Ezekieli

47 Agĩcoka akĩnjokia mũromo-inĩ wa hekarũ,+ na ngĩona maĩ magĩtherera na mwena wa irathĩro moimĩte rungu rwa itonyero rĩa hekarũ,+ nĩ gũkorũo mwena wayo wa mbere warorete irathĩro. Maĩ macio maathereraga moimĩte rungu rwa mwena wa ũrĩo wa hekarũ, mũhuro wa kĩgongona.

2 Agĩcoka akĩnjerekeria na nja angereirie kĩhingo kĩa mwena wa rũgongo+ akĩndwara nja na agĩĩthiũrũrũkia nginya kĩhingo-inĩ kĩrĩa kĩarorete irathĩro,+ na ngĩona maĩ magĩtherera moimĩte mwena wa ũrĩo.

3 Hĩndĩ ĩrĩa mũndũ ũcio aathiire erekeire mwena wa irathĩro anyitĩte rũrigi rwa gũthima na guoko,+ agĩthima mĩkono 1,000* na akĩngereria maĩ-inĩ macio; naguo ũriku wamo wanginyaga thũngʼwa-inĩ.

4 Agĩcoka agĩthima mĩkono ĩngĩ 1,000 na akĩngereria maĩ-inĩ macio; naguo ũriku wamo wanginyaga maru-inĩ.

Agĩthima mĩkono ĩngĩ 1,000 na akĩngereria maĩ-inĩ macio; naguo ũriku wamo wanginyaga njohero-inĩ.

5 Rĩrĩa aathimire mĩkono ĩngĩ 1,000, rũgĩkorũo rũrĩ rũũĩ itangĩahotire kũringa, nĩ gũkorũo maĩ maarĩ mariku ũũ atĩ mũndũ no atubĩrire, rwarĩ na maĩ maingĩ ũndũ rũtangĩaringĩkire na magũrũ.

6 Akĩnjũria atĩrĩ: “Mũrũ wa mũndũ, nĩ wona maũndũ macio?”

Agĩcoka akĩnjokia nginya hũgũrũrũ-inĩ cia rũũĩ rũu. 7 Hĩndĩ ĩrĩa ndacokire, ngĩona atĩ mĩena-inĩ yerĩ ya rũũĩ rũu kwarĩ na mĩtĩ mĩingĩ mũno.+ 8 Agĩcoka akĩnjĩra ũũ: “Maĩ maya maratherera merekeire mwena wa irathĩro magacoka magaikũrũka matuĩkanĩirie Araba*+ makaingĩra iria. Rĩrĩa maingĩra iria-inĩ,+ maĩ ma iria makaagĩra. 9 Ciũmbe nyingĩ irĩ muoyo nĩ irĩtũũraga kũrĩa guothe maĩ macio marĩthereraga. Nĩ kũrĩkoragwo na thamaki nyingĩ tondũ maĩ maya nĩ marĩthereraga kuo. Maĩ ma iria nĩ mekwagĩra na ciũmbe ciothe nĩ irĩtũũraga muoyo kũrĩa guothe rũũĩ rũratherera.

10 “Ategi a thamaki makaarũgamaga hũgũrũrũ-inĩ ciarĩo kuuma Eni-gedi+ o nginya Eni-egilaimu, kũrĩa gũgaakorũo na kũndũ gwa kwanĩkagwo neti cia gũtega. Gũgaakorũo na thamaki nyingĩ cia mĩthemba mĩingĩ o ta thamaki cia Iria Rĩrĩa Inene.*+

11 “Nĩ rĩgaakorũo na kũndũ gũtondoru na matomboya, no icio itikaagĩra. Igaatigwo irĩ o na cumbĩ.+

12 “Mĩthemba yothe ya mĩtĩ ya irio nĩ ĩgaakũraga mĩena-inĩ yerĩ ya rũũĩ rũu. Mathangũ mayo matikoma kana yage gũciara. Ĩkaagĩaga maciaro o mweri, nĩ gũkorũo maĩ mayo mathereraga kuuma handũ harĩa hatheru.+ Maciaro mayo magaatuĩka irio, namo mathangũ matuĩke ma kũhonania.”+

13 Jehova Mwathani Ũrĩa Mũnene ekuuga ũũ: “Gĩcigo gĩkĩ nĩkĩo mũkaagaya gĩtuĩke igai rĩa mĩhĩrĩga ĩrĩa 12 ya Isiraeli, na Jusufu akaagaĩrũo icunjĩ igĩrĩ.+ 14 Nĩ mũgaakĩgaya na mũkorũo na icunjĩ ciganaine.* Nĩ ndehĩtire atĩ nĩ ngaahe maithe manyu ma tene bũrũri ũyũ,+ na rĩu nĩ mũheetwo* ũgatuĩka igai rĩanyu.

15 “Ũyũ nĩguo mũhaka wa mwena wa rũgongo wa bũrũri ũcio: Uumĩte Iria-inĩ Rĩrĩa Inene ũgereire njĩra ya Hethiloni+ werekeire Zedadi,+ 16 Hamathu,+ Berotha,+ na Sibiraimu, ĩrĩa ĩrĩ gatagatĩ ga gĩcigo kĩa Dameski na kĩa Hamathu, o nginya Hazeri-hatikoni, ĩrĩa ĩrĩ mũhaka-inĩ wa Haurani.+ 17 Kwoguo mũhaka ũkaambĩrĩria iria-inĩ ũkinye Hazaru-enoni,+ mũhaka-inĩ wa Dameski mwena wa rũgongo, na mũhaka wa Hamathu.+ Ũcio nĩguo mũhaka wa mwena wa rũgongo.

18 “Naguo wa mwena wa irathĩro ũgaakorũo gatagatĩ ka Haurani na Dameski na ũtwarane na Rũũĩ rwa Jorodani gatagatĩ ka Gileadi+ na bũrũri wa Isiraeli. Mwagĩrĩirũo gũthima kuuma mũhaka-inĩ o nginya iria rĩa mwena wa irathĩro.* Ũcio nĩguo mũhaka wa mwena wa irathĩro.

19 “Mũhaka wa mwena wa mũhuro ũkaambĩrĩria Tamaru ũthiĩ o nginya maĩ-inĩ ma Meribathu-kadeshi,+ ũcoke ũthiĩ o nginya Mũkuru-inĩ* na Iria-inĩ Rĩrĩa Inene.+ Ũcio nĩguo mũhaka wa mwena wa mũhuro.

20 “Naguo mwena wa ithũĩro nĩ Iria Rĩrĩa Inene, kuuma mũhaka-inĩ nginya handũ hangʼethanĩire na Lebo-hamathu.*+ Ũcio nĩguo mũhaka wa mwena wa ithũĩro.”

21 “Mwagĩrĩirũo kwĩgayanĩria bũrũri ũcio inyuĩ ene, mũũgayanĩrie mĩhĩrĩga ĩrĩa 12 ya Isiraeli. 22 Mwagĩrĩirũo kũũgayania ũtuĩke igai rĩanyu na mũgaĩre andũ a kũngĩ arĩa maikaraga hamwe na inyuĩ arĩa magĩĩte na ciana magĩikara gatagatĩ-inĩ kanyu; na magaatuĩka o ta Aisiraeli arĩa maciarĩirũo bũrũri ũcio. O nao nĩ makaaheo igai hamwe na inyuĩ gatagatĩ-inĩ ka mĩhĩrĩga ya Isiraeli. 23 Mwagĩrĩirũo kũhe mũndũ wa kũngĩ igai gĩcigo-inĩ kĩa mũhĩrĩga ũrĩa aikaraga,” ũguo nĩguo Jehova Mwathani Ũrĩa Mũnene oigĩte.