Chiwanq junelik li «xam li nachalk rikʼin li Yos»

1. Kʼaru naxye li Santil Hu chirix li tzʼaqal rahok?

LI RAATIN li Yos naxye aʼin chirix li rahok: «Li xxamlel li Rahok aʼan tiqwal xam, tzʼaqal xam li nachalk rikʼin li Yos! Chixjunil li haʼ wank saʼ palaw inkʼaʼ naru tixchup li Rahok, chi moko taaʼosoʼq xbʼaanebʼ li nimaʼ» (Cant. 8:6, 7).b Kʼajoʼ xchʼinaʼusal ebʼ li aatin aʼin! Ebʼ li aatin aʼin naxkʼut chiqu li rahok li naxkʼutbʼesi li bʼeelomej ut li ixaqilbʼej saʼ li xsumlajik maakʼaʼ naqʼaxok ru ut naru nawank chi junelik.

2. Kʼaru tento teʼxbʼaanu li sumsukebʼ re naq maajunwa tkehoʼq li rahok saʼ li xsumlajik?

² Li bʼeelomej ut li ixaqilbʼej tento teʼxkʼe xchʼool wi nekeʼraj naq li rahok twanq chi junelik. Qakʼoxlaq rix jun li xaml. Re naq inkʼaʼ tchupq tento naq tqakʼe li xsiʼul. Wi inkʼaʼ nabʼaanumank nachup li xaml. Joʼkan ajwiʼ nakʼulmank rikʼin li rahok li nekeʼxkʼutbʼesi chiribʼilebʼ ribʼ li bʼeelomej ut li ixaqilbʼej: re naq kawaq ribʼ tento naq teʼxkʼe xchʼool chi xkawresinkil rajlal. Wank sut li chʼaʼajkilal chirix li tumin, li yajel malaj xkʼirisinkil li alal kʼajolbʼej, naru tixchʼaʼajki li rahok li nekeʼxkʼutbʼesi chiribʼilebʼ ribʼ li sumsukebʼ. Wi sumsukat, kʼaru taabʼaanu re naq junelik twanq li «xam li nachalk rikʼin li Yos»? Saʼ li tzolom aʼin tqatzol oxibʼ li naʼlebʼ li tatxtenqʼa re naq kawaq laasumlajik ut sahaq saʼ laachʼool.c

KAWRESIHOMAQ LEEʼAMIIWIL RIKʼIN LI JEHOBʼA

3. Kʼaʼut aajel ru naq li sumsukebʼ teʼwanq joʼ ramiiw li Jehobʼa re naq junelik twanq li rahok saʼ li xsumlajik? (Eclesiastés 4:12; chaawil li jalam u).

³ Re naq junelik twanq li «xam li nachalk rikʼin li Yos», li bʼeelomej ut li ixaqilbʼej tento naq teʼxyal xqʼe chi wank joʼ ramiiw li Jehobʼa. Kʼaʼut naqaye aʼin? Wi saʼ kabʼichal oxloqʼ chiruhebʼ wank saʼ amiiwil rikʼin li Jehobʼa, teʼxyal xqʼe chi xpaabʼankil chixjunil li naʼlebʼ li naxkʼe rehebʼ. Chi joʼkan teʼxqʼax ru chixjunil li chʼaʼajkilal li truuq xbʼaanunkil naq tkʼehoʼq li rahok (taayaabʼasi Eclesiastés 4:12). Joʼkan bʼiʼ, li wankebʼ choʼq ramiiw li Jehobʼa nekeʼxyal xqʼe chi xkʼambʼal re rikʼin li xnaʼlebʼ. Jun eetalil, qʼunebʼ xchʼool, nekeʼkuyuk maak ut wankebʼ xkuyum (Efes. 4:32–5:1). Naq li sumsukebʼ nekeʼxkʼut li naʼlebʼ aʼin moko chʼaʼaj ta naq tkʼiiq li rahom chiribʼilebʼ ribʼ. Li xLena li wank 25 chihabʼ xsumlajik naxye: «Moko chʼaʼaj ta xraabʼal junaq li qʼaxal naxra ut naroxloqʼi li Jehobʼa!».

4. Kʼaʼut naq li Jehobʼa kixsikʼ ru laj José ut li xMaría re naq teʼwanq choʼq xyuwaʼ li Sikʼbʼil Ru?

⁴ Qilaq jun eetalil li wank saʼ li Santil Hu. Saʼ li xjunkabʼal laj David, li Jehobʼa kixsikʼ laj José ut li xMaría re naq teʼwanq choʼq xnaʼ xyuwaʼ li Sikʼbʼil Ru. Kʼaʼut naq kixsikʼebʼ? Xbʼaan naq naxnaw naq laj José ut li xMaría wankebʼ saʼ amiiwil rikʼin ut junelik teʼxkʼe xbʼeenwa saʼ li xsumlajik. Kʼaru naru nekeʼxtzol li sumsukebʼ rikʼin laj José ut li xMaría?

5. Chankiru naq li bʼeelomej teʼxkʼam rehebʼ rikʼin laj José?

⁵ Laj José junelik naxbʼaanu li naxye li Jehobʼa re, aʼin kixbʼaanu naq chaabʼilaq joʼ bʼeelomej. Junelik kixbʼaanu li kiyeeheʼk re xbʼaan li Yos. Oxibʼ sut kixchʼolobʼ kʼaru tento tixbʼaanu rikʼin li xjunkabʼal. Usta kichʼaʼajkoʼk chiru xbʼaanunkil abʼan junelik kiʼabʼink (Mat. 1:20, 24; 2:13-15, 19-21). Saʼ xkʼabʼaʼ naq kixpaabʼ li Jehobʼa kiruuk xkolbʼal ut xwenteninkil li xMaría. Chʼolchʼo naq aʼin kixbʼaanu naq li xMaría tixra ut troxloqʼi li xkʼanjel joʼ bʼeelomej. Ex bʼeelomej naru teekʼam eere rikʼin laj José naq teesikʼ leenaʼlebʼ saʼ li Santil Hu chirix chanru xchʼolaninkil leejunkabʼal.d Naq nekeeyuʼami li nekeetzol usta tento teejal wiibʼ oxibʼ li naʼlebʼ, nekeekʼutbʼesi naq nekeera leerixaqil. Chi joʼkaʼin jwal kawaq leesumlajik. Jun li hermaan re Vanuatu li 20 chihabʼ xsumlajik naxye: «Naq nawil naq linbʼeelom naxsikʼ li xtenqʼ rikʼin li Jehobʼa ut naxyuʼami, jwal nawoxloqʼi. Ninkʼojobʼ inchʼool rikʼin ut rikʼin li naxsikʼ xbʼaanunkil».

6. Kʼaru naru teʼxtzol li ixaqilbʼej rikʼin li xMaría?

⁶ Li xMaría wank joʼ ramiiw li Jehobʼa. Li xpaabʼal ut li ramiiwil rikʼin moko wank ta saʼ xkʼabʼaʼ laj José. Naxnaw chiʼus li Santil Hu (Lucas 1:46). Joʼkan ajwiʼ narisi xhoonal re kʼoxlak chirix li naxtzol (Luc. 2:19, 51). Saʼ xkʼabʼaʼ naq kaw xpaabʼal xMaría, kiwank joʼ jun chaabʼil ixaqilbʼej. Naabʼal li qechpaabʼanel saʼ li qakutan nekeʼxyal xqʼe chi xkʼambʼal rehebʼ rikʼin li xMaría. Qilaq li kixkʼul li xʼÉmiko. Aʼan naxye: «Naq moko sumsukin ta nintzol li Santil Hu injunes. Abʼanan, naq xinsumlaak linbʼeelom natijok saʼ qakʼabʼaʼ ut aʼan nakʼamok bʼe re xbʼaanunkil chixjunil li naʼajmank re xkawresinkil qapaabʼal. Xinkʼe reetal naq kaw linpaabʼal saʼ xkʼabʼaʼ li kʼaru naxbʼaanu linbʼeelom. Xinkʼe reetal naq tento naq tinyal inqʼe laaʼin ajwiʼ. Aajel ru naq tinkawresi linʼamiiwil rikʼin li Jehobʼa. Xwisi inhoonal re wank injunes re tijok chiru li Jehobʼa, xyaabʼasinkil li Santil Hu ut xkʼoxlankil rix» (Gál. 6:5). Ex ixaqilbʼej, wi nekeeyal eeqʼe chi xkawresinkil leeʼamiiwil rikʼin li Jehobʼa, leebʼeelom qʼaxal teʼxra ut sahaqebʼ saʼ xchʼool eerikʼin (Prov. 31:30).

7. Kʼaru teʼxtzol li sumsukebʼ rikʼin laj José ut María?

⁷ Laj José ut li xMaría xeʼkʼanjelak saʼ wiibʼal re xkawresinkil li xpaabʼalebʼ. Nekeʼxnaw naq aajel ru xloqʼoninkil ru li Jehobʼa joʼ junkabʼal (Luc. 2:22-24, 41; 4:16). Kichʼaʼajkoʼk tana chiruhebʼ xbʼaanunkil ut mas wiʼ chik naq kinimank li xjunkabʼal. Abʼan xeʼxqʼax ru. Aʼin jun chaabʼil eetalil choʼq rehebʼ li sumsukebʼ! Wi wankebʼ leekokʼal maare nachʼaʼajkoʼk cheeru xik saʼebʼ li chʼutam ut risinkil leehoonal re loqʼonink joʼ junkabʼal. Naru nachʼaʼajkoʼk ajwiʼ xsikʼbʼal leehoonal re tijok ut tzolok joʼ sumal. Abʼan jultikaq eere naq wi nekeeloqʼoni ru li Jehobʼa joʼ junkabʼal tkawuuq leeramiiwil rikʼin ut teera eeribʼ cheeribʼil eeribʼ. Joʼkan bʼiʼ, kʼehomaq xbʼeenwa li xkʼanjel li Jehobʼa saʼ leeyuʼam.

8. Kʼaru teʼruuq xbʼaanunkil saʼ li loqʼonink joʼ junkabʼal li wankebʼ xchʼaʼajkilal saʼ li xsumlajik?

⁸ Kʼaru texruuq xbʼaanunkil wi wank leechʼaʼajkilal saʼ leesumlajik? Maare inkʼaʼ teʼraj xloqʼoninkil ru li Jehobʼa joʼ junkabʼal. Wi joʼkan nekeekʼul, kʼaʼut naq inkʼaʼ teetikibʼ rikʼin junaq li naʼlebʼ li moko chaʼaʼjkaq ta ut twulaq cheeru saʼ kabʼichal? Aʼin li xbʼeen naʼlebʼ li texruuq xbʼaanunkil re xkawresinkil leesumlajik ut xwaklesinkil leechʼool chiribʼil eeribʼ re naq texkʼanjelaq chiru li Jehobʼa joʼ sumal.

NUMSIHOMAQ LEEHONAL SAʼ KABʼICHAL

9. Kʼaʼut naq li bʼeelomej ut li ixaqilbʼej tento teʼxnumsi li hoonal saʼ kabʼichal?

⁹ Li sumsukebʼ naru nekeʼxra ribʼ chiribʼilebʼ ribʼ naq nekeʼxnumsi li hoonal saʼ wiibʼal. Aʼin textenqʼa re xnawbʼal kʼaru naxkʼoxla ut narekʼa li jun chik (Gén. 2:24). Li xLilia ut laj Ruslán li ak numenaq 15 chihabʼ li xsumlajikebʼ, qilaq kʼaru xeʼxkʼe reetal naq tojeʼaq xeʼsumlaak. Li xLilia naxye: «Xqakʼe reetal naq inkʼaʼ tooruuq xnumsinkil naabʼal hoonal saʼ wiibʼal joʼ xqakʼoxla chaq. Laatzʼ qu chi kʼanjelak, xyamlesinkil li qochoch…, ut moqon xeʼwank li qakokʼal. Xqakʼe reetal naq wi inkʼaʼ naqakʼe qahoonal re wank joʼ sumal, naru naq naqakanabʼ qibʼ».

10. Chankiru teʼxyuʼami li sumsukebʼ li naxye Efesios 5:15, 16?

¹⁰ Maare tento teʼxkʼubʼ ribʼ chiʼus re naq teʼruuq xnumsinkil li hoonal saʼ kabʼichal (taayaabʼasi Efesios 5:15, 16). Laj Uzondu li wank Nigeria naxye: «Naq ninkʼubʼ linhoonal, ninkʼe ajwiʼ saʼ ajl li hoonal li tinnumsi rikʼin li wixaqil, qʼaxal oxloqʼ chiwu li hoonal aʼan» (Filip. 1:10). Aatinaqo anaqwan chirix li xʼAnastasia, rixaqil jun li cheekel winq li naʼulaʼanink chʼuut re Moldavia. Aʼan naxchʼolobʼ chankiru naroksi li xhoonal chi chaabʼil: «Ninbʼaanu linkʼanjel naq linbʼeelom naxbʼaanu xkʼanjel rikʼin li chʼuut. Re naq moqon, naru naqanumsi li qahoonal saʼ kabʼichal». Abʼan, kʼaru texruuq xbʼaanunkil wi wank naabʼal leekʼanjel ut chʼaʼaj cheeru xsikʼbʼal leehoonal re wank saʼ kabʼichal?

11. Kʼaru li kʼanjel nekeʼxbʼaanu saʼ kabʼichal laj Áquila ut li xPriscila?

¹¹ Li sumsukebʼ naru nekeʼxkʼam re rikʼin laj Áquila ut li xPriscila, jun li sumal li xeʼwank chaq saʼ xkutankilebʼ li apóstol (Rom. 16:3, 4). Usta li Santil Hu moko naabʼal ta naxye chirix li sumal aʼin, naxye bʼan naq nekeʼkʼanjelak, nekeʼpuktesink ut nekeʼxtenqʼa ebʼ li junchʼol joʼ sumal (Hech. 18:2, 3, 24-26). Joʼkan ajwiʼ naq li Santil Hu naʼaatinak chirixebʼ, junelik naʼaatinak joʼ sumal.

12. Kʼaru teʼruuq xbʼaanunkil li sumsukebʼ re naq teʼruuq xnumsinkil hoonal saʼ kabʼichal? (Chaawil li jalam u).

¹² Chanru naru teʼxkʼam rehebʼ li sumsukebʼ rikʼin laj Áquila ut li xPriscila? Kʼoxla chixjunil li tento taabʼaanu laaʼat ut laasumʼaatin. Ma naru nekeebʼaanu saʼ kabʼichal li kʼanjel aʼin ut moko kaʼaj tawiʼ saʼ junesal? Jun eetalil, laj Áquila ut li xPriscila xeʼpuktesink saʼ wiibʼal. Ma joʼkan ajwiʼ nekeebʼaanu laaʼex? Laj Áquila ut li xPriscila nekeʼkʼanjelak ajwiʼ saʼ wiibʼal. Yaal naq maare inkʼaʼ nekexkʼanjelak joʼ sumal saʼ jun ajwiʼ li naʼaj. Abʼan, wi texkʼanjelaq saʼ ochoch saʼ wiibʼal? (Ecl. 4:9). Wi joʼkan teebʼaanu, sa teerekʼa eeribʼ ut texruuq chi aatinak. Laj Robert ut xLinda numenaq 50 chihabʼ xsumlajikebʼ. Laj Robert naxye: «Moko naabʼal ta qahoonal wank re xnumsinkil joʼ sumal. Abʼan naq yookin xchʼajbʼal li sekʼ ut li wixaqil naxchaqihobʼresi malaj yookin chi kʼanjelak chirix li ochoch ut aʼan nachalk intenqʼankil sa nawekʼa wibʼ. Kʼanjelak joʼ sumal naxbʼaanu naq toowanq saʼ junajil ut naq qʼaxal tqara qibʼ chiqibʼil qibʼ».

13. Kʼaru tento teʼxbʼaanu li sumsukebʼ re naq teʼwanq saʼ junajil?

¹³ Jultikaq eere naq moko juntaqʼeet ta naq wankex saʼ kabʼichal rikʼin naq wankex saʼ junajil. Jun li hermaan ixq re Brasil li ak sumsu chikan naxye: «Saʼebʼ li qakutan qʼaxal laatzʼ ru li qayuʼam ut maare naqakʼoxla naq yooko xnumsinkil li hoonal saʼ kabʼichal xbʼaan naq wanko saʼ jun ajwiʼ li ochoch. Abʼan xinkʼe reetal naq wank chik kʼaru tento tqabʼaanu chiru naq kaʼajwiʼ toowanq joʼ sumal. Naʼajmank ajwiʼ chiwu xchʼolaninkil linbʼeelom». Kʼehomaq reetal li nekeʼxbʼaanu laj Bruno ut li xTays, re xkʼebʼal xchʼoolebʼ chiribʼilebʼ ribʼ. Laj Bruno naxye: «Re xtawbʼal rusilal li hoonal li naqanumsi saʼ kabʼichal, naqakʼula li qaselular».

14. Kʼaru teʼruuq xbʼaanunkil li sumsukebʼ naq inkʼaʼ nawulak chiruhebʼ xnumsinkil li hoonal chiribʼilebʼ ribʼ?

¹⁴ Abʼan, wi inkʼaʼ nawulak cheeru xnumsinkil hoonal joʼ sumal? Maare nekeʼxkʼoxla naq moko juntaqʼeet ta nawulak cheeru ut wank sut nekeʼxpoʼk chiribʼil eeribʼ. Kʼaru tatruuq xbʼaanunkil wi joʼkan nakaakʼul? Qakʼoxlaq chirix li xaml li xooʼaatinak wiʼ saʼ xtiklajik. Naq nalech moko nim ta xxamlel; re naq nimaq li xaml, aajel ru naq kokʼaj xsaʼ taakʼe li xsiʼul. Joʼkan ajwiʼ, rajlal kutan yalomaq eeqʼe chi xnumsinkil bʼayaq li hoonal chiribʼil eeribʼ. Bʼaanuhomaq junaq li naʼlebʼ li nawulak cheeru saʼ wiibʼal li inkʼaʼ tixkʼam chaq li chʼaʼajkilal (Sant. 3:18). Wi teetikibʼ rikʼin junaq li naʼlebʼ li moko nim ta, teekʼe reetal naq li rahom chiribʼil eeribʼ tkʼiiq wiʼ chik.

OXLOQʼIMAQ EERIBʼ CHIRIBʼIL EERIBʼ

15. Kʼaʼut aajel ru naq li sumsukebʼ teʼroxloqʼi ribʼebʼ?

¹⁵ Aajel ru li oxloqʼink saʼ li sumlajik. Chanchan li iqʼ li naʼajmank re naq moko tchupq ta li xaml. Wi maakʼaʼ li iqʼ nachup li xaml. Joʼkan ajwiʼ, wi maakʼaʼ li oxloqʼink saʼ li sumlajik, li rahok naru nakehoʼk. Abʼan wi li bʼeelomej ut li ixaqilbʼej nekeʼroxloqʼi ribʼebʼ moko tkehoʼq ta li rahok. Jultikaq aawe naq li wank xwankil aʼan naq li jun chik narekʼa naq oxloqʼinbʼil, maawaʼ naq nakaakʼoxla naq laaʼat nakat-oxloqʼink. Numenaq 25 chihabʼ li xsumlajik li xPenny ut laj Aret. Li xPenny naxye: «Xbʼaan naq naqoxloqʼi qibʼ wank li rahok saʼ li ochoch. Naqaye kʼaru naqekʼa ut kʼaru naqakʼoxla chi maakʼaʼ qaxiw, xbʼaan naq naqoxloqʼi li naxye li jun chik». Kʼaru teʼruuq xbʼaanunkil li bʼeelomej ut li ixaqilbʼej re naq teʼrekʼa naq oxloqʼinbʼilebʼ? Qilaq li xeʼxbʼaanu laj Abrahán ut li xSara.

16. Kʼaru teʼruuq xtzolbʼal li bʼeelomej rikʼin laj Abrahán? (1 Pedro 3:7; chaawil li jalam u).

¹⁶ Laj Abrahán kiroxloqʼi li xSara. Kirabʼi li kixye ut kixkʼe saʼ ajl li narekʼa. Saʼ jun kutan li xSara jwal ra saʼ xchʼool, joʼkan naq kirisi xjosqʼil rikʼin laj Abrahán ut kixye re naq aʼan wank re naq wank xchʼaʼajkilal. Abʼanan, aʼan moko kipoʼk ta chi moko kixsume ta saʼ josqʼil. Naxnaw ajwiʼ chiʼus ut naroxloqʼi li xkʼanjel joʼ bʼeelomej ut naxtenqʼa re naq tixbʼaanu chi chaabʼil. Li kixbʼaanu aʼan rabʼinkil kʼaru naxkʼoxla ut xtuqubʼankil ru li xchʼaʼajkilal (Gén. 16:5, 6). Kʼaru naqatzol? Li bʼeelomej naxsikʼ kʼaru tixbʼaanu li junkabʼal (1 Cor. 11:3). Saʼ xkʼabʼaʼ naq naxra li rixaqil, naxkʼe saʼ ajl li naxkʼoxla ut qʼaxal wiʼ chik naq li yook xkʼoxlankil choʼq re, tixchʼaʼajki (1 Cor. 13:4, 5). Joʼkan ajwiʼ wank sut li ixaqilbʼej moko sa ta narekʼa ribʼ ut naraj naq t-abʼiiq. Ma nakaawoxloqʼi laasumʼaatin rikʼin xkʼebʼal aachʼool chi rabʼinkil? (Taayaabʼasi 1 Pedro 3:7). Li xʼAngela ut laj Dimitri jayeʼq ma 30 chihabʼ li xsumlajikebʼ. Aʼan naxye chanru li xbʼeelom naxbʼaanu naq trekʼa naq oxloqʼinbʼil: «Laj Dimitri junelik naxkʼe xchʼool chi wabʼinkil naq yook injosqʼil malaj nawaj aatinak. Wank xkuyum wikʼin usta moko sa ta nawekʼa wibʼ».

17. Kʼaru teʼruuq xtzolbʼal li ixaqilbʼej rikʼin li xSara? (1 Pedro 3: 5, 6).

¹⁷ Li xSara kixkʼutbʼesi naq naroxloqʼi laj Abrahán xbʼaan naq naxkʼulubʼa li naxkʼoxla xbʼaanunkil (Gén. 12:5). Saʼ jun kutan laj Abrahán kiraj xkʼebʼal xwahebʼ li winq li xeʼwulak chi maakʼaʼ saʼ xchʼool. Joʼkan naq kixye re li xSara naq tixyiibʼ naabʼal li kaxlanwa usta laatzʼ ru (Gén. 18:6). Li xSara kixbʼaanu li kiyehek re xbʼaan laj Abrahán. Ex ixaqilbʼej laaʼex ajwiʼ naru texnaʼlebʼaq joʼ li xSara ut rabʼinkil li nekeʼxye eere leebʼeelom. Wi teebʼaanu kawaq leesumlajik (taayaabʼasi 1 Pedro 3:5, 6). Laj Dimitri, li xooʼaatinak wiʼ saʼ li raqal 16, naxchʼolobʼ kʼaru naxbʼaanu li rixaqil re naq trekʼa naq oxloqʼinbʼil: «Naq ninsikʼ kʼaru xbʼaanunkil rikʼin li junkabʼal, li xʼAngela nikinxtenqʼa usta moko juntaqʼeet ta naqakʼoxla. Naq moko us ta naʼelk li xinkʼoxla moko napoʼk ta wikʼin. Oxloqʼ chiwu naq joʼkan nanaʼlebʼak!». Moko chʼaʼaj ta xraabʼal junaq li nakatroxloqʼi.

18. Kʼaru rusilal twanq wi junelik wanq li rahok saʼ li sumlajik?

¹⁸ Laj Tza naraj naq maakʼaʼaq chik li rahok saʼ xyanqebʼ laj paabʼanel li sumsukebʼ. Wi li sumsukebʼ teʼxkanabʼ xraabʼal ribʼebʼ chiribʼilebʼ ribʼ, inkʼaʼ chik teʼxra li Jehobʼa. Abʼan maakʼaʼ naru xkehobʼresinkil li tzʼaqal rahok! Joʼkan bʼiʼ, li rahok li wank saʼ li sumlajik chi wank joʼ naxye El Cantar de los Cantares. Kʼehomaq li Jehobʼa xbʼeenwa saʼ leeyuʼam, sikʼomaq hoonal re xnumsinkil saʼ wiibʼal, kʼutbʼesihomaq naq nekeʼroxloqʼi eeribʼ naq nekeekʼe saʼ ajl li narekʼa ut li naʼajmank chiru li jun chik. Wi teebʼaanu, leesumlajik tixkʼe xloqʼal li Jehobʼa, li chalenaq wiʼ li tzʼaqal rahok, ut leerahom twanq joʼ li xaml li chʼolaninbʼil: junelik wank xxamlel.