2 Timoteo
2 Joʼkan bʼiʼ, at walal, maakanabʼ xwaklesinkil aachʼool rikʼin li xnimal rusilal li Yos li wank rikʼin li Kristo Jesús. 2 Ut chixjunil li xaawabʼi wikʼin ut xeʼrabʼi naabʼalebʼ li testiiw, kanabʼ saʼ ruqʼebʼ li winq li nekeʼxchʼolani chiʼus ebʼ li xkʼanjel ut chi joʼkan kawresinbʼilaqebʼ re xtzolbʼalebʼ li junchʼol. 3 Joʼ jun li soldaad li nakʼanjelak chiʼus chiru li Kristo Jesús, kʼulubʼa ebʼ li chʼaʼajkilal li tento taakʼul. 4 Li soldaad li naraj xsahobʼresinkil xchʼool li kixaqabʼank re choʼq soldaad moko naxbʼaanu ta junaq chik li kʼanjel re xwenteninkil ribʼ. 5 Joʼkan ajwiʼ nakʼulmank rikʼin li bʼatzʼunk, maaʼani naxkʼul li maatan wi inkʼaʼ nabʼatzʼunk joʼ chanru xaqabʼanbʼil. 6 Laj awinel li kaw nakʼanjelak tento naq aʼan xbʼeenwa tixtzeka ru li rawimq. 7 Maakanabʼ xkʼoxlankil li yookin xyeebʼal; li Qaawaʼ tixbʼaanu naq taataw ru chixjunil.
8 Jultikaq aawe naq li Jesukriist kiwaklesiik chi yoʼyo saʼ xyanqebʼ li kamenaq ut aʼan jun rehebʼ li ralal xkʼajol laj David, joʼ naxye li chaabʼil esil li ninkʼe chi naweʼk. 9 Ut saʼ xkʼabʼaʼ aʼin, yookin chi rahobʼtesiik ut bʼakʼbʼokin chi kareen joʼ jun li winq li naxqʼet li chaqʼrabʼ. Abʼanan, li raatin li Yos moko bʼakʼbʼo ta chi kareen. 10 Joʼkan naq yookin xkuybʼal chixjunil saʼ xkʼabʼaʼ li sikʼbʼilebʼ ru re naq teʼxtaw li kolbʼa ibʼ saʼ xkʼabʼaʼ li Kristo Jesús joʼ ajwiʼ li loqʼal chi junelik. 11 Li aatin aʼin tzʼaqal yaal: wi tookamq rochbʼeen, chʼolchʼo naq toowanq ajwiʼ rochbʼeen; 12 wi inkʼaʼ naqakanabʼ xkuybʼal chixjunil, tooʼawabʼejinq ajwiʼ rochbʼeen; wi naqaye naq inkʼaʼ naqanaw ru, aʼan ajwiʼ tixye naq inkʼaʼ naxnaw qu; 13 usta laaʼo inkʼaʼ naqabʼaanu li naxye li Yos, aʼan junelik naxbʼaanu li naxye xbʼaan naq aʼan inkʼaʼ naxqʼet ribʼ chiru li raatin.
14 Maakanabʼ xjultikankil rehebʼ aʼin ut chiru li Yos taaye rehebʼ chi kutankil naq inkʼaʼ teʼpleetiq chirix aatin xbʼaan naq aʼin maakʼaʼ naʼok wiʼ ut naxrahobʼtesihebʼ li yookebʼ chi abʼink. 15 Bʼaanu chixjunil li wank saʼ laawuqʼ re naq li Yos tatxkʼulubʼa joʼ jun laj kʼanjel li maakʼaʼ nachalk wiʼ xxutaan ut li naroksi li raatin li Yos chi tzʼaqal re ru. 16 Abʼan maakʼulubʼa li aatin li maakʼaʼ naʼok wiʼ li inkʼaʼ naroxloqʼi li Yos xbʼaan naq aʼin naxkʼam chaq naabʼal li naʼlebʼ li inkʼaʼ nawulak chiru li Yos 17 ut tixjekʼi ribʼ joʼ li xox li naxqʼaresi saʼ junpaat li tibʼelej. Joʼkan kikʼulmank rikʼin laj Himeneo ut laj Fileto. 18 Ebʼ li winq aʼin xeʼxkanabʼ li yaal, yookebʼ xyeebʼal naq ak xwank li wakliik chi yoʼyo ut yookebʼ xpoʼbʼal ru xpaabʼal wiibʼ oxibʼ li qas qiitzʼin. 19 Usta joʼkan, li rubʼelankil li Yos xaqxo chi kaw ut chiru tzʼiibʼanbʼil aʼin: «Li Jehobʼa* naxnaw ruhebʼ li re» ut «Li naxyaabʼasi li xkʼabʼaʼ li Jehobʼa* re naq ttenqʼaaq tento tixtzʼeqtaana li inkʼaʼ us».
20 Joʼkan bʼiʼ, saʼ jun nimla ochoch moko kaʼaj tawiʼ wank ebʼ li sekʼ re oor ut plaat, wank ajwiʼ re cheʼ ut re sebʼ. Wank naʼoksimank choʼq re li ninqʼe ut wank naʼoksimank yalaq joqʼe. 21 Joʼkan naq li naxnajtobʼresi ribʼ rikʼinebʼ li sekʼ li naʼoksimank yalaq joqʼe, chanchanaq li sekʼ li naʼoksimank saʼ li ninqʼe, santobʼresinbʼilaq, tkʼanjelaq chiru laj echal re ut kawresinbʼilaq re xbʼaanunkil jalan jalanq li chaabʼil kʼanjel. 22 Joʼkan naq, elelin chiru li nekeʼxrahi ru ebʼ li saaj ut sikʼ li tiikilal, li paabʼank, li rahok ut li tuqtuukilal, rochbʼeenebʼ li nekeʼxyaabʼasi li xkʼabʼaʼ li Qaawaʼ re naq teʼtenqʼaaq xbʼaan naq saqebʼ ru li xchʼool.
23 Joʼkan ajwiʼ, tzʼeqtaana li choqink li maakʼaʼ naʼok wiʼ xbʼaan naq pleet naxchiqʼ chaq. 24 Laj kʼanjel chiru li Qaawaʼ inkʼaʼ tpleetiq, tuulanaq bʼan rikʼin chixjunilebʼ, kawresinbʼilaq re kʼutuk, tixkuy ribʼ naq tbʼaanuuq re li maaʼusilal 25 ut tixtzolebʼ saʼ tuulanil li moko nekeʼnaʼlebʼak ta chiʼus. Maare li Yos tixbʼaanu naq teʼxyotʼ xchʼool ut teʼxjal xnaʼlebʼ re naq teʼxnaw li yaal chi tzʼaqal re ru 26 ut chi joʼkan teʼajq ru ut teʼeleliq chiru li xraʼal laj Tza* xbʼaan naq aʼan kirechanihebʼ re naq teʼxbʼaanu li naraj.