1 Pedro
2 Joʼkan naq, tzʼeqtanamaq chixjunil li maaʼusilal, li bʼalaqʼik, li kaʼpakʼal u, li kaqalink ut chixjunil li aatin li nayoobʼamank chirixebʼ li junchʼol. 2 Joʼ chanru naq ebʼ li kʼuulaʼal li tojaʼ teʼyoʼlaaq nekeʼxrahi ru li leech, laaʼex tento teetzol xrahinkil ru li tzʼaqal leech li nachalk saʼ li raatin li Yos re naq texkʼiiq ut texruuq chi koleʼk. 3 Tkʼulmanq aʼin wi ak xeekʼe reetal naq li Qaawaʼ qʼaxal chaabʼil.
4 Ebʼ li winq xeʼxtzʼeqtaana li yoʼyokil pek abʼan li Yos kixsikʼ ru ut oxloqʼ chiru. Naq nekexjilok rikʼin 5 chanchanex li yoʼyokil pek li yookex chi kabʼlaak, re xyiibʼankil jun li ochoch saʼ xkʼabʼaʼ li xsantil musiqʼej li Yos re naq laaʼexaq jun chʼuut aj tij li kʼulanbʼil choʼq re li Yos. Chi joʼkan teeyeechiʼi li mayej li bʼeresinbʼil xbʼaan li santil musiqʼej ut kʼulubʼanbʼil xbʼaan li Yos saʼ xkʼabʼaʼ li Jesukriist. 6 Xbʼaan naq jun xraqal li Raatin li Yos naxye: «Kʼehomaq reetal! Yookin xkʼebʼal aran Sion jun li pek li sikʼbʼil ru, jun li oxloqʼinbʼil pek li naxik saʼ xxuk ut nakʼemank taqʼa ut li naxkʼojobʼ xchʼool chirix inkʼaʼ tkanaaq saʼ xutaan».
7 Joʼkan bʼiʼ, cheeru laaʼex, aʼan oxloqʼ xbʼaan naq laaʼex aj paabʼanel. Abʼan, choʼq rehebʼ li maawaʼebʼ aj paabʼanel, «li pek li xeʼxtzʼeqtaana ebʼ laj kabʼlanel, aʼan li kikanaak choʼq xnimal ru pek li naxik saʼ xxuk ut nakʼemank taqeʼq» 8 ut «jun li pek li nakʼehok chi tichkʼok ut jun li pek li natʼanok». Ebʼ aʼan nekeʼtichkʼok xbʼaan naq inkʼaʼ nekeʼxpaabʼ li raatin li Yos. Ut ak kiyeemank chaq naq joʼkan teʼxkʼul. 9 Abʼan laaʼex jun li teep sikʼbʼil ru, laaʼex jun chʼuut chi awabʼej li wankex choʼq aj tij, laaʼex jun santil tenamit, laaʼex jun li tenamit sikʼbʼil ru xbʼaan li Yos re naq teekʼe chi naweʼk yalaq bʼar chirix li rusilal li Yos. Aʼan kiʼisink eere saʼ qʼoqyink ut xexkʼul saʼ li xsaqenk li kʼajoʼ xchʼinaʼusal. 10 Xbʼaan naq junxil moko laaʼex ta chaq jun li tenamit, abʼan anaqwan laaʼex chik xtenamit li Yos; junxil inkʼaʼ kiʼuxtaanaak eeru* abʼan anaqwan uxtaananbʼil eeru.*
11 Ex wechpaabʼanel li wankex choʼq aj abʼl tenamit ut aj numelex, nintzʼaama cheeru naq teetzʼeqtaana li naxrahi ru li tibʼelej li yook chi yalok saʼ leeyuʼam. 12 Junelik chaabʼilaq eenaʼlebʼ saʼ xyanqebʼ li tenamit re naq teʼxkʼe reetal li xchaabʼilal ru leebʼaanuhom naq texqʼabʼaaq chi xbʼaanunkil li inkʼaʼ us. Ut chi joʼkan, teʼxkʼe xloqʼal li Yos naq tkʼulunq chi raqok aatin.
13 Saʼ xkʼabʼaʼ li Qaawaʼ kʼehomaq eeribʼ rubʼel xwankil li kʼebʼilebʼ xwankil xbʼaanebʼ li winq. Aʼ yaal ma junaq awabʼej xbʼaan naq aʼan nim xwankil cheeru, 14 malaj ebʼ li ruuchil awabʼej li taqlanbʼilebʼ chi xkʼebʼalebʼ chi xtojbʼal xmaak ebʼ li inkʼaʼ nekeʼxbʼaanu li us ut chi xnimankilebʼ li nekeʼxbʼaanu li us. 15 Xbʼaan naq li Yos naraj naq texnaʼlebʼaq chiʼus ut chi joʼkan teebʼaanu naq li maakʼaʼebʼ xnaʼlebʼ teʼxtzʼap saʼ re. Ebʼ li qas qiitzʼin aʼin inkʼaʼ nekeʼxnaw li nekeʼxye. 16 Laaʼex moko wankex ta chik choʼq moos. Abʼan moko xbʼaan ta naq moko wankex ta chik choʼq moos naq teebʼaanu li inkʼaʼ us, wanqex bʼan choʼq xmoos li Yos. 17 Teeroxloqʼi li jalan jalanq chi qas qiitzʼin, teera chixjunilebʼ leerechpaabʼanel, qʼaxal teeroxloqʼi li Yos, teeroxloqʼi li awabʼej.
18 Ebʼ li moos teʼxkʼe ribʼ rubʼel xwankil ebʼ li xpatron ut teʼroxloqʼi joʼ chanru xkʼulubʼebʼ. Moko kaʼaj tawiʼ teʼxbʼaanu aʼin rikʼinebʼ li chaabʼilebʼ xnaʼlebʼ ut qʼunebʼ xchʼool, teʼxbʼaanu ajwiʼ aʼin rikʼinebʼ li chʼaʼaj xsahobʼresinkilebʼ xchʼool. 19 Xbʼaan naq wi junaq li qas qiitzʼin naxkuy ebʼ li chʼaʼajkilal* ut narahobʼtesiik chi maakʼaʼ xmaak saʼ xkʼabʼaʼ naq saq ru xchʼool* chiru li Yos, aʼin qʼaxal naxkʼe xsahil xchʼool li Yos. 20 Xbʼaan naq wi nekexsakʼeʼk saʼ xkʼabʼaʼ naq xexmaakoʼbʼk, ma wank xwankil naq teekuy? Abʼanan, wi nekeekuy ebʼ li rahilal saʼ xkʼabʼaʼ naq nekeebʼaanu li us, aʼin qʼaxal naxsahobʼresi xchʼool li Yos.
21 Joʼkan bʼiʼ, aʼin ajʼe naq xexbʼoqeʼk xbʼaan naq li Kriist kirahobʼtesiik saʼ eekʼabʼaʼ re naq teekʼe eeqʼe chi xkʼambʼal eere rikʼin saʼ chixjunil. 22 Aʼan maajunwa kimaakobʼk chi moko kiroksi ta ebʼ li aatin re bʼalaqʼik. 23 Naq yookebʼ xhobʼal inkʼaʼ kixhobʼebʼ. Naq yookebʼ xrahobʼtesinkil, inkʼaʼ kixye naq tixbʼaanu li maaʼusilal rehebʼ. Kixkanabʼ bʼan saʼ ruqʼ li naraqok aatin saʼ tiikilal. 24 Aʼan kixpaqo li qamaak naq kikʼeheʼk li xtibʼel chiru cheʼ re naq tqakanabʼ wank rubʼel xwankil li maak ut twanq qayuʼam re xbʼaanunkil li us. Ut «saʼ xkʼabʼaʼ li xrahilal xexkʼirtasiik». 25 Xbʼaan naq laaʼex chanchanex chaq ebʼ li karneer li chaʼchaʼinbʼilebʼ, abʼan anaqwan xexsutqʼiik rikʼin laj kʼaakʼalenel ut li cheekel winq li naʼilok re leeyuʼam.