Santiago
5 Anaqwan abʼihomaq laaʼex li bʼihom; yaabʼanqex ut rahaq eechʼool xbʼaan ebʼ li chʼaʼajkilal li tchalq saʼ eebʼeen. 2 Ak xqʼaak leebʼihomal ut leetʼikr ak xwaʼeʼk xbʼaan xmaxel. 3 Leeʼoor ut leeplaat ak xqʼolenk ut li qʼol* aʼin tixkʼe chi naweʼk naq wank eemaak ut tixwaʼ leetibʼel. Li xeetamresi chanchanaq jun li xaml saʼ xraqik ebʼ li kutan. 4 Kʼehomaq reetal, ebʼ laj kʼanjel li xeʼxsikʼ ru leerawimq inkʼaʼ nekeʼxkanabʼ xjapbʼal rehebʼ xbʼaan naq toj maajiʼ nekeʼtojeʼk ut li xyaabʼebʼ xkux ak xwulak saʼ xxik li Jehobʼa,* li najolomink rehebʼ li ánjel saʼ choxa. 5 Saʼ ruuchichʼochʼ xeeroksi leebʼihomal re xbʼaanunkil li nekeerahi ru. Xeekʼe chi nimank leechʼool choʼq re xkutankil li kamsink. 6 Xeekʼe chi xtojbʼal xmaak ut xeekamsi li tiik xchʼool. Ma inkʼaʼ tabʼiʼ tzʼeqtaananbʼilex xbʼaan aʼan?
7 Joʼkan bʼiʼ ex wechpaabʼanel, cheekuyaq roybʼeninkil toj reetal naq ak wanq arin* li Qaawaʼ. Kʼehomaq reetal: laj awinel naxkuy roybʼeninkil ru li awimq toj reetal naq natʼaneʼk li xbʼeen habʼ* ut li xkabʼ habʼ.* 8 Laaʼex ajwiʼ wanq eekuyum; kawresihomaq leechʼool xbʼaan naq chi seebʼ wanq arin li Qaawaʼ.
9 Meejit eeribʼ cheeribʼil eeribʼ ex wechpaabʼanel re naq inkʼaʼ traqmanq aatin saʼ eebʼeen. Kʼehomaq reetal, laj Raqol Aatin ak wank saʼ li okebʼaal. 10 Ex wechpaabʼanel, kʼamomaq eere rikʼinebʼ li propeet li xeʼaatinak saʼ xkʼabʼaʼ li Jehobʼa* xbʼaan naq ebʼ aʼan xeʼxkuy xnumsinkil li rahilal ut xeʼwank xkuyum. 11 Kʼehomaq reetal, naqaye naq sahebʼ saʼ xchʼool* li ak xeʼxkuy ebʼ li rahilal. Laaʼex ak xeerabʼi chirix li xkuyum laj Job ut xeeril ajwiʼ li kixbʼaanu li Jehobʼa* chirix, joʼkan naq nekeenaw naq li Jehobʼa* qʼaxal narahok ut naʼuxtaanank u.*
12 Ex wechpaabʼanel, kanabʼamaq xpatzʼbʼal li choxa malaj li ruuchichʼochʼ chi moko teepatzʼ junaq chik li kʼabʼaʼej. Wi teeye «tqabʼaanu», tento teebʼaanu ut wi teeye «inkʼaʼ tqabʼaanu», inkʼaʼ teebʼaanu re naq inkʼaʼ traqmanq aatin saʼ eebʼeen.
13 Ma wank junaq saʼ eeyanq li yook xkʼulbʼal li rahilal? Mixkanabʼ tijok. Ma wank junaq saʼ eeyanq li sa saʼ xchʼool? Chixbʼichaaq ebʼ li salmo. 14 Ma wank junaq li yaj saʼ eeyanq? Xbʼoqaq ebʼ li cheekel winq re li chʼuut ut aʼanebʼ teʼtijoq chirix ut teʼxkʼe aseeyt saʼ xbʼeen saʼ xkʼabʼaʼ li Jehobʼa.* 15 Ut wi li natijok naxpaabʼ naq li yaj* ttenqʼaaq xbʼaan li Yos aʼin tixbʼaanu naq tkʼiraaq ut li Jehobʼa* twaklesinq re. Joʼkan ajwiʼ, wi xmaakobʼk, tkuymanq xmaak.
16 Joʼkan bʼiʼ, teeye chi kutankil leemaak cheeribʼil eeribʼ ut textijoq cheerix cheeribʼil eeribʼ re naq texkʼiraaq. Li tij li naxbʼaanu li winq li tiik xchʼool qʼaxal wank xwankil. 17 Laj Elías aʼan chaq jun li winq joʼ laaʼo, abʼanan naq kixkʼe xchʼool chi tijok re naq inkʼaʼ tchalq li habʼ, inkʼaʼ kixkʼe li habʼ saʼ xbʼeen li ruuchichʼochʼ chiru oxibʼ chihabʼ rikʼin waqibʼ po. 18 Tojaʼ naq kitijok wiʼ chik ut kichalk li habʼ ut li chʼochʼ kixkʼe li ru.
19 Ex wechpaabʼanel, wi junaq li qas qiitzʼin naxbʼaanu naq junaq eere tixkanabʼ li yaal ut natenqʼaak xbʼaan jalan chik re naq tsutqʼiiq, 20 cheenawaq naq li natenqʼank re laj maak chi xkanabʼankil li maaʼusilal, yook xtenqʼankil re naq inkʼaʼ tkamq ut yook ajwiʼ xtenqʼankil re naq tkuymanq li xmaak.