Juan
3 Saʼ xyanqebʼ laj pariseey wank chaq jun li winq aj Nicodemo xkʼabʼaʼ, aʼan jun rehebʼ li nekeʼjolomink rehebʼ laj judiiy. 2 Laj Nicodemo xkoho rilbʼal li Jesús naq kiqʼoqyinoʼk ut kixye re: «At Kʼutunel* naqanaw naq taqlanbʼilat chaq xbʼaan li Yos xbʼaan naq maakʼaʼ junaq winq li naxbʼaanu ebʼ li sachbʼachʼoolej li nakaabʼaanu laaʼat wi moko wank ta li Yos rikʼin». 3 Li Jesús kixye re: «Wi junaq li qas qiitzʼin inkʼaʼ nayoʼlaak wiʼ chik,* moko truuq ta rilbʼal li Xʼawabʼejilal li Yos». 4 Laj Nicodemo kixye re: «Chanru tyoʼlaaq junaq li qas qiitzʼin li ak tiix chik? Inkʼaʼ naru naxchʼik ribʼ saʼ xkʼubʼ xsaʼ li xnaʼ ut tyoʼlaaq xkabʼ sutil, peʼyaal?». 5 Kichaqʼok li Jesús ut kixye re: «Relik chi yaal ninye aawe naq wi junaq li qas qiitzʼin inkʼaʼ nayoʼlaak rikʼin haʼ ut rikʼin li santil musiqʼej, moko truuq ta chi ok saʼ li Xʼawabʼejilal li Yos. 6 Li xyoʼlaak rikʼin tibʼelej re li tibʼelej, li xyoʼlaak rikʼin santil musiqʼej re li santil musiqʼej. 7 Misach aachʼool chirix li xinye aawe “Laaʼex tento texyoʼlaaq wiʼ chik”. 8 Li kawil iqʼ naʼapunk bʼarwiʼ naraj usta nakatruuk rabʼinkil inkʼaʼ nakaanaw bʼar nachalk ut bʼar naxik. Joʼkan ajwiʼ nakʼulmank rikʼin li qas qiitzʼin li nayoʼlaak rikʼin santil musiqʼej».*
9 Tojaʼ naq laj Nicodemo kixye re: «Chanru naru nakʼulmank chixjunil aʼin?». 10 Kichaqʼok li Jesús ut kixye re: «Laaʼat aj kʼutunel saʼ Israel ut inkʼaʼ nakaanaw chirix aʼin? 11 Relik chi yaal ninye aawe, laaʼo nokooʼaatinak chirix li naqanaw ut naqakʼe chi naweʼk li ak xqil, abʼan laaʼex inkʼaʼ nekeekʼulubʼa li naqakʼe chi naweʼk. 12 Wi xinye eere chirix li nakʼulmank saʼ ruuchichʼochʼ ut inkʼaʼ nekeepaabʼ, chanru teepaabʼ wi tinye eere chirix li nakʼulmank saʼ choxa? 13 Joʼkan ajwiʼ, maajun winq ak xtaqeʼk saʼ choxa kaʼajwiʼ li kiʼelk chaq saʼ choxa aʼ li Ralal li Winq. 14 Ut joʼ chanru naq laj Moisés kixtaqsi li kʼantiʼ chiru cheʼ saʼ li chaqichʼochʼ, joʼkan ajwiʼ ttaqsiiq li Ralal li Winq 15 re naq li tpaabʼanq re wanq xyuʼam chi junelik.
16 »Saʼ xkʼabʼa naq li Yos kʼajoʼ kixra li ruuchichʼochʼ kixqʼaxtesi li Ralal li jun ajwiʼ chiru* re naq li tixkʼutbʼesi naq naxpaabʼ inkʼaʼ tsachq, wanq bʼan xyuʼam chi junelik. 17 Xbʼaan naq li Yos inkʼaʼ kixtaqla chaq li Ralal saʼ ruuchichʼochʼ re naq aʼan traqoq aatin saʼ xbʼeen li ruuchichʼochʼ, kixtaqla bʼan chaq re naq li ruuchichʼochʼ tkoleʼq saʼ xkʼabʼaʼ aʼan. 18 Li naxkʼutbʼesi naq naxpaabʼ moko traqmanq ta aatin saʼ xbʼeen. Li inkʼaʼ naxkʼutbʼesi naq naxpaabʼ ak xraqmank aatin saʼ xbʼeen xbʼaan naq inkʼaʼ naxkʼutbʼesi naq inkʼaʼ napaabʼank saʼ xkʼabʼaʼ li Ralal li Yos, li jun ajwiʼ chiru. 19 Aʼin xyaalal naq traqmanq aatin saʼ xbʼeenebʼ: li saqenk kichalk saʼ ruuchichʼochʼ, abʼan ebʼ li qas qiitzʼin inkʼaʼ xeʼraj li saqenk, xeʼraj bʼan li qʼoqyink xbʼaan naq nekeʼxbʼaanu li inkʼaʼ us. 20 Xbʼaan naq li naxyuʼami li maaʼusilal xikʼ naril li saqenk ut moko naxik ta bʼarwiʼ wank li saqenk xbʼaan naq inkʼaʼ naraj naq li xbʼaanuhom t-elq chi kutankil. 21 Abʼan li naxbʼaanu li us naxik bʼarwiʼ wank li saqenk re naq tkʼutunq chi tzʼaqal re ru naq li xbʼaanuhom naxchap ribʼ rikʼin li rajom li Yos».
22 Chirix chik aʼan, li Jesús kiʼok rochbʼeenebʼ li xtzolom saʼebʼ li kʼalebʼaal re Judea. Ut aran kikanaak rochbʼeenebʼ li xtzolom ut kikubʼsink haʼ. 23 Abʼan laj Juan yook chaq ajwiʼ chi kubʼsink haʼ aran Enón chixkʼatq Salim xbʼaan naq naabʼal chaq li haʼ aran, ut ebʼ li qas qiitzʼin nekeʼchalk ut nekeʼkubʼsiik xhaʼ 24 xbʼaan naq laj Juan toj maajiʼ nakʼeheʼk saʼ tzʼalam.
25 Tojaʼ naq ebʼ li xtzolom laj Juan xeʼok xchoqinkil ribʼ rikʼin jun aj judiiy chirix li chʼajobʼresink. 26 Moqon chik xkohebʼ chi xyeebʼal re laj Juan: «At Kʼutunel,* li winq li wank chaq aawochbʼeen junpakʼal li nimaʼ Jordán, chirix li xat-aatinak wiʼ, yook chi kubʼsink haʼ, ut chixjunilebʼ yookebʼ chi xik chirix». 27 Kichaqʼok laj Juan ut kixye rehebʼ: «Maakʼaʼ naru naxkʼul junaq wi inkʼaʼ ta chalenaq saʼ choxa. 28 Laaʼex nekeenaw chi tzʼaqal naq xinye “Maawaʼin li Kriist, taqlanbʼilin bʼan chiru aʼan”. 29 Li wank rikʼin li ixaqilbʼej aʼan li bʼeelomej. Abʼan li ramiiw li bʼeelomej naq wank chixkʼatq ut narabʼi xyaabʼ xkux, kʼajoʼ nasahoʼk saʼ xchʼool. Joʼkan naq, anaqwan numtajenaq chik xsahil linchʼool. 30 Aʼan tento tkʼihanq li xkʼanjel, abʼan laaʼin tkʼosq linkʼanjel».
31 Li nachalk taqeʼq wank saʼ xbʼeen chixjunilebʼ li junchʼol. Li re li ruuchichʼochʼ re li ruuchichʼochʼ ut naʼaatinak chirix li ruuchichʼochʼ. Li nachalk saʼ choxa wank saʼ xbʼeen chixjunilebʼ li junchʼol. 32 Ut naxkʼe chi naweʼk li rilom ut li rabʼihom, abʼan maaʼani nakʼulubʼank re li naxkʼe chi naweʼk. 33 Li nakʼulubʼank re li naxkʼe chi naweʼk naxpaabʼ chi anchal xchʼool naq li Yos naxye li yaal. 34 Li taqlanbʼil chaq xbʼaan li Yos naxye li raatin li Yos xbʼaan naq li Yos chi yoʼon naxkʼe li xsantil musiqʼej. 35 Li Yuwaʼbʼej naxra li Alalbʼej ut ak xqʼaxtesi saʼ ruqʼ chixjunil li kʼaʼaq re ru. 36 Li naxkʼutbʼesi naq naxpaabʼ li Alalbʼej wank xyuʼam chi junelik, abʼan li inkʼaʼ naʼabʼink chiru li Alalbʼej inkʼaʼ tril li yuʼam, li xjosqʼil bʼan li Yos tkanaaq junelik saʼ xbʼeen.