Judas

1 Laaʼin laj Judas, xmoos li Jesukriist ut riitzʼin laj Santiago. Nintzʼiibʼa li esilhu aʼin choʼq rehebʼ li bʼoqbʼilebʼ ut li raarokebʼ xbʼaan li Yos, li Yuwaʼbʼej, ut kʼulanbʼilebʼ choʼq re li Jesukriist:

2 Teekʼul taxaq chi yoʼon li uxtaanank u,* li tuqtuukilal ut li rahok li nachalk rikʼin li Yos.

3 Laaʼex li raarokex inbʼaan, rubʼelaj xwaj eetzʼiibʼankil chirix chanru tooxkol li Yos. Abʼan xwil naq aajel ru eetzʼiibʼankil re xtzʼaamankil eere naq qʼaxal teekʼe eeqʼe chi xkolbʼal rix li paabʼal li xkʼemank jun sut ajwiʼ rehebʼ li santil paabʼanel. 4 Nintzʼiibʼa eere aʼin xbʼaan naq wiibʼ oxibʼ li winq xeʼxchʼik ribʼ saʼ eeyanq saʼ muqmu ut li Raatin li Yos ak kixye chaq naq traqmanq aatin saʼ xbʼeenebʼ li winq aʼin. Ebʼ li winq aʼin inkʼaʼ nekeʼroxloqʼi li Yos ut nekeʼroksi li xnimal rusilal li Qayos re naq teʼmaakobʼq chi maakʼaʼebʼ xxutaan* ut nekeʼxtzʼeqtaana laj echal qe aʼ li Qaawaʼ Jesukriist.

5 Usta chʼolchʼo cheeru, nawaj xjultikankil eere naq li Jehobʼa* kixkol jun li tenamit saʼ xnaʼajebʼ laj Ejiipt abʼan moqon chik kixsachebʼ li inkʼaʼ xeʼxkʼutbʼesi li xpaabʼal. 6 Ut ebʼ li ánjel li xeʼxkanabʼ li xkʼanjel saʼ choxa ut xeʼxkanabʼ li xnaʼaj bʼarwiʼ tento teʼwanq, kixbʼakʼebʼ rikʼin li kareen li inkʼaʼ natʼupeʼk ut kixkʼehebʼ saʼ chamal qʼoqyink toj reetal naq tchalq li raqbʼa aatin li twanq saʼ xnimal ru kutan. 7 Joʼkan ajwiʼ, li tenamit Sodoom ut Gomoor ut ebʼ li tenamit li wankebʼ chi xsutam xeʼok xmuxbʼal ribʼ* saʼ joʼmajoʼil ut ebʼ li winq xeʼok chi wank rikʼinebʼ li rechwinqilal. Ebʼ li qas qiitzʼin aʼin xeʼkʼeheʼk chi xtojbʼal xmaak chi junajwa rikʼin xaml ut chi joʼkan xeʼkanaak joʼ eetalil choʼq qe re naq weent tqabʼaanu.

8 Usta joʼkan, ebʼ li winq aʼin junelik yookebʼ xkʼoxlankil li inkʼaʼ us, yookebʼ xtzʼajninkil li xtibʼelebʼ ut li xtibʼelebʼ li junchʼol, yookebʼ xtzʼeqtaanankil li wankebʼ xwankil saʼ xbʼeenebʼ ut yookebʼ xyoobʼankil aatin saʼ xbʼeenebʼ li nekeʼxkʼul xloqʼal rikʼin li Yos. 9 Joʼkan bʼiʼ, naq li arkánjel Miguel kixchoqi ribʼ rikʼin laj Tza* chirix li xtibʼel laj Moisés inkʼaʼ kixkʼoxla naq xkʼulubʼ naq traqoq aatin saʼ xbʼeen chi moko kiroksi ta kawil aatin, kixye bʼan: «Li Jehobʼa* taxaq traqoq aatin saʼ aabʼeen». 10 Abʼan ebʼ li winq aʼin nekeʼxwechʼ rix chixjunil li inkʼaʼ nekeʼxtaw ru. Rikʼin chixjunil li nekeʼxtaw ru chanchanebʼ xul xbʼaan naq inkʼaʼ nekeʼkʼoxlak ut chanchanebʼ ajwiʼ xul saʼ chixjunil li nekeʼxbʼaanu ut saʼ xkʼabʼaʼ aʼin nekeʼxqʼaresi ribʼ xjunes.

11 Ra tchalq saʼ xbʼeenebʼ! Xbʼaan naq xeʼxtaqe li xbʼe laj Caín; ut re naq teʼqʼajkamuuq xeʼok xkʼambʼal re rikʼin xnaʼlebʼ laj Balaam ut xeʼosoʼk saʼ xkʼabʼaʼ naq xeʼxye li inkʼaʼ us chirixebʼ li winq li wankebʼ xwankil saʼ xbʼeenebʼ joʼ kixbʼaanu laj Coré. 12 Ebʼ li winq aʼin chanchanebʼ li ninqi pek li muqmukebʼ rubʼel haʼ naq nekeʼwaʼak saʼ eeyanq saʼebʼ li ninqʼe li nekeebʼaanu re xkʼutbʼesinkil leerahom; chanchanebʼ laj ilol karneer li xjunes xsaʼ nekeʼxkʼoxla; chanchanebʼ li choql li maakʼaʼ xhaʼel ut ekʼasinbʼilebʼ xbʼaan li kawil iqʼ; chanchanebʼ li cheʼ li inkʼaʼ nekeʼuuchink, kamenaqebʼ chi junajwa ut bʼoqʼbʼilebʼ li xxeʼ; 13 chanchanebʼ xkawil roq li palaw li narisi chaq xwoqx xbʼaan xxutaan; chanchanebʼ li chahim li inkʼaʼ nekeʼxnaw bʼar yookebʼ chi xik ut teʼkanabʼaaq chi junajwa saʼ xchamal li qʼoqyink.

14 Laj Enoc, li xwuq winq li chalenaq saʼ li xwuq junkabʼal chalen chaq laj Adán, kiʼaatinak chaq rubʼelaj chirixebʼ naq kixye: «Kʼehomaq reetal, li Jehobʼa* kichalk rikʼin li xkʼiila ánjel 15 re naq traqoq aatin saʼ xbʼeen chixjunilebʼ ut re naq tixkʼehebʼ chi xtojbʼal xmaak saʼ xkʼabʼaʼ li xmaaʼusilalebʼ. Li Yos tixbʼaanu aʼin xbʼaan naq xeʼnaʼlebʼak saʼ maaʼusilal ut xeʼxye li inkʼaʼ us chirix».

16 Ebʼ li winq aʼin ebʼ aj wechʼonel, moko saʼebʼ ta saʼ xchʼool rikʼin li kʼaru rehebʼ ut nekeʼxbʼaanu li inkʼaʼ us li nekeʼxrahi ru. Nekeʼaatinak re xnimobʼresinkil ribʼ ut qʼaxal nekeʼxnima li junchʼol re xtawbʼal li us kaʼajwiʼ choʼq rehebʼ.

17 Abʼan laaʼex li raarokex inbʼaan, jultikoʼq eere ebʼ li aatin li xeʼxye chaq ebʼ li xʼapóstol li Qaawaʼ Jesukriist. 18 Aʼanebʼ rajlal xeʼxye: «Saʼ xraqik ebʼ li kutan wanqebʼ teʼxseʼe li us ut teʼxbʼaanu li maaʼusilal li nekeʼxrahi ru». 19 Ebʼ li winq aʼin nekeʼxbʼaanu naq twanq li jachok ibʼ; nekeʼnaʼlebʼak joʼ xul ut moko bʼeresinbʼilebʼ ta xbʼaan li Yos. 20 Abʼan laaʼex li raarokex inbʼaan, kawresimaq eeribʼ rikʼin leesantil paabʼal ut textijoq rikʼin santil musiqʼej 21 re naq wanqex saʼ li xrahom li Yos naq yooqex roybʼeninkil li uxtaanank u* li nakʼamok saʼ li junelik yuʼam li tixkʼutbʼesi li Qaawaʼ Jesukriist. 22 Joʼkan ajwiʼ, meekanabʼ ruxtaanankilebʼ ru* li nekeʼwiibʼank xchʼool 23 ut saʼ junpaat teekolebʼ chiru li xaml. Teeruxtaana ruhebʼ* li junchʼol abʼan weent teebʼaanu re naq inkʼaʼ teetzʼajni eeribʼ rikʼinebʼ li xmaak. Xikʼ teeril ebʼ li xmaak.

24 Joʼkan bʼiʼ, li Yos naru nekextenqʼa re naq inkʼaʼ textʼaneʼq saʼ li maak ut naru xbʼaanunkil naq kaw xaqxoqex, naq maakʼaʼaq eepaltil ut naq qʼaxal sahaq saʼ leechʼool chiru li xloqʼal. 25 Li Yos, li jun ajwiʼ, xooxkol saʼ xkʼabʼaʼ li Qaawaʼ Jesukriist. Re taxaq aʼan li nimaak, li oxloqʼiik, li metzʼew ut li xwankilal joʼ chanru xwank junxil, joʼ chanru wank anaqwan ut joʼ chanru twanq junelik. Joʼkan taxaq.