2 Corintios
12 Tento tinnima wibʼ. Ok we chi aatinak eerikʼin chirix li moy u ut ebʼ li esil li nachalk rikʼin li Qaawaʼ, usta aʼin moko nikinxtenqʼa ta. 2 Ninnaw ru jun li winq li wank saʼ junajil rikʼin li Kriist li kaalaju chihabʼ anaqwan kikʼameʼk saʼ li rox choxa.* Laaʼin inkʼaʼ ninnaw ma kikʼameʼk saʼ tibʼelej malaj inkʼaʼ, kaʼajwiʼ li Yos naxnaw. 3 Yaal, ninnaw ru li winq aʼin, abʼan inkʼaʼ ninnaw ma kikʼameʼk saʼ tibʼelej malaj inkʼaʼ kaʼajwiʼ li Yos naxnaw, 4 li kikʼameʼk saʼ li chʼinaʼusil naʼajej,* ut kirabʼi li aatin li chʼaʼaj xchʼolobʼankil ut maaʼani kʼebʼil xleseens chi xyeebʼal. 5 Tinnima wibʼ chirix li winq aʼin, abʼan laaʼin kaʼajwiʼ tinnima wibʼ rikʼin li naxkʼutbʼesi naq moko kaw ta inchʼool. 6 Usta twaj raj xnimankil wibʼ, moko tinnaʼlebʼaq ta joʼ li winq li maakʼaʼ xnaʼlebʼ xbʼaan naq yooqin raj xyeebʼal li yaal. Abʼan inkʼaʼ nawaj xnimankil wibʼ re naq maaʼani qʼaxal tixnima wu rikʼin li nikinril chi xbʼaanunkil malaj li nikinrabʼi chi xyeebʼal 7 yal rikʼin xkʼulbʼal ebʼ li esil li nachalk rikʼin li Yos li qʼaxal chaabʼil.
Ut re naq inkʼaʼ tinqʼetqʼetoʼq wank jun linrahilal li inkʼaʼ naxkanabʼ inchʼiʼchʼiʼinkil chanchan jun li kʼix saʼ lintibʼel. Li kʼix aʼin chanchan xʼánjel laj Tza li inkʼaʼ naxkanabʼ inrahobʼtesinkil ut yookin xkʼulbʼal aʼin re naq inkʼaʼ tinqʼetqʼetoʼq. 8 Oxibʼ sut xintzʼaama re li Qaawaʼ naq trisi. 9 Abʼan kixye we: «Moko tinkʼe ta chik xtzʼaqobʼ aawe li xnimal wusilal li yookin chaq xkʼebʼal aawe xbʼaan naq numtajenaq xkawil linmetzʼew naq moko kaw ta aawibʼ». Joʼkan naq tinnima wibʼ chi anchal inchʼool naq moko kaw ta wibʼ re naq li xwankil li Kriist inkʼaʼ tixkanabʼ wank saʼ inbʼeen joʼ jun li chʼina ochoch. 10 Nasahoʼk inchʼool naq moko kaw ta wibʼ, naq ninkʼul li hobʼeʼk, naq wankin saʼ rajbʼal ru, naq ninrahobʼtesiik ut naq ninkʼul li rahilal saʼ xkʼabʼaʼ li Kriist. Joʼkan bʼiʼ, naq moko kaw ta wibʼ, aran naq qʼaxal kaw wibʼ.
11 Yookin chi naʼlebʼak joʼ li winq li maakʼaʼ xnaʼlebʼ. Laaʼex xeemin wu chi xbʼaanunkil aʼin xbʼaan naq laaʼex raj xexʼaatinak chiʼus chiwix. Laaʼin ak xinkʼutbʼesi naq moko kubʼenaq ta inwankil chiruhebʼ li «xninqal ru apóstol» li wankebʼ saʼ eeyanq, usta yaal naq maakʼaʼ inwankil. 12 Relik chi yaal, naq rikʼin xnimal inkuyum xinkʼutbʼesi cheeru naq laaʼin tzʼaqal apóstol ut xinbʼaanu ebʼ li sachbʼachʼoolej, ebʼ li xninqal ru naʼlebʼ ut ebʼ li xninqal ru bʼaanuhom. 13 Laaʼin inkʼaʼ xexinchʼiʼchʼiʼi re naq inkʼaʼ tinkʼe jun li iiq saʼ eebʼeen. Yal saʼ xkʼabʼaʼ aʼin moko juntaqʼeetex ta rikʼinebʼ li junchʼol chi chʼuut. Ma nekeekʼoxla naq inkʼaʼ us xinbʼaanu? Wi joʼkan, cheekuy inmaak.
14 Kʼehomaq reetal, aʼin li rox sut naq kawresinbʼilin re eerulaʼaninkil ut inkʼaʼ texinchʼiʼchʼiʼi. Xbʼaan naq laaʼex nekexinsikʼ maawaʼ li kʼaru eere. Ma inkʼaʼ tabʼiʼ ebʼ li naʼbʼej yuwaʼbʼej nekeʼxxok li tumin choʼq rehebʼ li ralal xkʼajol ut maawaʼ ebʼ li alal kʼajolbʼej nekeʼxxok li tumin choʼq rehebʼ li naʼbʼej yuwaʼbʼej? 15 Ut laaʼin chi anchal inchʼool tinsach cheerix chixjunil li wank we joʼ ajwiʼ linyuʼam. Wi laaʼin qʼaxal nekexinra, ma inkʼaʼ raj us naq joʼkan ajwiʼ tineera? 16 Usta moko xexinchʼiʼchʼiʼi ta, laaʼex xeeye naq rikʼin xseebʼal inkʼaʼuxl xexinbʼalaqʼi. 17 Ma xexinbʼalaqʼi tabʼiʼ re naq tinkanaaq rikʼin bʼayaq li tumin li xeekʼe naq xintaqla eerikʼin jun rehebʼ laj paabʼanel? 18 Xintzʼaama re laj Tito naq txik eerulaʼaninkil ut chirix xintaqla jun chik li qechpaabʼanel. Ma xeʼxbʼalaqʼi tabʼiʼ laj Tito re naq tkanaaq rikʼin bʼayaq li tumin li xeekʼe? Peʼyaal naq junaj ru qakʼaʼuxl?* Peʼyaal naq junaj ru li naʼlebʼ xqabʼaanu?
19 Laaʼex maare nekeekʼoxla naq yooko xkolbʼal qibʼ cheeru, abʼan moko joʼkan ta. Joʼ aj taqehom re li Kriist yooko xyeebʼal li yaal chiru li Yos. Usta joʼkan ex qechpaabʼanel li raarokex qabʼaan, naqabʼaanu aʼin re xwaklesinkil eechʼool. 20 Xbʼaan naq yook inkʼaʼuxl cheerix maare anchal naq tinwulaq inkʼaʼ texintaw joʼ twulaq raj chiwu ut laaʼex inkʼaʼ tineetaw joʼ twulaq raj cheeru. Yooqex bʼan chi pleetik, chi kaqalink, qʼaxal josqʼaqex, yooqex chi choqink, chi yoobʼank aatin chirixebʼ li junchʼol, chi numsink aatin, qʼetqʼetaqex ut yooqex xmululinkil eeribʼ. 21 Naq tinwulaq wiʼ chik eerikʼin, maare Linyos tixkubʼsi inwankil cheeru laaʼex ut tyotʼeʼq inchʼool saʼ xkʼabʼaʼ naabʼalebʼ li xeʼmaakobʼk rubʼelaj ut inkʼaʼ xeʼxyotʼ xchʼool chi moko xeʼxjal xnaʼlebʼ chirix li tzʼaj aj naʼlebʼ li xeʼxbʼaanu, li muxuk ibʼ* ut xeʼmaakobʼk chi maakʼaʼebʼ xxutaan.*