Kũguũrĩrio kwa Johana
8 Rĩrĩa aahingũrire+ mũhũũri wa mũgwanja,+ kũu igũrũ gũgĩkirũo ta nuthu ithaa. 2 Na ngĩona araika mũgwanja+ arĩa marũgamaga mbere ya Ngai, na makĩheo tũrumbeta mũgwanja.
3 Nake mũraika ũngĩ wanyitĩte rũgĩo rwa thahabu rwa gũcinĩra ũbumba, agĩũka na akĩrũgama kĩgongona-inĩ,+ akĩnengerũo ũbumba mũingĩ+ nĩguo aũrute hamwe na mahoya ma arĩa othe aamũre igũrũ rĩa kĩgongona gĩa thahabu+ kĩrĩa kĩarĩ mbere ya gĩtĩ kĩa ũnene. 4 Nayo ndogo ya ũbumba ũcio ĩkĩambata kuuma guoko-inĩ kwa mũraika ũcio hamwe na mahoya+ ma arĩa aamũre ĩgĩthiĩ mbere ya Ngai. 5 No o hĩndĩ ĩyo mũraika ũcio akĩoya rũgĩo rũu rwa ũbumba, akĩrũiyũria mwaki kuuma kĩgongona-inĩ kĩu na akĩũikia thĩ. Na gũkĩgĩa marurumĩ na mĩgambo na mĩhenũko ya rũheni+ na gĩthingithia. 6 Nao araika acio mũgwanja maarĩ na tũrumbeta+ mũgwanja makĩĩhaarĩria gũtũhuuha.
7 Wa mbere akĩhuuha karumbeta gake. Gũkĩgĩa mbura ya mbembe na mwaki ũtukanĩte na thakame, na igĩikio thĩ;+ nakĩo gĩcunjĩ gĩa ithatũ gĩa thĩ gĩkĩhĩa, na gĩcunjĩ gĩa ithatũ kĩa mĩtĩ gĩkĩhĩa, o na mĩmera yothe ĩrĩa mĩruru ĩkĩhĩa.+
8 Nake mũraika wa kerĩ akĩhuuha karumbeta gake. Na kĩndũ gĩtariĩ ta kĩrĩma kĩnene kĩrahĩa nĩ mwaki gĩgĩikio iria-inĩ.+ Na gĩcunjĩ gĩa ithatũ kĩa iria gĩgĩtuĩka thakame;+ 9 na gĩcunjĩ gĩa ithatũ gĩa ciũmbe iria irĩ muoyo thĩinĩ wa iria igĩkua,+ nakĩo gĩcunjĩ gĩa ithatũ kĩa meri igĩthũkanga.
10 Mũraika wa gatatũ akĩhuuha karumbeta gake. Na njata nene yaakanaga ta tawa ĩkĩgwa kuuma igũrũ, ĩkĩgwĩra gĩcunjĩ gĩa ithatũ kĩa njũũĩ na matherũkĩro ma maĩ.+ 11 Rĩĩtwa rĩa njata ĩyo nĩ Mũmera Mũrũrũ. Nakĩo gĩcunjĩ gĩa ithatũ kĩa maĩ makĩrũra, na andũ aingĩ magĩkua nĩ ũndũ wa maĩ macio, tondũ nĩ maatuĩkĩte marũrũ.+
12 Na mũraika wa kana akĩhuuha karumbeta gake. Nakĩo gĩcunjĩ gĩa ithatũ kĩa riũa gĩkĩhũũrũo,+ o na gĩcunjĩ gĩa ithatũ kĩa mweri na gĩcunjĩ gĩa ithatũ kĩa njata, nĩguo gĩcunjĩ gĩa ithatũ gĩacio kĩgĩe nduma+ naguo mũthenya ndũkagĩe ũtheri gĩcunjĩ kĩaguo gĩa ithatũ, na ũtukũ o taguo.
13 Ngĩcoka ngĩona na ngĩigua nderi ĩrombũkĩra igũrũ gatagatĩ ĩkiuga na mũgambo mũnene: “Kaĩ mũrĩ na haaro-ĩ, kaĩ mũrĩ na haaro-ĩ, kaĩ mũrĩ na haaro-ĩ,+ inyuĩ arĩa mũtũũraga thĩinĩ wa thĩ, nĩ ũndũ wa mĩgambo ĩyo ĩngĩ ya tũrumbeta twa araika atatũ arĩa marĩ hakuhĩ kũhuuha tũrumbeta twao!”+