Batangi na Beto Keyula . . .

Keti Nzambi Kebakaka Mpusu Mosi ya Nitu na Mbalu Mingi Kuluta Yankaka?

▪ Ve. Biblia ketuba pwelele nde: “Nzambi ke zolaka bantu yonso mutindu mosi. Na konso dikanda ya bantu yandi ke ndimaka bantu yina ke zitisaka yandi ti ke salaka mambu ya mbote.”​—Bisalu 10:34, 35.

Dibanza ya Nzambi na dyambu yai meswaswana mpenza ti ya bantu ya kukonda kukuka. Bantu mingi keyindulaka nde mpusu mosi ya nitu (mingi-mingi yina ya bo) meluta ya bankaka. Mabanza ya mutindu yina kemonisa dibanza ya Charles Darwin, yina kusonikaka nde: “Na bilumbu kekwisa, . . . bantu ya mpusu ya mbote tamana bo yonso mpi bayina ya mpusu ya mbi tayinga bo.” Dyambu ya mawa kele nde, bantu mingi kenyokwamaka na maboko ya bantu ya mpusu yankaka yina kekudimonaka nde bo meluta bo.

Keti yo kele mbote na kuyindula nde mpusu mosi ya nitu meluta yankaka? Mu mbandu, keti bantu ya siansi kepesaka banzikisa yina kemonisa nde bampusu yankaka ya nitu meluta ya bankaka? Nkutu, Bryan Sykes profesere mosi ya iniversite ya Oxford yina kelongaka mutindu bana kebakaka bikalulu ya bankaka na bo ketuba nde: “Yo kele ve ti ba gène mosi buna kaka sambu na bantu ya bwala mosi to ya insi mosi buna. . . . Mu kekudiyulaka ntangu yonso kana yo kele ti ADN ya Bagreki to ba gène ya bantu ya Italie, kansi, mono mezaba nde yo kele ve. . . . Beto kele mpenza ve ya kuswaswana.”

Mambu yai kewakana ti mambu yina beto ketanga na Biblia. Yo kelonga nde Nzambi kugangaka kaka bakala mosi mpi nkento mosi, yina bantu yonso mebasikaka na nzila na bo. (Kuyantika 3:20; Bisalu 17:26) Yo yina, na meso ya Nzambi bantu yonso kele kaka kiteso mosi.

Yehowa kebakaka ve na mbalu mpusu ya nitu ya muntu mosi to ilungi na yandi. Kansi, yandi kebakaka na mbalu dyambu mosi ya mfunu mingi​—ntima na beto ya kifwani, to kimuntu na beto ya kati. Biblia ketuba nde: “Muntu ke talaka yina ke monika na meso, kansi Mfumu Nzambi ke talaka ntima.” (1 Samuele 16:7) Kuyibuka kyeleka yai lenda pesa beto kikesa ya mingi. Inki mutindu?

Yo vanda mpusu na beto ya nitu kele nki mutindu, mingi na kati na beto kesepelaka ve na mambu yankaka ya nitu na beto, ata mpidina beto kevandaka ve ti makuki ya kusoba yo. Kansi, beto lenda tomisa mambu ya kuluta mfunu​—mabanza mpi mawi ya ntima na beto. (Kolosai 3:9-11) Kana beto kuditadila na masonga yonso, beto lenda bakisa nde bantangu yankaka beto kemonaka nde beto meluta bankaka na kiteso mosi buna, to nkutu bo meluta beto. Sambu mabanza yai kewakana ve ti mabanza ya Nzambi, beto fwete sala ngolo na kukatula yo na ntima na beto.​—Nkunga 139:23, 24.

Kana beto kesala ngolo sambu na kudimona mpi kumona bankaka mutindu Yehowa kemonaka beto, beto lenda vanda ti kivuvu nde yandi tasadisa beto. Ndinga na yandi keyibusa beto nde: “Mfumu Nzambi ke talaka bantu yonso ya nsi-ntoto ya mvimba sambu na kusadisa bayina me kudipesaka na yandi” na ntima ya mvimba. (2 Bansangu 16:9) Dyambu yai kele ya kyeleka, yo vanda mpusu na beto ya nitu kele inki mutindu.