Marcos tỹ rá
Pilatos tỹ Jesus mré vĩ
15 Tỹ vaj kỹ vẽnh jyvẽn tĩ kar ẽn ag tóg kusãg ki Jesus to jykrén mũ jagnẽ mré, Topẽ tũ to pãꞌi ag, kófa ag mré hã, Topẽ vĩ to ẽg kanhrãn tĩ ag mré hã ke gé. Kỹ ag tóg ti mrĩnh kỹ ti pére mũ mũ, Pilatos mỹ ti fẽg jé. 2 Kỹ tóg ti mỹ: “ã mỹ tỹ Judeu ag pãꞌi nĩꞌ?“ he mũ. Kỹ tóg: “ki hã ã tóg tó mũ,” he mũ.
3 Hã ra Topẽ tũ to pãꞌi ag tóg ti kato vĩ tỹ hẽn ri ke han mũ sir. 4 Kỹ tóg ti mỹ ke mãn mũ. “Mỹ ã tỹ ag mỹ nén ũ tó jãvãnh? Ha mẽ, ã to ag tóg vĩ kónãn mũ,” he tóg. 5 Hã ra tóg vĩ mãn tũ nĩ, kỹ tóg Pilatos mỹ e tĩ sir.
Ag tỹ Jesus to: “ter jé tóg ke mũ,” he
6 Hã ra Pilatos tóg ag mỹ vẽse ag kã ũn pir kavãg tĩ, fénhta tỹ Páscoa kar ki. Ag tỹ ũ to vĩ mũ ẽn kavãg tóg tĩ. Ti jykre vẽ. 7 Hã ra ũ tóg se kỹ nĩ, ti jijin hã vỹ: Barrabás, he mũ. Vẽnh génh kutẽm tĩ ag mré tóg se kỹ jẽ nĩ. Vẽnh génh kỹ ag tóg ũ kãgtén ja nĩgtĩ, hã kỹ ag tóg sigse kỹ nỹtĩ. 8 Kỹ vẽnh e ẽn ag tóg Pilatos to mũ mũ sir, ti mỹ: “ẽg mỹ ã tỹ nén han tĩ ẽn han nĩ,” he jé.
9 Kỹ tóg ag mỹ: “mỹ sỹ Judeu ag pãꞌi kavãn há?“ he mũ. 10 Pãꞌi ag tóg Jesus to jũ nỹtĩ, hã kỹ ag tóg nén ũ tũ to ti se ja nĩ. Hã ra Pilatos tóg ki kanhró nĩ, hã kỹ tóg ti kavãn sór mũ. 11 Hã ra pãꞌi ag tóg vẽnh kar krĩn ja nĩ, ag tỹ ti mỹ: “Barrabás hã kava ra,” he jé.
12 Kỹ Pilatos tóg ag mỹ: “kỹ inh ãjag tỹ ũ to: Judeu ag pãꞌi, he mũ ẽn tỹ hẽ ri kenh mũ?“ he mũ. 13 Kỹ ag tóg prẽnprẽr mũ sir. “!..Krunh to ti sã..!“ he ag tóg mũ sir, prẽnprẽr kỹ.
14 Kỹ tóg ag mỹ: “hẽ ri ken kỹ? Ti kórég tỹ ne han ti?“ he mũ. Hã ra ag tóg prẽr mãnꞌ, prẽr mãnꞌ he mũ sir. “!..Krunh to ti sã..!“ he ag tóg, prẽnprẽr kỹ.
15 Kỹ tóg ag mỹ Barrabás kavãg mũ sir. Jesus mrãnmrãn tóg mũ sir, mrãn ke jafã tỹ, kỹ tóg ag mỹ ti fẽg mũ sir, ag tỹ ka to ti sa jé.
Soldado ag tỹ Jesus vóg kónãn
16 Kỹ soldado ag tóg pãꞌi mág ĩn kã ra ti pére ge mũ sir, ag vẽnh jyvẽn jafã ẽn kã ra. Kỹ ag tóg soldado kar ag jé prẽr mũ sir. 17 Ti kri ag tóg kur kusũg fón mũ. Kỹ ag tóg sónh pirĩn kỹ tỹ ti krĩ tógfĩg mũ sir. 18 Kỹ ag tóg ti nyg kỹ ti mỹ: “viva, Judeu ag pãꞌi,” he mũ sir. 19 Kỹ ag tóg vãn tỹ ti krĩ mĩ mrãnmrãn mũ sir. Ti to ag tóg sugsug mũ sir. Kỹ ag tóg ti jo grĩnhgrĩnh ke mũ sir, ag tỹ ón kỹ ti to: “ẽg Senhor,” hen kỹ. 20 Ag tỹ ti nyg kar ag tóg ti ki kur kusũg ẽn kunũnh kỹ ti kur pẽ tỹ ti kã ra rãg kỹ ti pére mũ mũ, ag tỹ krunh to ti sa jé.
Jesus tỹ krunh to sa
21 Hã ra ũ tóg vãnh kã tákãtĩ mũ, ti jiji hã vỹ: Cirene tá Simão, he mũ. Ti krẽ ag vỹ tỹ Alexandre mré Rufo nỹtĩ. Ẽn mỹ ag tóg vĩ tar han mũ, ti tỹ Jesus krunh vỹn jé.
22 Kỹ ag tóg ti mré Gólgota tá junjun mũ sir. Gólgota to ken hã vẽ, hã vỹ: vẽnh krĩ kuka, he mũ. 23 Kỹ ag tóg ti mỹ vinho ven mũ, ka tỹ mirra jẽnjo mré, hã ra tóg kron jãvãnh nĩ, vẽnh kagta ti. 24 Kỹ ag tóg krunh to ti sãg mũ sir. Ti kur tỹ ag tóg jagnẽ mỹ vẽnh kãpãm mũ sir, to joga hen kỹ. 25 Kusã ki 9 óra vẽ sir.
26 Ag tỹ nén tỹ ti kato vĩ mũ vỹ ti kri rán kỹ sa, hã vỹ: “Judeu ag pãꞌi mág vẽ,” he mũ. Ti tỹ nẽji vẽsỹ pãꞌi mág han mũ to ag tóg ti tén mũ. 27 Ti kóm ag tóg krunh to bandido régre ag sãg mũ gé, Ũ vỹ ti pẽgja tá sa, jó ũ vỹ ti jakãnh tá sa. 28 Hã kỹ Jesus tóg nén tỹ ti to rán kỹ nĩ ẽn vé, hã vỹ: “ag mỹ tóg tỹ ũn jykre pãno ag mré ke nĩ,” he mũ, Topẽ vĩ rán ki.
29 Kỹ ũ tỹ mĩ mũ mũ ag tóg ti nygꞌ he mũ gé, vỹn vỹn he kỹ. “Óꞌ, ã ne tóg: Topẽ ĩn kókén jé sóg ke mũ, he géꞌ,” he ag tóg. “Kurã tãgtũ ki sóg ũ han mũ, he ã tóg mũ géꞌ. 30 Vẽnh kren han ra kemaꞌ. Krunh to kãtére kemaꞌ,” he ag tóg, ti to é he kỹ.
31 Kỹ Topẽ tũ to pãꞌi ag tóg ti nyg mũ gé. Jagnẽ mỹ ag tóg: “ũ krenkren han tóg, hã ra tóg vẽnh hã kren han ki kagtĩg nĩ,” he mũ. 32 “Cristo jé krunh to kãtére kemaꞌ, Judeu ag pãꞌi ti, ẽg tỹ ve jé, ẽg tỹ ti vĩ kri nĩm jé,” he ag tóg. Kỹ ti kóm krunh to nỹtĩ ẽn ag tóg, ti nyg mũ gé.
Jesus ter
33 Rã tỹ ẽg nĩno kã sa ra tóg kutyꞌ he mũ sir, ga kar mĩ hã. Kỹ kuty ẽn tóg óra tãgtũ tũg mũ. 34 3 óra ki Jesus tóg prẽr mũ sir, jamã há ra, kỹ tóg: “Eloí, Eloí, lemá sabactani?“ he mũ. Ẽg vĩ ki ẽg tóg tag to: “Topẽ, Topẽ, ã tỹ ne jé isovãnh nẽ?“ he mũ.
35 Kỹ tá nỹtĩ ũ ag tóg ti vĩ tag mẽ kỹ jagnẽ mỹ: “ha vé, Elias jé tóg prẽr mũ,” he mũ. 36 Kỹ ũ tóg vẽnhvãg tĩ mũ. Kỹ tóg ka jurỹn kỹ tỹ esponja kusón kỹ vinho kã ra rãg mũ sir. Kỹ tóg ti mỹ ven mũ sir, ti tỹ ki ũnhꞌ ũnhꞌ he jé. “Toregꞌ,” he tóg. “Hẽn ri ke mũn Elias kãtĩg mũ, ti kãtérem jé,” he tóg, ag mỹ.
37 Hã ra Jesus tóg prẽr mág pẽ han kỹ hun ke mũ sir. 38 Kỹ Topẽ ĩn krẽm kur tỹ jãnkã nĩfe tóg jaran ke mũ. Hã tóg vẽnh kãkym ke kãn mũ sir.
39 Hã ra capitão tóg ti vég jẽ nĩ. Ti prẽr mẽg tóg mũ. Ti tỹ hun ke ẽn vég tóg mũ. Kỹ tóg: “vẽnh vĩ há ja vẽ,” he mũ. “Topẽ kósin ja vẽ“ he tóg.
40 Kỹ ũn tỹtá fag tóg tá nỹtĩ gé. Kuvar há tá nỹtĩ kỹ fag tóg ti vég nỹtĩ nĩ. Fag kã ũ fi vỹ tỹ Maria Madalena fi nĩ, kỹ ũ fi tóg tỹ Salomé fi nĩ gé, kỹ ũ fi tóg tỹ Maria fi nĩ gé, José mré Tiago sĩ mỹnh tag fi. 41 Ũn tỹtá ẽn fag tóg ti nón mũ ja nĩgtĩ, ti tỹ Galiléia tá tĩ mũn kã. Tá fag tóg ti ki rĩr ja nĩgtĩ gé. Kỹ ũn tỹtá tỹ hẽn ri ke fag tóg ti vég nỹtĩ gé, ti tỹ krunh to sa kỹ, ti mré Jerusalém ra mũ ja ẽn fag.
Ag tỹ vẽnh kej tá ti fi
42 Rãké tóg nỹ ha, vẽnh kán ke kurã to hã. 43 Hã kỹ Arimatéia tá José tóg Pilatos mỹ Jesus fár to vĩ mũ. Tỹ tóg vẽnh jyvẽn tĩ ag kã ũ nĩ. Jykre kuryj tóg nĩ. Topẽ tỹ tỹ ẽg pãꞌi nĩ ve sór tóg tĩ gé. Ẽn hã vỹ mũmẽg vãnh nĩ kỹ ti fár to vĩ mũ.
44 Kỹ tóg: “kỹ ti mỹ ter huriꞌ?“ he mũ. Kỹ tóg capitão jé prẽr kỹ ti ki jẽmẽg mũ. 45 Kỹ tóg: “hỹ, ter ti huri,” he mũ. Kỹ tóg José mỹ ti fár ti fig mũ sir.
46 Kỹ tóg kur kupri kaja e kym mũ. Kỹ tóg ti kãtérem mũ. Kur ẽn tỹ tóg ti pãg mũ. Kỹ tóg vẽnh kej kã táti finh tĩ mũ sir, ag tỹ pãró nor han ja kã kã. Kỹ tóg pó tỹ ti jy nĩfénh mũ sir. 47 Hã ra Maria Madalena fi tóg vég mũ, Maria tỹ José mỹnh fi ke gé.