Hechos
4 Naq laj Pedro ut laj Juan yookebʼ raatinankil li tenamit, rikʼinebʼ xeʼnachʼok ebʼ laj tij, ebʼ laj saduseey ut li naʼilok re li rochoch li Yos. 2 Yookebʼ xjosqʼil xbʼaan naq ebʼ li apóstol nekeʼxtzol li tenamit ut nekeʼxye resil naq li Jesús kiwaklesiik chi yoʼyo saʼ xyanqebʼ li kamenaq. 3 Joʼkan naq xeʼchapeʼk ut xeʼkʼeheʼk saʼ tzʼalam ut aran xeʼxnumsi li qʼoqyink xbʼaan naq ak xʼok li qʼoqyink. 4 Abʼanan naabʼal rehebʼ li xeʼabʼink re li xeʼxye, xeʼok chi paabʼank, oobʼ mil tana li winq.
5 Saʼ li jun chik kutan xeʼxchʼutubʼ ribʼ aran Jerusalén ebʼ li nekeʼjolomink rehebʼ, ebʼ li cheekel winq ut ebʼ laj tzʼiibʼ, 6 rochbʼeenebʼ laj Anás aʼ li xbʼeenil aj tij, laj Caifás, laj Juan, laj Alejandro ut chixjunilebʼ li rech-alal li xbʼeenil aj tij. 7 Xeʼxkʼe laj Pedro ut laj Juan saʼ xyiihebʼ ut xeʼxpatzʼ rehebʼ: «Ani xkʼehok eewankil malaj saʼ xkʼabʼaʼ ani xeebʼaanu aʼin?». 8 Laj Pedro nujenaq chi santil musiqʼej, kixye rehebʼ:
«Ex cheekel winq ut laaʼex li nekeejolomi li tenamit 9 wi anaqwan teepatzʼ qe chirix li us li xbʼaanumank re li winq li yeq roq ut nekeeraj xnawbʼal ani kikʼirtansink re, 10 cheenawaq laaʼex ut chixjunil li tenamit Israel naq kikʼiraak saʼ xkʼabʼaʼ li Jesukriist laj Nazaret li xeetʼuyubʼ chiru cheʼ abʼan li Yos kixwaklesi chi yoʼyo saʼ xyanqebʼ li kamenaq. Saʼ xkʼabʼaʼ aʼan kikʼiraak li winq aʼin li wank cheeru. 11 Aʼin “li pek li xeetzʼeqtaana laaʼex laj kabʼlanel ut li pek aʼin kikanaak choʼq xnimal ru pek li naxik saʼ xxuk ut nakʼemank taqeʼq”. 12 Joʼkan ajwiʼ, kaʼajwiʼ aʼan laj kolonel xbʼaan naq maakʼaʼ junaq chik li kʼabʼaʼej saʼ chixjunil li ruuchichʼochʼ li kixsikʼ ru li Yos saʼ xyanqebʼ li qas qiitzʼin re naq teʼkoleʼq».
13 Joʼkan bʼiʼ, naq xeʼril naq laj Pedro ut laj Juan inkʼaʼ nekeʼxuwak ut naq xeʼxkʼe reetal naq maakʼaʼebʼ xwankil chi moko kʼihebʼ ta xtzolbʼal,* xeʼsach xchʼool. Ut xeʼxkʼe ajwiʼ reetal naq ebʼ li winq aʼin xeʼrochbʼeeni chaq li Jesús. 14 Ut saʼ xkʼabʼaʼ naq li winq li xkʼirtasiik wank rochbʼeenebʼ, maakʼaʼ chik xeʼruuk xyeebʼal. 15 Tojaʼ naq xeʼtaqlaak xyeebʼal rehebʼ naq teʼelq saʼ li naʼaj bʼarwiʼ wank li Nimla Raqlebʼaal Aatin* rehebʼ laj judiiy ut xeʼok chi aatinak chiribʼilebʼ ribʼ. 16 Xeʼxye: «Kʼaru tqabʼaanu rikʼinebʼ li winq aʼin? Xbʼaan naq chʼolchʼo chiru chixjunil li tenamit Jerusalén naq xeʼxbʼaanu jun li nimla sachbʼachʼoolej ut inkʼaʼ naru tqaye naq moko yaal ta. 17 Abʼan re naq maaʼani chik tnawoq re chirix aʼin, qasebʼesihaqebʼ ut qayeehaq rehebʼ naq inkʼaʼ chik teʼaatinaq saʼ xkʼabʼaʼ li winq aʼin».
18 Tojaʼ naq xeʼbʼoqeʼk ut xeʼyeeheʼk re, naq inkʼaʼ chik teʼaatinaq chi moko teʼkʼutuq saʼ xkʼabʼaʼ li Jesús. 19 Abʼan laj Pedro ut laj Juan xeʼxye rehebʼ: «Wi us chiru li Yos naq laaʼex chik texqapaabʼ ut inkʼaʼ li Yos, laaʼex chik yaal eere. 20 Abʼan laaʼo inkʼaʼ naru naqakanabʼ aatinak chirix li xqil ut xqabʼi». 21 Joʼkan bʼiʼ, naq ak xeʼsebʼesiik wiʼ chik, xeʼkanabʼaak chi xik ut inkʼaʼ xeʼtaweʼk xmaak re xkʼebʼalebʼ chi xtojbʼal xmaak ut nekeʼxxuwa ru li tenamit xbʼaan naq chixjunilebʼ yookebʼ xkʼebʼal xloqʼal li Yos rikʼin li kikʼulmank. 22 Xbʼaan naq numenaq 40 chihabʼ wank re li winq li kikʼirtasiik rikʼin sachbʼachʼoolej.
23 Naq ak xeʼelk saʼ tzʼalam, xkohebʼ bʼarwiʼ wankebʼ li junchʼol chi apóstol, xeʼxseeraqʼi chaq rehebʼ li xeʼyeeheʼk re xbʼaanebʼ li xbʼeenil aj tij ut ebʼ li cheekel winq. 24 Naq xeʼrabʼi aʼin, xeʼtijok chiru li Yos saʼ komonil ut xeʼok xyeebʼal:
«At Qaawaʼ li Nakaajolomi Chixjunil, laaʼat li xatyiibʼank re li choxa, li ruuchichʼochʼ, li palaw ut chixjunil li wank chisaʼ 25 ut laaʼat li xaaye saʼ xkʼabʼaʼ li santil musiqʼej chi xtzʼuumal re laj David li qaxeʼtoon ut aamoos: “Kʼaʼut xeʼxpoqoqi ribʼ* ebʼ li qas qiitzʼin ut ebʼ li tenamit xeʼok xkʼoxlankil li naʼlebʼ li maakʼaʼ naʼok wiʼ? 26 Ebʼ li awabʼej re li ruuchichʼochʼ ak kawresinbʼilebʼ re yalok saʼ xbʼeen li Jehobʼa* ut saʼ xbʼeen li yulbʼil ru* ut li nekeʼjolomink xeʼxchʼutubʼ ribʼ re yalok saʼ xbʼeenebʼ”. 27 Ut joʼkan tzʼaqal kikʼulmank, saʼ li tenamit aʼin laj Herodes* ut laj Poncio Pilato xeʼxchʼutubʼ ribʼ rikʼinebʼ li junchʼol chi tenamit ut rikʼinebʼ laj Israel re yalok saʼ xbʼeen li Jesús laasantil moos li yulbʼil ru aabʼaan. 28 Xeʼxchʼutubʼ ribʼ re xbʼaanunkil li xaaye chaq rubʼelaj. Kikʼulmank aʼin xbʼaan naq wank aawankil ut xbʼaan naq naxchap ribʼ rikʼin laawajom. 29 Ut anaqwan Jehobʼa,* kʼe reetal naq nekeʼraj qasebʼesinkil, tenqʼahebʼ laamoos re naq inkʼaʼ teʼxkanabʼ aatinak chirix laawaatin chi maakʼaʼebʼ xxiw, 30 ut maakanabʼ xyeʼbʼal laawuqʼ re kʼirtasink ut re xbʼaanunkil ebʼ li sachbʼachʼoolej ut ebʼ li xninqal ru naʼlebʼ saʼ xkʼabʼaʼ li Jesús laasantil moos».
31 Naq xeʼraqeʼk chi tijok* chi anchalebʼ xchʼool, kiʼekʼank li naʼaj bʼarwiʼ chʼutchʼukebʼ, ut chixjunilebʼ xeʼnujak chi santil musiqʼej ut xeʼok xyeebʼal resil li raatin li Yos chi maakʼaʼebʼ xxiw.
32 Joʼkan ajwiʼ, chixjunilebʼ laj paabʼanel junaj ru xchʼoolebʼ ut xkʼaʼuxebʼ, ut maaʼani rehebʼ naril naq re xjunes li junkabʼlal li wank rikʼin, nekeʼxwotz bʼan chixjunil. 33 Ebʼ li apóstol inkʼaʼ xeʼxkanabʼ xyeebʼal resil li xwaklijik chi yoʼyo li Qaawaʼ Jesús ut us xeʼelk. Ut chixjunilebʼ xeʼosobʼtesiik chi yoʼon rikʼin xnimal rusilal li Yos. 34 Joʼkan naq, maaʼani rehebʼ wank saʼ rajbʼal ru xbʼaan naq chixjunilebʼ li wankebʼ xchʼochʼ malaj rochoch nekeʼxkʼayi ut nekeʼxkʼe chaq li xtuminal 35 rehebʼ li apóstol. Tojaʼ naq najekʼimank joʼ chanru naʼajmank chiru li junjunq. 36 Joʼkan naq laj José, jun laj Leví li yoʼlajenaq aran Chipre, li nakʼabʼaʼiik xbʼaanebʼ li apóstol joʼ Bernabé (chi jalbʼil ru naraj xyeebʼal «ralal li nakʼojobʼank chʼool»), 37 kixkʼayi jun li chʼochʼ ut li xtuminal kixkʼe chaq rehebʼ li apóstol.