Filipenses
2 Joʼkan bʼiʼ, kʼehomaq eeqʼe chi xwaklesinkil eechʼool cheeribʼil eeribʼ saʼ xkʼabʼaʼ naq wankex saʼ junajil rikʼin li Kriist, teekʼojobʼ eechʼool rikʼin rahok ut kʼoxlamaq eeribʼ, teera eeribʼ ut teetoqʼobʼa eeru,* 2 teesahobʼresi inchʼool, kʼutbʼesimaq naq wankex saʼ junajil, cheera eeribʼ, junajaq ru leebʼaanuhom ut leekʼaʼuxl. 3 Mexjosqʼoʼk malaj meenima eeribʼ eejunes, teekubʼsi bʼan eeribʼ ut teekʼoxla naq ebʼ li junchʼol nimebʼ cheeru, 4 meesikʼ li us kaʼajwiʼ choʼq eere, teesikʼ bʼan li us choʼq rehebʼ li junchʼol.
5 Kʼoxlanqex joʼ chanru kikʼoxlak chaq li Kristo Jesús, 6 usta chanchan chaq li Yos, inkʼaʼ kinumeʼk saʼ li xkʼaʼuxl xjuntaqʼeetankil ribʼ rikʼin li Yos. 7 Inkʼaʼ, kixkanabʼ bʼan chixjunil, kixkʼulubʼa wank choʼq moos ut kisutqʼi choʼq winq. 8 Ut moko kaʼaj tawiʼ aʼin, naq kikʼulunk joʼ winq kixkubʼsi ribʼ ut kiʼabʼink toj reetal naq kiwulak li xkamik. Joʼkan tzʼaqal, kikamk chiru li cheʼ re rahobʼtesiik.* 9 Joʼkan naq li Yos kixtaqsi saʼ jun li naʼaj qʼaxal nim xteram ut chi anchal xchʼool kixkʼe re li kʼabʼaʼej li wank saʼ xbʼeen yalaq kʼaru chi kʼabʼaʼej. 10 Li Yos kixbʼaanu aʼin re naq li wankebʼ saʼ choxa, li wankebʼ saʼ ruuchichʼochʼ ut li wankebʼ rubʼel chʼochʼ teʼroxloqʼi li xkʼabʼaʼ li Jesús. 11 Ut chixjunilebʼ teʼxkʼe chi naweʼk chiru li komonil naq li Jesukriist aʼan li Qaawaʼ re naq tkʼemanq xloqʼal li Yos aʼ li Yuwaʼbʼej.
12 Ex wechpaabʼanel li raarokex inbʼaan, laaʼex junelik xexʼabʼink naq wankin chaq eerikʼin ut anaqwan naq maaʼanihin eerikʼin qʼaxal nekexʼabʼink wiʼ chik. Joʼkan ajwiʼ li junjunq saʼ eeyanq chixkʼehaq xqʼe chi roxloqʼinkil li Yos re naq tixtaw li xkolbʼal. 13 Li Yos naxkʼe eemetzʼew re naq texruuq xbʼaanunkil li naraj aʼan. Ut naxbʼaanu naq t-alaaq saʼ leechʼool ut naxkʼe eemetzʼew re naq texruuq xbʼaanunkil li nawulak chiru. 14 Maakʼaʼ naxye kʼaru yooqex xbʼaanunkil inkʼaʼ texwechʼinq chi moko texchoqinq 15 re naq maakʼaʼ kʼaru texqʼabʼaaq wiʼ, saqaq eeru, laaʼexaq ralal xkʼajol li Yos ut maakʼaʼaq eepaltil saʼ xyanq li tenamit li wank chiruhebʼ li kutan aʼin li qʼaxal maaʼus xnaʼlebʼ ut inkʼaʼ naxbʼaanu li us, laaʼex nekexlemtzʼunk joʼ li saqenk saʼ li ruuchichʼochʼ, 16 meekanabʼ xchapbʼal eeribʼ chi kaw rikʼin li aatin li nakʼehok yuʼam. Chi joʼkan wanq xyaalal naq tsahoʼq saʼ inchʼool saʼ xkutankil li Kriist xbʼaan naq ninnaw naq inkʼaʼ xinʼaanilak chi maakʼaʼ xyaalal chi moko xinkʼanjelak chi kaw chi maakʼaʼ rajbʼal. 17 Yookin chi hoymank joʼ namayejamank li bʼiin saʼ xbʼeen li xnaʼaj li mayej.* Ut yookin chi tzʼaqonk chirix li kʼanjel li yookex xbʼaanunkil choʼq re li Yos saʼ xkʼabʼaʼ leepaabʼal. Usta yookin chi hoymank, sa ajwiʼ linchʼool joʼ laaʼex. 18 Joʼkan ajwiʼ laaʼex, tento naq tsahoʼq saʼ leechʼool ut teewotz wikʼin li xsahil leechʼool.
19 Anaqwan nawoybʼeni saʼ xkʼabʼaʼ li Qaawaʼ Jesús naq chi seebʼ tintaqla eerikʼin laj Timoteo re naq tkʼojlaaq linchʼool naq twabʼi chanru wankex. 20 Xbʼaan naq maakʼaʼ junaq chik li qas qiitzʼin li nanaʼlebʼak joʼ aʼan, li naxkʼe tzʼaqal xchʼool cheerix. 21 Xbʼaan naq ebʼ li junchʼol nekeʼxsikʼ kaʼajwiʼ li nekeʼraj ut inkʼaʼ li naraj li Jesukriist. 22 Abʼan laaʼex nekeenaw naq ak xkʼutbʼesi naq chaabʼil xnaʼlebʼ, ak xkʼanjelak wochbʼeen joʼ moos re xkʼebʼal chi naweʼk li chaabʼil esil joʼ naxbʼaanu jun li alalbʼej rikʼin li xyuwaʼ. 23 Ut naq ak xinnaw kʼaru tkʼulmanq wikʼin nawoybʼeni naq aʼan tintaqla eerikʼin. 24 Joʼkan ajwiʼ, kʼojkʼo inchʼool rikʼin li Qaawaʼ naq chi seebʼ laaʼin ajwiʼ wanqin eerikʼin.
25 Abʼan anaqwan nawil naq aajel ru naq tintaqla eerikʼin laj Epafrodito, li wechpaabʼanel ut aj tenqʼahom we ut nakʼanjelak chi kaw wochbʼeen joʼ jun li soldaad, li xeetaqla chaq re naq tinxtenqʼa. 26 Kʼajoʼ naraj eerilbʼal ut qʼaxal ra saʼ xchʼool xbʼaan naq joʼ xeerabʼi resil kiyajerk. 27 Yaal naq nim chaq xyajel, kachʼin chik ma xkamk. Abʼanan, li Yos kixtoqʼobʼa ru* abʼan moko kaʼaj tawiʼ aʼan, kixtoqʼobʼa ajwiʼ wu re naq inkʼaʼ tnumtaaq xrahil linchʼool. 28 Joʼkan naq saʼ junpaat tintaqla eerikʼin re naq sahaq eechʼool chi rilbʼal wiʼ chik ru ut laaʼin sa chik twekʼa wibʼ. 29 Joʼkan naq kʼulumaq joʼ chanru kʼaynaqex chi xkʼulbʼal ebʼ li nekeʼtaqenk re li Qaawaʼ, chi kʼajoʼ xsahil eechʼool ut junelik teekʼutbʼesi naq qʼaxal nekeera ebʼ li winq joʼ li winq aʼin 30 xbʼaan naq kachʼin chik ma xkamk saʼ xkʼabʼaʼ li xkʼanjel li Kriist,* kixkʼe saʼ xiwxiw li xyuʼam re intenqʼankil xbʼaan naq laaʼex inkʼaʼ xexruuk intenqʼankil saʼ xkʼabʼaʼ naq moko wankex ta arin.