Mateo

25 »Joʼkan naq, li Xʼawabʼejilal li choxa chanchan lajeebʼ li ixqaʼal* li xeʼxchap li xkandil* ut xkohebʼ chi xkʼulbʼal li winq li ok re chi sumlaak. 2 Oobʼ rehebʼ li ixqaʼal* aʼin maakʼaʼebʼ xnaʼlebʼ ut oobʼ wankebʼ xnaʼlebʼ. 3 Li maakʼaʼebʼ xnaʼlebʼ xeʼxchap li xkandil* ut inkʼaʼ xeʼxkʼam li aseeyt, 4 abʼan li wankebʼ xnaʼlebʼ xeʼxkʼam li xkandil* joʼ ajwiʼ ebʼ li meet li wank aseeyt chisaʼ. 5 Saʼ xkʼabʼaʼ naq kibʼayk li winq li ok re chi sumlaak, ebʼ li ixqaʼal* xeʼchalk xwara ut warenaq xeʼkanaak. 6 Abʼan naq tuqtu qʼoqyink kiʼabʼimank jun xyaabʼ kuxej li kixye: “Li winq li ok re chi sumlaak ak wank arin! Elenqex chi xkʼulbʼal!”. 7 Tojaʼ naq ebʼ li ixqaʼal* xeʼwakliik ut xeʼxkʼubʼ li xkandil.* 8 Ut ebʼ li ixqaʼal* li maakʼaʼebʼ xnaʼlebʼ xeʼxye rehebʼ li wankebʼ xnaʼlebʼ: “Kʼehomaq bʼayaq qe leeʼaseeyt xbʼaan naq li qakandil* ak chup re”. 9 Li wankebʼ xnaʼlebʼ xeʼchaqʼok: “Maare moko ttzʼaqloq ta choʼq qe ut choʼq eere. Ayuqex bʼan rikʼin laj kʼay ut loqʼomaq eere”. 10 Abʼan naq yookebʼ chaq xloqʼbʼal li aseeyt, kikʼulunk li winq li ok re chi sumlaak. Ebʼ li ixqaʼal* li kawresinbʼilebʼ xeʼok rochbʼeen li winq aʼin re xninqʼehinkil li sumlaak; tojaʼ naq kitzʼapmank li okebʼaal. 11 Naq xeʼsutqʼiik chaq ebʼ li ixqaʼal* li maakʼaʼebʼ xnaʼlebʼ, xeʼxye: “Qaawaʼ, qaawaʼ, te chiqu li okebʼaal!”. 12 Abʼan aʼan kixsumehebʼ: “Relik chi yaal ninye eere, inkʼaʼ ninnaw eeru”.

13 »Joʼkan naq junelik ajʼajaq eeru xbʼaan naq inkʼaʼ nekeenaw xkutankil chi moko li xhoonalil.

14 »Li Xʼawabʼejilal li choxa chanchan ajwiʼ jun li winq li ok re chi xik chi najt, kixtaqla xbʼoqbʼalebʼ li xmoos ut kixxaqabʼebʼ chi rilbʼal li xjunkabʼlal. 15 Re jun li xmoos kixkʼe oobʼ bʼools li tumin,* re li jun chik kixkʼe wiibʼ ut re li jun chik, jun. Kixkʼe re li junjunq aʼ yaal chanru li xseebʼal, tojaʼ naq xkoho chi najt. 16 Li kixkʼul oobʼ bʼools li tumin* saʼ junpaat xkoho chi yakok chiru ut oobʼ chik kixkʼul saʼ xbʼeen aʼin. 17 Joʼkan ajwiʼ li kixkʼul wiibʼ bʼools li tumin* kixkʼul wiibʼ chik saʼ xbʼeen aʼin. 18 Abʼan li kixkʼul jun bʼools li tumin,* xkoho, kixpik jun li jul saʼ chʼochʼ ut aran kixkʼe li xtumin* laj echal re.

19 »Ak junxil xkʼulbʼal aʼin, naq kikʼulunk laj echal moos ut kixtzʼil rix kʼaru xeʼxbʼaanu rikʼin li xtumin. 20 Li kixkʼul oobʼ bʼools li tumin* kixkʼam chaq li xkʼemank re ut oobʼ chik saʼ xbʼeen, ut kixye: “Waʼ, oobʼ bʼools li tumin* xaakʼe we ut oobʼ chik xintaw saʼ xbʼeen”. 21 Laj echal re kixye re: “Qʼaxal us xaabʼaanu, at inmoos, chaabʼil aanaʼlebʼ ut paabʼajelat! Xbʼaan naq xaawil chiʼus wiibʼ oxibʼ li kʼaru we, tatinxaqabʼ chi rilbʼal naabʼal chik. Kim ut tzʼaqonk saʼ li xsahil xchʼool laj echal aawe”. 22 Chirix chik aʼan, kichalk li kixkʼul wiibʼ bʼools li tumin* ut kixye: “Waʼ, wiibʼ bʼools li tumin* xaakʼe we ut wiibʼ chik xintaw saʼ xbʼeen”. 23 Laj echal re kixye re: “Qʼaxal us xaabʼaanu, at inmoos, chaabʼil aanaʼlebʼ ut paabʼajelat! Xbʼaan naq xaawil chiʼus wiibʼ oxibʼ li kʼaru we, tatinxaqabʼ chi rilbʼal naabʼal chik. Kim ut tzʼaqonk saʼ li xsahil xchʼool laj echal aawe”.

24 »Moqon chik, kichalk li kixkʼul jun bʼools li tumin* ut kixye: “Waʼ, laaʼin ninnaw naq kaw nakattaqlank, nakaaxok ru li awimq bʼarwiʼ inkʼaʼ xat-awok. Nakaachʼutubʼ ru li awimq bʼarwiʼ inkʼaʼ xatkʼanjelak. 25 Joʼkan naq xinxuwak ut xinkʼe rubʼel chʼochʼ li bʼools chi tumin* li xaakʼe we. Weʼi tinqʼaxtesi aawe”. 26 Laj echal re kixsume: “At moos, maaʼus aanaʼlebʼ ut kʼajoʼ aaqʼemal! Laaʼat nakaanaw naq ninxok ru li awimq bʼarwiʼ inkʼaʼ xinʼawok ut ninchʼutubʼ ru li awimq bʼarwiʼ inkʼaʼ xinkʼanjelak. 27 Joʼkan naq xaakʼe raj lintumin saʼ li kʼulebʼaal tumin. Chi joʼkan, naq tinsutqʼiiq, xinkʼul xral lintumin”.

28 »Chirix chik aʼan kixye: “Maqʼomaq chiru li bʼools chi tumin* ut kʼehomaq re li wank lajeebʼ bʼools xtumin.* 29 Xbʼaan naq li wank kʼaru re, tkʼemanq xtzʼaqobʼ re ut naabʼalaq chik chiru; abʼan li maakʼaʼ kʼaru re, tmaqʼeʼq chiru usta kachʼin wank rikʼin. 30 Ut li moos li maakʼaʼ naʼok wiʼ, kutumaq chirix kabʼl saʼ qʼoqyink. Aran tyaabʼaq ut tixkʼuxuxi li ruch re”.*

31 »Naq tchalq li Ralal li Winq saʼ li xloqʼal rochbʼeen chixjunilebʼ li ánjel, toj aran tchunlaaq saʼ li xloqʼlaj kʼojaribʼaal. 32 Chixjunilebʼ li tenamit teʼchʼutubʼaaq chiru aʼan, ut aʼan tixkʼe ebʼ li qas qiitzʼin saʼ wiibʼ li chʼuut, joʼ naxbʼaanu laj ilol karneer naq narisihebʼ li karneer saʼ xyanqebʼ li chibʼaat. 33 Tixkʼehebʼ li karneer saʼ li xnim uqʼ, aʼut ebʼ li chibʼaat saʼ li xtzʼe.

34 »Tojaʼ naq li Awabʼej tixye rehebʼ li wankebʼ saʼ li xnim uqʼ: “Kimqex, li osobʼtesinbʼilex xbʼaan Linyuwaʼ, cheerechani li Xʼawabʼejilal li Yos li kawresinbʼil choʼq eere chalen chaq saʼ xtiklajik li ruuchichʼochʼ.* 35 Xbʼaan naq xineekʼe chi waʼak naq xintzʼokaak. Xeekʼe wukʼaʼ naq xchaqik we. Xineekʼul saʼ leerochoch naq yookin xsikʼbʼal bʼar tinkanaaq. 36 Xeekʼe intʼikr naq tʼustʼukin.* Xineeril naq xinyajerk. Xexwulak chi wilbʼal naq xinwank saʼ tzʼalam”. 37 Tojaʼ naq teʼchaqʼoq li tiikebʼ xchʼool: “Qaawaʼ, joqʼe xqil naq xattzʼokaak ut xqakʼe aawa; malaj xchaqik aawe ut xqakʼe aawukʼaʼ? 38 Joqʼe xqil naq yookat xsikʼbʼal bʼar tatkanaaq ut xatqakʼul saʼ qochoch? Joqʼe xatqil chi tʼustʼu ut xqakʼe aatʼikr? 39 Joqʼe xatyajerk malaj xatwank saʼ tzʼalam ut xoowulak aawilbʼal?”. 40 Ut li Awabʼej tixye rehebʼ: “Relik chi yaal ninye eere naq chixjunil li xeebʼaanu rehebʼ li wiitzʼin li kubʼenaqebʼ xwankil, we xeebʼaanu”.

41 »Tojaʼ naq tixye rehebʼ li wankebʼ saʼ li xtzʼe: “Elenqex chiwu, laaʼex li kiraqmank aatin saʼ eebʼeen. Ayuqex saʼ li xaml li inkʼaʼ nachup li kawresinbʼil choʼq re laj Tza* ut ebʼ li xʼánjel. 42 Xbʼaan naq xintzʼokaak abʼan inkʼaʼ xineekʼe chi waʼak. Ut xchaqik we abʼan inkʼaʼ xeekʼe wukʼaʼ. 43 Inkʼaʼ xineekʼul saʼ leerochoch naq yookin xsikʼbʼal bʼar tinkanaaq. Tʼustʼukin chaq abʼan inkʼaʼ xeekʼe intʼikr. Xinyajerk ut xinwank saʼ tzʼalam abʼan inkʼaʼ xineeril”. 44 Tojaʼ naq ebʼ aʼan teʼxye: “Qaawaʼ, joqʼe xqil naq xattzʼokaak malaj xchaqik aawe, malaj yookat xsikʼbʼal bʼar tatkanaaq, malaj tʼustʼukat malaj yajat malaj wankat saʼ tzʼalam ut inkʼaʼ xatqil?”. 45 Tojaʼ naq tixye rehebʼ: “Relik chi yaal ninye eere naq li inkʼaʼ xeebʼaanu rehebʼ li wiitzʼin li kubʼenaqebʼ xwankil, moko xeebʼaanu ta ajwiʼ we laaʼin”. 46 Ebʼ aʼin teʼkamq chi junajwa,* abʼan li xeʼxbʼaanu li us teʼxtaw li yuʼam chi junelik».