Tzolom 7
Chanru Tootijoq?
Kʼaʼut us naq junelik tootijoq? (1)
Chiru ani tootijoq ut chanru? (2, 3)
Chirix kʼaru tootzʼaamanq? (4)
Joʼqʼe us naq tattijoq? (5, 6)
Ma narabʼi li Yos chixjunilebʼ li tij? (7)
1. Li tijok aʼan aatinak saʼ qʼunil chʼoolej rikʼin li Yos. Wi junelik tootijoq, tqil li Yos joʼ tzʼaqal qamiiw. Li Jehobʼa, usta nim ut wank xwankil, narabʼi naq nokootijok. Ut laaʼat, ma junelik nakattijok? (Salmo 65:3 [65:2 Wy]; 1 Tesalonicenses 5:17.)
2. Naq nokootijok yooko chi loqʼonink. Joʼkan naq kaʼajwiʼ chiru li Jehobʼa tento naq tootijoq. Naq li Jesus kiwank saʼ Ruuchichʼochʼ kaʼajwiʼ chiru li xyuwaʼ kitijok, joʼkan ajwiʼ tento tqabʼaanu laaʼo (Mateo 4:10; 6:9). Abʼan, naq tootijoq tento naq tqabʼaanu saʼ xkʼabʼaʼ li Jesus. Chi joʼkan naqakʼutbʼesi naq naqoxloqʼi li xkʼanjel li Jesus ut naq naqapaabʼ naq tookoleʼq saʼ xkʼabʼaʼ, xbʼaan naq kixmayeja ribʼ (Juan 14:6; 1 Juan 2:1, 2).
3. Naq tootijoq tento naq tqaye re li Yos li nachalk saʼ qachʼool. Inkʼaʼ yal tqatzol malaj tqil chiru junaq li hu li kʼaru tqaye re (Mateo 6:7, 8). Naru tootijoq yalaq joʼqʼe, yalaq bʼar ut yalaq chanru, abʼan tento naq tqabʼaanu saʼ xyaalal ut chiʼus. Usta tootijoq saʼ qachʼool li Yos nokoorabʼi (1 Samuel 1:12, 13). Re naq sa tattijoq us naq wanqat aajunes bʼarwiʼ maaʼani t-eekʼanq (Marcos 1:35).
4. Chirix kʼaru tootzʼaamanq? Chirix chixjunil li naru natenqʼank qe re naq inkʼaʼ tqakanabʼ li Yos, ut re naq toowanq choʼq ramiiw (Filipenses 4:6, 7). Li Jesus kixkʼut naq tento tootzʼaamanq chirix li xkʼabʼaʼ ut li Rajom li Jehobʼa. Joʼkan ajwiʼ naru tqapatzʼ naq tixkʼe qatzakahemq, tixkuy qamaak ut naq tooxkol chiru li aaleek (Mateo 6:9-13). Tento naq tqatzʼaama li naraj li Yos ut li nawulak chiru ut moko kaʼaj tawiʼ qe tqapatzʼ (1 Juan 5:14).
5. Laaʼat naru nakattijok chiru li Yos naq taawaj xbʼanyoxinkil re chixjunil li naxkʼe aawe malaj naq taawaj xloqʼoninkil ru (1 Crónicas 29:10-13). Maakanabʼ tijok naq wanqat saʼ chʼaʼajkilal ut naq laapaabʼal yooq chi yaleʼk rix (Salmo 55:23 [55:22 Wy]; 120:1). Joʼkan ajwiʼ naq ok qe chi waʼak us naq tootijoq (Mateo 14:19). «Junelik chextijoq» naxye qe li Jehobʼa (Efesios 6:18).
6. Naq toomaakobʼq tento naq tqatzʼaama re li Jehobʼa naq tixkuy qamaak ut tooruxtaana. Li Yos tixkuy qamaak wiʼ laaʼo tqaye re naq xoomaakobʼk ut inkʼaʼ chik tqabʼaanu (Salmo 86:5; Proverbios 28:13 Wy).
7. Li Jehobʼa kaʼajwiʼ narabʼi li tiikebʼ xchʼool. Re naq li Yos tatrabʼi, tento naq taabʼaanu li naxye li Raatin (Proverbios 15:29; 28:9). Naq tattijoq tento naq qʼunaq laachʼool chiru li Yos (Lucas 18:9-14). Tento ajwiʼ naq tatkʼanjelaq chirix li yookat chi xtzʼaamankil re. Chi joʼkan taakʼutbʼesi naq nakattijok chi anchal aachʼool ut naq nakaapaabʼ naq li Yos tatxtenqʼa. Kaʼajwiʼ chi joʼkan li Jehobʼa tixsume li nakaapatzʼ re (Hebreos 11:6).