Maũndũ ma Matukũ ma Tene wa Mbere

23 Rĩrĩa Daudi aakũrire na agĩkuhĩrĩria mũthia wa ũtũũro wake,* agĩtua mũrũwe Suleimani mũthamaki wa Isiraeli.+ 2 Thutha ũcio agĩcokanĩrĩria anene othe a Isiraeli, athĩnjĩri-Ngai,+ na Alawii.+ 3 Alawii arĩa maarĩ na mĩaka 30 gũthiĩ na igũrũ magĩtarũo;+ mũigana wao, matarĩtwo o mũndũ o mũndũ warĩ 38,000. 4 Kuuma harĩ acio, andũ 24,000 maarũgamagĩrĩra wĩra wa nyũmba ya Jehova, na kwarĩ na anene na atuanĩri ciira 6,000,+ 5 na kwarĩ na arangĩri 4,000 a ihingo,+ na andũ 4,000 maagoocaga+ Jehova na indo cia ũini iria Daudi ooigire atĩrĩ ũhoro-inĩ wacio, “Ndacithondekire nĩgetha ihũthagĩrũo nyĩmbo-inĩ cia kũgooca.”

6 Daudi agĩcoka akĩmabanga* marĩ ikundi+ kũringana na ariũ a Lawii: Gerishoni, Kohathu, na Merari.+ 7 Kuuma harĩ Agerishoni maarĩ Ladani na Shimei. 8 Ariũ a Ladani maarĩ Jehieli ũrĩa warĩ mũtongoria, Zethamu, na Joeli,+ maarĩ atatũ. 9 Ariũ a Shimei maarĩ Shelomothu, Hazieli, na Harani, maarĩ atatũ. Acio nĩo maarĩ atongoria a nyũmba cia maithe mao cia Ladani. 10 Na ariũ a Shimei maarĩ Jahathu, Zina, Jeushu, na Beria. Acio ana nĩo maarĩ ariũ a Shimei. 11 Jahathu nĩwe warĩ mũtongoria nake Ziza nĩwe warĩ wa kerĩ. No tondũ Jeushu na Beria matiarĩ na ariũ aingĩ-rĩ, maatarirũo marĩ nyũmba ĩmwe ya maithe mao na maaheetwo wĩra ũmwe.

12 Ariũ a Kohathu maarĩ Amuramu, Iziharu,+ Hebironi, na Uzieli,+ maarĩ ana. 13 Ariũ a Amuramu maarĩ Haruni+ na Musa.+ No Haruni nĩ aamũrirũo+ nĩguo atũũre atheragia Harĩa Hatheru Mũno, we o hamwe na ariũ ake, nĩgetha makarutaga magongona mbere ya Jehova, makamũtungatĩra, na makarathimanaga thĩinĩ wa rĩĩtwa rĩake hingo ciothe.+ 14 Naho ha ũhoro wĩgiĩ Musa mũndũ wa Ngai ũrĩa wa ma-rĩ, ariũ ake maataragwo gatagatĩ-inĩ ka mũhĩrĩga wa Alawii. 15 Ariũ a Musa maarĩ Gerishomu+ na Eliezeri.+ 16 Harĩ ariũ a Gerishomu, Shebueli+ nĩwe warĩ mũtongoria. 17 Harĩ njiarũa cia* Eliezeri, Rehabia+ nĩwe warĩ mũtongoria; Eliezeri ndaarĩ na ariũ angĩ, no ariũ a Rehabia maarĩ aingĩ mũno. 18 Harĩ ariũ a Iziharu,+ Shelomithu+ nĩwe warĩ mũtongoria. 19 Ariũ a Hebironi maarĩ Jeria ũrĩa warĩ mũtongoria, wa kerĩ aarĩ Amaria, wa gatatũ aarĩ Jahazieli, na wa kana aarĩ Jekameamu.+ 20 Ariũ a Uzieli+ maarĩ Mika ũrĩa warĩ mũtongoria na wa kerĩ aarĩ Ishia.

21 Ariũ a Merari maarĩ Mahili na Mushi.+ Ariũ a Mahili maarĩ Eliazaru na Kishu. 22 Eliazaru agĩkua, no ndaarĩ na ariũ, aarĩ na airĩtu atheri. Nĩ ũndũ ũcio ariũ a Kishu, arĩa maarĩ a mbarĩ ciao,* makĩmoya magĩtuĩka atumia ao. 23 Ariũ a Mushi maarĩ Mahili, Ederi, na Jeremothu, maarĩ atatũ.

24 Acio nĩo maarĩ ariũ a Lawii kũringana na nyũmba cia maithe mao, atongoria a nyũmba cia maithe mao, kũringana na arĩa maandĩkithirio arĩa maatarirũo na makĩandĩkwo na marĩĩtwa mao na maarutaga wĩra ũtungata-inĩ wa nyũmba ya Jehova, na maarĩ na mĩaka 20 gũthiĩ na igũrũ. 25 Nĩ gũkorũo Daudi ooigĩte atĩrĩ: “Jehova Ngai wa Isiraeli nĩ aheete andũ ake ũhurũko,+ na arĩikaraga Jerusalemu tene na tene.+ 26 Ningĩ Alawii matirĩbataraga gũkuua gĩikaro kĩrĩa kĩamũre o na kana kĩndũ o na kĩmwe harĩ indo iria ihũthagĩrũo ũtungata-inĩ wakĩo.”+ 27 Tondũ kũringana na watho wa mũico ũrĩa Daudi aaheanire, Alawii arĩa maarĩ na mĩaka 20 gũthiĩ na igũrũ nĩ maatarirũo. 28 Wĩra wao warĩ gũteithĩrĩria ariũ a Haruni+ ũtungata-inĩ wa nyũmba ya Jehova, kũrũgamĩrĩra kũu nja,*+ rumu cia kũrĩĩra, gũtheria kĩndũ o gĩothe kĩamũre, na wĩra o wothe ũrĩa wabataranagia ũtungata-inĩ wa nyũmba ya Ngai ũrĩa wa ma. 29 Maateithagĩrĩria ũhoro-inĩ wĩgiĩ mĩgate ya kũiganĩrĩrũo,*+ mũtu mũhinyu wa igongona rĩa mũtu, tũmĩgate tũceke tũtekĩrĩtwo ndawa ya kũimbia,+ keki irugĩtwo na rũgĩo, mũtu mũkime,+ na ithimi ciothe cia gũthima ũingĩ na ũnene. 30 Maagĩrĩirũo kũrũgamaga o rũcinĩ o rũcinĩ+ gũcokeria Jehova ngatho na kũmũgooca na mageka ũguo hwaĩ-inĩ.+ 31 Maateithagĩrĩria hĩndĩ ĩrĩa yothe magongona ma njino maarutagĩrũo Jehova mahinda ma Thabatũ,+ tũrũgamo twa mweri,+ hĩndĩ ya ciathĩ,+ kũringana na mũigana ũrĩa wabataranagia ũringaine na mawatho mamegiĩ, na meekaga ũguo hĩndĩ ciothe mbere ya Jehova. 32 Ningĩ nĩ maarũmbũyagia wĩra wao ũkonainie na hema ya gũtũnganwo, harĩa hatheru, na ũhoro-inĩ wĩgiĩ ariũ a ithe wao ariũ a Haruni nĩ ũndũ wa ũtungata wa nyũmba ya Jehova.