Filipenses
3 Ex wechpaabʼanel, junelik sahaq saʼ eechʼool saʼ xkʼabʼaʼ li Qaawaʼ. Inkʼaʼ ninlubʼk chi xtzʼiibʼankil wiʼ chik li ak xintzʼiibʼa chaq eere ut aʼin tkʼanjelaq cheeru.
2 Weent teebʼaanu rikʼinebʼ li nekeʼnaʼlebʼak joʼebʼ li tzʼiʼ, weent teebʼaanu rikʼinebʼ li nekeʼrahobʼtesink, weent teebʼaanu rikʼinebʼ li nekeʼsetok tibʼelej. 3 Xbʼaan naq qikʼin wank li tzʼaqal setok tzʼuumal tzʼejwal, laaʼo yooko chi kʼanjelak chiru li Yos saʼ xkʼabʼaʼ li xsantil musiqʼej ut yooko xnimankil qibʼ chirix li Kristo Jesús ut inkʼaʼ yooko xkʼojobʼankil qachʼool rikʼin li tibʼelej. 4 Abʼan wi junaq naraj xnimankil ribʼ saʼ xkʼabʼaʼ naq kʼojkʼo xchʼool rikʼin li tibʼelej,
laaʼin qʼaxal tinnima wiʼ chik wibʼ chiru aʼan. 5 Laaʼin xseteʼk xtzʼuumal intzʼejwal naq wank chaq waqxaqibʼ kutan we, laaʼin aj Israel, chalenaqin saʼ xteepal laj Benjamín, laaʼin aj hebreo ralal xkʼajolebʼ laj hebreo, laaʼin aj pariseey saʼ xkʼabʼaʼ li chaqʼrabʼ, 6 xinkʼe inchʼool chi xrahobʼtesinkilebʼ li qas qiitzʼin li wankebʼ saʼ li chʼuut. Xinkʼutbʼesi naq maakʼaʼ inmaak naq xinbʼaanu chiʼus chixjunil joʼ chanru naxye li chaqʼrabʼ. 7 Abʼan chixjunil li wank chaq xwankil choʼq we, anaqwan maakʼaʼ chik xwankil* saʼ xkʼabʼaʼ li Kriist. 8 Laaʼin nawil naq chixjunil li kʼaʼaq re ru maakʼaʼ xwankil naq ninjuntaqʼeeta rikʼin li tzʼaqal nawom chirix li Kristo Jesús, Linqaawaʼ. Li nawom aʼin maaʼani natawok re xtzʼaq. Ut saʼ xkʼabʼaʼ aʼan xinkanabʼ chixjunil, mul aj chik choʼq we. Re naq chi joʼkan tinruuq rechaninkil li Kriist 9 ut ilbʼilin joʼ aj taqehom re. Abʼan inkʼaʼ ninye naq tiik inchʼool xbʼaan naq ninpaabʼ li Chaqʼrabʼ, ilbʼilin bʼan chi joʼkan xbʼaan naq ninpaabʼ li Kriist. Joʼkan, li Yos naril naq tiikebʼ xchʼool li nekeʼxkʼojobʼ xchʼool rikʼin li Kriist. 10 Li nawaj aʼan xnawbʼal ru li Kriist ut li xwankil li kiwaklesink re chi yoʼyo ut xkʼulbʼal li rahilal li kixkʼul aʼan maakʼaʼ naxye usta tinkamq joʼ kikamk aʼan, 11 re rilbʼal ma tinruuq chi wank saʼ xyanqebʼ li teʼwakliiq chi yoʼyo xbʼeenwa saʼ xyanqebʼ li kamenaq.
12 Aʼin moko naraj ta xyeebʼal naq ak xinkʼul linqʼajkamunkil chi moko ak xintaw li yuʼam li tzʼaqal re ru, toj yookin bʼan xkʼebʼal inqʼe re xkʼulbʼal linqʼajkamunkil xbʼaan naq ninnaw naq aʼin ajʼe naq li Kristo Jesús kixsikʼ wu. 13 Ex wechpaabʼanel, moko ak xintaw ta aʼin. Abʼan chʼolchʼo chiwu jun li naʼlebʼ: ak xsach saʼ inchʼool li xinkanabʼ chiʼixbʼej ut yookin xyuʼbʼal wibʼ re xtawbʼal chixjunil li chalk re. 14 Inkʼaʼ ninkanabʼ xkʼebʼal inqʼe re xkʼulbʼal linqʼajkamunkil. Li qʼajkamunkil aʼin aʼan li yuʼam saʼ choxa, li tixkʼe li Yos rehebʼ li kixbʼoqebʼ saʼ xkʼabʼaʼ li Kristo Jesús. 15 Joʼkan bʼiʼ, laaʼo li kaw li qapaabʼal chookʼoxlaq chirix li ak xinye. Abʼan wi junaq qe inkʼaʼ nakʼoxlak chi joʼkaʼin li Yos ttenqʼanq re chi kʼoxlak chi joʼkaʼin. 16 Abʼanan, maakʼaʼ naxye joʼnimal ak xookʼiik saʼ xkʼanjel li Yos, inkʼaʼ tqakanabʼ wank chiʼus saʼ li bʼe aʼin.
17 Ex wechpaabʼanel, cheejunilex kʼamomaq eere wikʼin ut kʼehomaq reetal li yookebʼ xyuʼaminkil li eetalil li xqakʼe eere. 18 Xbʼaan naq naabʼalebʼ xikʼ nekeʼril li Kriist ut li cheʼ re rahobʼtesiik.* Junxil rajlal ninpatzʼebʼ abʼan anaqwan ninyaabʼak naq ninpatzʼebʼ. 19 Yal yookebʼ aj chik roybʼeninkil li rosoʼjikebʼ ut li xyosebʼ aʼan li nekeʼxrahi ru; nekeʼxnima ribʼ rikʼin li xutaanalil naʼlebʼ li nekeʼxbʼaanu ut kaʼajwiʼ li wank saʼ ruuchichʼochʼ nekeʼxkʼoxla. 20 Abʼan li qochoch wank saʼ choxa ut yooko roybʼeninkil chi anchal qachʼool li Qaawaʼ Jesukriist, aj kolonel, 21 aʼan tixjal li qatibʼel li maakʼaʼ naʼok wiʼ re naq wanq xloqʼal joʼ li xtibʼel aʼan. Troksi li xnimal xwankil re xbʼaanunkil aʼin, li wankil ajwiʼ aʼin nakʼanjelak re naq chixjunil wanq rubʼel xwankil.