Sikʼomaq anaqwan chiru ani teeraj kʼanjelak

1. Kʼaru tento tqabʼaanu re naq sahaq saʼ qachʼool ut kʼaʼut? (Isaías 48:​17, 18).

LI QAYUWAʼ li wank saʼ choxa naraj naq tqayal xsahil li qayuʼam anaqwan ut saʼebʼ li kutan chalkebʼ re (Ecl. 3:​12, 13). Xooxyobʼtesi re naq tooruuq xbʼaanunkil naabʼal li naʼlebʼ. Abʼan moko xooxyobʼtesi ta re naq laaʼo tqabʼeresi li qayuʼam chi moko re naq tqaye bʼar wank li us ut li inkʼaʼ us (Ecl. 8:9; Jer. 10:23). Aʼan naxnaw naq re naq sahaq saʼ qachʼool tento naq tooʼabʼinq ut tookʼanjelaq chiru (yaabʼasi Isaías 48:​17, 18).

2. Kʼaru naraj laj Tza naq tqakʼoxla? Chanru kixsume li Jehobʼa li tikʼtiʼ aʼin?

² Saʼ li Santil Hu naqataw resil ebʼ li winq ut ebʼ li ixq li sahebʼ saʼ xchʼool saʼ xkʼabʼaʼ naq xeʼkʼanjelak chiru li Jehobʼa. Abʼan li Jesús jwal sa xrekʼa ribʼ naq xkʼanjelak chiru li Jehobʼa. Laj Tza naraj naq laaʼo tqakʼoxla naq moko naʼajmank ta li Yos saʼ li qayuʼam re naq sahaq saʼ qachʼool, ut naxye ajwiʼ naq naru tqabʼeresi li qayuʼam yal qajunes (Gén. 3:​4, 5). Joʼkan naq li Jehobʼa kixkanabʼ naq chiru jun qʼehil ebʼ li qas qiitzʼin teʼxbʼeresi li xyuʼam re xkʼutbʼesinkil naq moko yaal ta li kixye laj Tza. Abʼanan ebʼ li chʼaʼajkilal li naqil saʼebʼ li qasutam naxkʼutbʼesi naq ebʼ li poyanam moko us ta nekeʼelk naq nekeʼxyal xbʼeresinkil li xyuʼam. Joʼkan naq saʼ li tzolom aʼin tqatzʼil rix li kiʼekʼasink re li Jesús chi kʼanjelak chiru li Jehobʼa. Moqon tqatzʼil rix, kʼaʼut naq li Qayuwaʼ li wank saʼ choxa wank xkʼulubʼ naq tqakʼe xloqʼal. Ut tqajultika ajwiʼ bʼar wank wiibʼ oxibʼ xyaalal li kixbʼaanu naq t-alaaq saʼ qachʼool kʼanjelak chiru li Jehobʼa.

KʼARU KIʼEKʼASINK RE LI JESÚS NAQ XSIKʼ KʼANJELAK CHIRU LI JEHOBʼA

3. Kʼaru kixyeechiʼi laj Tza re li Jesús? Kʼaru kixbʼaanu li Jesús?

³ Naq li Jesús kiwank saʼ Ruuchichʼochʼ, kixsikʼ ani aj chi u tkʼanjelaq. Naq tojeʼ kikubʼeek xhaʼ li Jesús, laj Tza kixye re naq tixkʼe re chixjunil li xʼawabʼejilal li ruuchichʼochʼ wi tixwiqʼib ribʼ chiru junsutaq. Abʼan li Jesús kixye re: «Elen chiwu! Xbʼaan naq tzʼiibʼanbʼil: “Loqʼoni ru li Jehobʼa Laayos ut kaʼajwiʼ chiru aʼan tatkʼanjelaq”» (Mat. 4:​8-10). Kʼaʼut naq li Jesús kinaʼlebʼak chi joʼkaʼin? Qilaq wiibʼ oxibʼ xyaalal.

4, 5. Bʼar wank wiibʼ oxibʼ xyaalal kʼaʼut naq li Jesús kixsikʼ kʼanjelak chiru li Jehobʼa?

⁴ Li xbʼeen xyaalal kʼaʼut naq li Jesús kixsikʼ kʼanjelak chiru li Jehobʼa aʼan naq naxra chi anchal xchʼool (Juan 14:31). Joʼkan ajwiʼ, li Jesús naxnaw naq kʼanjelak chiru li Jehobʼa aʼan li us (Juan 8:​28, 29; Apoc. 4:11). Naxnaw ajwiʼ naq aʼan xkʼehok re li qayuʼam, nakʼehok chi yoʼon ut naru tqakʼojobʼ qachʼool rikʼin (Sal. 33:4; 36:10; Sant. 1:17). Li Jehobʼa junelik kixye li yaal re li Jesús ut kixkʼe re chixjunil li wank re (Juan 1:14). Abʼan laj Tza moko junaqik ta rikʼin li Jehobʼa, laj Tza aj tikʼtiʼ junelik naraj xkomon li wank re, naxkʼoxla ribʼ xjunes ut kixbʼaanu naq ebʼ li qas qiitzʼin teʼmaakobʼq ut teʼkamq (Juan 8:44). Li Jesús naxnaw ru chiʼus li Jehobʼa ut laj Tza, joʼkan naq li Jesús maajunwa kixkʼoxla xqʼetbʼal ribʼ chiru li Jehobʼa ut naʼlebʼak joʼ laj Tza (Filip. 2:​5-8).

⁵ Jun chik xyaalal kʼaʼut naq li Jesús kikʼanjelak chiru li Jehobʼa aʼan naq junelik wank saʼ xchʼool li rusilal li tixkʼam chaq saʼ xbʼeen li ruuchichʼochʼ wi tiik xchʼool (Heb. 12:2). Li Jesús naxnaw naq wi tiik xchʼool tixsantobʼresi xkʼabʼaʼ li Xyuwaʼ ut trisi chixjunil li rahilal li kixkʼam chaq laj Tza saʼ xbʼeen li ruuchichʼochʼ.

KʼAʼUT WANK XKʼULUBʼ LI JEHOBʼA NAQ TQALOQʼONI RU

6, 7. Kʼaʼut naabʼalebʼ li qas qiitzʼin inkʼaʼ nekeʼkʼanjelak chiru li Jehobʼa? Kʼaʼut wank xkʼulubʼ li Jehobʼa naq tqaloqʼoni ru?

⁶ Anaqwan naabʼalebʼ li qas qiitzʼin inkʼaʼ nekeʼkʼanjelak chiru li Jehobʼa xbʼaan naq inkʼaʼ nekeʼxnaw ru. Maajiʼ nekeʼxnaw li xchaabʼil naʼlebʼ ut chixjunil li naxbʼaanu chirixebʼ. Chanchanebʼ laj Atenas bʼarwiʼ kixkʼe chi naweʼk li chaabʼil esil li apóstol Pablo (Hech. 17:​19, 20, 30, 34).

⁷ Li apóstol Pablo kixye rehebʼ laj Atenas naq li Yos «naxkʼe rehebʼ li qas qiitzʼin li yuʼam, li musiqʼ ut chixjunil li naʼajmank chiruhebʼ». Kixchʼolobʼ ajwiʼ chiruhebʼ naq «saʼ xkʼabʼaʼ aʼan wank qayuʼam, nokooʼekʼank ut yoʼyoko». Ut «rikʼin jun ajwiʼ chi winq kixyobʼtesi chixjunilebʼ li tenamit». Joʼkan naq saʼ xkʼabʼaʼ naq li Jehobʼa kiyobʼtesink qe wank xkʼulubʼ naq tqaloqʼoni ru (Hech. 17:​25, 26, 28).

8. Kʼaru maajunwa tixbʼaanu li Jehobʼa?

⁸ Saʼ xkʼabʼaʼ naq li Jehobʼa aʼan laj Yobʼtesinel ut li najolomink re li choxachʼochʼ, truuq raj xminbʼal ru ebʼ li qas qiitzʼin re naq teʼkʼanjelaq chiru. Abʼan li Jehobʼa maajunwa naxbʼaanu aʼin! Naraj bʼan naq li xkʼihalil li qas qiitzʼin teʼwanq choʼq ramiiw chi junelik (1 Tim. 2:​3, 4). Joʼkan naq xkʼe qe naabʼal li eetalil li naxkʼutbʼesi naq yoʼyo ut naq nokooxra. Saʼ xkʼabʼaʼ aʼin kixxaqabʼ ebʼ li chʼuut ut ebʼ li cheekel winq li nokooʼeʼxra (Hech. 20:28). Joʼkan ajwiʼ nokooxkawresi re naq tqakʼut chiruhebʼ li qas qiitzʼin li osobʼtesihom li tixkʼam chaq saʼ xbʼeen li ruuchichʼochʼ ut li tixbʼaanu re naq ttzʼaqloq ru li rajom (Mat. 10:​11-13; 28:​19, 20).

9. Chanru naxkʼutbʼesi li xrahom li Jehobʼa?

⁹ Li Jehobʼa naxkʼutbʼesi li xrahom chiruhebʼ li qas qiitzʼin li inkʼaʼ nekeʼxpaabʼ naq yoʼyo. Chiru naabʼal chihabʼ chi miyon ebʼ li qas qiitzʼin nekeʼwank joʼ chanru nekeʼraj. Saʼ xkʼabʼaʼ naq li Jehobʼa nawulak chiru kʼehok, naxkʼe rehebʼ li naʼajmank re naq yoʼyoqebʼ ut teʼxyal xsahil li xyuʼam (Mat. 5:​44, 45; Hech. 14:​16, 17). Saʼ xkʼabʼaʼ li Jehobʼa, ebʼ li qas qiitzʼin naru nekeʼwank xjunkabʼal, ralal xkʼajol, ebʼ li ramiiw ut naru nekeʼril li rusilal li naxkʼam chaq li kʼanjel li nekeʼxbʼaanu (Sal. 127:3; Ecl. 2:24). Chʼolchʼo chiqu naq li Qayuwaʼ li wank saʼ choxa naxra chixjunilebʼ li qas qiitzʼin (Éx. 34:6). Anaqwan tqil wiibʼ oxibʼ xyaalal kʼaʼut naq xʼalaak saʼ qachʼool kʼanjelak chiru li Jehobʼa ut chanru nokoorosobʼtesi.

KʼAʼUT KIʼALAAK SAʼ QACHʼOOL KʼANJELAK CHIRU LI JEHOBʼA

10. a) Bʼar wank xbʼeen xyaalal kʼaʼut nokookʼanjelak chiru li Jehobʼa? (Mateo 22:37). b) Chanru xatxtenqʼa li xkuyum li Jehobʼa? (Salmo 103:​13, 14).

¹⁰ Joʼ li Jesús, li xbʼeen xyaalal kʼaʼut naq nokookʼanjelak chiru li Jehobʼa aʼan naq naqara chi anchal qachʼool (yaabʼasi Mateo 22:37). Naq naqanaw ru chiʼus li Jehobʼa naʼalaak saʼ qachʼool jilok chixkʼatq. Wank xkuyum qikʼin ut naxjultika naq poqs okenaqo wiʼ (yaabʼasi Salmo 103:​13, 14). Naq ebʼ laj Israel xeʼxqʼet ribʼ chiru li Jehobʼa kixtzʼaama rehebʼ: «Kanabʼomaq xbʼaanunkil li maaʼusilal» (Jer. 18:11). Naq naqanaʼlebʼa rix li xkuyum li Jehobʼa ut jalan chik ebʼ li naʼlebʼ, naʼalaak saʼ qachʼool kʼanjelak chiru chi junelik.

11. Bʼar wank junjunq xyaalal kʼaʼut naq nokookʼanjelak chiru li Jehobʼa?

¹¹ Nokookʼanjelak ajwiʼ chiru li Jehobʼa xbʼaan naq naqanaw naq aʼan li us (Mat. 4:10). Joʼkan ajwiʼ naqajultika ebʼ li rusilal li naxkʼam chaq wank saʼ tiikilal chiru li Yos: naqatenqʼa xsantobʼresinkil li xkʼabʼaʼ, naqakʼutbʼesi naq laj Tza aj tikʼtiʼ ut naqasahobʼresi xchʼool li Qayuwaʼ. Wi nokookʼanjelak chiru li Jehobʼa anaqwan tooruuq kʼanjelak chiru junqʼe junqʼe kutan (Juan 17:3).

12, 13. Kʼaru naqatzol rikʼin li kixkʼul li xJane ut li xPam?

¹² Chalen naq yooko chi kʼiik naqatzol xraabʼal li Jehobʼa ut saʼ xnumikebʼ li chihabʼ li qarahom naru ajwiʼ nakʼiik chiʼus. Naq xeʼxtikibʼ xtzolbʼal li Santil Hu li xJane wank junlaju chihabʼ re ut li xPama wank lajeebʼ chihabʼ re. Usta li xnaʼ xyuwaʼ inkʼaʼ xeʼxkʼulubʼa xtzolbʼal li Santil Hu, li xJane ut li xPam xeʼkʼehek xleseens re naq teʼxchʼutubʼ ribʼ rikʼinebʼ laj Testiiw, abʼan tento ajwiʼ teʼxik saʼ li iklees bʼarwiʼ nekeʼxik li xjunkabʼal saʼ xraqik li xamaan. Li xJane naxye: «Li xeʼxkʼut chiwu ebʼ laj Testiiw chirix li Santil Hu xinxtenqʼa re naq inkʼaʼ tinket li bʼan li nakanobʼresink u ut inkʼaʼ tinmux wibʼ, xbʼaan naq ebʼ li wechtzolom yookebʼ chaq xminbʼal wu chi xbʼaanunkil li yibʼ aj naʼlebʼ aʼin».

¹³ Wiibʼ oxibʼ chihabʼ chirix aʼin, saʼ kabʼichal xeʼok joʼ aj puktesinel. Moqon chik xeʼok joʼ aj kʼamolbʼe saʼ li puktesink ut nekeʼxchʼolani ajwiʼ li xnaʼ xyuwaʼ li cheekebʼ chik. Naq li xJane naxjultika li kixkʼul naxye: «Xintzol naq li Jehobʼa maajunwa naxkanabʼ xchʼolaninkilebʼ li ramiiw, xbʼaan naq joʼ naxye 2 Timoteo 2:19: “Li Jehobʼa naxnaw ruhebʼ li re”». Chʼolchʼo naq li Jehobʼa naxchʼolanihebʼ li nekeʼxra ut nekeʼxsikʼ kʼanjelak chiru.

14. Chanru tooruuq xkolbʼal xkʼabʼaʼ li Jehobʼa? (Chaawil ebʼ li jalam u).

¹⁴ Naqaj okenk re xsantobʼresinkil xkʼabʼaʼ li Jehobʼa. Qayehaq naq wank jun aawamiiw li qʼun xchʼool, nasihink ut natawok u. Saʼ jun kutan jun li qas qiitzʼin naʼok xyeebʼal naq laawamiiw yibʼ ru xnaʼlebʼ ut aj tikʼtiʼ. Peʼyaal naq taakol raj rix? Joʼkan ajwiʼ nakʼulmank rikʼin jun li qas qiitzʼin li naʼok xyeebʼal tikʼtiʼ chirix li Jehobʼa, saʼ junpaat naqachʼolobʼ li yaal chirix ut chi anchal qachʼool naqakol li xkʼabʼaʼ (Sal. 34:2; Is. 43:10). Li naqaye ut li naqabʼaanu naxkʼutbʼesi naq naqaj kʼanjelak chiru li Jehobʼa chi anchal qachʼool.

15. Kʼaru li osobʼtesihom kixkʼul laj Pablo saʼ xkʼabʼaʼ naq kixjal li kixkʼubʼ xbʼaanunkil saʼ li xyuʼam? (Filipenses 3:​7, 8).

¹⁵ Re xkʼebʼal xtzʼaqobʼ qakʼanjel chiru li Jehobʼa chi anchal qachʼool naqajal li kʼaru naqakʼubʼ xbʼaanunkil saʼ li qayuʼam. Jun chaabʼil eetalil chirix aʼin aʼan laj Pablo, saʼ li xteep kʼebʼil chaq xwankil abʼan xtzʼeqtaana li wankilal aʼin re xtaqenkil li Kriist ut kiʼok chi kʼanjelak chiru li Jehobʼa (Gál. 1:14). Saʼ xkʼabʼaʼ aʼin sa chaq saʼ xchʼool ut kikʼeheʼk xkʼanjel re naq t-awabʼejinq rochbʼeen li Kriist. Li apóstol Pablo maajunwa kixkʼoxla naq maakʼaʼ aj e naq kikʼanjelak chiru li Jehobʼa, wi laaʼo nokookʼanjelak chiru li Jehobʼa inkʼaʼ ajwiʼ tqakʼoxla naq maakʼaʼ aj e naq yooko chi kʼanjelak chiru (yaabʼasi Filipenses 3:​7, 8).

16. Kʼaru naxkʼut chiqu li kixkʼul li xJulia? (Chaawil ebʼ li jalam u).

¹⁶ Wi naqakʼe qachʼool chi kʼanjelak chiru li Jehobʼa sahaq saʼ qachʼool saʼ li qayuʼam, tooruuq xkʼulbʼal li osobʼtesihom anaqwan ut saʼ li kutan chalk re. Qilaq li kixkʼul li xJulia. Saʼ li xkachʼinal nabʼichank saʼ li xʼiklees. Ut saʼ xkʼabʼaʼ naq chaabʼil nabʼichank jun li ixq kixyeechiʼi xtzolbʼal re naq tbʼichanq chiʼus, moqon chik xnaweʼk ru yalaq bʼar ut kibʼichank saʼebʼ li naʼaj li nawbʼilebʼ ru. Naq yook chaq chi tzolok saʼ jun li tzolebʼaal re bʼichank, jun li rechtzolom kiraatina chirix li Yos ut kixchʼolobʼ chiru naq li xkʼabʼaʼ li Yos aʼan Jehobʼa. Chirix chik aʼan li xJulia kixtikibʼ xtzolbʼal li Santil Hu wiibʼ sut chiru li xamaan. Moqon chik kixkʼe xchʼool kʼanjelak chiru li Jehobʼa ut kixkanabʼ li xkʼanjel joʼ aj bʼichanel. Aʼin kichʼaʼajkoʼk chiru xbʼaanunkil. Aʼan naxye: «Naabʼalebʼ li qas qiitzʼin xeʼxye we naq moko us ta yookin roksinkil linyuʼam, abʼan laaʼin nawaj roksinkil linyuʼam re kʼanjelak chiru li Jehobʼa». Anaqwan naq ak xnumeʼk 30 chihabʼ kʼaru naxkʼoxla li xJulia chirix li kixbʼaanu? Aʼan naxye: «sa linchʼool ut chʼolchʼo chiwu naq li Jehobʼa tixkʼe we saʼebʼ li kutan chalkebʼ re chixjunil li narataw linchʼool» (Sal. 145:16).

MAAKANABʼ KʼANJELAK CHIRU LI JEHOBʼA

17. Kʼaru naraj xyeebʼal choʼq rehebʼ laj kʼanjel chiru li Yos wank saʼ rosoʼjikebʼ li kutan? Ut kʼaru naraj xyeebʼal choʼq rehebʼ li toj maajiʼ nekeʼkʼanjelak chiru?

¹⁷ Jwal nachʼ wank chaq li rosoʼjik. Li apóstol Pablo kixye: «Xbʼaan naq “chi seebʼ”, “tkʼulunq li yook chaq chi chalq ut inkʼaʼ tbʼayq”» (Heb. 10:37). Kʼaru naraj xyeebʼal aʼin? Naraj xyeebʼal naq moko naabʼal hoonal ta chik nakanaak re naq ebʼ li qas qiitzʼin teʼxsikʼ kʼanjelak chiru li Jehobʼa (1 Cor. 7:29). Ut wi ak xqasikʼ kʼanjelak chiru li Jehobʼa, chʼolchʼo chiqu naq tqanumsi wiibʼ oxibʼ li aaleek, abʼan moko naabʼal kutan ta chik tqakuy li aaleek aʼin.

18. Kʼaru naraj li Jehobʼa ut li Jesús naq tqabʼaanu?

¹⁸ Wi ak naabʼal chihabʼ qokik chi kʼanjelak chiru li Jehobʼa michʼinaak qachʼool. Li Jesús kixye rehebʼ li qas qiitzʼin naq teʼok choʼq xtzolom ut maajunwa teʼxkanabʼ xtaqenkil (Mat. 16:24). Li Jehobʼa naraj naq inkʼaʼ tqakanabʼ kʼanjelak chiru us ta wank sut tchʼaʼajkoʼq chiqu xbʼaanunkil. Abʼanan, wi nokookʼanjelak chiru li Jehobʼa anaqwan naru tqataw naabʼal li osobʼtesihom ut sahaq li qachʼool (Sal. 35:27).

19. Kʼaru naqatzol rikʼin li kixkʼul laj Gene?

¹⁹ Wankebʼ nekeʼxkʼoxla naq wi teʼkʼanjelaq chiru li Jehobʼa inkʼaʼ teʼxyal xsahil xyuʼam. Wi laaʼat toj saajat, ma taakʼoxla naq wank kʼaru taatzʼeq wi tatkʼanjelaq chiru li Yos? Jun li saaj li naxkʼabʼaʼi Gene naxye: «Xinkʼoxla naq joʼ aj Testiiw wank naabʼal li naʼlebʼ li inkʼaʼ nokooruuk xbʼaanunkil. Xinkʼoxla naq naabʼalebʼ li saaj li xinkʼiik wiʼ nekeʼxyal xsahil li xyuʼam xbʼaan naq nekeʼninqʼehik, nekeʼelk rikʼin ixq, nekeʼbʼatzʼunk videojuego chirix li kamsink abʼan laaʼin kaʼajwiʼ saʼ chʼutam ut sa puktesink ninʼelk». Kʼaru kixkʼul laj Gene naq kamaʼin xnaʼlebʼak? Aʼan naxye: «Xintikibʼ xbʼaanunkil ebʼ li yibʼ ru aj naʼlebʼ li nekeʼxbʼaanu jalanebʼ chik li saaj. Saʼ xtiklajik xwulak chiwu abʼan xwekʼa naq moko sa ta inchʼool. Joʼkan naq xinʼok xjultikankil ebʼ li naʼlebʼ li wank saʼ li Santil Hu li moko yookin ta xyuʼaminkil ut li rusilal li naxkʼam chaq wi tinyuʼami. Xinʼok chi kʼanjelak chiru li Jehobʼa chi anchal inchʼool. Chalen aran nawekʼa naq li Jehobʼa narabʼi lintij».

20. Kʼaru chʼolchʼo chiqu naq tqabʼaanu?

²⁰ Laj salmiist kibʼichank chiru li Jehobʼa: «Us xaq re li sikʼbʼil ru aabʼaan, aʼ li nakakʼam aawikʼin re taawanq saʼ laamuhebʼaal» (Sal. 65:5). Joʼ laj Josué, qayehaq chi anchal qachʼool: «Laaʼin ut linjunkabʼal tookʼanjelaq chiru li Qaawaʼ» (Jos. 24:15).