Maũndũ ma Matukũ ma Tene wa Mbere

15 Daudi agĩgĩthiĩ na mbere gwaka nyũmba ciake Itũũra-inĩ rĩa Daudi, na akĩhaarĩria handũ nĩ ũndũ wa Ithandũkũ rĩa Ngai ũrĩa wa ma na akĩamba hema nĩ ũndũ warĩo.+ 2 Hĩndĩ ĩyo nĩrĩo Daudi ooigire atĩrĩ: “Gũtirĩ mũndũ wagĩrĩirũo gũkuua Ithandũkũ rĩa Ngai ũrĩa wa ma o tiga Alawii, nĩ gũkorũo nĩo Jehova athuurĩte makuuage Ithandũkũ rĩa Jehova na mamũtungatagĩre hingo ciothe.”+ 3 Daudi agĩcoka agĩcokanĩrĩria andũ othe a Isiraeli kũu Jerusalemu nĩguo mambatie Ithandũkũ rĩa Jehova marĩtware harĩa aahaarĩirie nĩ ũndũ warĩo.+

4 Daudi agĩcokanĩrĩria njiarũa cia Haruni+ na Alawii:+ 5 kuuma harĩ Akohathu, Urieli ũrĩa warĩ mũnene na ariũ a ithe wao 120; 6 kuuma harĩ Amerari, Asaia+ ũrĩa warĩ mũnene na ariũ a ithe wao 220; 7 kuuma harĩ Agerishomu, Joeli+ ũrĩa warĩ mũnene na ariũ a ithe wao 130; 8 kuuma harĩ njiarũa cia Elizafani,+ Shemaia ũrĩa warĩ mũnene na ariũ a ithe wao 200; 9 kuuma harĩ njiarũa cia Hebironi, Elieli ũrĩa warĩ mũnene na ariũ a ithe wao 80; 10 kuuma harĩ njiarũa cia Uzieli,+ Aminadabu ũrĩa warĩ mũnene na ariũ a ithe wao 112. 11 Ningĩ Daudi agĩta athĩnjĩri-Ngai Zadoku+ na Abiatharu+ na Alawii Urieli, Asaia, Joeli, Shemaia, Elieli, na Aminadabu, 12 akĩmeera atĩrĩ: “Inyuĩ nĩ inyuĩ atongoria a nyũmba cia maithe manyu cia Alawii. Mwĩtheriei, inyuĩ o hamwe na ariũ a ithe wanyu, mũcoke mwambatie Ithandũkũ rĩa Jehova Ngai wa Isiraeli mũrĩrehe harĩa haarĩirie nĩ ũndũ warĩo. 13 Tondũ mũtiarĩkuuire riita rĩrĩa rĩa mbere-rĩ,+ marakara ma Jehova Ngai witũ nĩ maatũrĩrĩmbũkĩire,+ nĩ gũkorũo tũtiatuĩririe mũtaratara ũrĩa wagĩrĩire.”+ 14 Nĩ ũndũ ũcio athĩnjĩri-Ngai na Alawii magĩĩtheria nĩguo makambatie Ithandũkũ rĩa Jehova Ngai wa Isiraeli.

15 Alawii magĩgĩkuua Ithandũkũ rĩu rĩa Ngai ũrĩa wa ma na mĩtĩ yarĩo marĩigĩrĩire ciande-inĩ ciao,+ o ta ũrĩa Musa aathanĩte kũgerera kiugo kĩa Jehova. 16 Daudi agĩcoka akĩra anene a Alawii mathuure ariũ a ithe wao arĩa aini nĩguo maine makenete, na maine na indo cia ũini: inanda cia ndigi, inanda cia mũgeeto,+ na thani iria ihũũrithanagio.+

17 Nĩ ũndũ ũcio Alawii magĩthuura Hemani+ mũrũ wa Joeli, na kuuma harĩ ariũ a ithe wao, Asafu+ mũrũ wa Berekia, na kuuma harĩ ariũ a ithe wao Amerari, Ethani+ mũrũ wa Kushaia. 18 Na maarĩ hamwe na ariũ a ithe wao a gĩkundi gĩa kerĩ,+ Zekaria, Beni, Jaazieli, Shemiramothu, Jehieli, Uni, Eliabu, Benaia, Maaseia, Matithia, Elifelehu, na Mikineia na Obedi-edomu na Jeieli arangĩri a ihingo. 19 Aini Hemani,+ Asafu,+ na Ethani maarĩ a kũhũũrithania thani cia gĩcango iria ihũũrithanagio;+ 20 na Zekaria, Azieli, Shemiramothu, Jehieli, Uni, Eliabu, Maaseia, na Benaia maahũũraga inanda cia ndigi na mũgambo wa Alamothu;*+ 21 na Matithia,+ Elifelehu, Mikineia, Obedi-edomu, Jeieli, na Azazia maahũũraga inanda cia mũgeeto na mũgambo wa Sheminithu,*+ magakorũo marĩ arũgamĩrĩri. 22 Kenania+ mũnene wa Alawii aarũgamagĩrĩra wĩra wa ũkuui, nĩ gũkorũo aarĩ njorua yaguo, 23 na Berekia na Elikana maarĩ arangĩri a ihingo nĩ ũndũ wa Ithandũkũ. 24 Athĩnjĩri-Ngai Shebania, Joshafatu, Nethaneli, Amasai, Zekaria, Benaia, na Eliezeri maahuuhaga tũrumbeta na mũgambo mũnene marĩ mbere ya Ithandũkũ rĩa Ngai ũrĩa wa ma,+ na Obedi-edomu na Jehia o nao maatungataga marĩ arangĩri a ihingo nĩ ũndũ wa Ithandũkũ.

25 Nake Daudi hamwe na athuri* a Isiraeli na anene a andũ ngiri maathiaga magereire mwena-inĩ nĩguo mambatie ithandũkũ rĩa kĩrĩkanĩro kĩa Jehova kuuma nyũmba-inĩ ya Obedi-edomu+ makenete mũno.+ 26 Rĩrĩa Ngai ũrĩa wa ma aateithirie Alawii arĩa maakuuĩte ithandũkũ rĩa kĩrĩkanĩro kĩa Jehova, makĩruta igongona rĩa tũtegwa mũgwanja na ndũrũme mũgwanja.+ 27 Daudi eehumbĩte kagooti gatarĩ moko ka ngora ĩrĩa njega, o ta Alawii othe arĩa maakuuĩte Ithandũkũ rĩu, aini, na Kenania mũnene wa ũkuui na wa aini; ningĩ Daudi nĩ eehumbĩte ebodi ya gatani.+ 28 Aisiraeli othe magĩkĩrehe ithandũkũ rĩa kĩrĩkanĩro kĩa Jehova makiugagĩrĩria makenete,+ makĩhuuhaga coro, na marĩ na tũrumbeta,+ na thani iria ihũũrithanagio, makĩhũũraga inanda cia ndigi na inanda cia mũgeeto na mũgambo mũnene.+

29 No rĩrĩa ithandũkũ rĩa kĩrĩkanĩro kĩa Jehova rĩakinyire Itũũra-inĩ rĩa Daudi,+ Mikali mwarĩ wa Saulu+ agĩcũthĩrĩria thĩ ndirica-inĩ akĩona Mũthamaki Daudi akĩrũgarũga na agĩkũngũĩra; na akĩambĩrĩria kũmũnyarara ngoro-inĩ yake.+