Kʼaru nekeʼxkʼoxla ebʼ laj paabʼanel chirix li haʼ li nakaltesink?

Saʼ chixjunil li Ruuchichʼochʼ jalan jalanq li naʼlebʼ nekeʼxye chirix li haʼ li nakaltesink. Wankebʼ nekeʼukʼak joqʼeqil rochbʼenebʼ li ramiiw ut junchʼol chik inkʼaʼ nekeʼxchʼeʼ bʼayaq. Wankebʼ chik nekeʼukʼak toj reetal nekeʼkalaak. Kʼaru naxye li Santil Hu chirix li haʼ li nakaltesink?

1. Ma maak naq tinʼukʼaq?

Li Santil Hu moko naxye ta naq maak rukʼbʼal li haʼ li nakaltesink. Naxye bʼan naq «li bʼiin li nasahoʼk wiʼ xchʼool» li winq, aʼan jun maatan li naxkʼe li Yos (Salmo 104:14, 15). Li Santil Hu naʼaatinak chirixebʼ li winq ut ixq li xeʼkʼanjelak chiru li Jehobʼa li xeʼrukʼ li haʼ li nakaltesink (1 Timoteo 5:23).

2. Kʼaru li naʼlebʼ naxkʼe li Santil Hu choʼq rehebʼ li nekeʼraj ukʼak?

Li Jehobʼa inkʼaʼ naxkʼulubʼa li kalaak ut li numʼukʼak (Gálatas 5:21). Li Santil Hu naxye: «Maajunaji aawibʼ rikʼinebʼ li nekeʼkalaak» (Proverbios 23:20). Joʼkan bʼiʼ, wi naqaj ukʼak qajunes malaj rochbʼenebʼ li qamiiw maajunwa raj tookalaaq malaj tooʼukʼaq toj reetal inkʼaʼ chik tqanaw kʼaru tqaye malaj tqabʼaanu ut tqakʼe saʼ xiwxiwal li qayuʼam. Wi inkʼaʼ tooruuq xbʼisbʼal joʼkʼihal tqukʼ, us raj naq inkʼaʼ tqayal chi junajwa.

3. Chanru naqakʼutbʼesi naq oxloqʼ chiqu li nekeʼxkʼoxla xbʼaanunkil li junchʼol?

Yaal re li junjunq ma t-ukʼaq malaj inkʼaʼ. Inkʼaʼ raj tooraqoq aatin saʼ xbʼeen li naraj ukʼak bʼayaq ut moko tqapuʼersi ta li inkʼaʼ naraj ukʼak (Romanos 14:10). Inkʼaʼ nokooʼukʼak wi naqanaw naq aʼin tixtochʼ xchʼool li junchʼol (yaabʼasi Romanos 14:21). Joʼ aj paabʼanel naqayuʼami li naxye li Santil Hu: «Maaʼani chixsikʼ li kʼaru us choʼq re xjunes, aʼaq bʼan li us choʼq re li ras riitzʼin chixsikʼ» (yaabʼasi 1 Corintios 10:23, 24).

QASIKʼAQ XCHAMAL LI NAʼLEBʼ

4. Laaʼat yaal aawe ma tat-ukʼaq malaj inkʼaʼ

Kʼaru naxkʼoxla chaq li Jesús chirix li haʼ li nakaltesink? Re xtawbʼal li xsumenkil qatzʼilaq rix li xbʼeen sachbʼachʼoolej li kixbʼaanu. Cheeyaabʼasi Juan 2:1-11 ut chexʼaatinaq chirix ebʼ li patzʼom aʼin:

• Kʼaru naxkʼoxla chaq li Jesús chirix li haʼ li nakaltesink ut chirixebʼ li nekeʼukʼak?

• Xbʼaan naq li Jesús moko kixye ta naq maak xyalbʼal bʼayaq li haʼ li nakaltesink, kʼaru raj tixkʼoxla laj paabʼanel chirixebʼ li nekeʼukʼak bʼayaq?

Abʼanan, xyeebʼal naq jun laj paabʼanel naru rukʼbʼal li haʼ li nakaltesink moko naraj ta xyeebʼal naq junelik us xbʼaanunkil. Cheeyaabʼasi Proverbios 22:3 ut cheetzʼilaq rix ma us naq texʼukʼaq saʼ li hoonal aʼin:

• Naq taabʼeresi junaq li kaar malaj jalan chik li kʼanjelobʼaal.

• Naq wankat saʼ yuʼam.

• Naq laj bʼanonel xye aawe naq inkʼaʼ taawukʼ li haʼ li nakaltesink.

• Naq nachʼaʼajkoʼk chaawu xbʼisbʼal joʼkʼihal taawukʼ.

• Naq saʼ laateep li chaqʼrabʼ inkʼaʼ naxkʼulubʼa naq tat-ukʼaq.

• Naq wankat rikʼin junaq li kristiʼaan li inkʼaʼ chik naraj ukʼak xbʼaan naq aj kalajenaq chaq junxil.

Wi taabʼaanu junaq li ninqʼe, ma taakʼe li haʼ li nakaltesink? Re xnawbʼal kʼaru taabʼaanu, cheerilaq li BʼIDEO.

BʼIDEO: Ma tinkʼe li haʼ li nakaltesink? (2:41)

Cheeyaabʼasi Romanos 13:13 ut 1 Corintios 10:31, 32. Naq ak xeeyaabʼasi ebʼ li raqal chexʼaatinaq chirix li patzʼom aʼin:

• Chanru tatxtenqʼa li naʼlebʼ aʼin re xsahobʼresinkil xchʼool li Jehobʼa?

5. Kʼoxla joʼkʼihal taawukʼ

Wi nakat-ukʼak jultikaq aawe naq li Jehobʼa moko naxye ta naq maak naq taawukʼ li haʼ li nakaltesink, abʼan moko naxkʼulubʼa naq taaqʼax ru li taabʼaanu. Kʼaʼut? Cheeyaabʼasi Oseas 4:11, 18 ut chexʼaatinaq chirix li patzʼom aʼin:

• Kʼaru truuq xkʼulbʼal li kristiʼaan li nakalaak?

Kʼaru tooxtenqʼa re naq inkʼaʼ tqaqʼax ru li tqabʼaanu? Tento naq chʼolchʼooq chiqu joʼkʼihal naru naqukʼ. Cheeyaabʼasi Proverbios 11:2 ut chexʼaatinaq chirix li patzʼom aʼin:

• Kʼaʼut us naq chʼolchʼooq chaawu joʼkʼihal li haʼ li nakaltesink taawukʼ?

6. Kol aawibʼ chiru li haʼ li nakaltesink

BʼIDEO: «Kʼajoʼ chaq xyibʼal ru linyuʼam» (6:32)

• Chanru nanaʼlebʼak laj Dimitri naq nakalaak?

• Ma saʼ junpaat kiruuk xkanabʼankil li kalaak?

• Chanru kiruuk xkanabʼankil chi junajwa?

Cheeyaabʼasi 1 Corintios 6:10, 11 ut chexʼaatinaq chirix ebʼ li patzʼom aʼin:

• Ma nimla maak tawiʼ li kalaak? Kʼaʼut?

• Kʼaʼut naqanaw naq naru naxjal xnaʼlebʼ li nawulak chiru kalaak?

Cheeyaabʼasi Mateo 5:30 ut chexʼaatinaq chirix li patzʼom aʼin:

• Naq li Jesús kixye saʼ li eetalil naq taayokʼ laawuqʼ kiraj xyeebʼal naq tento taayal aaqʼe chi xkanabʼankil junaq li yibʼ aj naʼlebʼ re naq sahaq saʼ xchʼool li Jehobʼa aawikʼin. Kʼaru tatruuq xbʼaanunkil wi yookat xyalbʼal aaqʼe re naq inkʼaʼ chik tat-ukʼaq?a

Cheeyaabʼasi 1 Corintios 15:33, Wy, ut chexʼaatinaq chirix li patzʼom aʼin:

• Kʼaru taakʼul wi nakaawochbʼenihebʼ li nekeʼwulak chiru kalaak?

LI AK XQATZOL

Li haʼ li nakaltesink aʼan jun maatan li nachalk rikʼin li Jehobʼa, abʼan aʼan inkʼaʼ naxkʼulubʼa li numʼukʼak ut li kalaak.

Qajultikaq

• Kʼaru naxye li Santil Hu chirix li haʼ li nakaltesink?

• Kʼaru rahilal naru taakʼul wi nakatkalaak?

• Chanru naqakʼutbʼesi naq oxloqʼ chiqu li nekeʼxkʼoxla li junchʼol chirix li ukʼak?

SIKʼ XKOMON LI NAʼLEBʼ

Kʼaru chʼolchʼooq chiruhebʼ li saaj wi nekeʼraj ukʼak?

Kʼoxla li taakʼul wi tat-ukʼaq (2:31)

Tzol kʼaru tatruuq xbʼaanunkil wi nachʼaʼajkoʼk chaawu xkanabʼankil ukʼak.

«Li tatxtenqʼa re naq taakanabʼ ukʼak» (Laj Kʼaakʼalehom, 1 re enero 2010)

Saʼ xkʼabʼaʼ naq li Santil Hu inkʼaʼ naʼaatinak chirix xtaqsinkil ut xsumsakʼinkil chiribʼil li bʼaas, ma us naq ebʼ laj paabʼanel teʼxbʼaanu aʼin?

«Xpatzʼom ebʼ laj ilol hu» (Laj Kʼaakʼalehom, 15 re febrero 2007)

Il chanru kixkanabʼ ukʼak jun li winq saʼ li resil xyuʼam «Junes kalaak ninbʼaanu».

«Li Santil Hu kixjalebʼ xyuʼam» (Laj Kʼaakʼalehom, 1 re mayo 2012)