Apocalipsis
1 Li aatin li kixkʼe chi kutankil* li Yos saʼ xkʼabʼaʼ li Jesukriist re xkʼutbʼesinkil chiruhebʼ li xmoos li Yos li tkʼulmanq chi seebʼ. Li Jesukriist kixtaqla li xʼánjel rikʼin laj Juan, li xmoos, re xkʼutbʼal chiru li tkʼulmanq saʼ li kutan chalk re. 2 Laj Juan kixkʼe chi naweʼk ebʼ li aatin li kixkʼe li Yos ut chixjunil li kixye li Jesukriist, joʼkan, kixkʼe chi naweʼk chixjunil li kiril. 3 Sa saʼ xchʼool li tixyaabʼasi saʼ kawil kuxej ebʼ li aatin li wank saʼ li propesiiy aʼin ut sahebʼ saʼ xchʼool li teʼabʼinq re ut teʼxpaabʼ li tzʼiibʼanbʼil aran xbʼaan naq nachʼ wank li hoonal li xaqabʼanbʼil.
4 Laaʼin laj Juan nintzʼiibʼa li wuqubʼ chi chʼuut li wank saʼ xweent Asia:
Teekʼul taxaq li xnimal rusilal ut li tuqtuukilal li naxkʼe «li wank, li xwank chaq ut li tchalq», li naxkʼe li wuqubʼ chi santil metzʼew li wank chiru li xkʼojaribʼaal 5 ut li naxkʼe li Jesukriist, li Testiiw li Naxye li Yaal, li Kiwaklesiik Xbʼeenwa saʼ xyanqebʼ li kamenaq ut li Najolomink saʼ xbʼeenebʼ li awabʼej re chixjunil li ruuchichʼochʼ.
Li nokooxra ut xoorisi rubʼel xwankil li maak saʼ xkʼabʼaʼ li xkikʼel 6 (ut kixbʼaanu naq laaʼaqo jun li awabʼejilal ut laaʼaqo aj tij choʼq re li Xyos ut li Xyuwaʼ) re taxaq li loqʼal ut li wankilal chi junelik. Joʼkan taxaq.
7 Kʼehomaq reetal! Tchalq saʼ xyanq li choql, chixjunilebʼ teʼiloq re ut t-ileʼq ajwiʼ xbʼaanebʼ li xeʼxeqʼok re ut saʼ xkʼabʼaʼ aʼan chixjunilebʼ li teep saʼ ruuchichʼochʼ teʼxten chiruhebʼ li xmaqabʼ xbʼaan xrahilebʼ xchʼool, joʼkan, chʼolchʼo naq tkʼulmanq aʼin. Joʼkan taxaq.
8 «Laaʼin li Alfa ut li Omega,* chan li Jehobʼa* Yos, aʼan li wank, li xwank chaq ut li tchalq aʼ li Nimajwal».
9 Laaʼin laj Juan leerechpaabʼanel ut eerochbʼeen saʼ li rahobʼtesiik, saʼ li awabʼejilal ut saʼ li kuyuk joʼ aj tqehom re li Jesús. Xinwank chaq Patmos, li naʼaj li sutsu chi haʼ, xbʼaan naq xinʼaatinak chirix li Yos ut xinkʼe chi naweʼk chirix li Jesús. 10 Li santil musiqʼej xinxkʼam chaq saʼ xkutankil li Qaawaʼ ut chiwix xwabʼi jun li kawil kuxej chanchan xyaabʼ jun li trompeet 11 li yook xyeebʼal: «Tzʼiibʼa saʼ jun li bʼotbʼilhu li yookat rilbʼal ut taqla re li wuqubʼ chi chʼuut: Éfeso, Esmirna, Pérgamo, Tiatira, Sardis, Filadelfia ut Laodicea».
12 Xinʼilok chiwix re rilbʼal ani yook chi aatinank we ut naq xinbʼaanu aʼin, xwil wuqubʼ xnaʼaj kandeel* re oor. 13 Saʼ xyi li naʼaj kandeel* xwil jun li qas qiitzʼin chanchan ralal li winq tiqto rikʼin jun li jut-aqʼ li nawulak toj chi roq ut wank jun li kʼaamalsaʼ re oor chire xchʼool. 14 Joʼkan ajwiʼ, saq li xjolom ut li rismal joʼ li saqi noqʼ ut joʼ li ratzʼamke. Ut saʼ ru chanchan li ruʼuj raqʼ xaml. 15 Li roq kilemtzʼunk joʼ li tzʼaqal qʼanchʼiichʼ* li nahaʼresiik saʼ xaml ut li xyaabʼ xkux chanchan xyaabʼ li kʼiila haʼ.* 16 Saʼ xnim ruqʼ wank chaq wuqubʼ li chahim; saʼ re kiʼelk chaq jun li jutzʼchʼiichʼ kaʼpakʼal xqʼesnal, najt roq ut qʼes ru ut li xnaqʼ ru* chanchan li saqʼe naq qʼaxal nalemtzʼunk. 17 Naq xwil ru, xintʼaneʼk chi roq chanchan kamenaq xinkanaak.
Ut aʼan kixkʼe li xnim ruqʼ saʼ inbʼeen ut kixye we: «Matxuwak. Laaʼin li Xtiklajik ut li Xraqik 18 ut li yoʼyo. Kamenaqin chaq abʼan anaqwan yoʼyokin ut tinwanq chi junelik ut wank wikʼin xlaawil li kamk ut xlaawil li Muqlebʼaal Kamenaq.* 19 Joʼkan naq tzʼiibʼa chixjunil li xaawil, chixjunil li yook chi kʼulmank anaqwan ut chixjunil li tkʼulmanq chirix aʼin. 20 Aʼin xmuqmukil naʼlebʼ li Yos chirix li wuqubʼ chi chahim li xaawil saʼ linnim uqʼ ut li wuqubʼ xnaʼaj kandeel* re oor: li wuqubʼ chi chahim reetalil ebʼ li ánjel re li wuqubʼ chi chʼuut ut li wuqubʼ xnaʼaj kandeel* reetalil li wuqubʼ chi chʼuut.