Hebreos

11 Li paabʼal naxbʼaanu naq li nekeeroybʼeni ttzʼaqloq ru. Li paabʼal aʼan li naxkʼutbʼesi naq yaal li nekeepaabʼ usta inkʼaʼ nekeeruuk rilbʼal. 2 Saʼ xkʼabʼaʼ aʼin, kikʼutbʼesiik chiruhebʼ li qaxeʼtoon naq li Yos sa xchʼool rikʼinebʼ.

3 Saʼ xkʼabʼaʼ li qapaabʼal naqakʼe reetal naq li wank saʼ choxa ut saʼ ruuchichʼochʼ* kikʼemank saʼ xnaʼaj saʼ xkʼabʼaʼ li raatin li Yos joʼkan naq li naʼilmank kichalk saʼ xkʼabʼaʼ li inkʼaʼ naʼilmank.

4 Saʼ xkʼabʼaʼ li xpaabʼal laj Abel kixyeechiʼi re li Yos jun li mayej qʼaxal chaabʼil chiru li kixkʼe laj Caín. Saʼ xkʼabʼaʼ li xpaabʼal, kikʼutbʼesiik chiru naq tiik xchʼool xbʼaan naq li Yos kixkʼulubʼa li xmayej. Usta kikamk, toj naʼaatinak saʼ xkʼabʼaʼ li xpaabʼal.

5 Saʼ xkʼabʼaʼ li xpaabʼal laj Enoc, kikʼameʼk saʼ jalan chik naʼaj re naq inkʼaʼ ra tixkʼul naq tkamq ut maaʼani kitawok re xbʼaan naq li Yos kixkʼam saʼ jalan chik naʼaj. Ut naq toj maajiʼ nakʼameʼk saʼ jalan chik naʼaj, kikʼuteʼk chiru naq kixsahobʼresi xchʼool li Yos. 6 Joʼkan ajwiʼ, wi maakʼaʼ xpaabʼal junaq li qas qiitzʼin, inkʼaʼ naru naxsahobʼresi xchʼool li Yos xbʼaan naq li najilok rikʼin li Yos tento tixpaabʼ naq aʼan yoʼyo ut naq naxqʼajkamuhebʼ li nekeʼxkʼe xchʼool chi xloqʼoninkil ru.

7 Saʼ xkʼabʼaʼ li xpaabʼal laj Noé kiʼabʼink chiru li Yos naq kiyeeheʼk re li tkʼulmanq usta toj maajiʼ naʼilmank, kiroxloqʼi li Yos ut kixyiibʼ li jukubʼ kabʼl re xkolbʼalebʼ li wankebʼ saʼ rochoch. Saʼ xkʼabʼaʼ li xpaabʼal kixkʼutbʼesi naq xkʼulubʼ naq li ruuchichʼochʼ aʼin t-osoʼq ut kiyeemank naq tiik xchʼool saʼ xkʼabʼaʼ li xpaabʼal.

8 Saʼ xkʼabʼaʼ li xpaabʼal laj Abrahán kiʼabʼink naq kibʼoqeʼk ut xkoho saʼ li naʼaj li tixkʼul joʼ ereens.* Xkoho usta inkʼaʼ naxnaw bʼar txik. 9 Saʼ xkʼabʼaʼ li xpaabʼal kiwank joʼ abʼil tenamit saʼ li chʼochʼ li kiyeechiʼimank re, chanchan tawiʼ wank saʼ abʼil naʼaj. Kiwank saʼ kokʼ ochoch rochbʼeen laj Isaac ut laj Jacob li teʼxkʼul li ereens* li kiyeechiʼimank ajwiʼ re aʼan. 10 Xbʼaan naq aʼan yook roybʼeninkil li tenamit li wank tzʼaqal rubʼelankil li kixyiibʼ ut kixkabʼla li Yos.

11 Saʼ xkʼabʼaʼ li xpaabʼal li xSara kikanaak saʼ yuʼam usta ak cheek chik. Chʼolchʼo chiru li xSara naq li kixbʼaanu li yeechiʼom tixbʼaanu li naxye. 12 Saʼ xkʼabʼaʼ aʼin, yal rikʼin jun chi winq li chanchan kamenaq, xeʼyoʼlaak naabʼal li alal kʼajolbʼej joʼ li chahim li wank saʼ choxa ut inkʼaʼ naruhank rajlankilebʼ joʼ li samahibʼ li wank chire li palaw.

13 Chixjunilebʼ aʼin kaw xaqxokebʼ saʼebʼ li xpaabʼal naq xeʼkamk usta inkʼaʼ xeʼxkʼul li kiyeechiʼimank rehebʼ abʼan xeʼril chi najt ut xeʼxkʼulubʼa chi sa saʼ xchʼoolebʼ ut xeʼxkʼe chi naweʼk chiru li komonil naq ebʼ aj abʼl tenamit ut yal aj numelebʼ saʼ li ruuchichʼochʼ. 14 Ut li nekeʼaatinak chi joʼkaʼin nekeʼxkanabʼ chi chʼolchʼo ru naq yookebʼ xkʼebʼal xchʼool chi xsikʼbʼal jun li naʼaj choʼq rehebʼ. 15 Abʼanan, wi inkʼaʼ raj xeʼxkanabʼ xkʼoxlankil li naʼaj li xeʼelk wiʼ chaq xeʼxsikʼ raj xyaalal chanru teʼsutqʼiiq. 16 Abʼan anaqwan nekeʼxkʼe xqʼe re xtawbʼal jun li naʼaj li qʼaxal chaabʼil, aʼin naraj xyeebʼal, jun li naʼaj li nachalk saʼ choxa. Joʼkan naq li Yos inkʼaʼ naxutaanak xbʼaanebʼ chi moko naq nekeʼxye naq aʼan Xyosebʼ xbʼaan naq kixkawresi jun li tenamit choʼq rehebʼ.

17 Saʼ xkʼabʼaʼ li xpaabʼal laj Abrahán, naru nayeemank naq kixyeechiʼi laj Isaac naq kiyaleʼk rix, joʼkan, li winq li kixkʼul li yeechiʼom chi anchal xchʼool kawresinbʼil chik re xyeechiʼinkil li ralal li jun ajwiʼ chiru 18 usta kiyeeheʼk re: «Saʼ xkʼabʼaʼ laj Isaac tchalq li tkʼabʼaʼiiq choʼq aawalal aakʼajol». 19 Chʼolchʼo chiru naq li Yos naru naxwaklesi chi yoʼyo laj Isaac ut joʼkan kikʼulmank, li Yos kixkol chiru li kamk ut aʼin reetalil li tkʼulmanq moqon.

20 Saʼ xkʼabʼaʼ li xpaabʼal laj Isaac kirosobʼtesi ajwiʼ laj Jacob ut laj Esaú rikʼin xyeebʼal rehebʼ li tkʼulmanq moqon.

21 Saʼ xkʼabʼaʼ li xpaabʼal laj Jacob kirosobʼtesihebʼ li ralal xkʼajol laj José naq ak kamk re ut chapcho li xxuqʼ xbʼaan naq kixloqʼoni li Yos.

22 Saʼ xkʼabʼaʼ li xpaabʼal laj José kiʼaatinak chirix li relikebʼ laj Israel aran Ejiipt ut naq yook chaq chi nachʼok li xkamik kixye rehebʼ naq tento teʼxkʼam li xbʼaqel.

23 Saʼ xkʼabʼaʼ li xpaabʼal li xnaʼ xyuwaʼ laj Moisés xeʼxmuq chiru oxibʼ po naq kiyoʼlaak xbʼaan naq xeʼxkʼe reetal naq li chʼinaʼal qʼaxal chʼinaʼus naʼilok ut inkʼaʼ xeʼxuwak chiru li xeʼtaqlaak wiʼ xbʼaan li awabʼej. 24 Saʼ xkʼabʼaʼ li xpaabʼal laj Moisés, naq ak xwinqiloʼk, inkʼaʼ xkʼulubʼa naq tyeemanq naq aʼan xyum li xrabʼin laj faraón. 25 Kiʼalaak saʼ xchʼool naq trahobʼtesiiq rochbʼeen li xtenamit li Yos chiru xyalbʼal li sahilal li moko najt ta nawank ut nachalk saʼ li maak 26 kiril naq li xutaan li kixkʼul li Kriist qʼaxal nim chiru li xbʼihomal li tenamit Ejiipt xbʼaan naq naroybʼeni chi anchal xchʼool li rosobʼtesinkil. 27 Saʼ xkʼabʼaʼ li xpaabʼal kixtzʼeqtaana li tenamit Ejiipt ut inkʼaʼ kixuwak chiru xjosqʼil li awabʼej. Kaw chaq xpaabʼal chanchan tawiʼ yook rilbʼal li inkʼaʼ naʼilmank ru. 28 Saʼ xkʼabʼaʼ li xpaabʼal kixnima li Paswa ut kixrachrachi chi kikʼ chire rokebʼaal ebʼ li ochoch re naq laj sachonel maakʼaʼ tixbʼaanu rehebʼ li xbʼeen alalbʼej.

29 Saʼ xkʼabʼaʼ li xpaabʼal li tenamit kixtoq ru li kaqi palaw chanchan tawiʼ yook chi numeʼk saʼ chaqi ru. Abʼan, naq ebʼ laj Ejiipt xeʼxyal xbʼaanunkil aʼin, li palaw kinuqʼuk rehebʼ.

30 Saʼ xkʼabʼaʼ li xpaabʼal li tenamit chiru wuqubʼ kutan kixsut rix li tzʼak li sutsu wiʼ li tenamit Jericó ut li tzʼak kitʼaneʼk. 31 Saʼ xkʼabʼaʼ li xpaabʼal li xRahab, aj yumbʼeet, inkʼaʼ kikamk rochbʼeenebʼ li inkʼaʼ xeʼabʼink xbʼaan naq kixkʼul saʼ tuulanil ebʼ li winq li xeʼwulak chi chʼuukink.

32 Ut kʼaru chik tinye? Xbʼaan naq moko ttzʼaqloq ta raj inhoonal re xyeebʼal eere chirix laj Gedeón, laj Barac, laj Sansón, laj Jefté ut laj David joʼ ajwiʼ laj Samuel ut ebʼ li junchʼol chi propeet. 33 Saʼ xkʼabʼaʼebʼ li xpaabʼal xeʼxqʼax ruhebʼ li awabʼejilal, xeʼxbʼaanu li us, xeʼxkʼul ebʼ li yeechiʼom, xeʼxtzʼap rehebʼ li kaqkoj, 34 xeʼxchup xkawil li xaml, xeʼkoleʼk chiru li qʼesnal jutzʼchʼiichʼ, xeʼkanaak chi maakʼaʼebʼ xmetzʼew abʼan moqon chik xeʼwank wiʼ chik xmetzʼew, kawebʼ ribʼ saʼ li yalok ut xeʼxbʼaanu naq ebʼ laj puubʼ li xeʼraj yalok saʼ xbʼeenebʼ li xtenamit, teʼeleliq. 35 Wankebʼ li ixq li xeʼkamk xkomon xeʼwaklesiik chi yoʼyo. Joʼkan ajwiʼ, usta ebʼ li qas qiitzʼin xeʼxrahobʼtesi ebʼ li xmoos li Yos, ebʼ li moos aʼin inkʼaʼ xeʼxtzʼeqtaana li Yos re naq teʼkanabʼaaq chi xik ut chi joʼkan teʼxkʼul li wakliik chi yoʼyo li qʼaxal chaabʼil chiru li xeʼxkʼul ebʼ li junchʼol. 36 Joʼkan tzʼaqal, wankebʼ xeʼseʼeek ut xeʼkʼeheʼk chi tzʼuum* ut moko kaʼaj tawiʼ aʼin, xeʼbʼakeʼk chi kareen ut xeʼkʼeheʼk saʼ tzʼalam. 37 Xeʼteniik chi pek, xeʼyaleʼk rix, xeʼseteʼk saʼ wiibʼ jachal ut xeʼkamsiik rikʼin jutzʼchʼiichʼ, xeʼxbʼeni ribʼ yalaq bʼar ut tiqtokebʼ rikʼin rix karneer ut rix chibʼaat, xeʼwank saʼ rajbʼal ru, xeʼxkʼul li rahilal ut xeʼhobʼeʼk 38 ut moko xkʼulubʼ ta li ruuchichʼochʼ naq ebʼ li qas qiitzʼin aʼin teʼwanq chisaʼ. Xeʼxbʼeni ribʼ saʼ li chaqichʼochʼ, saʼebʼ li tzuul, saʼebʼ li ochoch pek ut saʼebʼ li xjulel chʼochʼ.

39 Usta xyeemank li us chirixebʼ xbʼaan li xpaabʼalebʼ, inkʼaʼ xeʼxkʼul li kiyeechiʼimank rehebʼ 40 xbʼaan naq li Yos kixkʼoxla chi rubʼelaj li us choʼq qe ut chi joʼkan inkʼaʼ teʼisiiq xbʼeenwa li xmaak chiqu laaʼo.