1 Juan
4 Laaʼex, li raarokex inbʼaan, meepaabʼ yalaq kʼaru chi propesiiy,* tzʼilomaq bʼan rix ebʼ li propesiiy* re rilbʼal ma chalenaq rikʼin li Yos xbʼaan naq ak xeʼwaklijeʼk chaq saʼ ruuchichʼochʼ ebʼ li bʼalaqʼil propeet.
2 Laaʼex teenaw naq li propesiiy* chalenaq rikʼin li Yos wi naxkʼut naq yaal naq li Jesukriist kichalk saʼ ruuchichʼochʼ joʼ winq. 3 Abʼan wi li propesiiy aʼin inkʼaʼ naxkʼutbʼesi naq li Jesús kichalk saʼ ruuchichʼochʼ joʼ winq, moko chalenaq ta rikʼin li Yos. Li propesiiy aʼin chalenaq rikʼin li natzʼeqtaanank re li Kriist aʼ li xeerabʼi naq tchalq ut ak wank chik saʼ ruuchichʼochʼ.
4 Ex walal inkʼajol, li raarokex inbʼaan, laaʼex chalenaqex rikʼin li Yos ut xeeqʼaxebʼ ru li bʼalaqʼil propeet xbʼaan naq li wank saʼ junajil eerikʼin qʼaxal nim chiru li wank saʼ junajil rikʼin li ruuchichʼochʼ. 5 Ebʼ aʼan rehebʼ li ruuchichʼochʼ joʼkan naq nekeʼaatinak chirix li wank saʼ ruuchichʼochʼ ut nekeʼabʼiik xbʼaan li ruuchichʼochʼ. 6 Laaʼo chalenaqo rikʼin li Yos. Li naxnaw ru li Yos nokoorabʼi abʼan li moko chalenaq ta rikʼin li Yos inkʼaʼ nokoorabʼi. Chi joʼkan naqakʼe reetal bʼar wank li propesiiy li naxye li yaal ut li inkʼaʼ naxye li yaal.
7 Ex wechpaabʼanel miqakanabʼ xraabʼal qibʼ chiqibʼil qibʼ xbʼaan naq li rahok nachalk rikʼin li Yos ut li narahok yoʼlajenaq rikʼin li Yos ut naxnaw ru li Yos. 8 Li inkʼaʼ narahok toj maajiʼ naxnaw ru li Yos xbʼaan naq li Yos aʼan li rahok. 9 Joʼkaʼin naq kikʼutbʼesimank li xrahom li Yos chiqix: li Yos kixtaqla chaq saʼ ruuchichʼochʼ li Ralal, li jun ajwiʼ chiru, re naq saʼ xkʼabʼaʼ aʼan tqataw li yuʼam. 10 Li Yos kixtaqla chaq li Ralal joʼ mayej chirix li qamaak ut re xkʼambʼal wiʼ chik qibʼ saʼ usilal rikʼin. Kixbʼaanu aʼin xbʼaan naq nokooxra chaq ut inkʼaʼ xbʼaan naq laaʼo xoorahok re.
11 Ex wechpaabʼanel wi joʼkaʼin xooxra li Yos, tenebʼanbʼil ajwiʼ saʼ qabʼeen xraabʼal qibʼ chiqibʼil qibʼ. 12 Maaʼani ak rilom ru li Yos. Wi inkʼaʼ naqakanabʼ xraabʼal qibʼ chiqibʼil qibʼ, li Yos twanq qikʼin ut tzʼaqalaq re ru li xrahom qikʼin. 13 Chi joʼkaʼin naqanaw naq wanko saʼ junajil rikʼin ut naq aʼan wank saʼ junajil qikʼin: xbʼaan naq kixkʼe qe li xsantil musiqʼej. 14 Joʼkan ajwiʼ, laaʼo xqil naq li Yuwaʼbʼej kixtaqla chaq li Ralal re xkolbʼal li ruuchichʼochʼ ut laaʼo naqakʼe chi naweʼk aʼin. 15 Wi junaq li qas qiitzʼin naxye chi anchal xchʼool naq li Jesús aʼan Ralal li Yos, li Yos wank saʼ junajil rikʼin li qas qiitzʼin aʼin ut li qas qiitzʼin aʼin wank saʼ junajil rikʼin li Yos. 16 Ut laaʼo ak xqanaw naq li Yos nokooxra ut chʼolchʼo chiqu aʼin.
Li Yos aʼan li rahok* ut li naxkʼe xchʼool chi rahok wank saʼ junajil rikʼin li Yos ut li Yos wank saʼ junajil rikʼin aʼan. 17 Saʼ xkʼabʼaʼ aʼin tzʼaqal chik re ru li qarahom chirix li Yos re naq tooruuq chi aatinak chi maakʼaʼ qaxiw saʼ xkutankil li raqok aatin. Xbʼaan naq chanchano li Kriist saʼ li ruuchichʼochʼ aʼin. 18 Li naxra li Yos inkʼaʼ naxuwak. Li tzʼaqal rahok naxbʼaanu naq inkʼaʼ tooxuwaq xbʼaan naq li xiw naxram chiru junaq li qas qiitzʼin xyeebʼal li narekʼa. Li xrahom li qas qiitzʼin li yook xxiw moko tzʼaqal ta re ru. 19 Laaʼo nokoorahok xbʼaan naq aʼan xooxra xbʼeenwa.
20 Wi junaq naxye «Laaʼin ninra li Yos» abʼan xikʼ naril li ras riitzʼin, aj tikʼtiʼ. Xbʼaan naq li inkʼaʼ naxra li ras qiitzʼin li naril ru, moko truuq ta xraabʼal li Yos, li inkʼaʼ naril ru. 21 Aʼan kixkʼe qe li chaqʼrabʼ aʼin: li naxra li Yos chixrahaq ajwiʼ li ras riitzʼin.