Hechos
2 Joʼkan bʼiʼ, saʼ li Ninqʼe chirix li Pentecostés, chixjunilebʼ chʼutchʼukebʼ saʼ jun chi naʼajej. 2 Ut maakʼaʼ saʼ xchʼoolebʼ naq saʼ choxa kiʼabʼimank kamaʼ jun li kawil iqʼ najubʼubʼnak chi chalk ut kinujak saʼ chixjunil li ochoch bʼarwiʼ chunchukebʼ. 3 Ut xeʼril kamaʼ li ruʼuj raqʼ xaml li kiʼok xjekʼinkil ribʼ ut xkʼebʼal ribʼ saʼ xbʼeen li junjunq chi qas qiitzʼin. 4 Chixjunilebʼ xeʼnujak rikʼin santil musiqʼej ut xeʼok chi aatinak saʼ jalan jalanq chi aatinobʼaal joʼ chanru xeʼkawresiik xbʼaan li santil musiqʼej.
5 Chiruhebʼ li kutan aʼan, wankebʼ chaq aran Jerusalén ebʼ laj judiiy li nekeʼxloqʼoni li Yos chi anchalebʼ xchʼool. Ebʼ laj judiiy aʼin chalenaqebʼ saʼebʼ li tenamit re chixjunil li ruuchichʼochʼ. 6 Joʼkan bʼiʼ, naq xʼabʼimank li xʼekʼank chaq, kixchʼutubʼ ribʼ li kʼiila tenamit chi sachso xchʼool xbʼaan naq xeʼrabʼi chi aatinak ebʼ li xtzolom li Jesús saʼ li raatinobʼaalebʼ. 7 Joʼkan naq sachsokebʼ xchʼool xeʼkanaak ut xeʼok xyeebʼal: «Kʼehomaq reetal chixjunilebʼ li yookebʼ chi aatinak. Peʼyaal naq aʼanebʼ aj Galileo? 8 Abʼan, chanru naqabʼihebʼ chi aatinak saʼ li qaatinobʼaal? 9 Saʼ qayanq wankebʼ aj Partia, aj Media, aj Elam, aj Mesopotamia, aj Judea, aj Capadocia, aj Ponto ut li wankebʼ saʼ xweent Asia, 10 aj Frigia, aj Panfilia, aj Ejiipt, ut li nekeʼchalk saʼ xteepal Libia chixkʼatq Cirene, ebʼ li ulaʼ li chalenaqebʼ Roma joʼebʼ aj judiiy ut li xeʼok chi paabʼank saʼ xyanqebʼ laj judiiy, 11 aj Creta ut aj Arabia, chiqajunilo naqabʼihebʼ chi xyeebʼal saʼ li qaatinobʼaal li xnimal ru xnaʼlebʼ li Yos». 12 Joʼkan tzʼaqal, chixjunilebʼ sachsokebʼ xchʼool ut nekeʼxye chiribʼilebʼ ribʼ: «Kʼaru xyaalal aʼin?». 13 Abʼanan, wankebʼ nekeʼseʼenk rehebʼ ut xeʼxye: «Teʼkalaaq».
14 Abʼan laj Pedro kixaqli rochbʼeenebʼ li Junlaju ut chi kaw xyaabʼ xkux kixye rehebʼ li qas qiitzʼin: «Ex aj Judea ut aj Jerusalén, kʼehomaq eechʼool chi rabʼinkil li waatin ut cheenawaq aʼin. 15 Ebʼ li qas qiitzʼin aʼin moko teʼkalaaq ta, joʼ yookex xkʼoxlankil xbʼaan naq kachʼin chik ma bʼeleebʼ hoor re eqʼla. 16 Li yook bʼan chi kʼulmank aʼan li kixye chaq li Yos saʼ xkʼabʼaʼ li propeet Joel: 17 “Saʼ xraqik ebʼ li kutan, naxye li Yos, tinhoy bʼayaq linsantil musiqʼej saʼ xbʼeenebʼ li qas qiitzʼin. Ebʼ li ralal ut ebʼ li xrabʼin teʼaatinaq joʼ propeet, ebʼ li saaj li wankebʼ saʼ eeyanq teʼril li moy u, ut ebʼ li cheek li wankebʼ saʼ eeyanq teʼmatkʼeq, 18 ut chiruhebʼ li kutan ajwiʼ aʼan tinhoy bʼayaq linsantil musiqʼej saʼ xbʼeenebʼ li winq ut ixq li wankebʼ choʼq inmoos ut teʼaatinaq joʼ propeet. 19 Tinbʼaanu ebʼ li xninqal ru naʼlebʼ taqeʼq saʼ choxa ut sachbʼachʼoolej taqʼa saʼ ruuchichʼochʼ: twanq kikʼ, xaml ut sibʼ. 20 Naq toj maajiʼ nachalk li xnimal ut xchaqʼalil ru xkutankil li Jehobʼa,* tqʼoqyinoʼq ru li saqʼe ut tkikʼoq ru li po. 21 Ut li naxyaabʼasi li xkʼabʼaʼ li Jehobʼa* re naq ttenqʼaaq, tkoleʼq”.
22 »Ex aj Israel, abʼihomaq aʼin: joʼ nekeenaw, li Jesús laj Nazaret taqlanbʼil chaq xbʼaan li Yos. Saʼ xkʼabʼaʼ aʼan, li Yos kixbʼaanu saʼ eeyanq ebʼ li xninqal ru bʼaanuhom, ebʼ li xninqal ru naʼlebʼ ut ebʼ li sachbʼachʼoolej. 23 Li winq aʼin, li kiqʼaxtesiik saʼ ruqʼebʼ li xikʼ nekeʼilok re joʼ ak xaqabʼanbʼil chaq ut nawbʼil chaq chi rubʼelaj xbʼaan li Yos, laaʼex xeeklawxi chiru cheʼ saʼ xkʼabʼaʼ li maaʼusebʼ xnaʼlebʼ* ut xeekamsi. 24 Abʼan li Yos kixwaklesi chi yoʼyo re risinkil rubʼel xwankil li kamk xbʼaan naq moko naru ta nakanaak rubʼel xwankil li kamk. 25 Laj David kixye chirix: “Junelik wank chiwu li Jehobʼa* xbʼaan naq aʼan wank saʼ linnim uqʼ re naq maakʼaʼ tchiqʼchiqʼinq we. 26 Joʼkan naq kisahoʼk saʼ inchʼool ut xinʼaatinak chi sa saʼ inchʼool. Ut saʼ chixjunil linyuʼam tinkʼojobʼ inchʼool aawikʼin, 27 xbʼaan naq inkʼaʼ tinaakanabʼ saʼ li Muqlebʼaal Kamenaq* chi moko taakanabʼ naq tqʼaaq laamoos li nakʼanjelak chaawu. 28 Xaakʼut chiwu xbʼehil li yuʼam. Qʼaxal tsahobʼresi linchʼool naq wanqin chaawu”.
29 »Cheekuy inmaak ex wechpaabʼanel, chi chʼolchʼo ru tinʼaatinaq eerikʼin chirix laj David, li qaxeʼtoonil yuwaʼ, li kikamk ut kimuqeʼk ut li xmuqlebʼaal toj wank qikʼin saʼebʼ li qakutan. 30 Saʼ xkʼabʼaʼ naq aʼan chaq propeet ut naxnaw naq li Yos ak kixye re, naq jun rehebʼ li ralal xkʼajol tchunlaaq saʼ li xkʼojaribʼaal, 31 kiril chi rubʼelaj naq kiwaklesiik chi yoʼyo li Kriist ut kiʼaatinak chirix aʼin, kixye naq inkʼaʼ kikanabʼaak saʼ li Muqlebʼaal Kamenaq* chi moko kiqʼaak li xtibʼel. 32 Li Yos kixwaklesi chi yoʼyo li Jesús, ut chiqajunilo xqil aʼin. 33 Joʼkan naq, saʼ xkʼabʼaʼ naq kitaqsiik saʼ xnim uqʼ li Yos ut kixkʼul li santil musiqʼej joʼ kixyeechiʼi chaq li Yuwaʼbʼej, aʼan xhoyok chaq re li nekeeril ut nekeerabʼi. 34 Xbʼaan naq laj David inkʼaʼ kitaqeʼk saʼ choxa abʼan kixye: “Li Jehobʼa* kixye re Linqaawaʼ: «Kʼojlan saʼ linnim uqʼ 35 toj reetal tinkʼe rubʼel laawoq ebʼ li xikʼ nekeʼilok aawe re naq taayeqʼihebʼ»”. 36 Joʼkan bʼiʼ, chixnawaq li tenamit Israel naq li Yos kixxaqabʼ li Jesús choʼq Qaawaʼ ut choʼq Kriist aʼ li xeetʼuyubʼ chiru cheʼ».
37 Naq xeʼrabʼi aʼin, kʼajoʼ xeʼrahoʼk saʼ xchʼool ut xeʼxpatzʼ re laj Pedro ut ebʼ li junchʼol chi apóstol: «Ex qechpaabʼanel, kʼaru tqabʼaanu?». 38 Laj Pedro kixye rehebʼ: «Yotʼomaq eechʼool ut jalomaq eenaʼlebʼ ut chikubʼeeq eehaʼ saʼ xkʼabʼaʼ li Jesukriist re naq tkuymanq tsachmanq eemaak ut teekʼul li santil musiqʼej choʼq eemaatan. 39 Xbʼaan naq eere li yeechiʼom ut rehebʼ leeralal eekʼajol joʼ ajwiʼ rehebʼ li wankebʼ chi najt ut choʼq rehebʼ li nekeʼbʼoqeʼk xbʼaan li Qayos Jehobʼa».* 40 Ut inkʼaʼ kixkanabʼ xkʼebʼal chi naweʼk li chaabʼil esil chi tzʼaqal re ru ut kixye rehebʼ: «Kolomaq eeribʼ chiru li tenamit li wank chiruhebʼ li kutan aʼin li maaʼus xnaʼlebʼ». 41 Joʼkan naq li xeʼxkʼulubʼa li esil chi anchalebʼ xchʼool xeʼkubʼeek xhaʼ. Ut saʼ li kutan aʼan oxibʼ mil tana ebʼ li qas qiitzʼin xeʼok saʼ xyanqebʼ li xtzolom. 42 Ut xeʼxkʼe xchʼool chi xtzolbʼal li nekeʼxkʼut ebʼ li apóstol, nekeʼxkʼe xhoonal re wank* saʼ komonil nekeʼwaʼak ut nekeʼtijok saʼ junajil.
43 Joʼkan ajwiʼ, chixjunilebʼ li qas qiitzʼin xeʼok roxloqʼinkil li Yos, ut ebʼ li apóstol xeʼok xbʼaanunkil naabʼal li xninqal ru naʼlebʼ ut ebʼ li sachbʼachʼoolej. 44 Chixjunilebʼ li xeʼok chi paabʼank wankebʼ saʼ junajil ut nekeʼxwotz li kʼaru rehebʼ, 45 ut nekeʼxkʼayi li xjunkabʼlal* ut ebʼ li xchʼochʼ ut li xtuminal nekeʼxjekʼi joʼ chanru naʼajmank chiru li junjunq. 46 Saʼ komonil nekeʼxkʼe xchʼool chi xik wulaj wulaj saʼ rochoch li Yos. Nekeʼwaʼak saʼ jalan jalanq chi ochoch ut nekeʼxwotz li xtzekemq chi sahebʼ saʼ xchʼool ut chi anchalebʼ xchʼool, 47 nekeʼxnima ru li Yos ut yookebʼ xtawbʼal li usilal chiruhebʼ li qas qiitzʼin. Naq yook chaq chi kʼulmank aʼin, li Jehobʼa* wulaj wulaj yook xkʼambʼal chaq naabʼal chik li qas qiitzʼin re naq teʼoq saʼ xyanqebʼ. Ebʼ li qas qiitzʼin aʼin aʼanebʼ li yookebʼ chi koleʼk xbʼaan li Yos.