Samueli wa Kerĩ
8 Thutha wa ihinda, Daudi akĩhoota Afilisti+ na akĩmatooria biũ,+ na Daudi agĩtunyana Methegi-ama kuuma moko-inĩ ma Afilisti.
2 Agĩtooria Amoabi+ na akĩmeera makome thĩ na akĩmathima na rũrigi. Akĩmathima ithimi igĩrĩ cia rũrigi cia andũ arĩa mekũũragwo, na gĩthimi kĩmwe kĩa rũrigi kĩa andũ arĩa mekũrekwo matũũre muoyo.+ Na Amoabi magĩtuĩka ndungata cia Daudi na nĩ maamũrehagĩra irĩhi rĩa igooti.+
3 Daudi agĩgĩtooria Hadadezeri mũrũ wa Rehobu mũthamaki wa Zoba+ arĩ njĩra-inĩ agĩthiĩ gũcokia ũnene wake Rũũĩ-inĩ rwa Farati.+ 4 Daudi akĩmũtunya atwarithia a mbarathi 1,700 na thigari 20,000 cia gũthiĩ na magũrũ. Daudi agĩcoka agĩtema mĩkiha ya magũrũ ma mbarathi ciothe cia ngaari cia mbaara, o tiga mbarathi 100.+
5 Rĩrĩa Asiria a Dameski+ mookire gũteithia Mũthamaki Hadadezeri wa Zoba, Daudi akĩũraga Asiria 22,000.+ 6 Daudi agĩcoka agĩthondeka kambĩ cia thigari kũu Siria ya Dameski, na Asiria magĩtuĩka ndungata cia Daudi na nĩ maamũrehagĩra irĩhi rĩa igooti. Jehova agĩkĩhe Daudi ũhootani* kũrĩa guothe aathiaga.+ 7 Makĩria ma ũguo, Daudi akĩoya ngo cia gĩthiũrũrĩ cia thahabu kuuma kũrĩ ndungata cia Hadadezeri na agĩthiĩ nacio Jerusalemu.+ 8 Kuuma Beta na Berothai, matũũra ma Hadadezeri, Mũthamaki Daudi akĩoya gĩcango kĩingĩ mũno.
9 Na rĩrĩ, Mũthamaki Toi wa Hamathu+ akĩigua atĩ Daudi nĩ aatooretie mbũtũ yothe ya Hadadezeri.+ 10 Nĩ ũndũ ũcio Toi agĩtũma Joramu mũrũwe kũrĩ Mũthamaki Daudi akamũũrie ũrĩa arathiĩ na mbere na amũgaathĩrĩrie nĩ tondũ wa ũrĩa aarũĩte na Hadadezeri na akamũtooria (nĩ gũkorũo Hadadezeri nĩ aarũaga na Toi kaingĩ), na agĩkĩmũtwarĩra indo cia betha, thahabu, na gĩcango. 11 Mũthamaki Daudi agĩkĩamũrĩra Jehova indo icio, o hamwe na betha na thahabu iria aamũrĩte kuuma kũrĩ ndũrĩrĩ ciothe iria aatooretie:+ 12 kuuma Siria na Moabi,+ kuuma kũrĩ Aamoni, Afilisti,+ Aamaleki,+ na kuuma harĩ indo iria ciatunyanĩtwo cia Hadadezeri+ mũrũ wa Rehobu mũthamaki wa Zoba. 13 Ningĩ Daudi agĩĩthondekera rĩĩtwa hĩndĩ ĩrĩa aacokire oimĩte kũũraga Aedomu 18,000 Mũkuru-inĩ wa Cumbĩ.+ 14 Daudi agĩthondeka kambĩ cia thigari kũu Edomu. Aathondekire kambĩ cia thigari kũu Edomu guothe, nao Aedomu othe magĩtuĩka ndungata cia Daudi.+ Jehova agĩkĩhe Daudi ũhootani* kũrĩa guothe aathiaga.+
15 Daudi agĩthiĩ o na mbere gũthamakĩra andũ othe a Isiraeli,+ na Daudi aatuagĩra andũ ake othe+ ciira na kĩhooto na ũthingu.+ 16 Joabu+ mũrũ wa Zeruia aarĩ mũnene wa mbũtũ, nake Jehoshafatu+ mũrũ wa Ahiludu aarĩ mũigi wa rekondi. 17 Zadoku+ mũrũ wa Ahitubu na Ahimeleku mũrũ wa Abiatharu maarĩ athĩnjĩri-Ngai, nake Seraia aarĩ mwandĩki. 18 Benaia+ mũrũ wa Jehoiada aarĩ mũnene wa Akerethi na Apelethi.+ Nao ariũ a Daudi magĩtuĩka atungati arĩa anene.*