“Mono Zwaka Bima Yonso ya Mono Vandaka na Yo Mfunu”

RAPORE ya Organisation mondiale de la santé (OMS) kemonisa nde na bilumbu yai bantu kuluta bamilio 120 na inza ya mvimba kenyokwama na basusi mpi kukonda kivuvu. Konso mvula, milio mosi ya bantu kekudifwaka bo mosi mpi bantu na kati ya bamilio 10 ti 20 kesosaka kudifwa. Inki lusadisu beto kele na yo sambu na bayina kenyokwama na basusi mpi kukonda kivuvu? Bankisi ya minganga lenda fyotuna mpasi, mpi lusadisu ya mawi kele mfunu. Ata mpidina, bamingi ya keyindulaka mutindu yina mezwaka lusadisu yankaka na mikanda ya Bambangi ya Yehowa yina ketendulaka Biblia, mutindu mukanda yai ya kelanda ya mekatuka na France kemonisa yo.

“Ntama mingi ve, mu vandaka kumona dyaka ve mfunu ya luzingu. Mu lombaka na Nzambi nde ya bika mu fwa kwa mono. Mu vandaka bonso nde mu mefwaka dezia na kati na mu mosi. Sambu na kusosa lusadisu, mu vandaka kusamba Yehowa mingi mpenza. Mu bakaka mpi lukanu ya kutanga Annuaire des Témoins de Jéhovah 2002, mpi mu manisaka yo na nima ya bilumbu tatu. Mu fwete tuba nde yo pesaka mono kikesa mingi kibeni mpi yo kumisaka lukwikilu na mono ngolo.

“Mono salaka dyaka mwa bansosa na baperiodike Nzozulu ya Nkengi ti Réveillez-vous!, mpi mono yitukaka mingi! Banda bamvula 15 mu ketangaka baperiodike yai mbala na mbala, kansi mu mebakisaka ntete ve mutindu masolo yango kepesaka kikesa mpi kesepidisaka. Yo ke ya kufuluka ti zola, kikalulu yina kemonanaka dyaka mingi ve na bilumbu yai. Mono zwaka bima yonso ya mono vandaka na yo mfunu.”

Biblia ketuba nde: “Mfumu Nzambi kele penepene na bantu yina ke na kikesa ve, yandi ke gulusaka bantu yonso yina me katulaka ntima.” (Nkunga 34:19) Ntembe kele ve nde, bayina yonso “ke na kikesa ve” to ‘ketulaka dyaka ntima ve’ lenda baka kikesa ti kivuvu sambu na bilumbu kekwisa na Biblia. Bambangi ya Yehowa kekabulaka mikanda yina ketendulaka Biblia sambu na kusadisa bantu yina ke na mfunu ya lusadisu sambu bo baka mambote na bima yai ya kimpeve ya kepesaka kikesa.