Mateo

24 Naq li Jesús yook chi elk saʼ rochoch li Yos, ebʼ li xtzolom xeʼjilok rikʼin ut xeʼxye re, naq tril chanru yiibʼanbʼil li rochoch li Yos. 2 Tojaʼ naq li Jesús kixye rehebʼ: «Ma nekeeril chixjunil aʼin? Relik chi yaal ninye eere naq maajoqʼe tkanaaq arin pek saʼ xbʼeen pek. Chixjunil tjukʼmanq».

3 Naq li Jesús chunchu chaq saʼ li tzuul Olivo, ebʼ li xtzolom xeʼnachʼok rikʼin naq wank xjunes ut xeʼxpatzʼ re: «Ye qe joqʼe tkʼulmanq aʼin ut kʼaru li eetalil tkʼutbʼesinq re, naq ak wanqat arin* ut ebʼ li kutan li tixkʼutbʼesi naq nachʼ wank xraqik li ruuchichʼochʼ?».*

4 Li Jesús kixye rehebʼ: «Weent teebʼaanu. Maaʼani chibʼalaqʼinq eere 5 xbʼaan naq naabʼalebʼ teʼkʼulunq ut teʼroksi linkʼabʼaʼ ut yooqebʼ xyeebʼal “Laaʼin li Kriist”, ut teʼxbʼalaqʼi naabʼal li qas qiitzʼin. 6 Laaʼex teerabʼi resil naq saʼ jalan jalanq chi tenamit yooq li yalok u. Weent teebʼaanu, mexxuwak xbʼaan naq chixjunil aʼin tento tkʼulmanq, abʼan toj maajiʼaq li xraqik.

7 »Xbʼaan naq teʼyaloq tenamit rikʼin jalan chik tenamit ut awabʼejilal rikʼin jalan chik awabʼejilal, ut twanq weʼej ut ninqi hiik saʼ naabʼal chi naʼajej. 8 Chixjunil aʼin aʼanaq xtiklajik li xnimal ru rahilal.*

9 »Tojaʼ naq texrahobʼtesiiq ut texkamsiiq, ut xbʼaan linkʼabʼaʼ xikʼ texʼileʼq xbʼaanebʼ li tenamit. 10 Ut naabʼalebʼ ajwiʼ teʼxkanabʼ xpaabʼankil li Yos,* teʼxqʼaxtesi ribʼ chiribʼilebʼ ribʼ saʼ ruqʼebʼ li xikʼ nekeʼilok rehebʼ ut xikʼ teʼril ribʼ chiribʼilebʼ ribʼ. 11 Teʼwakliiq chaq naabʼal li bʼalaqʼil propeet li teʼxbʼalaqʼi naabʼal li qas qiitzʼin 12 ut naq tkʼihanq li maaʼusilal,* li xkʼihalil li qas qiitzʼin tixkanabʼ rahok. 13 Abʼan li tixkuy toj naq twulaq li xraqik, aʼan tkoleʼq. 14 Ut tyeemanq resil li chaabʼil esil chirix li Xʼawabʼejilal li Yos saʼ chixjunil li ruuchichʼochʼ re naq chi joʼkan ebʼ li qas qiitzʼin teʼruuq rabʼinkil, tojaʼ naq tchalq li xraqik.

15 »Joʼkan bʼiʼ, naq teeril saʼ li santil naʼaj li tzʼaj aj naʼlebʼ li kʼajoʼ xchuhal ut nasachok re chixjunil, chirix li kiʼaatinak wiʼ laj Daniel li propeet, (li naʼilok ru hu chixtawaq ru li kiyeemank chaq),* 16 li wanqebʼ Judea tento teʼelq aran ut teʼxik saʼebʼ li tzuul. 17 Li wanq saʼ xbʼeen li kabʼl* mikubʼeek chaq saʼ rochoch chi risinkil li kʼaru re, 18 ut li wanq saʼ li awimq misutqʼiik chaq chi xsikʼbʼal li xtʼikr li naxlan wiʼ ribʼ. 19 Ra tchalq saʼ xbʼeenebʼ li yaj aj ixq malaj li yooqebʼ chi tuʼresink chiruhebʼ li kutan aʼan! 20 Meekanabʼ tijok re naq inkʼaʼ texʼeleliq saʼ xqʼehil li habʼalqʼe malaj chiru li kutan sábado.* 21 Saʼebʼ li kutan aʼan twanq jun li nimla rahilal.* Chalen chaq saʼ xtiklajik li ruuchichʼochʼ toj saʼebʼ li kutan aʼin, maajunwa kiwank chaq jun nimla rahilal joʼ aʼin chi moko twanq moqon. 22 Joʼkan naq, wi inkʼaʼ raj tkʼosmanq ebʼ li kutan aʼan, maaʼani raj tkoleʼq; abʼan, saʼ xkʼabʼaʼ li sikʼbʼilebʼ ru, ebʼ li kutan aʼan tkʼosmanq.

23 »Ut wi junaq li qas qiitzʼin tixye eere “Ilomaq, arin wank li Kriist!” malaj “Wank leʼ!”, meepaabʼ. 24 Xbʼaan naq teʼwakliiq chaq ebʼ li bʼalaqʼil kriist ut ebʼ li bʼalaqʼil propeet ut teʼxbʼaanu ebʼ li sachbʼachʼoolej li kʼajoʼ xninqal ut ebʼ li xninqal ru naʼlebʼ. Ut teʼxbʼaanu aʼin re naq teʼruuq xbʼalaqʼinkil li sikʼbʼilebʼ ru. 25 Kʼehomaq reetal, ninye eere aʼin naq toj maajiʼ nakʼulmank. 26 Joʼkan naq, wi teʼxye eere “Ilomaq, wank saʼ li chaqichʼochʼ!”, mexxik aran; malaj wi teʼxye eere “Ilomaq, wank saʼ ochoch!”, meepaabʼ. 27 Xbʼaan naq, joʼ chanru naq li xrepom kaaq nachalk bʼarwiʼ naʼelk li saqʼe ut nalemtzʼunoʼk bʼarwiʼ naʼok li saqʼe, joʼkanaq ajwiʼ naq ak wanq arin* li Ralal li Winq. 28 Bʼarwiʼ wanq li kamenaq, aran teʼchʼutlaaq ebʼ li tʼiw.

29 »Chiruhebʼ li kutan aʼan, naq ak xnumeʼk li rahilal, saʼ junpaat tqʼoqyinoʼq li saqʼe, inkʼaʼ tsaqenoʼq li po, teʼoq chi tʼaneʼk ebʼ li chahim li wank saʼ choxa ut tchiqʼchiqʼiiq ebʼ li wankilal li wank saʼ choxa. 30 Tojaʼ naq saʼ choxa tkʼutunq reetalil li Ralal li Winq ut chixjunilebʼ li tenamit re li ruuchichʼochʼ teʼxten chiru li xmaqabʼ xbʼaan xrahilebʼ xchʼool ut teʼril chi chalk li Ralal li Winq saʼ xbʼeen li choql saʼ choxa rikʼin xwankilal ut xnimal xloqʼal. 31 Ut aʼan tixtaqlahebʼ li xʼánjel rikʼin xkawil yaabʼ trompeet re xchʼutubʼankil li sikʼbʼilebʼ ru saʼ xkaaxukuutil li ruuchichʼochʼ, chalen saʼ xmaril li choxa toj saʼ junpakʼal chik.

32 »Cheetawaq eenaʼlebʼ rikʼin li eetalil* chirix xtoonal li iig. Naq al ruqʼ li cheʼ ut naʼok chi elk li xxaq, chʼolchʼo cheeru naq xnachʼok chaq li saqʼehil. 33 Joʼkan ajwiʼ laaʼex, naq teeril chixjunil aʼin, cheenawaq naq li Ralal li Winq ak xnachʼok chaq, xaqxo chire kabʼl. 34 Relik chi yaal ninye eere naq li tenamit li wank chiruhebʼ li kutan aʼin, inkʼaʼ tkamq wi toj maajiʼ nakʼulmank chixjunil aʼin. 35 Li choxa ut li ruuchichʼochʼ teʼosoʼq, abʼan li waatin maajunwa tsachq.

36 »Aʼut chirix li xkutankil ut li xhoonalil, maaʼani nanawok re chi moko ebʼ li ánjel saʼ choxa chi moko li Alalbʼej; kaʼajwiʼ li Yuwaʼbʼej. 37 Joʼ chanru kikʼulmank saʼ xkutankil laj Noé, joʼkanaq ajwiʼ naq ak wanq arin* li Ralal li Winq. 38 Xbʼaan naq saʼebʼ li kutan aʼan naq toj maajiʼ nachalk li Bʼutʼihaʼ, ebʼ li qas qiitzʼin yookebʼ chaq chi waʼak ut chi ukʼak, ebʼ li winq yookebʼ chaq chi sumlaak ut ebʼ li ixq qʼaxtesinbʼilebʼ re sumlaak... toj reetal kiwulak xkutankil naq laj Noé kiʼok saʼ li jukubʼ kabʼl; 39 ut inkʼaʼ xeʼabʼink toj naq kichalk li Bʼutʼihaʼ ut kixsach chixjunilebʼ. Joʼkanaq ajwiʼ naq ak wanq arin* li Ralal li Winq. 40 Tojaʼ naq wiibʼ li winq wanqebʼ saʼ li awimq: jun tkʼameʼq ut li jun chik tkanabʼaaq. 41 Wiibʼ li ixq yooqebʼ chi keʼek: jun tkʼameʼq ut li jun chik tkanabʼaaq. 42 Joʼkan naq junelik ajʼooq eeru xbʼaan naq inkʼaʼ nekeenaw kʼaru kutankil tkʼulunq Leeqaawaʼ.

43 »Chiwanq saʼ leechʼool jun li naʼlebʼ: wi laj echal ochoch tixnaw joqʼe hoonal re li qʼoqyink tchalq laj elqʼ, tyoʼleq raj ut inkʼaʼ tixkanabʼ naq laj elqʼ tixchʼik ribʼ saʼ rochoch. 44 Joʼkan ajwiʼ laaʼex, cheekawresi eeribʼ xbʼaan naq li Ralal li Winq tchalq saʼ jun li hoonal li inkʼaʼ nekeeroybʼeni.

45 »Ani tzʼaqal li moos li paabʼajel ut wank xnaʼlebʼ* li kixaqabʼaak xbʼaan laj echal re saʼ xbʼeenebʼ li moos li wankebʼ saʼ ochoch re xkʼebʼalebʼ xtzekemq saʼ xqʼehil? 46 Sa saʼ xchʼool li moos aʼin wi naq tkʼulunq laj echal re ttaweʼq xbʼaanunkil aʼin. 47 Relik chi yaal ninye eere naq tixxaqabʼ chi xjolominkil chixjunil li xjunkabʼlal.

48 »Abʼan, wi li moos aʼin tmaaʼusoʼq xnaʼlebʼ ut saʼ jun kutan tixye saʼ xchʼool: “Yook chi bʼayk laj echal we” 49 ut naʼok xsakʼbʼalebʼ li rechmoosil ut naʼok chi waʼak ut chi ukʼak rochbʼeenebʼ li kʼaynaqebʼ chi kalaak, 50 laj echal re li moos aʼin tkʼulunq saʼ jun kutan li inkʼaʼ naxyoʼoni ut saʼ li hoonal li maakʼaʼ saʼ xchʼool, 51 ut qʼaxal tixrahobʼtesi ut tixkʼe saʼ xyanqebʼ laj kaʼpakʼal u. Aran tyaabʼaq ut tixkʼuxuxi li ruch re.*