiitzʼin li wankebʼ aran.

14 Chirix chik aʼin, li Jesús kixtaw li winq saʼ rochoch li Yos ut kixye re: «Kʼe reetal, xatkʼiraak. Matmaakobʼk chik, maare anchal tchalq junaq chik li nimla rahilal saʼ aabʼeen». 15 Xkoho li winq ut kixye rehebʼ laj judiiy naq li Jesús kikʼirtasink re. 16 Joʼkan naq ebʼ laj judiiy nekeʼxhobʼ li Jesús xbʼaan naq yook xbʼaanunkil aʼin saʼ sábado.* 17 Abʼan li Jesús naxye chaq rehebʼ: «Linyuwaʼ toj yook chi kʼanjelak, ut laaʼin toj yookin ajwiʼ chi kʼanjelak». 18 Saʼ xkʼabʼaʼ aʼin, ebʼ laj judiiy xeʼxkʼe wiʼ chik xqʼe chi xkamsinkil xbʼaan naq nekeʼxkʼoxla naq inkʼaʼ naroxloqʼi li sábado,* ut nekeʼxkʼoxla ajwiʼ naq yook xjuntaqʼeetankil ribʼ rikʼin li Yos xbʼaan naq Yuwaʼ naxye re.

19 Joʼkan bʼiʼ, li Jesús kixye rehebʼ: «Relik chi yaal ninye eere naq li Alalbʼej inkʼaʼ naxtaqla ribʼ xjunes; kaʼajwiʼ naxbʼaanu li naril xbʼaanunkil li Yuwaʼbʼej. Xbʼaan naq chixjunil li naxbʼaanu li Yuwaʼbʼej, li Alalbʼej naxbʼaanu ajwiʼ chi joʼkan. 20 Xbʼaan naq li Yuwaʼbʼej naxra li Alalbʼej ut naxkʼut chiru chixjunil li naxbʼaanu aʼan, ut tixkʼut chiru ebʼ li bʼaanuhom li qʼaxal nim wiʼ chik chiru aʼin re naq sachsooq eechʼool texkanaaq. 21 Xbʼaan naq joʼ li Yuwaʼbʼej naxwaklesihebʼ chi yoʼyo ebʼ li kamenaq ut naxkʼehebʼ xyuʼam, li Alalbʼej naxkʼe ajwiʼ xyuʼam li naraj xkʼebʼal re. 22 Xbʼaan naq li Yuwaʼbʼej inkʼaʼ naraqok aatin saʼ xbʼeenebʼ li qas qiitzʼin, kixkanabʼ bʼan saʼ ruqʼ li Alalbʼej re naq aʼan traqoq aatin, 23 re naq chixjunilebʼ teʼroxloqʼi li Alalbʼej joʼ naq nekeʼroxloqʼi li Yuwaʼbʼej. Li inkʼaʼ naroxloqʼi li Alalbʼej inkʼaʼ naroxloqʼi li Yuwaʼbʼej, li kitaqlank chaq re. 24 Relik chi yaal ninye eere naq li narabʼi li waatin ut naxpaabʼ li kitaqlank chaq we, wank xyuʼam chi junelik ut inkʼaʼ traqmanq aatin saʼ xbʼeen, chanchan bʼan jun li winq li kamenaq chaq ut anaqwan yoʼyo.

25 Relik chi yaal ninye eere naq twulaq xqʼehil (ak xwulak bʼan chik) naq ebʼ li kamenaq teʼrabʼi xyaabʼ xkux li Ralal li Yos, ut li teʼabʼinq teʼwanq xyuʼam. 26 Xbʼaan naq joʼ chanru naq li Yuwaʼbʼej wank xwankil re xkʼebʼal li yuʼam, kixkʼe ajwiʼ xwankil li Alalbʼej re xkʼebʼal li yuʼam. 27 Ut kixkʼe xwankil re naq traqoq aatin xbʼaan naq aʼan Ralal li Winq. 28 Misach eechʼool rikʼin aʼin xbʼaan naq twulaq xqʼehil naq chixjunilebʼ li wankebʼ saʼ muqlebʼaal kamenaq teʼrabʼi xyaabʼ xkux 29 ut teʼelq chaq: li xeʼxbʼaanu li us teʼwakliiq chi yoʼyo re naq teʼwanq xyuʼam ut li xeʼxbʼaanu li inkʼaʼ us teʼwakliiq chi yoʼyo re naq traqmanq aatin saʼ xbʼeenebʼ. 30 Laaʼin inkʼaʼ naru nintaqla wibʼ injunes naq ninbʼaanu junaq li naʼlebʼ. Ninraqok aatin saʼ xkʼabʼaʼ li nawabʼi ut ninbʼaanu saʼ tiikilal xbʼaan naq inkʼaʼ ninbʼaanu li nawaj, ninbʼaanu bʼan li naraj li kitaqlank chaq we.

31 »Wi injunes ninkʼe wibʼ chi naweʼk, ebʼ li junchʼol inkʼaʼ teʼxpaabʼ li tinye. 32 Abʼan wank jun chik li naxkʼe chi naweʼk chiwix, ut ninnaw naq paabʼajel li naxye chiwix. 33 Laaʼex xeetaqla ebʼ laj kʼehol esil rikʼin laj Juan, ut aʼan naxkʼe chi naweʼk li yaal. 34 Abʼanan, laaʼin inkʼaʼ ninkʼulubʼa li naxkʼe chi naweʼk junaq winq, abʼan ninye aʼin re naq texkoleʼq. 35 Li winq aʼin chanchan li kandil* li inkʼaʼ nachup xxamlel ut saqenk saqenk ru, ut laaʼex yal rikʼin jun kʼamok xeeraj xsahobʼresinkil eechʼool rikʼin li xsaqenkil. 36 Abʼan li ninkʼe chi naweʼk qʼaxal wank wiʼ chik xwankil chiru li kixkʼe chi naweʼk laj Juan xbʼaan naq li kʼanjel xinxtaqla xbʼaanunkil Linyuwaʼ aʼ li kʼanjel li yookin xbʼaanunkil, naxkʼutbʼesi naq li Yuwaʼbʼej kitaqlank chaq we. 37 Ut li Yuwaʼbʼej, li xtaqlank chaq we, aʼan ajwiʼ li naxkʼe chi naweʼk chiwix. Laaʼex maajunwa eerabʼihom li xyaabʼ xkux chi moko eerilom chanru aʼan, 38 ut li raatin moko wank ta saʼ leechʼool xbʼaan naq inkʼaʼ nekeepaabʼ li taqlanbʼil chaq xbʼaan.

39 »Laaʼex nekeekʼe eechʼool chi xtzolbʼal chiʼus li Raatin li Yos xbʼaan naq nekeekʼoxla naq rikʼin aʼin teetaw li junelik yuʼam, ut aʼin ajwiʼ naxkʼe chi naweʼk chiwix. 40 Usta joʼkan, laaʼex inkʼaʼ nekeeraj chalk wikʼin re naq twanq eeyuʼam. 41 Laaʼin inkʼaʼ ninkʼulubʼa naq ebʼ li qas qiitzʼin teʼxkʼe inloqʼal. 42 Abʼanan, chʼolchʼo chiwu naq laaʼex inkʼaʼ nekeera li Yos. 43 Laaʼin xinchalk saʼ xkʼabʼaʼ Linyuwaʼ ut laaʼex inkʼaʼ nikineekʼul. Wi jalan raj chik tchalq, chʼolchʼo naq teekʼul. 44 Chanru tineepaabʼ wi nekeekʼulubʼa li loqʼal chiribʼil eeribʼ ut inkʼaʼ nekeesikʼ li xloqʼal li jun ajwiʼ chi tzʼaqal Yos? 45 Meekʼoxla naq laaʼin texinjit chiru li Yuwaʼbʼej. Li najitok eere aʼan laj Moisés li nekeekʼojobʼ wiʼ eechʼool. 46 Relik chi yaal naq wi nekeepaabʼ raj laj Moisés, nikineepaabʼ raj laaʼin xbʼaan naq aʼan kixtzʼiibʼa resil li tinbʼaanu. 47 Abʼan, wi inkʼaʼ nekeepaabʼ li kixtzʼiibʼa chaq, chanru teepaabʼ li ninye?».