Romanos
7 Ma inkʼaʼ nekeenaw, ex wechpaabʼanel (xbʼaan naq yookin eeraatinankil laaʼex li nekeenaw li naxye li chaqʼrabʼ), naq li winq wank rubʼel xwankil li Chaqʼrabʼ naq yoʼyo? 2 Jun eetalil, li chaqʼrabʼ naxye naq li sumsukil ixq junelik sumsuuq rikʼin li xbʼeelom naq yoʼyooq li xbʼeelom; abʼan, wi tkamq li xbʼeelom, li ixaqilbʼej t-elq rubʼel xchaqʼrabʼ li xbʼeelom. 3 Joʼkan bʼiʼ, wi toj yoʼyo li xbʼeelom ut nasumlaak rikʼin jalan chik winq, nawbʼilaq ru choʼq aj muxul sumsu. Abʼan, wi nakamk li xbʼeelom ut nasumlaak rikʼin jalan chik winq, t-elq rubʼel xwankil li xchaqʼrabʼ li xbʼeelom ut maawaʼaq aj muxul sumsu.
4 Joʼkan ajwiʼ, ex wechpaabʼanel, li xtibʼel li Kriist xexrisi rubʼel xwankil li Xchaqʼrabʼ laj Moisés. Aʼin kikʼulmank re naq jalan chik t-echaninq eere aʼ li kiwaklesiik chi yoʼyo saʼ xyanqebʼ li kamenaq. Anaqwan naru chik tooʼeʼroksi choʼq xmoos li Yos. 5 Naq yooko chaq xyuʼaminkil li naxrahi ru li tibʼelej, li Chaqʼrabʼ kixkanabʼ chi chʼolchʼo ru naq li yibʼru aj naʼlebʼ li naxrahi ru li tibʼelej naxbʼaanu naq tmaakobʼq li qatibʼel ut li maak nokooxkʼam saʼ li kamk. 6 Abʼan anaqwan moko wanko ta chik choʼq xmoos li Chaqʼrabʼ xbʼaan naq moko wank ta xwankil saʼ qabʼeen. Joʼkan naq tento raj toowanq choʼq moos moko xbʼaan ta naq li Chaqʼrabʼ nokooxbʼeresi, laaʼo bʼan moos xbʼaan naq li santil musiqʼej nokooxbʼeresi.
7 Joʼkan bʼiʼ, kʼaru tqaye? Ma nimla maak li Chaqʼrabʼ? Relik chi yaal naq inkʼaʼ! Laaʼin inkʼaʼ raj xinnaw kʼaru li maak wi maawaʼ raj saʼ xkʼabʼaʼ li Chaqʼrabʼ. Jun eetalil, inkʼaʼ raj xinnaw naq moko us ta naq tinrahi ru li maawaʼ we wi li Chaqʼrabʼ inkʼaʼ raj kixye «Maarahi ru li maawaʼ aawe». 8 Abʼan li maak kiroksi li taql re naq t-alaaq saʼ linchʼool chi xrahinkil ru chixjunil li maawaʼ we. Naq toj maakʼaʼ chaq li chaqʼrabʼ aʼin, maakʼaʼ chaq xwankil li maak. 9 Yoʼyokin chaq naq toj maakʼaʼ li chaqʼrabʼ. Abʼan naq kiwulak li chaqʼrabʼ xchʼolaak chiwu naq laaʼin aj maak ut xinkamk. 10 Ut xinkʼe reetal naq li taql li tento raj tkʼamoq we saʼ li yuʼam, yook inkʼambʼal saʼ li kamk. 11 Xbʼaan naq li maak kiroksi li chaqʼrabʼ aʼin re inqʼunbʼesinkil ut aʼan xinxkamsi. 12 Joʼkan bʼiʼ, li Chaqʼrabʼ saant, ut li taqlahom saant, tiik ru ut chaabʼil.
13 Abʼan, chanru? Ma saʼ xkʼabʼaʼ li us naq xinkamk? Relik chi yaal naq inkʼaʼ! Li maak kikamsink we. Li chaqʼrabʼ chaabʼil abʼan chi chʼolchʼo kixye naq li maak kikamsink we. Li chaqʼrabʼ kixkʼutbʼesi naq qʼaxal yibʼru li maak. 14 Naqanaw naq li Chaqʼrabʼ re li Yos saʼ xkʼabʼaʼ li xsantil musiqʼej, abʼan li chʼaʼajkilal wank wikʼin, laaʼin aj maak ut xinkʼayiik choʼq xmoos li maak. 15 Xbʼaan naq inkʼaʼ nintaw ru kʼaʼut ninnaʼlebʼak chi joʼkaʼin, inkʼaʼ ninbʼaanu li nawaj, ninbʼaanu bʼan li xikʼ nawil. 16 Abʼanan, wi ninbʼaanu li inkʼaʼ nawaj, ninye naq chaabʼil li Chaqʼrabʼ. 17 Abʼan anaqwan maawaʼ chik laaʼin li ninbʼaanunk re aʼin, li maak bʼan li wank saʼ linjunxaqalil. 18 Ninnaw naq maakʼaʼ bʼayaq rusilal lintibʼel xbʼaan naq usta nawaj xbʼaanunkil li us inkʼaʼ ninruuk xbʼaanunkil. 19 Xbʼaan naq inkʼaʼ ninbʼaanu li us li nawaj xbʼaanunkil, ninyuʼami li inkʼaʼ us li inkʼaʼ nawaj xbʼaanunkil. 20 Joʼkan bʼiʼ, wi ninbʼaanu li inkʼaʼ nawaj, moko laaʼin ta chik li ninbʼaanunk re aʼin, li maak bʼan li wank saʼ linjunxaqalil.
21 Ninkʼe reetal naq li chaqʼrabʼ aʼin nataqlank saʼ inbʼeen: naq nawaj xbʼaanunkil li us aʼ chik li inkʼaʼ us naxkʼe ribʼ chiwu. 22 Relik chi yaal naq linchʼool nawulak chiru li xchaqʼrabʼ li Yos. 23 Abʼan saʼ lintibʼel nawil jun chik li chaqʼrabʼ li nayalok rikʼin li xchaqʼrabʼ linkʼaʼuxl ut nikinxkʼe rubʼel xwankil li xchaqʼrabʼ li maak li wank saʼ lintibʼel. 24 Kʼajoʼ xtoqʼobʼaal wu! Ani tkoloq we chiru li tibʼelej li yook chi kʼamok we saʼ li kamk aʼin? 25 Ninbʼanyoxi re li Yos xbʼaan naq nikinxkol saʼ xkʼabʼaʼ li Qaawaʼ Jesukriist. Joʼkan bʼiʼ, rikʼin linkʼaʼuxl wankin choʼq xmoos li xchaqʼrabʼ li Yos, abʼan rikʼin lintibʼel wankin choʼq xmoos li xchaqʼrabʼ li maak.