Romanos
12 Joʼkan bʼiʼ, ex was wiitzʼin, saʼ xkʼabʼaʼ naq li Yos kixtoqʼobʼa eeru,* nintzʼaama cheeru naq teeyeechiʼi leetibʼel joʼ yoʼyokil mayej, saant ut li naxkʼulubʼa li Yos. Ut chi joʼkan teeroksi chiʼus leekʼaʼuxl naq texkʼanjelaq chiru li Yos. 2 Ut meekanabʼ naq texpakʼ li ruuchichʼochʼ* aʼin, kanabʼomaq bʼan naq li Yos tixjal chanru nekexkʼoxlak re naq eejunes ajwiʼ teekʼe reetal bʼar wank li xchaabʼilal, li xsahilal ut li xtzʼaqalil re ru li rajom li Yos.
3 Saʼ xkʼabʼaʼ naq li Yos kixkʼut chiwu li xnimal rusilal, ninye eere naq meekʼoxla naq qʼaxal nim wiʼ chik leewankil. Tzʼaqalaq bʼan ru li teekʼoxla cheerix. Ut tzʼilomaq eerix rikʼin xnimal li paabʼal li kixkʼe eere li Yos. 4 Joʼ chanru naq jun li tibʼelej wank naabʼal xchaʼal abʼan moko chixjunilebʼ ta nekeʼxbʼaanu jun chi kʼanjel 5 joʼkan ajwiʼ laaʼo, usta naabʼalo, naqakʼubʼ jun chi tibʼelej li wank saʼ junajil rikʼin li Kriist. Laaʼo ajwiʼ joʼ xchaʼal li tibʼelej wanko saʼ junajil chiqibʼil qibʼ. 6 Saʼ xkʼabʼaʼ naq li Yos kixkʼut chiqu li xnimal rusilal wank jalan jalanq qamaatan. Wi xqakʼul li maatan re xkʼebʼal chi naweʼk li resil li Yos, miqakanabʼ xkʼebʼal chi naweʼk; 7 wi xqakʼul li maatan re xtenqʼankilebʼ li junchʼol, miqakanabʼ xtenqʼankilebʼ li junchʼol; wi xqakʼul li maatan re xtzolbʼalebʼ li junchʼol, miqakanabʼ xtzolbʼalebʼ li junchʼol, 8 wi xqakʼul li maatan re kʼehok naʼlebʼ, miqakanabʼ kʼehok naʼlebʼ, wi xqakʼul li maatan re wotzok, choowotzoq chi anchal qachʼool, li nakʼamok bʼe, chixbʼaanuhaq chiʼus ut chi tikto; li naʼuxtaanank u,* chixbʼaanuhaq chi sa saʼ xchʼool.
9 Mexrahok saʼ kaʼpakʼal u. Xikʼ teeril li moko us ta; kʼehomaq eechʼool chi xbʼaanunkil li us. 10 Kʼutbʼesimaq li tzʼaqal rahok cheeribʼil eeribʼ joʼ nekeʼxra ribʼ ebʼ li junkabʼal. Chexkʼamoq bʼe chi roxloqʼinkil eeribʼ cheeribʼil eeribʼ. 11 Kʼanjelaqex chi kaw ut meeqʼema eeribʼ saʼ leekʼanjel. Kanabʼomaq naq li santil musiqʼej tixbʼaanu naq wanq eemetzʼew. Chexkʼanjelaq chiru li Jehobʼa* chi anchal eechʼool. 12 Chisahoʼq saʼ leechʼool rikʼin li teekʼul saʼ li kutan chalk re. Cheekuyaq ebʼ li chʼaʼajkilal. Maajunwa teekanabʼ tijok. 13 Wotzomaq li kʼaru eere rikʼinebʼ li santil paabʼanel li naʼajmank xtenqʼankilebʼ. Kʼaytesihomaq eeribʼ chi xtenqʼankilebʼ li junchʼol. 14 Cheetzʼaama re li Yos naq trosobʼtesihebʼ li xikʼ nekeʼilok ut meeye li inkʼaʼ us chirixebʼ. 15 Sahaq saʼ eechʼool rikʼinebʼ li sahebʼ saʼ xchʼool, yaabʼanqex rikʼinebʼ li nekeʼyaabʼak. 16 Kʼoxlamaq ebʼ li junchʼol joʼ chanru nekeekʼoxla eeribʼ. Meekʼoxla naq nim eewankil, kʼoxlamaq bʼan naq kubʼenaq eewankil. Meekʼoxla naq qʼaxal wank eenaʼlebʼ.
17 Li xbʼaanu maaʼusilal eere meekʼe reqaj re. Kʼehomaq eechʼool chirix li nekeʼxkʼoxla ebʼ li qas qiitzʼin naq us. 18 Bʼaanumaq chixjunil li wank saʼ leeruqʼ re naq texwanq saʼ tuqtuukilal rikʼin chixjunilebʼ. 19 Ex wechpaabʼanel, meekʼe reqaj li teʼxbʼaanu eere, kanabʼomaq bʼan naq li xjosqʼil li Yos tkʼehoq reqaj rehebʼ. Xbʼaan naq tzʼiibʼanbʼil: «“Laaʼin tinkʼe reqaj rehebʼ, laaʼin tinkʼe rehebʼ li xkʼulubʼebʼ”, chan li Jehobʼa».* 20 Taabʼaanu bʼan aʼin, «wi ttzʼokaaq li xikʼ naʼilok aawe, kʼe chi waʼak; wi tchaqiq re, kʼe bʼayaq rukʼaʼ. Ut rikʼin aʼin, chanchan tawiʼ yookat xkʼebʼal li xtiqwal ruxaml saʼ xbʼeen xjolom re xqʼunobʼresinkil li xkawil xchʼool». 21 Maakanabʼ naq li maaʼusilal tqʼaxoq u saʼ aabʼeen, qʼax bʼan ru li maaʼusilal rikʼin xbʼaanunkil li us.