Colosenses
1 Laaʼin laj Pablo, xʼapóstol li Kristo Jesús saʼ xkʼabʼaʼ li rajom li Yos ut laj Timoteo, li qechpaabʼanel. 2 Nintzʼiibʼa li esilhu aʼin choʼq eere laaʼex li santil paabʼanel li wankex aran Colosas, laaʼex li inkʼaʼ nekeetzʼeqtaana li Kriist ut wankex saʼ junajil rikʼin:
Chiwanq taxaq eerikʼin li xnimal rusilal ut li xtuqtuukilal li Yos, li Qayuwaʼ.
3 Junelik nokoobʼanyoxink chiru li Yos, li Xyuwaʼ li Qaawaʼ Jesukriist naq nokootijok cheerix 4 xbʼaan naq xqabʼi resil leepaabʼal chirix li Kristo Jesús ut naq nekeera chixjunilebʼ li santil paabʼanel 5 saʼ xkʼabʼaʼ li oybʼenihom li xokxo choʼq eere saʼ choxa. Naq xeerabʼi li yaal chirix li chaabʼil esil, xeetzol chirix li oybʼenihom aʼin. 6 Li chaabʼil esil aʼin li xwulak eerikʼin yook chi uuchink ut yook chi wulak saʼ chixjunil li ruuchichʼochʼ, joʼkan ajwiʼ yook chi bʼaanumank saʼ eeyanq chalen naq xeerabʼi ut xeenaw chi tzʼaqal chanru xnimal rusilal li Yos. 7 Aʼin tzʼaqal li xeetzol rikʼin laj Epafras, li qechmoosil li raaro qabʼaan ut chaabʼil nakʼanjelak chiru li Kriist. Aʼan naxbʼaanu li kʼanjel li tqabʼaanu raj laaʼo wi wanko raj eerikʼin. 8 Aʼan kixye ajwiʼ qe naq li santil musiqʼej nekextenqʼa chi xkʼutbʼesinkil li rahok.
9 Chalen naq xqabʼi aʼin inkʼaʼ naqakanabʼ tijok cheerix ut xtzʼaamankil naq tkʼemanq eere li nawom chi tzʼaqal re ru chirix li rajom li Yos ut texruuq xtawbʼal li tzʼaqal naʼlebʼ ut teetaw ru rikʼin li xtenqʼ li santil musiqʼej 10 ut joʼ chanru nekeebʼeresi leeyuʼam teekʼe xloqʼal li Jehobʼa* ut chi joʼkan sahaq xchʼool eerikʼin naq yookex chi uuchink saʼ chixjunil li chaabʼil kʼanjel ut tkʼiiq leenawom chi tzʼaqal re ru chirix li Yos. 11 Nokootijok ajwiʼ re naq li xnimal xwankil li Yos truuq xkʼebʼal eemetzʼew joʼ naʼajmank cheeru re naq texruuq xnumsinkil chixjunil rikʼin kuyum ut sahil chʼoolejil 12 ut yooqex ajwiʼ chi bʼanyoxink chiru li Yuwaʼbʼej, li kikawresink eere re naq teekʼul ajwiʼ li ereens li teʼxkʼul li santil paabʼanel li wankebʼ saʼ li saqenk.
13 Aʼan xoorisi rubʼel xwankil li akʼabʼ ut xooxkʼam saʼ li xʼawabʼejilal li Ralal, li raaro xbʼaan, 14 ut saʼ xkʼabʼaʼ aʼan nakuymank li qamaak xbʼaan naq xooxkol naq kixtoj rix li qamaak. 15 Aʼan xjalam u li Yos li inkʼaʼ naʼilmank ru, aʼan li xbʼeen alalbʼej chiru chixjunil li kiyobʼtesimank.* 16 Saʼ xkʼabʼaʼ aʼan kiyobʼtesiik chixjunil li wank saʼ choxa ut li wank saʼ ruuchichʼochʼ li naʼilmank ut li inkʼaʼ naʼilmank ru, ebʼ li awabʼej, ebʼ li nekeʼtaqlank, ebʼ li awabʼejilal malaj li wankebʼ xwankil. Chixjunil aʼin kiwank chaq saʼ xkʼabʼaʼ aʼan ut choʼq re aʼan. 17 Joʼkan ajwiʼ, aʼan ak wank chaq junxil naq toj maakʼaʼ chaq chixjunil aʼin ut chixjunil aʼin kichalk saʼ xkʼabʼaʼ aʼan 18 ut aʼan xjolom li tibʼelej, aʼin naraj xyeebʼal, xjolomil li chʼuut. Aʼan li xtiklajik, li xbʼeen alalbʼej li kiwaklesiik xbʼeenwa saʼ xyanqebʼ li kamenaq re naq aʼanaq li xbʼeen saʼ chixjunil 19 xbʼaan naq li Yos kixkʼul xchʼool naq chixjunil twanq rikʼin li Jesús chi tzʼaqal re ru. 20 Ut saʼ xkʼabʼaʼ li xkikʼel li Kriist li kixhoy chiru li cheʼ re rahobʼtesiik,* li Yos naxbʼaanu naq chixjunil li wank saʼ choxa ut chixjunil li wank saʼ ruuchichʼochʼ tixkʼam wiʼ chik ribʼ saʼ usilal rikʼin.
21 Joʼkan ajwiʼ, laaʼex jachjokex rikʼin li Yos ut xikʼ nekeeril chaq xbʼaan naq junelik nekeekʼoxla xbʼaanunkil li inkʼaʼ us. 22 Abʼan anaqwan aʼan yook xbʼaanunkil naq teekʼam eeribʼ saʼ usilal rikʼin saʼ xkʼabʼaʼ li xtibʼel li kikamk re naq chi joʼkan santaqex, maakʼaʼaq eepaltil ut maakʼaʼ texqʼabʼaaq wiʼ chiru aʼan. 23 Abʼanan, laaʼex inkʼaʼ teekanabʼ xpaabʼankil li Yos, xeʼinbʼilaqex chiʼus saʼ xbʼeen rubʼelankil li paabʼal ut kaw xaqxoqex. Meekanabʼ naq texnajtobʼresiiq rikʼin li osobʼtesink li yookex roybʼeninkil naq xeerabʼi li chaabʼil esil li yook chi kʼemank chi naweʼk saʼ chixjunil li ruuchichʼochʼ. Laaʼin laj Pablo, xinʼok choʼq aj kʼanjel chirix li chaabʼil esil.
24 Anaqwan nasahoʼk linchʼool xbʼaan naq yookin xkʼulbʼal li rahilal cheerix ut yookin xkuybʼal li xrahilal li Kriist li toj tinkʼul saʼ lintibʼel re naq us wanq li xtibʼel aʼ li chʼuut. 25 Laaʼin aj kʼanjel chiru li xtenamit li Yos xbʼaan naq li Yos kixaqabʼank we chi xbʼaanunkil li kʼanjel aʼin ut ninbʼaanu aʼin re naq us wanqex. Aʼin xyaalal naq ninbʼaanu chixjunil li wank saʼ wuqʼ re xkʼebʼal chi naweʼk li raatin li Yos 26 aʼ li muqmukil naʼlebʼ li nachalk rikʼin li Yos li moko nawbʼil ta chaq xbʼaan li ruuchichʼochʼ* ut xbʼaanebʼ li qas qiitzʼin li xeʼwank chaq junxil. Abʼan anaqwan xkʼemank chi naweʼk rehebʼ li santil paabʼanel. 27 Li Yos kixkʼe chi naweʼk rehebʼ li santil paabʼanel li wankebʼ saʼ xyanqebʼ li tenamit li muqmukil naʼlebʼ li kʼajoʼ xloqʼal ut xbʼihomal. Li muqmukil naʼlebʼ aʼin aʼan li Kriist li wank saʼ junajil eerikʼin ut yookex roybʼeninkil naq tkʼemanq eeloqʼal rochbʼeen aʼan. 28 Chirix aʼan yooko xkʼebʼal chi naweʼk ut yooko xyeebʼal re chixjunil li ruuchichʼochʼ naq weent teʼxbʼaanu ut yooko xkʼutbʼal chiruhebʼ rikʼin xnimal ru naʼlebʼ re naq tooruuq xkʼutbʼal chixjunilebʼ li qas qiitzʼin chiru li Yos joʼebʼ li nekeʼxtaqe li Kriist chi tzʼaqal re ru. 29 Aʼan ajʼe naq yookin chi kʼanjelak chi kaw, yookin xkʼebʼal inqʼe rikʼin li metzʼew li naxkʼe we li qʼaxal yook chi kʼanjelak wikʼin.