Lucas

23 Joʼkan naq li kʼiila tenamit kiwakliik ut kixkʼam li Jesús chiru laj Pilaat. 2 Tojaʼ naq xeʼok xqʼabʼankil. Xeʼxye: «Li winq aʼin yook xpoqoqinkil* li qatenamit, kixye naq moko aajel ta ru xkʼebʼal li tumin li nachʼutubʼamank choʼq re li awabʼej re Roma* ut yook xyeebʼal naq aʼan li Kriist, jun li awabʼej». 3 Chirix chik aʼan laj Pilaat kixpatzʼ re li Jesús: «Ma laaʼat li awabʼej rehebʼ laj judiiy?». Kichaqʼok li Jesús ut kixye re: «Heeheʼ, laaʼat yookat xyeebʼal». 4 Laj Pilaat kixye ajwiʼ rehebʼ li xbʼeenil aj tij ut ebʼ li kʼiila tenamit: «Laaʼin inkʼaʼ nintaw xmaak li winq aʼin». 5 Abʼan aʼanebʼ inkʼaʼ nekeʼxkanabʼ xyeebʼal: «Rikʼin li xkʼutum yook xpoqoqinkil* li tenamit saʼ chixjunil Judea; kixtikibʼ chaq Galilea ut tkʼulunq toj arin». 6 Naq kirabʼi aʼin, laj Pilaat kixpatzʼ ma aj Galilea li winq aʼin. 7 Naq ak kixnaw naq li Jesús chalenaq saʼ li naʼaj bʼarwiʼ naʼawabʼejink laj Herodes,* kixtaqla rikʼin xbʼaan naq aʼan wank chaq ajwiʼ Jerusalén saʼebʼ li kutan aʼan.

8 Naq laj Herodes kiril ru li Jesús, kʼajoʼ naq kisahoʼk saʼ xchʼool. Ak junxil chik naraj rilbʼal ru li Jesús xbʼaan naq naabʼal kirabʼi chirix ut naroybʼeni naq tixbʼaanu junaq li sachbʼachʼoolej. 9 Tojaʼ naq kiʼok xbʼaanunkil re naabʼal li patzʼom, abʼan li Jesús inkʼaʼ kixsume. 10 Abʼanan, ebʼ li xbʼeenil aj tij ut ebʼ laj tzʼiibʼ xeʼwakliik ut xeʼok xqʼabʼankil chi kʼajoʼebʼ xjosqʼil. 11 Tojaʼ naq laj Herodes, rochbʼeenebʼ laj puubʼ li wankebʼ rubʼel xwankil, xikʼ kiril ut kixseʼe naq kixkʼe jun chʼinaʼusil tʼirk chirix li Jesús. Chirix chik aʼan kixtaqla wiʼ chik rikʼin laj Pilaat. 12 Laj Herodes ut laj Pilaat junxil xikʼ nekeʼril chaq ribʼ abʼan saʼ ajwiʼ li kutan aʼan xeʼok xkʼambʼal ribʼ saʼ aamiiwil.

13 Moqon chik, laj Pilaat kixbʼoqebʼ li xbʼeenil aj tij, ebʼ li awabʼej ut li tenamit 14 ut kixye rehebʼ: «Laaʼex xeekʼam chaq we li winq aʼin xbʼaan naq nekeeye naq yook xtakchiʼinkil li tenamit re naq tixqʼet ribʼ chiru li awabʼejilal. Abʼan, kʼehomaq reetal, xinbʼaanu re naabʼal li patzʼom cheeru abʼan inkʼaʼ xintaw chirix kʼaru nekeeqʼabʼa wiʼ. 15 Moko xtaweʼk ta ajwiʼ xmaak xbʼaan laj Herodes joʼkan naq kixqʼaxtesi wiʼ chik qe. Kʼehomaq reetal, li winq aʼin moko wank ta junaq xmaak li xkʼulubʼ wiʼ kamk. 16 Joʼkan naq tinbʼaanu naq tkʼeheʼq chi tzʼuum ut tinkanabʼ chi xik». 17 * 18 Abʼan li kʼiila tenamit kixjap re chi xyeebʼal: «Kamsi li winq aʼin ut kanabʼ chi xik laj Barrabás». 19 (Li winq aʼin kikʼeheʼk saʼ tzʼalam xbʼaan naq kixqʼet ribʼ chiru li awabʼejilal re li tenamit ut kikamsink). 20 Laj Pilaat kixbʼoqebʼ wiʼ chik xbʼaan naq kiraj xkanabʼankil chi xikʼ li Jesús. 21 Tojaʼ naq aʼanebʼ xeʼok xyeebʼal chi kaw xyaabʼ xkuxebʼ: «Tʼuyubʼamaq chiru cheʼ, tʼuyubʼamaq chiru cheʼ». 22 Saʼ rox sut kixye wiʼ chik rehebʼ: «Abʼan, kʼaʼut? Kʼaru xmaakoni li winq aʼin? Laaʼin inkʼaʼ nintaw junaq xmaak li xkʼulubʼ wiʼ kamk. Joʼkan bʼiʼ tinbʼaanu naq tkʼeheʼq chi tzʼuum ut tinkanabʼ chi xik». 23 Saʼ xkʼabʼaʼ aʼin, inkʼaʼ nekeʼxkanabʼ xyeebʼal ut xpatzʼbʼal chi kaw xyaabʼ xkuxebʼ naq ttuyubʼaaq chiru cheʼ, ut li xyaabʼebʼ xkux kinumtaak wiʼ chik. 24 Joʼkan naq laj Pilaat kixye naq tbʼaanumanq li yookebʼ xpatzʼbʼal. 25 Kixkanabʼ chi xik li winq li yookebʼ xpatzʼbʼal aʼ li kikʼemank saʼ tzʼalam saʼ xkʼabʼaʼ naq kixqʼet ribʼ chiru li awabʼejilal ut kikamsink. Abʼan xeʼxqʼaxtesi li Jesús saʼ ruqʼebʼ re naq teʼxbʼaanu rikʼin li nekeʼraj.

26 Naq yookebʼ risinkil li Jesús aran, xeʼxxaqabʼ jun li winq aj Cirene, Simón xkʼabʼaʼ. Li winq aʼin yook chaq chi chalk saʼ kʼalebʼaal ut xeʼxkʼe chixpaqo li cheʼ* li yook xkʼambʼal li Jesús re naq yooq chirix. 27 Ut naabʼalebʼ li qas qiitzʼin yookebʼ chi xik chirix. Saʼ xyanqebʼ aʼin wankebʼ li ixq li yookebʼ xtenbʼal chiruhebʼ li xmaqabʼ xbʼaan xrahilebʼ xchʼool ut japjokebʼ re chi yaabʼak chirix. 28 Ut li Jesús kirilebʼ li ixq ut kixye rehebʼ: «Ex xrabʼin Jerusalén, kanabʼomaq yaabʼak chiwix. Chexyaabʼaq bʼan cheerix ut chirixebʼ leeralal leekʼajol; 29 xbʼaan naq, kʼehomaq reetal, yook chi nachʼok xkutankil naq tyeemanq: “Sahebʼ saʼ xchʼool li ixq li inkʼaʼ nekeʼruuk chi wank xkʼuulaʼal, ebʼ li inkʼaʼ xeʼwank xkʼuulaʼal ut li inkʼaʼ xeʼtuʼresink!”. 30 Tojaʼ naq teʼoq xyeebʼal rehebʼ li tzuul “Tʼanenqex saʼ qabʼeen!” ut xyeebʼal rehebʼ li bʼool “Chooʼeetzʼap!”. 31 Wi nekeebʼaanu aʼin naq rax li cheʼ, kʼaru tkʼulmanq naq tchaqiq?».

32 Yookebʼ ajwiʼ xkʼambʼal wiibʼ li winq aj elqʼ re naq teʼkamsiiq rochbʼeen. 33 Ut naq xeʼwulak saʼ li naʼaj li naxkʼabʼaʼi Xnaʼaj Xjolom li Kamenaq, xeʼxklawxi chiru cheʼ rochbʼeenebʼ laj elqʼ; jun saʼ xnim ut jun saʼ xtzʼe. 34 Abʼan li Jesús kiʼok xyeebʼal: «At Inyuwaʼ, chaakuyebʼ xmaak xbʼaan naq inkʼaʼ nekeʼxnaw li nekeʼxbʼaanu». Joʼkan ajwiʼ, xeʼxbʼuuli rix* li xtʼikr re naq teʼxjekʼi chirixebʼ. 35 Ut li tenamit yook chi ilok aran. Abʼan ebʼ laj jolominel yookebʼ xnitzbʼal chi ruʼuj ut nekeʼxye: «Kixkolebʼ li junchʼol; chixkolaq ribʼ xjunes wi aʼan Xkriist li Yos, li Sikʼbʼil Ru». 36 Ebʼ laj puubʼ yookebʼ ajwiʼ xseʼenkil, xeʼjilok chixkʼatq, ut xeʼxyeechiʼi re li bʼiin li ra re 37 ut xeʼok xyeebʼal re: «Wi laaʼat li awabʼej rehebʼ laj judiiy, kol aawibʼ». 38 Saʼ xbʼeen xjolom wank jun li cheʼ li tzʼiibʼanbʼil ru li naxye: «Aʼin li awabʼej rehebʼ laj judiiy».

39 Tojaʼ naq jun rehebʼ laj elqʼ li wank aran chi tʼuytʼu kiʼok xhobʼal, ut xyeebʼal re: «Laaʼat li Kriist, peʼyaal? Wi joʼkan, kol aawibʼ ut kolo ajwiʼ laaʼo!». 40 Naq li jun chik kirabʼi aʼin , kixqʼus li rechwinqilal: «Ma inkʼaʼ nakaawoxloqʼi li Yos, laaʼat li yookat ajwiʼ xkʼulbʼal li rahilal li yook xkʼulbʼal li winq aʼin? 41 Ut laaʼo qakʼulubʼ li yooko xkʼulbʼal, abʼan li winq aʼin maakʼaʼ xmaakoni». 42 Tojaʼ naq kixye: «Jesús, chinjultikoʼq aawe naq tat-oq saʼ Laaʼawabʼejilal». 43 Ut li Jesús kixye re: «Laaʼin ninye aawe anaqwan: wanqat wikʼin saʼ li Chʼinaʼusil Naʼajej».*

44 Usta kachʼin chik ma tuqtu waʼlebʼ, kiqʼoqyinoʼk saʼ chixjunil li teep ut kikutanoʼk naq kachʼin chik ma oxibʼ hoor re ewu 45 xbʼaan naq kimuqunk li saqʼe. Tojaʼ naq li kortiin* li wank saʼ li santil naʼaj re li rochoch li Yos kiqʼicheʼk saʼ xyi. 46 Ut li Jesús kixjap re chi kaw, ut kixye: «At Inyuwaʼ, saʼ laawuqʼ ninkanabʼ linmusiqʼ!».* Naq kixye aʼin, kikamk. 47 Naq kiril aʼin li winq li nataqlank rehebʼ laj puubʼ,* kiʼok xkʼebʼal xloqʼal li Yos ut kixye: «Chʼolchʼo tzʼaqal naq li winq aʼin tiik xchʼool». 48 Ut naq chixjunil li tenamit li chʼutchʼukebʼ aran xeʼril li kikʼulmank, xeʼok xtenbʼal chiruhebʼ li xmaqabʼ naq xeʼsutqʼiik saʼ rochoch. 49 Chixjunilebʼ li nekeʼxnaw chaq ru xaqxokebʼ chi najt. Aran ajwiʼ yookebʼ chaq chi ilok ebʼ li ixq li xeʼtaqenk re chalen chaq Galilea.

50 Ut kiwank jun li winq chaabʼil ut tiik xchʼool, aj José xkʼabʼaʼ. Laj José aʼan jun rehebʼ li winq li oxloqʼinbʼil saʼ li Nimla Raqlebʼaal Aatin* rehebʼ laj judiiy. 51 (Aʼan inkʼaʼ kitzʼaqonk chirixebʼ chi moko kixkʼulubʼa ta li xeʼxkʼubʼ chirix li Jesús). Li winq aʼin aj Arimatea, jun li tenamit re Judea, ut yook roybʼeninkil li Xʼawabʼejilal li Yos. 52 Laj José xkoho chi aatinak rikʼin laj Pilaat ut kixpatzʼ li xtibʼel li Jesús. 53 Ut kixkubʼsi li xtibʼel li Jesús ut kixbʼat rikʼin chaabʼil tʼikr re liin. Chirix chik aʼan, kixkʼe saʼ jun li muqlebʼaal li hopbʼil saʼ pek bʼarwiʼ maajiʼ kʼebʼil junaq li qas qiitzʼin. 54 Joʼkan bʼiʼ, aʼan xkutankil li kawresink ut ak tiklaak re li kutan sábado.* 55 Ebʼ li ixq li xeʼchalk chirix li Jesús chalen chaq Galilea xkohebʼ ajwiʼ aran. Xeʼchʼuukink chisaʼ li muqlebʼaal kamenaq ut xeʼril chanru kikʼemank li xtibʼel. 56 Chirix chik aʼan xkohebʼ chi xkawresinkil li sununkil bʼan ut li sununkil aseeyt. Abʼan xeʼhilank chiru li sábado* joʼ naxye chaq li chaqʼrabʼ.