Colosenses
3 Abʼan, wi laaʼex xexwaklesiik chi yoʼyo rochbʼeen li Kriist, meekanabʼ xsikʼbʼal li wank taqeʼq bʼarwiʼ chunchu li Kriist saʼ xnim ruqʼ li Yos. 2 Chiwanq leekʼaʼuxl chirix li wank taqeʼq ut inkʼaʼ chirix li wank saʼ ruuchichʼochʼ. 3 Xbʼaan naq laaʼex xexkamk ut leeyuʼam muqmu rikʼin li Kriist li wank saʼ junajil rikʼin li Yos. 4 Naq tkʼutbʼesimanq li Kriist, li qayuʼam, aran ajwiʼ texkʼutbʼesiiq rochbʼeen aʼan rikʼin loqʼal.
5 Joʼkan bʼiʼ, kʼehomaq chi kamk ebʼ li xchaʼal leetibʼel re naq inkʼaʼ textʼaneʼq saʼ li muxuk ibʼ,* saʼ li tzʼaj aj naʼlebʼ chi moko qʼaxal teerahi ru wank rikʼin winq malaj ixq ut meekanabʼ naq aʼin ttaqlanq saʼ eebʼeen chi moko teerahi ru xbʼaanunkil li inkʼaʼ us chi moko teerahi ru li maawaʼ eere xbʼaan naq aʼan ajwiʼ xloqʼoninkil li pechʼbʼil yos.* 6 Saʼ xkʼabʼaʼ aʼin nachalk xjosqʼil li Yos. 7 Joʼkan ajwiʼ xexnaʼlebʼak chaq laaʼex junxil. 8 Abʼan, anaqwan tzʼeqtaanahomaq chixjunil aʼin: li josqʼil, li maaʼusilal, li aatin li ra nanaq ut miʼelk chi xtzʼuumal eere li tzʼaj aj aatin. 9 Meetikʼtiʼi eeribʼ cheeribʼil eeribʼ. Isimaq cheerix li najter yuʼam ut li xeebʼaanu junxil 10 ut tiqibʼomaq eeribʼ rikʼin li akʼ yuʼam naq yooqex xnawbʼal ru li Yos. Ut chi joʼkan texnaʼlebʼaq joʼ naxbʼaanu aʼan. 11 Saʼ li akʼ yuʼam aʼin, ebʼ laj griego, ebʼ laj judiiy, li setbʼilebʼ xtzʼuumal xtzʼejwal, li inkʼaʼ setbʼilebʼ xtzʼuumal xtzʼejwal, li jalanebʼ xtenamit, li wankebʼ saʼ kʼalebʼaal,* ebʼ li moos, li moko wankebʼ ta choʼq moos, chixjunilebʼ aʼin juntaqʼeetebʼ. Li Kriist wank saʼ chixjunil ut laaʼo wanko saʼ junajil rochbʼeen.
12 Joʼkan bʼiʼ, laaʼex li sikʼbʼil eeru xbʼaan li Yos, santex ut raarokex, tiqibʼomaq eeribʼ rikʼin li toqʼobʼank u* ut rahok, usilal, kubʼsink ibʼ, tuulanil ut kuyum. 13 Meekanabʼ xkuybʼal eeribʼ cheeribʼil eeribʼ ut xkuybʼal leemaak chi anchal leechʼool usta junaq eere wank kʼaru tixjit wiʼ li jun chik. Li Jehobʼa* kixkuy leemaak chi anchal xchʼool, joʼkan ajwiʼ bʼaanumaq laaʼex. 14 Abʼan moko kaʼaj tawiʼ aʼin, tiqibʼomaq eeribʼ rikʼin rahok xbʼaan naq li rahok aʼan li kʼaam li najunajink chi tzʼaqal re ru.
15 Ut li tuqtuukilal li nachalk rikʼin li Kriist chijolominq taxaq saʼ leechʼool joʼ awabʼej xbʼaan naq xexbʼoqeʼk saʼ li tuqtuukilal aʼin re naq wanqex saʼ jun chi tibʼelej. Ut junelik texbʼanyoxinq. 16 Chiwanq taxaq li xkʼutum li Kriist saʼ leechʼool chi tzʼaqal re ru, chi joʼkan teetaw eenaʼlebʼ. Meekanabʼ xtzolbʼal eeribʼ ut xwaklesinkil leechʼool* cheeribʼil eeribʼ rikʼin saalm, cheenimaq ru li Yos ut bʼichomaq ebʼ li bʼich re loqʼonink re xkʼutbʼesinkil naq nekexbʼanyoxink, texbʼichanq chiru li Jehobʼa* chi anchal leechʼool. 17 Joʼchʼinal joʼnimal li teeye malaj teebʼaanu, bʼaanumaq chixjunil saʼ xkʼabʼaʼ li Qaawaʼ Jesús ut texbʼanyoxinq chiru li Yos li Yuwaʼbʼej saʼ xkʼabʼaʼ aʼan.
18 Ex ixaqilbʼej, tento teekʼe eeribʼ rubʼel xwankil leebʼeelom joʼ nekeʼxbʼaanu li nekeʼtaqenk re li Qaawaʼ. 19 Ex bʼeelomej, meekanabʼ xraabʼal leerixaqil ut minumtaak leejosqʼil saʼ xbʼeenebʼ. 20 Ex alal kʼajolbʼej, texʼabʼinq chiru leenaʼ leeyuwaʼ saʼ chixjunil xbʼaan naq aʼin nawulak chiru li Qaawaʼ. 21 Ex yuwaʼbʼej,* meechiqʼ* xjosqʼil leeralal eekʼajol re naq inkʼaʼ teʼchʼinaaq xchʼool. 22 Ex moos, texʼabʼinq saʼ chixjunil chiruhebʼ leepatron ut inkʼaʼ texʼabʼinq kaʼajwiʼ naq yooqebʼ eerilbʼal yal re xsahobʼresinkilebʼ xchʼool, teebʼaanu bʼan chi anchal leechʼool xbʼaan naq nekeeroxloqʼi li Jehobʼa.* 23 Chixjunil li teebʼaanu, bʼaanumaq chi anchal leechʼool ut chi anchal eemetzʼew chanchan tawiʼ yookex xbʼaanunkil choʼq re li Jehobʼa* ut inkʼaʼ choʼq rehebʼ li qas qiitzʼin. 24 Xbʼaan naq nekeenaw naq rikʼin li Jehobʼa* teekʼul li ereens joʼ maatan. Texwanq choʼq xmoos laj Echal eere aʼ li Kriist. 25 Li tixbʼaanu li inkʼaʼ us, chʼolchʼo naq tkʼeheʼq chi xtojbʼal rix li kixbʼaanu ut li Yos inkʼaʼ nasikʼok u.