2 Timoteo
3 Abʼan tento taanaw naq saʼ xraqik ebʼ li kutan kawaq li wank ut qʼaxal chʼaʼajkaq xnumsinkil. 2 Xbʼaan naq ebʼ li qas qiitzʼin kaʼajwiʼ aʼanebʼ teʼxra ribʼ; teʼxrahi ru li tumin, teʼxnima ribʼ, teʼxqʼet ribʼ, teʼxye li inkʼaʼ us, inkʼaʼ chik teʼabʼinq chiru li xnaʼ xyuwaʼ, inkʼaʼ chik teʼbʼanyoxinq ut teʼxtzʼeqtaana li ras riitzʼin,* 3 inkʼaʼ chik teʼxra ribʼ chiribʼilebʼ ribʼ joʼ junkabʼal, inkʼaʼ chik teʼxkʼe ribʼ saʼ aatin, teʼyoobʼanq aatin chirixebʼ li junchʼol, inkʼaʼ chik teʼxkuy ribʼ, chanchanaqebʼ li xul li qʼaxal josqʼebʼ, teʼxtzʼeqtaana li us, 4 teʼxbʼaanu li maaʼusilal rehebʼ li ramiiw ut kawaqebʼ xjolom, qʼaxal qʼetqʼetaqebʼ, inkʼaʼ chik teʼxra li Yos kaʼaj chik teʼxkʼe xchʼool chirix li nekeʼxrahi ru 5 ut teʼxbʼaanu ribʼ naq nekeʼxloqʼoni li Yos chi anchalebʼ xchʼool abʼan rikʼin li xyuʼamebʼ teʼxkʼutbʼesi naq inkʼaʼ nekeʼxloqʼoni li Yos. Elen saʼ xyanqebʼ. 6 Saʼ xyanqebʼ li qas qiitzʼin aʼin, wankebʼ li winq li nekeʼbʼalaqʼink, ebʼ li winq aʼin nekeʼxchʼik ribʼ saʼ rochochebʼ li ixq li numtajenaqebʼ xmaak ut moko kawebʼ ta xpaabʼal ut nekeʼxqʼunbʼesi li xchʼoolebʼ; ebʼ li ixq aʼin nekeʼxkanabʼ naq li nekeʼxrahi ru tjukukinq rehebʼ 7 usta junelik yookebʼ chi tzolok maajunwa nekeʼruuk xtawbʼal li tzʼaqal nawom chirix li yaal.
8 Ut joʼ laj Janes ut laj Jambres, li xeʼxqʼet ribʼ chiru laj Moisés, aʼanebʼ ajwiʼ inkʼaʼ nekeʼxkanabʼ xqʼetbʼal ribʼ chiru li yaal. Ebʼ li winq aʼin tzʼajebʼ ru li xkʼaʼuxl ut maakʼaʼ rikʼinebʼ li rusilal li Yos xbʼaan naq inkʼaʼ nekeʼpaabʼank joʼ tento xbʼaanunkil. 9 Abʼanan, moko us ta teʼelq xbʼaan naq chixjunilebʼ teʼxkʼe reetal naq xeʼnaʼlebʼak saʼ memil, joʼ kikʼulmank rikʼin li wiibʼ chi winq aʼin. 10 Abʼan laaʼat inkʼaʼ nakaakanabʼ rabʼinkil li ninkʼut, rilbʼal chanru linyuʼam, li nawaj xtawbʼal saʼ linyuʼam, linpaabʼal, linkuyum, linrahom ut chanru ninkuy chixjunil, 11 joʼkan ajwiʼ, laaʼat nakaanaw chixjunil li rahilal li xinkʼul aran Antioquía, Iconio ut Listra. Abʼanan naq xinkʼul chixjunil li rahobʼtesiik aʼin, li Qaawaʼ xinxtenqʼa. 12 Joʼkan naq chixjunilebʼ li wankebʼ saʼ junajil rikʼin li Kristo Jesús ut nekeʼxloqʼoni li Yos chi anchalebʼ xchʼool teʼrahobʼtesiiq ajwiʼ. 13 Abʼan ebʼ li maaʼusebʼ xnaʼlebʼ ut li nekeʼbʼalaqʼik qʼaxal tnumtaaq wiʼ chik li xmaaʼusilalebʼ, yooqebʼ chi bʼalaqʼink ut yooqebʼ ajwiʼ chi bʼalaqʼiik.
14 Abʼan laaʼat maakanabʼ xpaabʼankil li xkʼuteʼk chaawu ut xateʼxtenqʼa chi xpaabʼankil xbʼaan naq nakaanaw rikʼin anihebʼ xaatzol 15 ut chalen saʼ laakachʼinal nakaanaw chirix li hu li tzʼiibʼanbʼil li raatin li Yos li naru naxkʼe aanaʼlebʼ. Aʼin ttenqʼanq aawe re naq tatkoleʼq xbʼaan naq nakaapaabʼ li Kristo Jesús. 16 Chixjunil li tzʼiibʼanbʼil saʼ li Raatin li Yos chalenaq rikʼin ut nakʼanjelak re xtzolbʼalebʼ li qas qiitzʼin, re xkʼebʼal chi naweʼk li inkʼaʼ us, re xtuqubʼankil ru chixjunil ut re xkawresinkilebʼ chi xbʼaanunkil li us. 17 Chi joʼkan laj kʼanjel chiru li Yos kawresinbʼilaq chi tzʼaqal re ru ut wanq rikʼin chixjunil li naʼajmank re xbʼaanunkil jalan jalanq li chaabʼil kʼanjel.