Juan
17 Naq ak kixye aʼin, li Jesús kixtaqsi li rilobʼaal saʼ choxa ut kixye: «At Inyuwaʼ ak xwulak xhoonalil. Kʼe xloqʼal laawalal re naq laawalal tixkʼe aaloqʼal, 2 joʼ chanru naq xaakʼe xwankil saʼ xbʼeen chixjunilebʼ li qas qiitzʼin re naq aʼan tixkʼe li junelik yuʼam rehebʼ chixjunil li xaakʼehebʼ saʼ ruqʼ. 3 Li teʼkʼuluq re li junelik yuʼam tento naq inkʼaʼ teʼxkanabʼ xnawbʼal aawu laaʼat li jun chi tzʼaqal Yos ut li Jesukriist li xaataqla chaq. 4 Laaʼin xinkʼe aaloqʼal saʼ ruuchichʼochʼ; xinchoy li kʼanjel li xaakʼe chinbʼaanu. 5 At Inyuwaʼ naq toj maajiʼ nayiibʼamank li ruuchichʼochʼ wank chaq inloqʼal chaakʼatq, anaqwan kʼe wiʼ chik inloqʼal.
6 »Xinkʼe chi naweʼk laakʼabʼaʼ rehebʼ li qas qiitzʼin li wankebʼ saʼ ruuchichʼochʼ ut li xaakʼehebʼ we. Aawehebʼ chaq abʼan xaakʼe we, ut xeʼxpaabʼ laawaatin. 7 Anaqwan nekeʼxnaw chik naq chixjunil li xaakʼe we chalenaq aawikʼin; 8 xbʼaan naq xinkʼe rehebʼ li esil li xaakʼe we ut xeʼxkʼulubʼa ut nekeʼxnaw chi tzʼaqal re ru naq xinchalk choʼq aawuuchil ut xeʼxpaabʼ naq laaʼat xattaqlank chaq we. 9 Nintzʼaamank chirixebʼ; inkʼaʼ nintzʼaamank chirix li ruuchichʼochʼ; nintzʼaamank bʼan chirixebʼ li xaakʼe we xbʼaan naq aawehebʼ; 10 ut chixjunil li kʼaru we, aawe ut chixjunil li kʼaru aawe, we ut laaʼin xinkʼul inloqʼal saʼ xyanqebʼ.
11 »Laaʼin tinkanabʼ li ruuchichʼochʼ ut tinxik aawikʼin, abʼan aʼanebʼ wankebʼ saʼ ruuchichʼochʼ. At insantil Yuwaʼ xbʼaan laakʼabʼaʼ li xinkʼut chiruhebʼ, ilebʼ* re naq wanqebʼ saʼ junajil joʼ naq laaʼo wanko saʼ junajil. 12 Naq wankin chaq rikʼinebʼ xinkʼe inchʼool chirixebʼ ut xwilebʼ xbʼaan laakʼabʼaʼ li xaakʼe we ut maaʼani rehebʼ kiʼosoʼk. Re naq ttzʼaqloq ru li Raatin li Yos, jun ajwiʼ tsachq ut aʼan li t-osoʼq. 13 Anaqwan xik we aawikʼin; ut ninye aʼin naq toj wankin saʼ ruuchichʼochʼ re naq ebʼ aʼan qʼaxal sahaqebʼ saʼ xchʼool joʼ laaʼin. 14 Xinkʼehebʼ chixnaw laawaatin, abʼan xikʼ xeʼileʼk xbʼaan li ruuchichʼochʼ xbʼaan naq moko rehebʼ ta li ruuchichʼochʼ, joʼ naq laaʼin moko rehin ta li ruuchichʼochʼ.
15 »Inkʼaʼ nintzʼaama chaawu naq taawisihebʼ saʼ ruuchichʼochʼ, nintzʼaama bʼan chaawu naq taakolebʼ* chiru li Maaʼus. 16 Ebʼ aʼan moko rehebʼ ta li ruuchichʼochʼ, joʼ naq laaʼin moko rehin ta li ruuchichʼochʼ. 17 Santobʼresihebʼ saʼ xkʼabʼaʼ li yaal; laawaatin aʼan li yaal. 18 Joʼ chanru naq xinaataqla saʼ ruuchichʼochʼ joʼkan ajwiʼ xintaqlahebʼ saʼ ruuchichʼochʼ. 19 Ut ninsantobʼresi wibʼ saʼ xkʼabʼaʼebʼ aʼan re naq ebʼ aʼan ajwiʼ teʼsantobʼresiiq saʼ xkʼabʼaʼ li yaal.
20 »Moko nintzʼaamank ta kaʼajwiʼ chirixebʼ, nintzʼaamank ajwiʼ chirixebʼ li teʼpaabʼanq we saʼ xkʼabʼaʼ li raatinebʼ, 21 re naq chixjunilebʼ wanqebʼ saʼ junajil. Joʼ naq laaʼat, Yuwaʼ, wankat saʼ junajil wikʼin; laaʼin wankin saʼ junajil aawikʼin. Ut ebʼ aʼan wanqebʼ saʼ junajil qikʼin; chi joʼkan li ruuchichʼochʼ tixpaabʼ naq laaʼat xattaqlank chaq we. 22 Xinkʼe rehebʼ li loqʼal li xaakʼe we re naq ebʼ aʼan teʼwanq saʼ junajil joʼ naq laaʼo wanko saʼ junajil: 23 laaʼin wankin saʼ junajil rikʼinebʼ ut laaʼat wankat saʼ junajil wikʼin re naq ebʼ aʼan wanqebʼ tzʼaqal saʼ junajil. Chi joʼkan li ruuchichʼochʼ tixnaw naq laaʼat xattaqlank chaq we ut xaarahebʼ joʼ naq xinaara laaʼin. 24 At Inyuwaʼ, nawaj naq li xaakʼehebʼ we wanqebʼ bʼarwiʼ wanqin laaʼin re naq teʼril li loqʼal li xaakʼe we xbʼaan naq xinaara naq toj maajiʼ natiklaak li ruuchichʼochʼ.* 25 At Inyuwaʼ, tiik aachʼool, relik chi yaal naq li ruuchichʼochʼ toj maajiʼ naxnaw aawu, abʼan laaʼin ninnaw aawu ut ebʼ aʼan ak nekeʼxnaw naq laaʼat xattaqlank chaq we. 26 Xinkʼehebʼ chixnaw laakʼabʼaʼ, ut inkʼaʼ tinkanabʼ xkʼebʼal chi naweʼk re naq laarahom rikʼin li xinaara wiʼ twanq rikʼinebʼ ut laaʼin wanqin saʼ junajil rikʼinebʼ».