Lucas

11 Saʼ jun kutan li Jesús yook chaq chi tijok saʼ jun li naʼaj, ut naq kiraqeʼk, jun rehebʼ li xtzolom kixye re: «Qaawaʼ, kʼut chiqu chanru tootijoq joʼ naq laj Juan kixkʼut tijok chiruhebʼ li xtzolom».

2 Tojaʼ naq aʼan kixye rehebʼ: «Naq textijoq teeye: “At Qayuwaʼ, santobʼresinbʼil taxaq laakʼabʼaʼ. Chichalq ta Laaʼawabʼejilal. 3 Chaakʼe taxaq qawa* choʼq re li junjunq chi kutan joʼ chanru naʼajmank chiqu. 4 Chaakuy chaasach li qamaak* xbʼaan naq laaʼo ajwiʼ naqakuy xmaak li namaakobʼk chiqu.* Ut mooʼaakanabʼ chi tʼaneʼk saʼ li aaleek”».

5 Tojaʼ naq kixye rehebʼ: «Qayehaq naq jun eere wank jun li ramiiw ut tuqtu qʼoqyink naxik chi rilbʼal ut naxye re: “At wamiiw, injalaq oxibʼaq aakaxlanwa, 6 xbʼaan naq tojaʼ twulaq saʼ wochoch jun li wamiiw li yook chaq chiru bʼe ut maakʼaʼ nayoʼlaak we”. 7 Ut li ramiiw nachaqʼok saʼ rochoch ut naxye: “Kanabʼ inchʼiʼchʼiʼinkil; ak xinkʼe saʼ laaw li okebʼaal, ebʼ linkokʼal ut laaʼin ak xqataw qanaʼaj. Inkʼaʼ chik tinruuq chi wakliik re xkʼebʼal aawe li nakaawaj”. 8 Laaʼin ninye eere: usta ramiiw, inkʼaʼ twakliiq chi xkʼebʼal re li naxpatzʼ. Abʼanan, saʼ xkʼabʼaʼ naq inkʼaʼ naxkanabʼ xtitzʼbʼal ut xtzʼaamankil re, twakliiq ut tixkʼe re li yook xpatzʼbʼal. 9 Joʼkan naq ninye eere: meekanabʼ patzʼok ut tkʼemanq eere, meekanabʼ sikʼok ut teetaw, meekanabʼ xchʼeʼbʼal li okebʼaal ut tteemanq cheeru. 10 Xbʼaan naq li napatzʼok, nakʼuluk; li nasikʼok, natawok; ut li naxchʼeʼ li okebʼaal, nateemank chiru. 11 Joʼkan bʼiʼ, wi junaq li alalbʼej tixpatzʼ xkar re li xyuwaʼ, ma wank junaq li yuwaʼbʼej saʼ eeyanq li tixkʼe kʼantiʼ re li ralal choʼq reqaj li kar? 12 Ut wi tixpatzʼ xmol, ma xookʼ tixkʼe re? 13 Joʼkan bʼiʼ, wi laaʼex nekeenaw xkʼebʼal li chaabʼil maatan rehebʼ leeralal eekʼajol, usta laaʼex aj maak, ma tojaʼ ta chik li Yuwaʼbʼej li wank saʼ choxa inkʼaʼ tixkʼe li santil musiqʼej* rehebʼ li nekeʼpatzʼok re!».

14 Moqon chik, kirisi jun li maaʼus aj musiqʼej rikʼin jun li winq. Li maaʼus aj musiqʼej kixkanabʼ chi mem li winq aʼin. Ut naq kiʼelk li maaʼus aj musiqʼej rikʼin, li winq kiʼaatinak. Sachso xchʼool kikanaak li kʼiila tenamit. 15 Abʼan wankebʼ xeʼok xyeebʼal: «Narisi ebʼ li maaʼus aj musiqʼej saʼ xkʼabʼaʼ laj Tza* li najolomink rehebʼ li maaʼus aj musiqʼej». 16 Ut re xyalbʼal rix, wankebʼ xeʼok xminbʼal ru re naq tixbʼaanu jun li sachbʼachʼoolej saʼ xkʼabʼaʼ li Yos. 17 Saʼ xkʼabʼaʼ naq naxnaw li yookebʼ xkʼoxlankil, kixye rehebʼ: «Jun li awabʼejilal tjukʼeʼq wi li nekeʼtzʼaqonk chirix nekeʼxpleeti ribʼ chiribʼilebʼ ribʼ, ut jun li junkabʼal* tjukʼeʼq wi li wankebʼ chisaʼ nekeʼxpleeti ribʼ chiribʼilebʼ ribʼ. 18 Joʼkan ajwiʼ, wi laj Tza naxpleeti ribʼ xjunes, li xʼawabʼejilal tjukʼeʼq. Laaʼex nekeeye naq laaʼin nawisi ebʼ li maaʼus aj musiqʼej saʼ xkʼabʼaʼ laj Tza.* 19 Wi laaʼin nawisi ebʼ li maaʼus aj musiqʼej saʼ xkʼabʼaʼ laj Tza,* saʼ xkʼabʼaʼ ani nekeʼisink maaʼus aj musiqʼej li nekeʼtaqenk eere? Joʼkan naq li nekeʼtaqenk eere teʼraqoq aatin saʼ eebʼeen. 20 Abʼan, wi laaʼin nawisi ebʼ li maaʼus aj musiqʼej saʼ xkʼabʼaʼ li ruʼuj ruqʼ li Yos, aʼin naraj xyeebʼal naq li Xʼawabʼejilal li Yos ak wank arin ut laaʼex inkʼaʼ xeekʼe reetal. 21 Naq jun li winq kaw ribʼ ut wank xchʼiichʼ naxkʼaakʼale chiʼus li rochoch, maakʼaʼ naxkʼul li xjunkabʼlal. 22 Abʼan, wi junaq li winq qʼaxal kaw wiʼ chik xmetzʼew chiru aʼan, nayalok rikʼin ut naxqʼax ru, tixmaqʼ li xchʼiichʼ ut tixjekʼi li xjunkabʼlal. 23 Li moko wank ta wikʼin, xikʼ nikinril ut li inkʼaʼ nakʼanjelak wochbʼeen re naq ebʼ li qas qiitzʼin teʼjiloq wikʼin, yook xnajtobʼresinkilebʼ chiwu.

24 »Naq jun li maaʼus aj musiqʼej naʼelk rikʼin junaq li qas qiitzʼin nanumeʼk saʼebʼ li chaqichʼochʼ re xsikʼbʼal bʼar thilanq. Ut saʼ xkʼabʼaʼ naq inkʼaʼ naxtaw, naxye: “Tinsutqʼiiq wiʼ chik saʼ wochoch li xinʼelk wiʼ chaq”. 25 Ut naq nawulak, naxtaw chi mesunbʼil ut uutzʼuʼujinbʼil ru. 26 Tojaʼ naq naxik ut naxkʼam chirix wuqubʼ chik li maaʼus aj musiqʼej li numtajenaq wiʼ chik xmaaʼusilalebʼ chiru aʼan ut naq ak xeʼok rikʼin li winq aʼin, nekeʼkanaak aran. Ut li xwanjik li qas qiitzʼin aʼin numtajenaq wiʼ chik xyibʼal ru chiru naq xwank chaq».

27 Naq yook xyeebʼal aʼin, jun li ixq li wank saʼ xyanq li kʼiila tenamit kixye chi kaw xyaabʼ xkux: «Sa saʼ xchʼool li ixq li xkʼamok aawe saʼ xkʼubʼ xsaʼ ut xatxtuʼresi!». 28 Abʼan aʼan kixye re: «Inkʼaʼ, sahebʼ bʼan saʼ xchʼool li nekeʼrabʼi li raatin li Yos ut nekeʼxyuʼami!».

29 Naq kixmululi ribʼ li kʼiila li tenamit chi xsutam, aʼan kiʼok xyeebʼal: «Li tenamit li wank chiruhebʼ li kutan aʼin aʼan jun li tenamit li maaʼus xnaʼlebʼ. Naxpatzʼ jun li sachbʼachʼoolej, abʼan inkʼaʼ tkʼemanq re, kaʼajwiʼ li sachbʼachʼoolej chirix laj Jonás. 30 Xbʼaan naq joʼ chanru naq laj Jonás kiwank joʼ eetalil choʼq rehebʼ laj Nínive, li Ralal li Winq aʼanaq eetalil choʼq re li tenamit li wank chiruhebʼ li kutan aʼin. 31 Saʼ Xkutankil li Raqok Aatin, li ixq li naʼawabʼejink aran Saba twakliiq chi yoʼyo rochbʼeenebʼ li winq re li tenamit li wank chiruhebʼ li kutan aʼin. Li ixq aʼin tixye naq ebʼ li winq li wank chiruhebʼ li kutan aʼin teʼxtoj xmaak. Xbʼaan naq aʼan kichalk toj saʼ xnajtil li ruuchichʼochʼ re rabʼinkil li xchamal xnaʼlebʼ laj Salomón. Abʼan, kʼehomaq reetal, arin wank li qʼaxal nim wiʼ chik chiru laj Salomón. 32 Saʼ Xkutankil li Raqok Aatin, ebʼ laj Nínive teʼwakliiq chi yoʼyo rochbʼeen li tenamit li wank chiruhebʼ li kutan aʼin ut teʼxye naq tixtoj xmaak. Xbʼaan naq ebʼ aʼan xeʼxyotʼ xchʼool ut xeʼxjal xnaʼlebʼ naq xeʼrabʼi li esil li kixkʼe chixnawebʼ laj Jonás. Abʼan, kʼehomaq reetal, arin wank li qʼaxal nim chiru laj Jonás. 33 Maaʼani naxloch li xkandil* ut chirix chik aʼan naxmuq chi moko naxtzʼap rikʼin jun li chakach, naxkʼe bʼan saʼ jun li naʼaj najt xteram re naq kutanaq xsaʼ naq teʼoq saʼ ochoch. 34 Saʼ laawu chanchan li kandil* li naxkutanobʼresi laatibʼel. Wi saʼ laawu nakʼanjelak chiʼus,* chixjunil laatibʼel tlemtzʼunq.* Abʼan, wi saʼ laawu nakaqalink,* laatibʼel wanq saʼ qʼoqyink. 35 Joʼkan bʼiʼ, weent taabʼaanu naq li saqenk li wank aawikʼin maawaʼaq qʼoqyink. 36 Joʼkan naq, wi chixjunil laatibʼel nalemtzʼunk, maakʼaʼ wanq saʼ qʼoqyink, chixjunil lemtzʼunaq joʼ naq jun li kandil* nakatxkutanobʼresi rikʼin li xsaqenk».

37 Naq kixye aʼin, jun laj pariseey kibʼoqoq re chi waʼak. Chirix chik aʼan kiʼok saʼ ochoch ut kichunlaak saʼ meex. 38 Abʼan laj pariseey kisach xchʼool chi rilbʼal naq inkʼaʼ nachʼajok* naq ok re chi waʼak. 39 Joʼkan naq li Qaawaʼ kixye re: «Kʼe reetal, laaʼex laj pariseey, chanchanex li ukʼlebʼ sekʼ ut li plaat li saabʼesinbʼil chirix ut kʼajoʼ xtzʼajnil chisaʼ xbʼaan naq inkʼaʼ nekeekanabʼ xrahinkil ru li inkʼaʼ us ut ratawankil li maaʼusilal. 40 Kʼajoʼ eememil! Ma inkʼaʼ tabʼiʼ li kiyiibʼank re li rix aʼan ajwiʼ li kiyiibʼank re li xsaʼ? 41 Joʼkan bʼiʼ, bʼaanumaq li us choʼq rehebʼ li nebʼaʼ ut chiʼalaaq saʼ leechʼool li teebʼaanu; ut wi joʼkan teebʼaanu, saqaq eeru saʼ chixjunil. 42 Abʼan ra tchalq saʼ eebʼeen, laaʼex laj pariseey xbʼaan naq nekeekʼe xlajeetqil li iskʼiʼij, li ruud ut jalan chik li ichaj,* abʼanan inkʼaʼ nekeekʼut li rahok joʼ naxbʼaanu li Yos chi moko nekeekʼam eere rikʼin li xtiikilal. Tenebʼanbʼil chaq saʼ eebʼeen xkʼebʼal xlajeetqil li kʼaʼaq re ru aʼin abʼan inkʼaʼ raj xeekanabʼ rahok joʼ naxbʼaanu li Yos chi moko xeekanabʼ ta raj xkʼambʼal eere rikʼin li xtiikilal. 43 Ra tchalq saʼ eebʼeen laaʼex laj pariseey xbʼaan naq saʼebʼ li naʼaj re loqʼonink nawulak cheeru chunlaak toj chiru ut nawulak ajwiʼ cheeru naq tkʼeheʼq xsahil eechʼool saʼebʼ li kʼayil! 44 Ra tchalq saʼ eebʼeen xbʼaan naq chanchanex ebʼ li muqlebʼaal li maakʼaʼebʼ reetalil: ebʼ li qas qiitzʼin nekeʼbʼeek saʼ xbʼeen ut inkʼaʼ nekeʼxnaw!».

45 Jun rehebʼ li winq li naxnaw chiʼus chirix li Chaqʼrabʼ kixye re: «At Kʼutunel rikʼin li yookat xyeebʼal yookat ajwiʼ qahobʼal». 46 Tojaʼ naq kixye: «Ra ajwiʼ tchalq saʼ eebʼeen laaʼex li nekeenaw chiʼus chirix li Chaqʼrabʼ xbʼaan naq qʼaxal aal li iiq li nekeetuubʼ saʼ xbʼeenebʼ li qas qiitzʼin, aʼut chi moko laaʼex nekeeraj rekʼasinkil rikʼin ruʼuj leeruqʼ.

47 »Ra tchalq saʼ eebʼeen xbʼaan naq nekeeyiibʼ xmuqlebʼaal ebʼ li propeet abʼan leexeʼtoon xeʼkamsink rehebʼ! 48 Chʼolchʼo naq laaʼex xeeril li xeʼxbʼaanu leexeʼtoon ut xeekʼulubʼa, aʼanebʼ xeʼxkamsi ebʼ li propeet ut laaʼex xeeyiibʼ li xmuqlebʼaalebʼ. 49 Saʼ xkʼabʼaʼ aʼin li Yos, li wank xnaʼlebʼ, kixye: “Laaʼin tintaqla ebʼ li propeet ut ebʼ li apóstol rikʼinebʼ ut wiibʼ oxibʼ rehebʼ aʼin teʼkamsiiq ut teʼrahobʼtesiiq 50 re naq li xkikʼel chixjunilebʼ li propeet li kihoymank chalen chaq saʼ xtiklajik li ruuchichʼochʼ* tpatzʼmanq re li tenamit li wank chiruhebʼ li kutan aʼin, 51 chalen li xkikʼel laj Abel toj li xkikʼel laj Zacarías, li xeekamsi chiru li rochoch li Yos chixkʼatq li xnaʼaj li mayej”.* Joʼkan tzʼaqal, ninye eere naq tpatzʼmanq re li tenamit li wank chiruhebʼ li kutan aʼin.

52 »Ra tchalq saʼ eebʼeen laaʼex li nekeenaw chiʼus chirix li Chaqʼrabʼ xbʼaan naq xeemaqʼ chiruhebʼ li qas qiitzʼin li laaw re xnawbʼal chirix li Yos! Laaʼex inkʼaʼ xexʼok ut li yookebʼ chi ok nekeeram chiruhebʼ!».

53 Naq kiʼelk aran, ebʼ laj tzʼiibʼ ut ebʼ laj pariseey xeʼok xminbʼal ru chi kaw ut xbʼaanunkil re naabʼal chik li patzʼom, 54 yookebʼ roybʼeninkil joqʼe tpaltoʼq saʼ li raatin re naq teʼruuq xchapbʼal.