Marcos

6 Tojaʼ naq kiʼelk aran, kiʼok saʼ li xtenamit ut ebʼ li xtzolom xeʼochbʼeenink re. 2 Naq kiwulak li sábado,* kiʼok chi kʼutuk saʼ li naʼaj re loqʼonink, li xkʼihalil ebʼ li qas qiitzʼin li xeʼabʼink re sachsokebʼ xchʼool xeʼkanaak ut xeʼxye: «Bʼar kixtaw li winq chixjunil aʼin? Kʼaʼut kikʼemank re li naʼlebʼ aʼin? Ut kʼaʼut kʼebʼil saʼ ruqʼ xbʼaanunkil ebʼ li sachbʼachʼoolej? 3 Peʼyaal naq aʼin laj peechʼ, li xyum li xMaría ut rasebʼ laj Santiago, laj José, laj Judas ut laj Simón?». Ma inkʼaʼ tabʼiʼ wankebʼ arin saʼ qayanq ebʼ li ranabʼ? Ut aʼin kiramok chiruhebʼ xpaabʼankil re. 4 Abʼan li Jesús kixye rehebʼ: «Li propeet naʼoxloqʼiik yalaq bʼar, abʼan moko joʼkan ta saʼ xtenamit, saʼ xyanq li rech-alal ut saʼ rochoch». 5 Joʼkan naq aran inkʼaʼ kiruuk xbʼaanunkil junaq li sachbʼachʼoolej, kaʼajwiʼ kixkʼirtasi wiibʼ oxibʼ li yaj rikʼin xkʼebʼal li ruqʼ saʼ xbʼeenebʼ. 6 Joʼkan naq kisach xchʼool chi rilbʼal naq inkʼaʼ nekeʼxpaabʼ li Yos. Ut kixbʼeni ebʼ li kʼalebʼaal li wankebʼ chi nachʼ re xtzolbʼalebʼ.

7 Tojaʼ naq kixchʼutubʼebʼ li Kabʼlaju ut kixtaqlahebʼ chi sumal, ut kixkʼehebʼ xwankil saʼ xbʼeenebʼ li maaʼus aj musiqʼej. 8 Kixye ajwiʼ rehebʼ naq maakʼaʼ teʼxkʼam choʼq rehebʼ li xbʼenik, kaʼajwiʼ jun li xuqʼ. Inkʼaʼ teʼxkʼam xtzekemq chi moko xchampa chi moko tumin* saʼ xkʼaamalebʼ xsaʼ. 9 Kixye naq teʼxkʼe xxaabʼebʼ* abʼan inkʼaʼ teʼxkʼam wiibʼ li xtʼikrebʼ.* 10 Ut kixye ajwiʼ rehebʼ: «Naq texʼoq saʼ junaq li ochoch kanaqex aran toj reetal twulaq xkutankil leexikik. 11 Wi saʼ junaq li naʼaj inkʼaʼ texkʼuleʼq chi moko texʼabʼiiq, naq texʼelq aran, chiqʼomaq li poqs cheeroq re naq teʼxnaw naq moko us ta wankebʼ». 12 Tojaʼ naq xeʼxchap xbʼe ut xeʼok xkʼebʼal chi naweʼk li raatin li Yos re naq ebʼ li qas qiitzʼin teʼxyotʼ xchʼool ut teʼxjal xnaʼlebʼ; 13 naabʼal ebʼ li maaʼus aj musiqʼej xeʼrisi ut naabʼalebʼ li yaj xeʼxyul chi aseeyt, ut xeʼxkʼirtasi.

14 Joʼkan bʼiʼ, li awabʼej Herodes kirabʼi resil aʼin xbʼaan naq yalaq bʼar kinawmank xkʼabʼaʼ li Jesús ut ebʼ li qas qiitzʼin yookebʼ xyeebʼal: «Laj Juan, aj Kubʼsihomhaʼ, kiwaklesiik chi yoʼyo saʼ xyanqebʼ li kamenaq ut saʼ xkʼabʼaʼ aʼin naru xbʼaanunkil ebʼ li sachbʼachʼoolej». 15 Abʼan wankebʼ nekeʼxye: «Aʼan laj Elías». Ut jalanebʼ chik nekeʼxye: «Aʼan jun li propeet, joʼ jun rehebʼ li propeet li kiwank chaq junxil». 16 Abʼan naq laj Herodes kirabʼi li nayeemank chirix li Jesús, kixye: «Laj Juan li xinchʼot xjolom kiwaklesiik chi yoʼyo». 17 Xbʼaan naq laj Herodes kixtaqla xchapbʼal laj Juan, kixbʼakʼ chi kareen ut kixkʼe saʼ tzʼalam saʼ xmaak li xHerodías li rixaqil laj Filipo li ras laj Herodes. Saʼ xkʼabʼaʼ naq laj Herodes kisumlaak rikʼin, 18 laj Juan kixye re laj Herodes: «Li chaqʼrabʼ inkʼaʼ naxkʼulubʼa naq twanq choʼq aawixaqil li rixaqil laawas». 19 Joʼkan naq li xHerodías xikʼ naril laj Juan ut kiraj xkamsinkil, abʼan moko kiruuk ta xbʼaanunkil 20 xbʼaan naq laj Herodes naxxuwa laj Juan. Chʼolchʼo chiru naq laj Juan naxloqʼoni li Yos ut tiik xchʼool, ut naxkʼe xchʼool chirix re naq maakʼaʼ tixkʼul. Rajlal naq narabʼi chi aatinak sachso xchʼool nakanaak, usta inkʼaʼ naxnaw li tixbʼaanu, nawulak chiru rabʼinkil.

21 Abʼan kiwulak xkutankil naq li xHerodías kiruuk xbʼaanunkil li kiraj naq laj Herodes kixninqʼehi li xchihabʼ. Kixbʼoqebʼ chi waʼak li ninqebʼ ru xkʼanjel, li nekeʼjolomink rehebʼ laj puubʼ ut li qʼaxal ninqebʼ xwankil saʼ xteepal Galilea. 22 Tojaʼ naq kiʼok li xkoʼ li xHerodías ut kixajok. Laj Herodes ut li yookebʼ chi waʼak* rochbʼeen kʼajoʼ naq xeʼwulak chiru chanru kixajok. Joʼkan naq li awabʼej Herodes kixye re li ixqaʼal: «Patzʼ we li nakaawaj ut laaʼin tinkʼe aawe». 23 Kixpatzʼ ajwiʼ xkʼabʼaʼ li Yos naq kixye re: «Joʼchʼinal joʼnimal li taapatzʼ, tinkʼe aawe, usta taapatzʼ xyiijachil linʼawabʼejilal». 24 Li ixqaʼal kiʼelk chiruhebʼ ut xkoho xyeebʼal re li xnaʼ: «Kʼaru tinpatzʼ?». Ut li xnaʼ kixye re: «Patzʼ xjolom laj Juan, aj Kubʼsihomhaʼ». 25 Saʼ li hoonal ajwiʼ aʼan, li ixqaʼal xkoho saʼ aanil bʼarwiʼ wank li awabʼej ut kixye re: «Nawaj naq taakʼe we anaqwan ajwiʼ saʼ jun li plaat li xjolom laj Juan, aj Kubʼsihomhaʼ». 26 Usta kʼajoʼ kirahoʼk xchʼool, li awabʼej Herodes kixbʼaanu li kixyeechiʼi xbʼaan naq kixkʼe li raatin ut kixbʼaanu xbʼaanebʼ li rulaʼ.* 27 Joʼkan naq saʼ junpaat kixtaqla jun rehebʼ laj puubʼ li nakʼanjelak chiru chi xkʼambʼal chaq xjolom laj Juan. Ut laj puubʼ aʼin kixchʼot xjolom laj Juan saʼ tzʼalam 28 ut kixkʼam chaq saʼ jun li plaat. Tojaʼ naq kixkʼe re li ixqaʼal, ut li ixqaʼal kixkʼe re li xnaʼ. 29 Naq ebʼ li xtzolom laj Juan xeʼrabʼi li kikʼulmank, xkohebʼ chi xxokbʼal li xtibʼel ut xeʼxkʼe saʼ jun li muqlebʼaal.

30 Ebʼ li xtzolom xeʼchʼutlaak saʼ xsutam li Jesús ut xeʼxseeraqʼi re chixjunil li xeʼxbʼaanu ut li xeʼxkʼut chaq. 31 Saʼ xkʼabʼaʼ naq ebʼ li qas qiitzʼin nekeʼchalk ut nekeʼxik, li Jesús ut ebʼ li xtzolom inkʼaʼ xeʼwank xhoonal re waʼak. Joʼkan naq kixye rehebʼ: «Chalqex wikʼin ut yoʼqebʼ saʼ jun li naʼaj najt rikʼin li tenamit re naq texhilanq bʼayaq». 32 Joʼkan naq xkohebʼ saʼ li jukubʼ* saʼ jun li naʼaj najt rikʼin li tenamit bʼarwiʼ teʼruuq chi wank xjunesebʼ. 33 Abʼan wankebʼ xeʼilok re, naq xkohebʼ. Ut naabʼalebʼ ajwiʼ xeʼxnaw aʼin. Joʼkan naq naabʼalebʼ li qas qiitzʼin re chixjunil li tenamit xkohebʼ saʼ junpaat chi roqebʼ ut xeʼwulak xbʼeenwa chiruhebʼ aʼan. 34 Naq li Jesús kikubʼeek saʼ li jukubʼ,* kiril li kʼiila tenamit* ut kʼajoʼ kixtoqʼobʼa ruhebʼ xbʼaan naq chanchanebʼ li karneer li maakʼaʼ aj ilol rehebʼ. Ut kiʼok xtzolbʼalebʼ chirix naabʼal li naʼlebʼ.

35 Saʼ xkʼabʼaʼ naq ewuuk chik, ebʼ li xtzolom xeʼjilok rikʼin ut xeʼxye re: «Najt wanko rikʼin li tenamit ut ewuuk chik. 36 Chaqʼrabʼihebʼ li qas qiitzʼin re naq teʼxloqʼ chaq xwa saʼebʼ li kʼalebʼaal li nachʼ wankebʼ arin». 37 Abʼan li Jesús kixye rehebʼ: «Kʼehomaqebʼ chi waʼak». Tojaʼ naq ebʼ li xtzolom xeʼxye re: «Ma nakaawaj naq tqaloqʼ chaq wiibʼ siʼeent denario* li kaxlanwa re xkʼebʼalebʼ chi waʼak?». 38 Li Jesús kixye rehebʼ: «Jarubʼ li kaxlanwa wank eerikʼin? Ilomaq chaq». Naq xeʼxnaw, xeʼxye re: «Oobʼ li kaxlanwa ut wiibʼ li kar». 39 Tojaʼ naq kixtaqla chixjunilebʼ li qas qiitzʼin chi chunlaak chi chʼuut saʼ pachʼayaʼ. 40 Joʼkan naq xeʼchunlaak chi chʼuut re 100 ut re 50. 41 Tojaʼ naq li Jesús kixchap li oobʼ chi kaxlanwa ut li wiibʼ chi kar, kixtaqsi li rilobʼaal saʼ choxa, ut kitijok. Chirix chik aʼan kixjachi li kaxlanwa ut kiʼok xkʼebʼal rehebʼ li xtzolom re naq teʼxjekʼi rehebʼ li qas qiitzʼin. Ut kixjekʼi ajwiʼ li wiibʼ chi kar re chixjunilebʼ. 42 Joʼkan naq chixjunilebʼ xeʼwaʼak ut xeʼkʼojlaak xchʼool. 43 Chirix chik aʼan, xeʼxxok kabʼlaju chakach xperaasil li kaxlanwa joʼ ajwiʼ li kar. Ebʼ li chakach aʼin nujenaqebʼ xsaʼ. 44 Oobʼ mil xkʼihal chixjunilebʼ li winq li xeʼwaʼak.

45 Tikto kixye li Jesús rehebʼ li xtzolom naq teʼtaqeʼq saʼ li jukubʼ* ut teʼxik junpakʼal li palaw li nanumeʼk chixkʼatq Betsaida. Aʼut aʼan toj kikanaak xchaqʼrabʼinkilebʼ li qas qiitzʼin. 46 Abʼan, naq ak xchaqʼrabʼihebʼ, xkoho chi tijok saʼ jun li tzuul. 47 Naq kiʼok li qʼoqyink, li jukubʼ* wank chaq saʼ xyi li palaw, abʼan li Jesús toj wank chaq xjunes saʼ li tzuul. 48 Tojaʼ naq, li Jesús kiril naq yook chi chʼaʼajkoʼk chiruhebʼ li xtzolom xbʼeresinkil li jukubʼ* xbʼaan naq chiruhebʼ yook chaq li kawil iqʼ. Ut naq ak saqewk re, li Jesús kiʼok chi bʼeek saʼ xbʼeen li haʼ re xtawbʼalebʼ chaq, abʼan kixkʼoxla xqʼaxbʼalebʼ. 49 Naq xeʼril chi bʼeek saʼ xbʼeen li palaw, xeʼok xyeebʼal: «Jun li moy u!». Ut xeʼok xjapbʼal re 50 xbʼaan naq chixjunilebʼ xeʼril ru ut xeʼxuwak. Abʼan saʼ junpaat kixye rehebʼ: «Mexkʼoxlak, laaʼin, mexxuwak!». 51 Kitaqeʼk saʼ li jukubʼ rochbʼeenebʼ li xtzolom ut li kawil iqʼ kituqlaak ru. Naq xeʼril aʼin kʼajoʼ naq xeʼsach xchʼool, 52 inkʼaʼ xeʼxtaw ru xyaalalil li sachbʼachʼoolej chirix li kaxlanwa xbʼaan naq toj tzʼaptzʼokebʼ li xchʼool.

53 Naq ak xeʼxtoq ru li palaw, xeʼwulak saʼ li naʼaj Genesaret ut xeʼxbʼakʼ li jukubʼ* nachʼ chire li palaw. 54 Abʼan, kubʼeek yookebʼ saʼ li jukubʼ* naq ebʼ li qas qiitzʼin xeʼxkʼe reetal naq aʼan li Jesús. 55 Ut xkohebʼ saʼ aanil chi xyeebʼal rehebʼ li qas qiitzʼin li wankebʼ saʼ li teep aʼin ut xeʼxkʼam re li Jesús ebʼ li yaj chiru chʼaat. Nekeʼxik bʼarwiʼ nekeʼrabʼi naq wank chaq li Jesús. 56 Rajlal naq naʼok saʼ junaq li kʼalebʼaal malaj tenamit, ebʼ li qas qiitzʼin nekeʼxkʼam ebʼ li xyaj saʼebʼ li kʼayil ut nekeʼxtzʼaama chiru naq tixkanabʼebʼ chi xchʼeʼbʼal chire li xtʼikr. Ut li nekeʼchʼeʼok re, nekeʼkʼiraak.