Marcos

13 Naq li Jesús yook chaq chi elk saʼ li rochoch li Yos, jun rehebʼ li xtzolom kixye re: «At Kʼutunel, kʼe reetal, kʼajoʼ xnimal ru ebʼ li pek ut li rochoch li Yos!». 2 Abʼanan li Jesús kixye re: «Joʼkan, yookat rilbʼal xnimal ru li rochoch li Yos. Maajoqʼe tkanaaq arin pek saʼ xbʼeen pek. Chixjunil tjukʼmanq».

3 Naq chunchu chaq li Jesús saʼ li tzuul Olivo saʼ xkaʼyabʼaal li rochoch li Yos, laj Pedro, laj Santiago, laj Juan ut laj Andrés xeʼxpatzʼ re, naq wank xjunes: 4 «Ye qe joqʼe tkʼulmanq aʼin ut kʼaru li eetalil tkʼutbʼesinq re, naq chixjunil aʼin twulaq xraqik?». 5 Joʼkan naq li Jesús kiʼok xyeebʼal rehebʼ: «Weent teebʼaanu. Maaʼani chibʼalaqʼinq eere. 6 Naabʼalebʼ teʼkʼulunq ut teʼroksi linkʼabʼaʼ ut yooqebʼ xyeebʼal: “Laaʼin li Kriist”, ut teʼxbʼalaqʼi naabʼal li qas qiitzʼin. 7 Joʼkan ajwiʼ, naq teerabʼi resil naq saʼ jalan jalanq chi tenamit yooq li yalok u, mexxuwak xbʼaan naq chixjunil aʼin tento tkʼulmanq, abʼan toj maajiʼaq li xraqik.

8 »Xbʼaan naq teʼyaloq tenamit rikʼin jalan chik tenamit ut awabʼejilal rikʼin jalan chik awabʼejilal, ut twanq ninqi hiik saʼ naabʼal chi naʼajej; twanq ajwiʼ weʼej. Chixjunil aʼin aʼanaq xtiklajik li xnimal ru rahilal.*

9 »Ut laaʼex, weent teebʼaanu. Texqʼaxtesiiq saʼ ruqʼebʼ laj raqol aatin ut texteniiq saʼebʼ li naʼaj re loqʼonink, ut saʼ inkʼabʼaʼ texmineʼq chi xik rikʼinebʼ li ruuchil awabʼej ut ebʼ li awabʼej re naq teʼxnaw chiwix. 10 Joʼkan ajwiʼ, xbʼeenwa tento tkʼemanq resil li chaabʼil esil saʼ chixjunil li ruuchichʼochʼ. 11 Aʼut, naq texkʼameʼq chiruhebʼ li wankebʼ xwankil, miʼok eekʼaʼuxl chi xkʼoxlankil chi rubʼelaj li teeye; yeehomaq li tyeemanq eere saʼ li hoonal aʼan xbʼaan naq moko laaʼex ta texʼaatinaq, li t-aatinaq aʼan li santil musiqʼej. 12 Joʼkan ajwiʼ, ebʼ li qas qiitzʼin teʼxqʼaxtesi ebʼ li ras ut ebʼ li riitzʼin re naq teʼkamsiiq ut li yuwaʼbʼej tixqʼaxtesi li ralal, ut ebʼ li alal kʼajolbʼej teʼxqʼet ribʼ chiru li xnaʼ xyuwaʼ ut teʼxbʼaanu naq teʼkamsiiq. 13 Ut xbʼaan linkʼabʼa xikʼ texʼileʼq xbʼaanebʼ li qas qiitzʼin. Abʼan li tixkuy toj naq twulaq li xraqik, aʼan tkoleʼq.

14 »Joʼkan bʼiʼ, naq teeril saʼ li naʼaj bʼarwiʼ inkʼaʼ naru nawank li tzʼaj aj naʼlebʼ li kʼajoʼ xchuhal ut nasachok re chixjunil, li wanqebʼ Judea tento teʼelq aran ut teʼxik saʼebʼ li tzuul (li naʼilok ru hu chixtawaq ru li kiyeemank chaq).* 15 Li wank saʼ xbʼeen li kabʼl* mikubʼeek chaq, chi moko trisi li kʼaru re saʼ rochoch, 16 ut li wank saʼ li awimq misuqʼiik chaq saʼ rochoch chi xsikʼbʼal li kʼaru re joʼ li tʼikr li naxlan wiʼ ribʼ. 17 Ra tchalq saʼ xbʼeenebʼ li yaj aj ixq malaj li yooqebʼ chi tuʼresink chiruhebʼ li kutan aʼan! 18 Meekanabʼ tijok re naq inkʼaʼ tkʼulmanq saʼ habʼalqʼe. 19 Saʼebʼ li kutan aʼan aʼanaq xkutankil ebʼ li rahilal. Chalen chaq naq li Yos kixyobʼtesi chixjunil toj saʼebʼ li kutan aʼin, maajunwa kiwank chaq jun li rahilal joʼ aʼin chi moko twanq moqon. 20 Joʼkan ajwiʼ, wi li Jehobʼa* inkʼaʼ raj tixkʼos ebʼ li kutan aʼan, maaʼani raj tkoleʼq; abʼan, saʼ xkʼabʼaʼ li sikʼbʼilebʼ ru xbʼaan, ebʼ li kutan aʼan tkʼosmanq.

21 »Joʼkan ajwiʼ, wi junaq li qas qiitzʼin tixye eere: “Ilomaq, arin wank li Kriist!” malaj “Ilomaq, wank leʼ li Kriist!”, meepaabʼ. 22 Xbʼaan naq teʼwakliiq chaq ebʼ li bʼalaqʼil kriist ut ebʼ li bʼalaqʼil propeet ut teʼxbʼaanu ebʼ li sachbʼachʼoolej ut ebʼ li xninqal ru naʼlebʼ. Ut teʼxbʼaanu aʼin re naq teʼruuq xbʼalaqʼinkil li sikʼbʼilebʼ ru. 23 Joʼkan naq weent teebʼaanu. Xinye eere chixjunil aʼin naq toj maajiʼ nakʼulmank.

24 »Abʼan chiruhebʼ li kutan aʼan, naq ak xnumeʼk li rahilal, li saqʼe tqʼoqyinoʼq, li po inkʼaʼ tsaqenoʼq, 25 ebʼ li chahim li wank saʼ choxa yooqebʼ chi tʼaneʼk ut ebʼ li wankilal li wank saʼ choxa tchiqʼchiqʼiiq. 26 Tojaʼ naq teʼril chi chalk li Ralal li Winq saʼ xbʼeen li choql rikʼin xnimal xwankilal ut xloqʼal. 27 Ut aʼan tixtaqlahebʼ li ánjel ut tixchʼutubʼebʼ li sikʼbʼilebʼ ru saʼ xkaaxukuutil li ruuchichʼochʼ, chalen saʼ xmaril li ruuchichʼochʼ toj saʼ xmaril li choxa.

28 »Cheetawaq eenaʼlebʼ rikʼin li eetalil* chirix xtoonal li iig. Naq al ruqʼ li cheʼ ut naʼok chi elk li xxaq, chʼolchʼo cheeru naq xnachʼok chaq li saqʼehil. 29 Joʼkan ajwiʼ laaʼex, naq teeril naq yook chi kʼulmank aʼin, cheenawaq naq li Ralal li Winq ak xnachʼok chaq, xaqxo chire kabʼl. 30 Relik chi yaal ninye eere naq li tenamit li wank chiruhebʼ li kutan aʼin, inkʼaʼ tkamq wi toj maajiʼ nakʼulmank chixjunil aʼin. 31 Li choxa ut li ruuchichʼochʼ teʼosoʼq, abʼan li waatin maajunwa tsachq.

32 »Aʼut chirix li xkutankil malaj li xhoonalil, maaʼani nanawok re chi moko ebʼ li ánjel saʼ choxa chi moko li Alalbʼej; kaʼajwiʼ li Yuwaʼbʼej. 33 Yoʼon wanqex, ajʼooq eeru xbʼaan naq inkʼaʼ nekeenaw joqʼe twulaq li hoonal li xaqabʼanbʼil. 34 Aʼin chanchan li winq li xkoho chi najt ut kixkanabʼ li rochoch, kixxaqabʼebʼ li xmoos chi rilbʼal ut kixkʼe xkʼanjel li junjunq ut kixye re laj ilol okebʼaal naq junelik ajʼooq ru. 35 Joʼkan naq junelik ajʼooq eeru xbʼaan naq inkʼaʼ nekeenaw joqʼe tkʼulunq laj echal kabʼl, ma ewu, ma tuqtuuq qʼoqyink, naq naʼok chi yaabʼak li tzoʼ kaxlan malaj naq yooq chi hikʼeʼk ru li kutan. 36 Naq tkʼulunq maare anchal textaweʼq chi wark. 37 Li ninye eere ninye ajwiʼ re chixjunilebʼ: junelik ajʼooq eeru».