Romanos

8 Joʼkan bʼiʼ, li wankebʼ saʼ junajil rikʼin li Kristo Jesús naraqmank aatin saʼ xbʼeenebʼ ut nayeemank naq maakʼaʼebʼ xmaak. 2 Joʼkan naq, li xchaqʼrabʼ li santil musiqʼej* kixkʼe eeyuʼam re naq texruuq chi wank saʼ junajil rikʼin li Kristo Jesús. Li chaqʼrabʼ ajwiʼ aʼin xexkol chiru li xchaqʼrabʼ li maak ut chiru li xchaqʼrabʼ li kamk. 3 Li Xchaqʼrabʼ laj Moisés maakʼaʼ xwankil re risinkilebʼ choʼq moos xbʼaan naq ebʼ li qas qiitzʼin moko tzʼaqalebʼ ta re ru ut ebʼ aj maak. Li Yos kiruuk risinkilebʼ choʼq moos naq kixtaqla chaq li Ralal joʼ winq re risinkil li maak. Ut chi joʼkaʼin, aʼan kixye naq maakʼaʼaq chik xwankil li maak saʼ xbʼeenebʼ li qas qiitzʼin. 4 Aʼin nakʼanjelak re naq tqabʼaanu li us li naxye li Chaqʼrabʼ naq inkʼaʼ tqakanabʼ naq li qatibʼel li namaakobʼk ttaqlanq saʼ qabʼeen, tqakanabʼ bʼan naq li xsantil musiqʼej li Yos ttaqlanq saʼ qabʼeen. 5 Xbʼaan naq li nekeʼxpaabʼ li tibʼelej nekeʼxkʼoxla rix li naxrahi ru li tibʼelej, abʼan li nekeʼxpaabʼ li santil musiqʼej nekeʼxkʼoxla rix li naraj li santil musiqʼej. 6 Li nekeʼxkʼoxla rix li naxrahi ru li tibʼelej, teʼkamq, abʼan, li nekeʼxkʼoxla rix li naraj li santil musiqʼej teʼxtaw li yuʼam ut li tuqtuukilal. 7 Naq junaq li qas qiitzʼin naxkʼe xchʼool chi xkʼoxlankil li naxrahi ru li tibʼelej, naxkanabʼ wank choʼq ramiiw li Yos xbʼaan naq inkʼaʼ naxpaabʼ li xchaqʼrabʼ li Yos chi moko naru xpaabʼankil. 8 Xbʼaan naq li nekeʼxpaabʼ li naxrahi ru li tibʼelej inkʼaʼ naru nekeʼxsahobʼresi xchʼool li Yos.

9 Abʼanan, laaʼex moko nekexnaʼlebʼak ta joʼ naraj li tibʼelej li namaakobʼk. Wi relik chi yaal naq wank eerikʼin li xsantil musiqʼej li Yos, laaʼex nekexnaʼlebʼak raj joʼ naraj li santil musiqʼej. Wi junaq li qas qiitzʼin inkʼaʼ nakʼoxlak joʼ li Kriist, li qas qiitzʼin aʼin moko re ta li Kriist. 10 Abʼan, wi li Kriist wank saʼ junajil eerikʼin, li santil musiqʼej naxkʼe eeyuʼam saʼ xkʼabʼaʼ li tiikilal, usta tkamq leetibʼel saʼ xkʼabʼaʼ li maak. 11 Joʼkan bʼiʼ, wi wank eerikʼin li xsantil musiqʼej li Yos li kixwaklesi chi yoʼyo li Kristo Jesús, li Yos troksi li xsantil musiqʼej re xbʼaanunkil naq wanq ajwiʼ xyuʼam leetibʼel.*

12 Joʼkan bʼiʼ, ex wechpaabʼanel, moko tento ta tqapaabʼ li naxrahi ru li tibʼelej. 13 Wi laaʼex nekeepaabʼ li naxrahi ru li tibʼelej, chʼolchʼo naq texkamq. Abʼan wi nekeekanabʼ naq li xwankil li santil musiqʼej textenqʼa chi xkanabʼankil li naxrahi ru li tibʼelej, twanq eeyuʼam. 14 Xbʼaan naq li nekeʼxkanabʼ naq teʼbʼeresiiq xbʼaan li xsantil musiqʼej li Yos, relik chi yaal naq aʼanebʼ ralal xkʼajol li Yos. 15 Xbʼaan naq li santil musiqʼej inkʼaʼ nokooxkʼe choʼq moos chi moko naxbʼaanu naq tooxuwaq wiʼ chik, naxbʼaanu bʼan naq kʼulbʼilaqo xbʼaan li Yos joʼ ralal xkʼajol ut naxbʼaanu naq tqaye: «Abba,* at Inyuwaʼ!». 16 Li santil musiqʼej naxkʼe chiqanaw naq laaʼo ralal xkʼajol li Yos. 17 Wi laaʼo ralal xkʼajol, tqakʼul li naraj xkʼebʼal qe li Yos ut tixkʼe ajwiʼ qe li tixkʼe re li Kriist. Abʼan xbʼeenwa toorahobʼtesiiq rochbʼeen li Kriist re naq tooruuq xkʼulbʼal qaloqʼal rochbʼeen.

18 Joʼkan naq ninkʼoxla naq li rahilal li yooko xkʼulbʼal anaqwan, qʼaxal kachʼin chiru li qʼajkamunkil li tqakʼul rikʼin li Yos. 19 Xbʼaan naq li xyobʼtesihom li Yos yook roybʼeninkil chi anchal xchʼool naq tkʼutunq xloqʼal ebʼ li ralal xkʼajol li Yos. 20 Li xyobʼtesihom wank rubʼel xwankil jun li yuʼam li maakʼaʼ naʼok wiʼ, abʼan moko yal kiraj ta, li Yos bʼan kixbʼaanu naq tkʼulmanq aʼin. Naq li Yos kixbʼaanu aʼin kixkʼe ajwiʼ qoybʼenihom: 21 li yobʼtesinbʼilebʼ xbʼaan li Yos inkʼaʼ chik teʼwanq rubʼel xwankil li maak ut li kamk. Ut chi joʼkan, chanchanaqebʼ li ralal xkʼajol li Yos li moko wankebʼ ta choʼq moos. Kʼajoʼ xchaabʼilal aʼin! 22 Naqanaw naq chalen junxil chixjunil li xyobʼtesihom naʼayaynak ut ra wank. 23 Laaʼo ak xqakʼul li xbʼeen qaqʼajkʼamunkil ut aʼan li santil musiqʼej. Usta xqakʼul aʼin toj nokooʼayaynak ut yooko ajwiʼ roybʼeninkil naq li Yos tooxkʼul joʼ ralal xkʼajol. Li Yos naru xbʼaanunkil aʼin xbʼaan naq li Kriist kitojok chiqix re qakolbʼal chiru li qatibʼel. 24 Naq xookoleʼk xqataw li oybʼenihom aʼin. Abʼan li oybʼenihom li naʼilmank ru moko tzʼaqal oybʼenihom ta. Chanru truuq junaq li qas qiitzʼin roybʼeninkil li ak yook rilbʼal? 25 Abʼan, wi yooko roybʼeninkil li inkʼaʼ naqil ru, inkʼaʼ tqakanabʼ roybʼeninkil rikʼin xnimal qakuyum ut chi anchal qachʼool.

26 Joʼkan ajwiʼ, li santil musiqʼej naʼokenk ajwiʼ re qatenqʼankil naq maakʼaʼ qametzʼew. Wank sut inkʼaʼ naqanaw kʼaru tqaye saʼ li qatij. Saʼ li hoonal naq maakʼaʼ qaatin re xyeebʼal li naqekʼa, li santil musiqʼej nokooxtenqʼa. 27 Saʼ xkʼabʼaʼ naq li Yos naxtzʼil rix li chʼoolej naxnaw li naxtzʼaama li santil musiqʼej chirixebʼ laj santil paabʼanel xbʼaan naq li naxtzʼaama naxchap ribʼ rikʼin li rajom li Yos.

28 Naqanaw naq li Yos naxbʼaanu naq chixjunil li xbʼaanuhom teʼkʼanjelaq saʼ junajil re xtenqʼankilebʼ li nekeʼxra li Yos, li bʼoqbʼilebʼ joʼ chanru naxkʼul xchʼool. 29 Xbʼeenwa kixkʼe xchʼool chirixebʼ ut chi rubʼelaj kixkʼubʼ naq chanchanaqebʼ li Ralal. Chi joʼkan li Ralal aʼanaq li xbʼeen alalbʼej saʼ xyanqebʼ li riitzʼin. 30 Li kixsikʼebʼ chi rubʼelaj, kixbʼoqebʼ ajwiʼ, ut li kixbʼoqebʼ, kixye naq tiikebʼ xchʼool. Ut li kixye naq tiikebʼ xchʼool, kixkʼehebʼ xloqʼal.

31 Joʼkan bʼiʼ, kʼaru tqaye chirix aʼin? Wi li Yos wank qikʼin, ani xikʼ t-iloq qe? 32 Wi li Yos kixkanabʼ naq li Ralal tixkʼul li rahilal ut kixqʼaxtesi saʼ qakʼabʼaʼ, ma inkʼaʼ tixkʼe ajwiʼ qe chi anchal xchʼool chixjunil li naʼajmank chiqu? 33 Ani naru naqʼabʼank rehebʼ li sikʼbʼilebʼ ru xbʼaan li Yos? Li Yos nayeehok re, naq tiikebʼ xchʼool. 34 Ani naru nayeehok re, naq wankebʼ xmaak? Li Kristo Jesús kikamk ut moko kaʼaj tawiʼ aʼin, kiwaklesiik chi yoʼyo, wank saʼ xnim ruqʼ li Yos ut natzʼaamank ajwiʼ chiqix.

35 Ani tjachoq qe rikʼin li xrahom li Kriist? Ma ebʼ li chʼaʼajkilal, li kʼaʼuxej, li rahobʼtesiik, li weʼej, li tʼusam, naq wank saʼ xiwxiw li qayuʼam malaj naq nekeʼxyeechiʼi qakamsinkil? 36 Chi joʼkaʼin tzʼiibʼanbʼil: «Xbʼaan naq laaʼo laatenamit junelik yookebʼ qakamsinkil. Nokooʼeʼril joʼebʼ li karneer li nekeʼkʼameʼk chi kamsiik». 37 Abʼan saʼ xkʼabʼaʼ li kirahok qe, xooqʼaxok u saʼ chixjunil aʼin. 38 Xbʼaan naq chʼolchʼo chiwu naq chi moko li kamk chi moko li yuʼam, chi moko ebʼ li ánjel chi moko ebʼ li awabʼejilal, chi moko li tkʼulmanq anaqwan chi moko li tkʼulmanq moqon, chi moko ebʼ li wankilal, 39 chi moko li wank taqeʼq chi moko li wank taqʼa, chi moko junaq chik li yobʼtesihom naru najachok qe rikʼin li xrahom li Yos li wank rikʼin li Kristo Jesús, li Qaawaʼ.