Marcos tỹ rá
Jesus tỹ vẽjagrẽ kórég tỹ mil ag pan
5 Kỹ ag tóg goj nig mág kafã ũ tá junjun mũ sir, Gerasa tá ke ag tá. 2 Jesus tỹ canoa kã tákãkutẽ mũ ra ũ tóg ti kato tẽ mũ. Jagrẽ kórég ti nĩ. Vẽnh kej tá tóg kãtĩ mũ. 3 Tá tóg ẽmã nĩ. Ag tỹ ti senh ke mũ ra tóg vẽnh mỹ tĩ. 4 Ti se tỹ hẽn ri ke han ja ag tóg nĩgtĩ vẽ, ferro tỹ, ti nĩgé, ti pẽn ke gé. Hã ra tóg ẽn kykym kãn ja nĩgtĩ. Ag tỹ ti kanhrãn sór mũ ra ag tóg ti tỹ hẽ ri ke ja tũ nĩgtĩ. 5 Kuty mré kurã ki tóg prẽr tĩgtĩ, vẽnh kej tá. Pãró ẽn ki pó génh kỹ tóg tỹ vẽsãnh tĩgtĩ. 6 Ti tỹ kuvar há tá Jesus ve kỹ tóg ti kato vẽnhvãg kãtĩ mũ, kỹ tóg ti krẽm grĩnh ke mũ. 7 Prẽr tóg mũ, kỹ tóg: “!..Jesusꞌ..!“ he mũ, “!..kynhmỹ Topẽ kósinꞌ..! Ã isỹ hẽ ri kenh mũ,” he tóg. “!..Topẽ jiji tó kỹ sóg ã mỹ to vĩ mũ, ã tỹ inh vóg kónãn tũ nĩ jé..!” he tóg. 8 Hã ra tóg ti mỹ: “ti tovãnh ra, Nén-Kórégꞌ,” he ja nĩ.
9 Kỹ tóg ti mỹ: “ã jiji hẽ ri ke tĩ,” he mũ. Kỹ tóg: “Mil,” he mũ. “E tãvĩ ẽg nỹtĩ,” he tóg, Nén-Kórég ti.
10 Kỹ tóg to vĩꞌ, to vĩꞌ, he mũ, ti tỹ ẽmã ẽn ki ti kutẽm tũ nĩ jé.
11 Hã ra ag mẽg tỹ porko ag tóg jẽg nỹtĩ, pãnónh ẽn kri. 12 Kỹ Nén-Kórég ag tóg ti mỹ: “ag mẽg to ẽg jẽgnẽ, ẽg tỹ ag ki ge jé,” he mũ.
13 Kỹ tóg ag mỹ: “hej,” he mũ. Kỹ ag tóg ẽn ti tovãnh kỹ porko ag ki ge mũ sir. Kỹ ag tóg rán ki re mũ sir, porko ag. Nãgnãr kãn ag tóg mũ sir, goj nig mág ki, porko tỹ mil régre ag hỹn.
14 Kỹ porko ki rĩr tĩ ag tóg pétẽ mũ sir, ẽmã ra. Tá ag tóg kãmén kãn mũ, ũ tỹ Nén-Kórég tỹ jagrẽ ja ẽn ti. Kỹ ag tóg Jesus to mũ kãn mũ sir, nén ẽn ve jé. 15 Hã ra ũn jagrẽ kórég ja ẽn tóg kur tu kỹ nĩ nĩ. Krĩ há tóg nĩ gé. Kỹ ag fe tóg jũrũn ke mũ. 16 Kỹ ũ tỹ vég mũ ag tóg ti kãmén mũ sir. 17 Hã kỹ ag tóg Jesus mỹ: “ha ẽmã tag ki kutẽ,” he mũ, ti tỹ ag rã hã nĩ tũ nĩ jé.
18 Ti tỹ canoa kã ki rã kỹ ũn jagrẽ kórég ja tóg: “nhỹ ã mré tĩg mũ,” he mũ. 19 Hã ra tóg ti mỹ: “nejé. Ha tĩg, ã ĩn ra, ã tỹ ã mré ke ag mré nĩ jé,” he mũ. “Ag mỹ kãmén nĩ, ẽg jóg mág tỹ ã tỹ háꞌ he mũ ti, ti tỹ ã jagãgtãn mũ ti,” he tóg. 20 Kỹ tóg tĩ mũ. Ẽmã tỹ Decápolis tá tóg Jesus tỹ ti tỹ háꞌ he ẽn kãmén mũ. Kỹ tóg vẽnh kar mỹ e tĩ sir.
Jairo tỹ ti kósin fi kaga tỹ Jesus mỹ tó
21 Kỹ Jesus tóg goj nig mág kafã ra tĩg mãn mũ, canoa kãmĩ. Kỹ vẽnh e tóg ti jo vẽnh mãn mũ, goj fyr tá. 22 Kỹ Judeu ag vẽnh kanhrãn jafã to pãꞌi tỹ Jairo tóg tá jun kỹ Jesus krẽm mũg ke mũ. 23 Ti mỹ tóg: “inh kósin fi vỹ tũg sór mũ. Kunĩg, ã tỹ ã nĩgé tỹ fi mẽ jé, fi tỹ háꞌ he jé, fi kren jé,” he mũ. 24 Kỹ tóg ti mré tĩ mũ. Hã ra ũn e ag tóg ti nón mũ kỹ ti kutãn mũ.
Ũn tỹtá kaga fi
25 Ag mũ ra ũn tỹtá ũ fi tóg ag nón tĩ mũ. Kyvénh krỹg ja tũ han kỹ fi tóg nĩ, prỹg tỹ 12 (ke) ki. 26 Médico ag mỹ fi tóg vẽnh ven tỹ hẽn ri ke han, to fi tóg fi tỹ nén vãm kãn, hã ra fi tóg háꞌ he tũ nĩ, ke han han fi tóg. 27 Hã ra fi tóg Jesus kãme mẽ ja nĩgtĩ. 28 Kỹ fi tóg: “sỹ hẽn ri ke mũn ti kur mẽg kỹ sóg háꞌ henh mũ,” he mũ. Kỹ fi tóg vẽnh e kã mĩ tĩg kỹ ti nón ti kur mẽg mũ sir. 29 Kỹ vãhã fi kyvénh tóg gám ke mũ sir, kỹ fi tóg ki kanhró nĩ, fi kaga tỹ háꞌ he ẽn ti.
30 Hã ra Jesus tóg ti fe tỹ ki kanhró nĩ gé. Kỹ tóg vẽnh e kã ki vĩrĩn ke kỹ: “ũ nỹ inh kur mẽꞌ?“ he mũ. 31 Kỹ ti mré mũ tĩ ag tóg ti mỹ: “vẽnh kar tỹ ã kutãn vẽ,” he mũ. 32 Kỹ tóg tã mĩ ẽvãnh kỹ fi vég mũ. 33 Kỹ fi tóg jũrũn ke mũ. Ti krẽm mũg ke kỹ fi tóg ti mỹ kãmén kãn mũ sir. 34 Hã ra tóg fi mỹ: “inh kósin,” he mũ. “Ã tỹ inh ki rã hã kỹ ã tóg háꞌ hé. Ha tĩg, jatun mỹ. Ã tỹ háꞌ he vẽ ha,” he tóg.
Jairo kósin fi rĩr mãn
35 Ti tỹ ver fi mré vẽmén jẽ ra Jairo mré ke ũ ag tóg ti tá junjun mũ. “Ã kósin fi vỹ hur ter. Ti kutãn mãn tũg nĩ,” he ag tóg mũ. 36 Hã ra Jesus tóg: “to krĩ kufy han tũg nĩ, inh vĩ hã kri nĩm nĩ,” he mũ. 37 Kỹ tóg ũn e ag mũ kamẽg kỹ ag mỹ: “Pedro hã vỹ tĩg mũ inh mré, Tiago ke gé, Tiago jãvy tỹ João ke gé,” he mũ.
38 Ag tỹ Jairo ĩn tá junjun kỹ tóg ũn kygfỹ mũ fag mỹ: 39 “ãjag tỹ ne jé kygfỹ nẽ,” he mũ. “Ãjag tỹ ne jé vẽsỹrénh nẽ? Ter tũ fi nĩ. Fi nũr vẽ,” he tóg. Ũn vẽsỹrénh jagy han mũ ẽn fag mỹ tóg ke mũ.
40 Hã ra fag tóg ti to é he mũ. Kỹ tóg fag pan kỹ gĩr fi mỹnh fag mré fi venh rã mũ, ti mré kãmũ mũ ag mré. 41 Fi nĩgé kãgmĩ kỹ tóg fi mỹ: “talitá cumi,” he mũ. Ẽg vĩ ki ke, hã vỹ: “nĩ ra, jỹ,” he mũ.
42 Kỹ vãhã gĩr fi tóg, nĩ kỹ kynẽ tĩ nĩ sir. Kri prỹg tỹ 12 (ke) fi nĩ. Kỹ tóg ag mỹ e tãvĩ tĩ. 43 Hã ra tóg ag mỹ: “ker ũ mỹ tó hẽꞌ!“ he mũ. “Ha fi mỹ vẽjẽn ven,” he tóg.