Lucas

3 Oʼlaju chihabʼ rokik chi awabʼejink laj Tiberio, li awabʼej re Roma,* laj Poncio Pilato wank chaq choʼq ruuchil awabʼej aran Judea, laj Herodes* wank chaq choʼq ruuchil awabʼej saʼ xteepal Galilea, ut laj Filipo, li ras, wank chaq choʼq ruuchil awabʼej saʼ xteepal Iturea ut Traconítide, ut laj Lisanias yook chaq chi awabʼejink saʼ xteepal Abilene, 2 joʼkan ajwiʼ laj Caifás wank chaq choʼq xyuwaʼil aj tij ut laj Anás wank chaq choʼq xbʼeenil aj tij. Chiruhebʼ li kutan aʼan, laj Juan, ralal laj Zacarías, kixkʼul jun li esil rikʼin li Yos naq wank chaq saʼ li chaqichʼochʼ.

3 Joʼkan naq xkoho saʼ chixjunil li teep re li nimaʼ Jordán ut yook xyeebʼal resil li kubʼihaʼ. Kixye rehebʼ li qas qiitzʼin naq teʼkubʼeeq xhaʼ re naq teʼxkʼutbʼesi naq xeʼxyotʼ xchʼool ut xeʼxjal xnaʼlebʼ ut chi joʼkan teʼkuyeʼq teʼsacheʼq xmaak. 4 Kikʼulmank tzʼaqal joʼ tzʼiibʼanbʼil saʼ xhu li propeet Isaías: «Saʼ li chaqichʼochʼ naʼabʼimank jun li kawil kuxej li yook xyeebʼal: “Kawresimaq xbʼe li Jehobʼa!* Tiikobʼresimaq li xbʼe. 5 Chixjunil li naʼaj li taqʼa ru tbʼutʼmanq. Chixjunil li tzuul ut ebʼ li bʼool tento naq thelmanq. Li bʼe li moko tiik ta ru ttiikobʼresiiq ut ebʼ li bʼe li xiikʼ ru ttuqubʼamanq. 6 Chixjunilebʼ teʼiloq re chanru tkoloq li Yos”».

7 Joʼkan naq laj Juan kiʼok xyeebʼal rehebʼ li kʼiila tenamit li xeʼchalk rikʼin re naq tixkubʼsihebʼ xhaʼ: «Ex ral kʼantiʼ li wank eemay, ani xyeehok eere naq texʼeleliq chiru xjosqʼil li Yos? 8 Xbʼeenwa kʼutbʼesimaq rikʼin leebʼaanuhom naq xeeyotʼ eechʼool ut xeejal eenaʼlebʼ. Meeye cheeribʼil eeribʼ “Li qayuwaʼ aʼan laj Abrahán”. Xbʼaan naq li Yos naru xbʼaanunkil naq teʼelq chaq ralal xkʼajol laj Abrahán rikʼinebʼ li pek aʼin. 9 Joʼkan ajwiʼ, li maal ak wank chik saʼ xtoonal li cheʼ. Ut wi junaq li cheʼ inkʼaʼ naʼuuchink chiʼus, tyokʼmanq ut tkutmanq saʼ xaml».

10 Ut ebʼ li kʼiila tenamit xeʼok xpatzʼbʼal re: «Kʼaru tento tqabʼaanu chi joʼkanan?». 11 Aʼan kixye rehebʼ: «Li wank wiibʼ xtʼikr chixkʼehaq re li maakʼaʼ re, ut li wank bʼayaq xtzekemq, chixbʼaanuhaq ajwiʼ aʼin». 12 Xeʼkʼulunk ajwiʼ li nekeʼxchʼutubʼ li toj choʼq re li awabʼej re naq teʼkubʼsiiq xhaʼ ut xeʼxpatzʼ re: «At Kʼutunel, kʼaru tento tqabʼaanu?». 13 Aʼan kixye rehebʼ: «Meepatzʼ xbʼeen li toj li ak xxaqabʼanbʼil». 14 Ebʼ laj puubʼ xeʼxpatzʼ ajwiʼ re: «Kʼaru tento tqabʼaanu?». Aʼan kixye rehebʼ: «Maaʼani cheemaqʼ xtumin chi moko teeyoobʼ tikʼtiʼ chirix junaq li qas qiitzʼin; chikʼojlaaq bʼan eechʼool rikʼin li nekextojeʼk wiʼ».*

15 Ebʼ li qas qiitzʼin yookebʼ chi yoʼonink ut yookebʼ xyeebʼal saʼ xchʼool, ma maawaʼ tawiʼ laj Juan aʼ li Kriist? 16 Laj Juan kixchʼolobʼ chiruhebʼ chixjunil li naʼlebʼ: «Laaʼin nawoksi li haʼ re xkubʼsinkil eehaʼ, abʼan li tchalq chiwix qʼaxal wank xwankil chiwu ut laaʼin moko wank ta inkʼulubʼ re xhitbʼal* xkʼaamal li xxaabʼ.* Aʼan troksi li santil musiqʼej ut li xaml re xkubʼsinkil eehaʼ. 17 Saʼ ruqʼ wank li kʼanjelobʼaal re xyamtesinkil li xnaʼaj li triiw bʼarwiʼ kichiqʼmank ru ut re xxokbʼal saʼ li xkʼulebʼaal. Abʼan li rix li triiw tixkʼat rikʼin jun li xaml li inkʼaʼ nachup».

18 Kixkʼe ajwiʼ re li tenamit naabʼal chik li naʼlebʼ ut inkʼaʼ kixkanabʼ xkʼebʼal chi naweʼk li chaabʼil esil. 19 Laj Juan kixqʼus laj Herodes, li awabʼej re li teep, xbʼaan chixjunil li maaʼusilal kixbʼaanu ut xbʼaan naq kisumlaak rikʼin li xHerodías, li rixaqil li ras laj Herodes, 20 li awabʼej aʼin toj kixbʼaanu jun chik li maaʼusilal: kixkʼe laj Juan saʼ tzʼalam.

21 Joʼkan bʼiʼ, naq chixjunil li tenamit kikubʼsiik xhaʼ, li Jesús kikubʼsiik ajwiʼ xhaʼ. Naq yook chi tijok, kiteehonk li choxa 22 ut li xsantil musiqʼej li Yos kikʼutunk kamaʼ jun li mukuy naq kikubʼeek saʼ xbʼeen ut kiʼelk chaq jun xyaabʼ kuxej saʼ choxa li kixye: «Laaʼat li Walal li ninra. Laaʼat nakaasahobʼresi linchʼool».