1 Tesalonicenses
5 Anaqwan ex aj paabʼanel moko aajel ta cheeru naq texqatzʼiibʼa chirix li xqʼehil ut li hoonal li xaqabʼanbʼil 2 xbʼaan naq laaʼex nekeenaw chiʼus naq li xkutankil li Jehobʼa* tchalq joʼ naq nachalk jun laj elqʼ chi qʼeq. 3 Naq yooqebʼ xyeebʼal «Anaqwan wanko chik saʼ tuqtuukilal ut maakʼaʼ chik tqaxuwa!» saʼ junpaat tchalq li xraqik saʼ xbʼeenebʼ, joʼ naq nachalk li xrahilal jun li ixq li wank saʼ yuʼam ut inkʼaʼ teʼruuq chi elelik. 4 Abʼan ex aj paabʼanel, moko wankex ta saʼ qʼoqyink re naq maakʼaʼaq saʼ leechʼool naq tchalq saʼ eebʼeen li kutan aʼin, joʼ naq tchalq raj li kutan saʼ xbʼeenebʼ laj elqʼ 5 xbʼaan naq cheejunilex ralal xkʼajol li saqenk ut ralal xkʼajol li kutan, laaʼo moko reho ta li qʼoqyink chi moko reho ta li akʼabʼ.
6 Joʼkan bʼiʼ, inkʼaʼ toowarq joʼ nekeʼxbʼaanu li junchʼol. Laaʼo junelik ajʼooq qu ut inkʼaʼ tqakanabʼ kʼoxlak chiʼus. 7 Li nekeʼwark, nekeʼwark chi qʼeq; ut li nekeʼkalaak, kalajenaqebʼ chi qʼeq. 8 Abʼan laaʼo, li reho li kutan, inkʼaʼ tqakanabʼ kʼoxlak chiʼus ut inkʼaʼ tqakanabʼ xkʼebʼal chiqix li paabʼal ut li rahok joʼ li ramlebʼ chʼiichʼ li naxkol chiru li qamaqabʼ ut li punit chʼiichʼ chirix li kolbʼa ibʼ li yooko roybʼeninkil 9 xbʼaan naq li Yos inkʼaʼ kixsikʼ qu re naq tchalq saʼ qabʼeen li xjosqʼil, kixsikʼ bʼan qu re naq tqataw li kolbʼa ibʼ saʼ xkʼabʼaʼ li Qaawaʼ Jesukriist. 10 Aʼan kikamk saʼ qakʼabʼaʼ re naq toowanq rochbʼeen aʼan aʼ yaal ma ajʼooqo malaj warenaqo.* 11 Joʼkan naq meekanabʼ xwaklesinkil eechʼool ut xtenqʼankil eeribʼ cheeribʼil eeribʼ joʼ ak yookex xbʼaanunkil.
12 Anaqwan, ex aj paabʼanel, naqatzʼaama cheeru naq teeroxloqʼihebʼ li nekeʼkʼanjelak chi kaw saʼ eeyanq, li nekeʼbʼeresink eere chirix li xkʼanjel li Qaawaʼ ut nekeʼxkʼe eenaʼlebʼ. 13 Kʼutbʼesimaq naq qʼaxal tuulanex rikʼinebʼ ut teerahebʼ xbʼaan li kʼanjel li nekeʼxbʼaanu. Wanqex ajwiʼ saʼ tuqtuukilal cheeribʼil eeribʼ. 14 Joʼkan ajwiʼ, ex aj paabʼanel naqatzʼaama cheeru naq teeqʼusebʼ li inkʼaʼ nekeʼabʼink, teekʼojobʼ xchʼool li rahebʼ xchʼool,* teetenqʼahebʼ li maakʼaʼebʼ xmetzʼew ut wanq eekuyum rikʼin chixjunilebʼ. 15 Kʼehomaq reetal naq maaʼani tixkʼe reqaj li maaʼusilal li xeʼxbʼaanu re. Junelik bʼan teekʼe eeqʼe chi xbʼaanunkil li us saʼ eeyanq ut saʼ xyanqebʼ li junchʼol.
16 Junelik sahaq saʼ leechʼool. 17 Junelik textijoq. 18 Teebʼanyoxi chixjunil. Aʼin naraj li Yos choʼq eere saʼ xkʼabʼaʼ li Kristo Jesús. 19 Meechup xxamlel li santil musiqʼej.* 20 Meetzʼeqtaana ebʼ li propesiiy. 21 Kʼehomaq reetal ma tzʼaqal yaal chixjunil ut kaw teechap li us.* 22 Teetzʼeqtaana chixjunil li maaʼusilal.
23 Aʼ taxaq li Xyosil li tuqtuukilal texsantobʼresi chi tzʼaqal re ru. Ut li xchaabʼilal ru leenaʼlebʼ,* leechʼool ut leetibʼel, ex aj paabʼanel maakʼaʼaq xmaak ut kawaqex saʼ chixjunil naq ak wanq arin* li Qaawaʼ Jesukriist. 24 Ut li nabʼoqok eere tixbʼaanu li naxye ut chʼolchʼo naq tixbʼaanu aʼin.
25 Ex aj paabʼanel meekanabʼ tijok chiqix.
26 Teekʼe xsahil xchʼool chixjunilebʼ laj paabʼanel ut teetzʼubʼebʼ ru.
27 Nintzʼaama cheeru saʼ xkʼabʼaʼ li Qaawaʼ naq tyaabʼasimanq li esilhu aʼin re chixjunilebʼ laj paabʼanel.
28 Aʼ taxaq li xnimal rusilal li Qaawaʼ Jesukriist chiwanq eerikʼin.