Juan
12 Naq waqibʼ kutan chik ma li Paswa, li Jesús kiwulak Betania bʼarwiʼ wank chaq laj Lázaro aʼ li kiwaklesiik chi yoʼyo saʼ xyanqebʼ li kamenaq xbʼaan li Jesús. 2 Ut chi qʼeq xeʼwaʼak* rochbʼeen. Li xMarta kixjekʼihebʼ li xtzekemq ut laj Lázaro wank saʼ xyanqebʼ li qas qiitzʼin li xeʼwaʼak rochbʼeen li Jesús. 3 Tojaʼ naq li xMaría kixchap mero liitr tana li sununkil aseeyt, li qʼaxal terto ut tzʼaqal naard. Kixkʼe saʼ xbʼeen li roq li Jesús ut chirix chik aʼan kixmes rikʼin rismal xjolom. Ut li xbʼook li sununkil aseeyt kinujak saʼ chixjunil li ochoch. 4 Abʼan jun rehebʼ li tzolom aʼ laj Judas Iscariote li ok re xqʼaxtesinkil, kixye: 5 «Kʼaʼut inkʼaʼ kikʼayimank li sununkil aseeyt aʼin chi oxibʼ siʼeent denario* ut li xtuminal xkʼemank raj rehebʼ li nebʼaʼ?». 6 Abʼanan moko kixye ta aʼin xbʼaan naq naxkʼe xchʼool chirixebʼ li nebʼaʼ, kixye bʼan xbʼaan naq aj elqʼ. Aʼan kʼebʼil re xkaaxil li tumin ut narelqʼa li tumin li nakʼemank chisaʼ. 7 Tojaʼ naq li Jesús kixye: «Kanabʼ xchʼiʼchʼiʼinkil; chixbʼaanuhaq joʼ kʼaynaqebʼ xbʼaanunkil re xkawresinkil xkutankil linmuqbʼal. 8 Xbʼaan naq ebʼ li nebʼaʼ junelik wankebʼ eerikʼin, abʼan laaʼin moko junelik ta wanqin eerikʼin».
9 Saʼ li hoonal ajwiʼ aʼin, naabʼalebʼ laj judiiy xeʼxnaw naq li Jesús wank chaq Betania ut xeʼchalk chi rilbʼal, abʼan moko kaʼaj tawiʼ aʼan, xeʼchalk ajwiʼ chi rilbʼal laj Lázaro aʼ li kiwaklesiik wiʼ chik chi yoʼyo saʼ xyanqebʼ li kamenaq. 10 Ebʼ li xbʼeenil aj tij xeʼok xsikʼbʼal chanru teʼxkamsi ajwiʼ laj Lázaro 11 xbʼaan naq saʼ xkʼabʼaʼ aʼan naabʼalebʼ laj judiiy xeʼwulak aran ut xeʼok xpaabʼankil li Jesús.
12 Wulajaq chik li kʼiila tenamit li kiwulak saʼ li ninqʼe kixnaw naq li Jesús yook chi wulak Jerusalén. 13 Joʼkan naq xeʼxchap li xxaq mokooch, xeʼelk chi xkʼulbʼal ut xeʼok xyeebʼal chi kaw xyaabʼ xkuxebʼ: «Naqatzʼaama chaawu naq taakol! Osobʼtesinbʼil taxaq li nachalk saʼ xkʼabʼaʼ li Jehobʼa,* li Awabʼej re Israel!». 14 Naq li Jesús kixtaw jun li chʼina bʼuur, kichunlaak saʼ xbʼeen, joʼ chanru tzʼiibʼanbʼil: 15 «At xkoʼ Sion, matxuwak: Kʼe reetal, weʼ chaq Laaʼawabʼej chunchu saʼ xbʼeen jun li chʼina bʼuur». 16 Ebʼ li xtzolom inkʼaʼ xeʼxtaw ru aʼin saʼ xtiklajik. Abʼan, naq li Jesús kiʼoxloqʼiik ru, xeʼxjultika naq aʼin li tzʼiibʼanbʼil chaq chirix ut aʼin chixjunil li xeʼxbʼaanu chaq re.
17 Joʼkan bʼiʼ, li kʼiila tenamit li kiril naq li Jesús kixye re laj Lázaro naq t-elq chaq saʼ li muqlebʼaal ut naq kixwaklesi wiʼ chik chi yoʼyo saʼ xyanqebʼ li kamenaq, yook chaq xkʼebʼal resil li kikʼulmank. 18 Saʼ xkʼabʼaʼ ajwiʼ aʼin ebʼ li qas qiitzʼin xeʼelk chi xkʼulbʼal li Jesús xbʼaan naq xeʼrabʼi resil li sachbʼachʼoolej li kixbʼaanu. 19 Joʼkan naq ebʼ laj pariseey xeʼok xyeebʼal chiribʼilebʼ ribʼ: «Kʼehomaq reetal, maakʼaʼ ajʼe li yooko xbʼaanunkil. Chixjunilebʼ li qas qiitzʼin xkohebʼ chirix!».
20 Ut saʼ xyanqebʼ li qas qiitzʼin li xeʼchalk chi xloqʼoninkil li Yos saʼ li ninqʼe wankebʼ wiibʼ oxibʼ aj griego. 21 Ebʼ aʼan xeʼnachʼok rikʼin laj Felipe li chalenaq Betsaida re Galilea ut xeʼxye re: «Waʼ, naqaj rilbʼal li Jesús». 22 Laj Felipe xkoho xyeebʼal re laj Andrés, moqon chik laj Andrés ut laj Felipe xkohebʼ xyeebʼal re li Jesús.
23 Abʼan li Jesús kixye rehebʼ: «Ak xwulak xhoonalil naq li Ralal li Winq tixkʼul xloqʼal. 24 Relik chi yaal ninye eere, wi jun tʼorol li triiw inkʼaʼ natʼaneʼk saʼ chʼochʼ ut inkʼaʼ nakamk, tkanaaq joʼ jun tʼorol li triiw. Abʼan wi nakamk, naabʼal li ru tixkʼe. 25 Li naxra li xyuʼam, tixtzʼeq, abʼan li tixtzʼeq li xyuʼam saʼ li ruuchichʼochʼ aʼin tixkol re xtawbʼal li junelik yuʼam. 26 Wi junaq li qas qiitzʼin naraj kʼanjelak chiwu, chinxtaqehaq; ut bʼarwiʼ wanqin laaʼin aran ajwiʼ wanq laj kʼanjel chiwu. Wi junaq tkʼanjelaq chiwu, t-oxloqʼiiq xbʼaan li Yuwaʼbʼej. 27 Anaqwan qʼaxal yook inkʼaʼuxl. Ut kʼaru raj tinye? At Inyuwaʼ, chinaakol chiru li tkʼulmanq. Abʼan, aʼan ajʼe naq kinchalk. 28 At Inyuwaʼ, kʼe xloqʼal laakʼabʼaʼ». Tojaʼ naq kiʼelk chaq saʼ choxa jun li yaabʼ kuxej li kixye: «Ak xinkʼe xloqʼal ut tinkʼe wiʼ chik xloqʼal».
29 Li kʼiila tenamit li wankebʼ aran xeʼrabʼi aʼin, ut wankebʼ xeʼok xyeebʼal naq xʼekʼank jun li kaaq. Jalanebʼ chik xeʼxye: «Jun li ánjel xʼaatinank re». 30 Tojaʼ naq li Jesús kixye: «Moko saʼ inkʼabʼaʼ ta naq xʼabʼimank li yaabʼ kuxej aʼin, saʼ eekʼabʼaʼ bʼan. 31 Anaqwan xwulak xhoonalil naq traqmanq aatin saʼ xbʼeen li ruuchichʼochʼ; ut li najolomink re li ruuchichʼochʼ aʼin t-isiiq. 32 Abʼan, naq tintʼuyubʼaaq chiru cheʼ, aʼin tixbʼaanu naq li jalan jalanq chi qas qiitzʼin teʼchalq wikʼin». 33 Abʼanan kixye aʼin re xchʼolobʼankil chanru tkamq. 34 Tojaʼ naq li kʼiila tenamit kixye: «Saʼ xkʼabʼaʼ li Chaqʼrabʼ naqanaw naq li Kriist wanq chi junelik. Chanru nakaaye naq li Ralal li Winq ttʼuyubʼaaq chiru cheʼ? Ani li Ralal li Winq?». 35 Joʼkan naq li Jesús kixye rehebʼ: «Li saqenk toj wanq jun kʼamokaq chik eerikʼin. Chexbʼeeq naq toj wank li saqenk eerikʼin re naq li qʼoqyink inkʼaʼ tixqʼax eeru; li nabʼeek saʼ qʼoqyink inkʼaʼ naxnaw bʼar yook chi xik. 36 Naq toj wank li saqenk eerikʼin, kʼutbʼesihomaq naq nekeepaabʼ li saqenk re naq laaʼexaq ralal xkʼajol li saqenk».
Naq ak kixye aʼin, li Jesús xkoho ut kixmuq ribʼ chiruhebʼ. 37 Usta kixbʼaanu chaq naabʼal li sachbʼachʼoolej chiruhebʼ, inkʼaʼ xeʼxpaabʼ. 38 Chi joʼkan kitzʼaqlok ru li raatin li propeet Isaías naq kixye: «Jehobʼa,* ma wank junaq li qas qiitzʼin li naxpaabʼ li naqakʼe chi naweʼk? Ut re ani kikʼemank chi naweʼk li xwankil li Jehobʼa?».* 39 Laj Isaías kixchʼolobʼ ajwiʼ xyaalal kʼaʼut inkʼaʼ xeʼruuk xpaabʼankil: 40 «Kixtzʼap saʼ ruhebʼ ut kixbʼaanu naq tkawuuq xjolomebʼ re naq inkʼaʼ teʼiloq, chi moko teʼxtaw ru li napatzʼmank rehebʼ chi moko teʼsutqʼiiq rikʼin li Yos chi moko tixkʼirtasihebʼ». 41 Laj Isaías kixye li naʼlebʼ aʼin xbʼaan naq kiril xloqʼal li Kriist ut kiʼaatinak chirix aʼan. 42 Usta joʼkan, naabʼal rehebʼ li nekeʼjolomink rehebʼ laj judiiy xeʼok xpaabʼankil li Kriist abʼan inkʼaʼ nekeʼxye chaq chi kutankil naq nekeʼxpaabʼ xbʼaan naq nekeʼxxuwa naq teʼisiiq saʼ li naʼaj re loqʼonink xbʼaanebʼ laj pariseey, 43 ut nawulak ajwiʼ chiruhebʼ naq teʼkʼeheʼq xloqʼal xbʼaanebʼ li qas qiitzʼin chiru naq teʼkʼeheʼq xloqʼal xbʼaan li Yos.
44 Abʼan li Jesús kixye chi kaw xyaabʼ xkux: «Li napaabʼank we moko kaʼaj tawiʼ nikinxpaabʼ laaʼin, naxpaabʼ ajwiʼ li kitaqlank chaq we; 45 ut li naril wu, naril ajwiʼ ru li kitaqlank chaq we. 46 Xinchalk joʼ jun li saqenk saʼ ruuchichʼochʼ re naq li tpaabʼanq we tixkanabʼ wank saʼ qʼoqyink. 47 Joʼkan bʼiʼ, wi junaq narabʼi li waatin ut inkʼaʼ naxbʼaanu, inkʼaʼ tinkʼe chi xtojbʼal xmaak; xbʼaan naq laaʼin inkʼaʼ xinchalk re xkʼebʼal chi xtojbʼal xmaak li ruuchichʼochʼ, xinchalk bʼan chi xkolbʼal li ruuchichʼochʼ. 48 Li natzʼeqtaanank we ut inkʼaʼ naxkʼulubʼa li waatin wank ani tkʼehoq re chi xtojbʼal xmaak. Li waatin li ak xinye tkʼehoq re chi xtojbʼal xmaak, saʼebʼ li kutan li chalkebʼ re. 49 Xbʼaan naq inkʼaʼ nintaqla wibʼ chi aatinak aʼ bʼan li Yuwaʼbʼej li kitaqlank chaq we nayeehok we li tento tinye ut li tento tinkʼut. 50 Ut laaʼin ninnaw naq li xtaqlahom li Yos nakʼehok junelik yuʼam. Joʼkan naq chixjunil li ninye, ninye joʼ kixye chaq we li Yuwaʼbʼej».